Gánwoungüda waméi wínsiñehabu

1. Ka katei hafurendeirubei lidan haturiahanu Bíbülia?

HARITAGUA humagili san saragu lídangiñe le hafurendeirubei dan le meha lichugúnbei aturiahani tídangiñeti Bíbülia hun? Chóuruti aba lan taweiridun hanigi dan le híchugubei fe giri lan Bungiu. Másiñati aba lan hasandirun darangilaü lau hasubudiruni ua lan aban fulasu le ñein lubéi lasufuriragüdaña Bungiu gürigia lárigiñe hounwen. Lanwoun lira, chóuruti aba lan hagundaarun dan le hafurendeirubei habagaridayaba lan hiduheñu ha hilaguaañabaña ani gayaraabei lan hawinwandun úara hama lidan aban Paraísu ya ubouagu.

2. Amu luéi inarüni le hafurendeirubei tídangiñe Bíbülia, ka amu igaburi arufudubalin hawanseruña lan? (Éfesuna 5:1, 2).

² Eibu haturiahanu Lererun Bungiu, eibu laganwoundun ínsiñeni le hasandirubei luagu Heowá. Ani ínchaha lumutün ínsiñeni le lun hawinwanduni le hafurendeirubei. Ábati hagumeserun anúadira buidu seremei adundehani le tídanbei Bíbülia. Aba hasansiruni ligaburi hisaminan luma husan ladüga busén humá hagundaaragüdüni Bungiu. Ítara kei láyeihani aban irahü lúguchi, aba giñe hagumeserun áyeihei Húguchi le siélubei le hínsiñehabubei (aliiha huméi Éfesuna 5:1, 2).

3. Ka álügüdahani gayaraabei wadügüni wóuniwagua?

³ Gayaraati wálügüdagun woungua: “Hínsiñetimahali san Heowá nun guentó sügǘ lau dan meha le nabadiseirunbei? Genegetimahaali san ligaburi nisaminan luma nusan lumoun ligaburi luma lisaminan Heowá lídantima larufudún ínsiñeni houn wábirigu?”. Anhein diliraü hali lubéi wínsiñehabu, mábürüha lan warüna. Susereeli meha katei le houn kristiánugu ha lídanbaña furumiñeti sígulu. Gama lumoun, masaminarunti meha Hesusu máraninaaña lan, masaminarunbei giñe ligiaméme wawagu (Aruf. 2:4, 7). Subudi lumuti gayara lan wasandiruni ínsiñeni le meha wasandirubei dan meha wafurendeirubalin inarüni.

4. Kaba wariha lidan aturiahani le?

⁴ Lidan aturiahani le, warihibei furumiñe ida luba lan wibihin lun laganwoundun ínsiñeni le wasandirubei luagu Heowá luma hawagu gürigia wáledigu. Ani lárigiñe, warihibei kaba lan buiti wasagara dandu wagía kei amu gürigia dan le warufuduni ínsiñeni le.

ÁFAAGUA WAMÁ LUN LAGANWOUNDUN ÍNSIÑENI LE WASANDIRUBEI LUAGU HEOWÁ

5, 6. Ka meha lénrengunga úmabei lagagibudagua apostolu Pábulu lidan lani ministeriu, ani ka ínchahabalin lun lasigirun eseriwida lun Heowá?

⁵ Gúndaati meha apostolu Pábulu saragu lidan lani ministeriu, ani gagibuguati meha luma saragu lénrengunga. Díseti meha laweiyasuha Pábulu, íbini hénrengu lan meha aweiyasuhani dan ligira. Dan meha laweiyasuhanbei, anihein meha dan dungua lan luma “denchaü dúnarugu” luma denchaü “hadan híwerutiña”. Anihein meha dan óusera hamani láganigu lau furundei (2 Ko. 11:23-27). Ligibuagu lira, mama meha súnwandan gunda hamá líbirigu lau áfaaguni le ladügübei lun líderaguniña (2 Ko. 10:10; Fili. 4:15).

⁶ Ka meha ínchahabalin Pábulu lun lasigirun eseriwida lun Bungiu? Furendeihali meha saragu luáguti ligaburi Heowá seremei laturiahanu Lererun Bungiu luma sun le lawinwandubei. Chouru lumuti meha Pábulu luagu hínsiñela lun Heowá (Rom. 8:38, 39; Efe. 2:4, 5). Hínsiñeti meha giñe Heowá lun Pábulu saragu. Arufuda lumuti ínsiñeni le, lau leseriwidun houn íbirigu lidan afiñeni luma lau katei le lasigirubei adüga hawagu (Ebü. 6:10).

7. Kaba íderaguawa lun laganwoundun ínsiñeni le wasandirubei luagu Heowá?

⁷ Lun laganwoundun ínsiñeni le wasandirubei luagu Bungiu, mosu waturiahanu Lererun. Dan le waliihanu Bíbülia, lunti wáfaagun lun wasubudiruni ka lan larufudahabei kada bérusu woun luagu Heowá. Lunti wálügüdagun woungua: “Ida liña larufuduni bérusu le nun hínsiñe nan lun Heowá? Ani, ka resun líchugubei bérusu burí le nun lun línsiñedun Heowá nun?”.

8. Ida liña líderaguniwa furíei lun laganwoundun ínsiñeni le wasandirubei luagu Bungiu?

⁸ Aban katei le gayaraabei lídehan lun línsiñedun Heowá woun, wadaarunu wanigi lidan wafurieidun lun sagü weyu (Sal. 25:4, 5). Lóunabubei Heowá furíei le (1 Huan 3:21, 22). Ariñagatu Khanh,b aban íbiri to awinwanduboun Asia: “Furumiñe hínsiñeti meha Heowá nun ladüga le nafurendeirubei tídangiñeti Bíbülia luagu. Aba laganwoundun ínsiñeni le dan le narihini lóunabuni nafurieidun, adügati katei le lun busén nan nadügüni katei le aubei lagundaara”.

ÁFAAGUA WAMÁ LUN LAGANWOUNDUN ÍNSIÑENI LE WASANDIRUBEI HAWAGU GÜRIGIA WÁLEDIGU

9. Ka hénpulu lánina ínsiñeni larufudubei Timotéu houn íbirigu?

⁹ Fiu irumu lárigiñe ladügagun Pábulu lungua kristiánume, aba lasubudirun aban nibureinti le buiti lusan le gíribei Timotéu. Hínsiñeti Heowá lun Timotéu ani hínsiñetiña giñe gürigia lun. Dan lárigiñe, ariñagati Pábulu houn filipuna libügürü Timotéu: “Ladüga úati amu numa le asaminaruti kei au, le áfaaguti lun buidu lan lidin hun” (Fili. 2:20). Mayanuhanti Pábulu luagu iyaraani le luágubei Timotéu lánina laranseruni burí katei o luáguti gíchigadi lan yanu. Furanguti le lan aweiridagüdübarun lanigi Pábulu, lueirin ínsiñeni le lasandirubei Timotéu hawagu líbirigu. Chóuruti memeniha lan meha hanigi lílana damuriguaü lun lachülürün Timotéu abisidahaña (1 Ko. 4:17).

10. Ida liña tarufudun Anna luma tani weiriei ínsiñeni hawagu íbirigu?

¹⁰ Wagía sun álugatiwa lun wíderaguniña wábirigu lidan ámuñegueinarügü igaburi (Ebu. 13:16). Haritagua humagiru san Anna, to uáguboun wayanuha lidan aturiahani le lubaragiñebei le? Lárigiñe aba lanarime liñawan dan, aba tidin tuguya luma tani weiriei abisidaha aban iduheñu gefentiña luagu Heowá. Aba harihini luagu heigua lan tábulugu haban iduheñu ha. Ligíati ua tubéi daüguaü harumatu hama iduheñu ha lun hasansiragun. Aba tafuranguagüdüni Anna le tadügübei luma tani weiriei: “Aba wanügünu daüguaü achiba ani sumudun wamoun. Le wadügübei mama aban katei wéiriti, gama lumoun, seremei ídemuei le wíchugubei houn wéirihali gamadagua wamá guenlé”. Ínsiñeni ínchahabarun Anna luma tani weiriei lun híchuguni ídemuei le houn íbirigu ha (1 Huan 3:17, 18).

11. a) Ida liña harihini amu dan le warufudun ínsiñeni? b) Según Ariñawagúni 19:17, ka ladügübei Heowá dan le warufudun ínsiñeni houn gürigia wáledigu?

¹¹ Dan le wóuseruniña amu lau ínsiñeni luma lau areini, wáfaaguña wáyeihani ligaburi lisaminan Heowá luma ligaburi ladügüni katei. Ani ariha hamuti amu gürigia áfaaguni le wadügübei. Másiñati íbidiñebei lan woun weiri lan lebegi areini le warufudubei houn amu. Khanh, íbiri to buga uáguboun wayanuhan lidan párafu 8, haritaguatagiña lau saragu ínsiñeni sun gürigia ha meha íderagubarun: “Seremei numutiña saragu sun íbirigu ha meha anügübalina apurichiha. Wéiriti meha hínsiñehabu, ñǘbuintiña meha áluahana, agunbiraha hamutina eiga íbini éigini lánina amidi, ani lárigiñe aba hayabin íchigana múnadoun. Ani guenlé gunfuranda naali aban lan lanarime áfaaguni le hadügübei lau saragu ínsiñeni”. Le linarün katei, mámaba sun gürigia íchiga seremei woun luagu burí fulesei le wadügübei houn. Dan le tayanuha Khanh hawagu ha íderagubarun ariñagatu: “Gúndaatina hamuga lun nadügün fulesei hawagu súngubei, gama lumoun, ibidiñeti nun halía lan hawinwanda guenlé. Anati Heowá subudi lumuti halía lan hawinwanda ani amuriahatina luma lun labiniruniña”. Ítara liña, ariha lumuti Heowá íbini lirahüñü katei buiti le wadügübei hawagu amu. Ariha lumuti kei aban katei gebegiti ani kei aban dúeiti le busén lubéi lafayeiruni (aliiha huméi Ariñawagúni 19:17).

12. Ida luba harufudun wügüriña badiseihaña ínsiñeni lidan damuriguaü? (Ariha humoun giñe iyawaü).

¹² Anhein aban lubéi íbiri wügüri huguya, ida luba harufuduni ínsiñeni le lidan damuriguaü? Lau híderaguniña amu. Aba lálügüdüni aban nibureinti gíriti Jordan aban wéiyaali lidan afiñeni ka lan gayaraabei ladügüni lúntima líderaguniña íbirigu. Aba lariñagun wéiyaali lidan afiñeni lun, buidu lan ladüga lidan lawanserun, ábati líchugun fiu adundehani lun lúntima labuiduragüdüni le ladügübei. Aba laritaguagüdüni lun chülügiñe lan tidoun Luban Wadamuridagun luma lun labusuragun houn achülürütiña, lun líchugun óunabagülei lidan adamuridaguni, luma lun gabügürügualá láfuridun apurichiha hama lílana sétanu le ñein lubéi, lúmati lun láluahan ida luba lan líderaguniña íbirigu. Lau gaganbadi lan Jordan lun adundehani le, laranseruña meha buidu lun gayaraabei lan leresibirun amu dasi lidan damuriguaü, adügati giñe katei le lun laganwoundun ínsiñeni le lasandirubei hawagu íbirigu. Aba giñe lafurendeirun, dan le lan liridúniwa aban íbiri kei ídehati lidan damuriguaü, mama ñein lagumesera líderaguniña amu; lubaragiñe lira, sigirügüti íderaguaña (1 Tim. 3:8-10, 13).

13. Ka íderagubalin Christian lunya leseriwidun keisi wéiyaali lidan afiñeni?

¹³ Seriwitün meha san luagu aban dan keisi wéiyaali lidan afiñeni o kei ídehati lidan damuriguaü? Mabulieidun lumuti Heowá dasi le meha hadügübei ni ínsiñeni le aubei hadügei (1 Ko. 15:58). Ani aríagu liña giñe lun ínsiñeni le áünhaguabei arufuda. Wuribati meha lasandiragun aban íbiri gíriti Christian lungua dan le meseriwidunhali lan kei wéiyaali lidan afiñeni. Lau sun lira, mábürühanti larüna, ariñagati: “Íbini mámaadina lan wéiyaali lidan afiñeni, nasigiruba meha adügei sun niyaraati lidan neseriwidun lun Heowá ladüga ínsiñeni le nasandirubei luagu”. Lau lásügürün dan ábaya liridun kei wéiyaali lidan afiñeni. Ariñagati Christian: “Machourun numuti meha anhein nánharuba lubéi lunya neseriwidun keisi wéiyaali lidan afiñeni. Gama lumoun, aba nasaminarun anhein lígiruña lubéi Heowá lunya neseriwidun keisi wéiyaali lidan afiñeni, nánharuba lun ladüga ínsiñeni le nasandirubei luagu Heowá luma hawagu níbirigu”.

14. Ka wafurendeirubei lídangiñe le tariñagubei aban íbiri to awinwanduboun Georgia?

¹⁴ Wagía lubúeingu Heowá arufudatiwa giñe ínsiñeni houn gürigia ha mámabaña gefentiña (Mat. 22:37-39). Kei hénpulu, ariñagatu aban íbiri gíritu Elena, to meha awinwanduboun Georgia: “Napurichihabei luagu aban dan ladüga ínsiñeni le nasandirubei luagu Heowá. Gama lumoun, eibu aganwoundeina lan ínsiñeni le nasandirubei luagu Núguchi Bungiu le siélubei aba giñe laganwoundun ínsiñeni le nasandirubei hawagu gürigia. Áfaaguatina meha nasaminarun ka lan turobuli gádanbaliña ani kaba lan ariñahani nayusura lun napurichiha houn. Lau saminaü le aba laganwoundun nabusenrun lun níderaguniña” (Rom. 10:13-15).

BUITI LE ASAGARÚBEI LÍDANGIÑE ÍNSIÑENI LE ARUFUDÚBEI HOUN AMU

15, 16. Ítara kei warihini tidan iyawaü, ka buiti asagarúbei dan le warufudun ínsiñeni houn amu?

¹⁵ Sagatiña giñe amu gürigia buiti lídangiñe warufudun ínsiñeni houn wábirigu. Lidan lidaani sandi COVID-19, íderagua lumutiña Paolo tuma lani weiriou saragu íbirigu derebuguhaña lun hafurendeirun ayusurei gágamuru o konputadora lun gayaraabei lan hapurichiha. Güreweiti meha tun aban hádangiñe tayusuruni katei burí le, lagumuhóun aba tafurendeiruni, ligía gayara lubéi tagunbirahaniña tiduheñu lidoun Aritaguagülei. Belutiña 60 hádangiñe tiduheñu lun haganbuni yanu lánina Aritaguagülei luéigiñe Internet. Dandu íbiri to kei tiduheñu sagatiña saragu buiti lídangiñe áfaaguni le ladügübei Paolo tuma lani weiriou. Abürühatu íbiri to lun Paolo, ariñaga: “Seremei báfaagun lun barufudahan woun wagía le derebuguhali. Mabulieidun nubéi berese lan Heowá nau ni áfaaguni le hadügübei wawagu”.

¹⁶ Seremei sügǘ kéiburi le, furendeiti Paolo aban katei súdiniti. Seremei ínsiñeni aba gunfuranda lani súdinitima lan ínsiñeni sügǘ lau subudi o iyaraani le wawagubei. Ariñagati: “Dan meha le neseriwidunbei kei ounigirúni sirkuitu. Chóuruti bulíei hamani íbirigu yanu meha le níchugubei, gama lumoun, haritagua hamagili ídemuei le níchugubei houn”.

17. Kátaña asagarubaña buiti lídangiñe ínsiñeni le warufudubei?

¹⁷ Dan le warufudun ínsiñeni, sagatiwa buiti lídangiñe, lidan igaburi le magurabun wamuti. Ítara liña larufuduni aban sügǘ le asuseredubei Néwaselanda. Aban weyu samudi, aba larihin Jonathan aban prekursoru apurichiha lábugua lábugiñe aban ladinha weyu amidirugu. Aba lagumeserun apurichiha luma sagü samudi rábounweyu. Dan ligía íbidiñegili meha lun Jonathan lasagaruba lan saragu buiti lídangiñe le ladügübei. Ariñagati Jonathan: “Lidan dan ligía mínsiñeti meha nun napurichiha. Gama lumoun, dan le narihinbalin garufudahadi lan prekursoru le ani buidu ligía lidin lun, aba línsiñedun apurichihani nun. Lanwoun lira, ibihatina aban lubuidun umadaü le íderagubalina saragu lun laganwoundun ínsiñeni le nasandirubei luagu Bungiu luma lun nasandirun ugundani lidan nani ministeriu, ani adügati lúntima nayarafadun lun Heowá”.

18. Ka labusenrubei Heowá lun wadügüni?

¹⁸ Busenti Heowá lun laganwoundun ínsiñeni le wasandirubei luagu luma hawagu gürigia wáledigu. Kei le aubei warihei, lun laganwoundun ínsiñe le wasandirubei luagu Heowá, mosu waliihanu Lererun, wararamagun asaminara luagu le waliihabei luma lun wafurieidun lun sagü weyu. Lun warufuduni buidu ínsiñeni le wasandirubei hawagu wábirigu, lunti wíderaguniña lidan aban lubuidun igaburi. Eibu aganwoundeina lan wínsiñehabu, aganwoundeina luba giñe wamadagua luma Heowá luma hama wábirigu. Gayaraabei gamadagua wamá hama lun súnwandan!