Ida liña labusenrun Heowá lun hóuseruniña lílana damuriguaü gürigia ha adügübaña figóu wéiriti?

1. Ka labusenrubei Heowá?

ADÜGA lumutiña Heowá gürigia lun gayara lan hanúadiruni kaba lan hadüga. Yusu wamuti iyaraani le sagü weyu. Lun aban lan hádangiñe lubúeingu Heowá aban gürigia, lunti lederegeruni libagari lun, ligía katei súdinitimati le gayaraabei ladügüni. Le linarün katei, busenti Heowá lun hadügüni gürigia katei le. Ka uagu? Ladüga hínsiñe hamá gürigia lun Heowá, busenti lun buidu lan lidin houn, lun gamadagua hamá luma lun hawinwandun lun súnwandan (2 Lur. 30:​19, 20; Gal. 6:​7, 8).

2. Ka labusenrubei Heowá lun hadügüni ha éiguadubaña lidoun aban figóu wéiriti ani masakürihantiña? (1 Huan 2:1).

² Mafosurunti Heowá ni aban lun leseriwidun lun, lubaragiñe lira, ígirati lun lanúadiruni kada gürigia kaba lan ladüga. Kati asuseredubei dan le ladügün aban kristiánu somu figóu wéiriti? Anhein masakürihan, lunti lasagarún lídangiñe damuriguaü (1 Ko. 5:​12, 13). Íbini ítara, busenti Heowá tídangiñe sun lanigi lun lagiribudun gürigia ligía lun. Le linarün katei, lun feruduna lániña Heowá ha asakürihabaña lídangiñe hafigoun ligía ábanbei lídangiñe lébuna lafayeiruni lebegi esefuruni (aliiha huméi 1 Huan 2:​1, LBID). Kei hínsiñehabu lubéi, dará lumuti larüna habá ha afigouhabaña ani ínchaha lumutiña lun hasakürihan (Sak. 1:3; Rom. 2:4; Sant. 4:8).

3. Kaba wariha lidan aturiahani le?

³ Busenti Heowá lun wáyeihani ligaburi larihini figóu luma ligaburi larihiniña gürigia ha adügübaña aban figóu wéiriti. Líderagubadiwa aturiahani le lun wibihini katei le. Furumiñe, warihibei ida liña lan louserún aban gürigia le meha adügübei aban figóu wéiriti lidan damuriguaü Korintu lidan furumiñeti sígulu. Lárigiñe, wayanuhaba luagu adundehani le líchugubei apostolu Pábulu dan le lasakürihanbei gürigia ligía. Lagumuhóun, warihibei ida liña lan larihiniña Heowá ha adügübaña aban figóu wéiriti.

IDA LIÑA LOUSERÚN ABAN GÜRIGIA LIDAN FURUMIÑETI SÍGULU LE MEHA ADÜGÜBEI ABAN FIGÓU WÉIRITI?

4. Ka meha asuseredubei lidan damuriguaü le Korintubei? (1 Korintuna 5:​1, 2).

⁴ (Aliiha huméi 1 Korintuna 5:​1, 2). Lidan lǘrüwan luéiyasun Pábulu keisi misionéru, aba líchugun fe lasusereduña lan meha aban katei le wéiriti luriban lidan iseri damuriguaü le Korintubei: lagamariduñoun meha aban kristiánu lúmari lúguchi. Ariñagati Pábulu aban lan “óunwenbu iwiyei lira, le máhawabei lun ni hadan ha mafiñenbaña luagu Kristu”. Mámarügüñein meha ánharügütiña lílana damuriguaü lun luriban lóuserun, másiñati giñe gunda hamá meha lau. Gayaraati añahein lan meha hádangiñe asaminarutiña lau lan hadügüni lira háyeihañein lan lugudemehabu Heowá. Mígirunti Heowá lun herederun gürigia ha adaagutiña katei wuribati tidan lóundarun. Chóuruti ladügüña lan meha liwiye lóuserun wügüri ligía lun layanuhóun wuriba luagu damuriguaü. Másiñati giñe hagumeserun amu kristiánugu áyeihei anhein eredera haganagua. Ligíati, ka adundehani líchugubei Pábulu houn lílana damuriguaü le Korintubei?

5. Ka meha labürüdübei Pábulu houn lílana damuriguaü le Korintubei, ani ka labusenrubei lariñagun? (1 Korintuna 5:​12, 13; ariha humóun giñe iyawaü).

⁵ (Aliiha huméi 1 Korintuna 5:​12, 13). Adügati meha Bungiu lun labürüdün apostolu Pábulu aban gárada houn kristiánugu ha Korintubaña luagu mosu lan buga lasagarún afigouhati le masakürihanbei haganaguagiñe. Ida luba méhati hóuseruni kristiánugu ha úaraguabaña gürigia ligía? Ariñagati meha Pábulu houn lun hebé lan hóundarun luma gürigia ligía, nírügü lun heigin luma (1 Ko. 5:11). Dan le weigin luma aban gürigia, liibe-agei dan ayanuhatiwa luma gürigia ligía ani adügati lira lúntima gibe lan dan wásügürün úara. Ligíati, le meha labusenrubei Pábulu lariñagun, moun lumuti lan hásügürün lílana damuriguaü dan luma wügüri ligía. Lídehaba meha lira lun máyeihan hamani ligaburi lóuserun (1 Ko. 5:​5-7). Ani gayaraabei meha ladügün lira lun líchugun wügüri ligía fe gárigüda laaru lan meha lanigi Heowá, ábameti lasandirun busiganu luagu le adüga láalibei ani línchahabei méhati lira lun lasakürihan.

6. Ka meha hadügübei dandu lílana damuriguaü kei gürigia le afigouhabei lárigiñebei heresibirunu ligaradan Pábulu?

⁶ Lárigiñebei meha lóunahanu Pábulu gárada houn lílana damuriguaü le Korintubei, gumeseti álügüdagua lungua ida luba lan funa hóunabun íbirigu tun gárada tuguya. Lau lásügürün dan, aba líchugun Titu aban lubuidun ñunsu lun: buiti meha hóunabun lun adundehani le líchugubei apostolu Pábulu houn (2 Ko. 7:​6, 7). Lanwoun lira, murusun dan lárigiñe lóunahanu Pábulu gárada, aba lasakürihan wügüri ligía. Aba lasansiruni ligaburi lóuserun luma ligaburi lisaminan, ani gumeseti afalarei lilurudun Heowá le úaraguabei(2 Ko. 7:​8-11). Kaba méhati adundehani líchiga Pábulu houn lílana damuriguaü guentó?

IDA LUBA MEHA LUNTI LAN HÓUSERUNI LÍLANA DAMURIGUAÜ AFIGOUHATI LE ASAKÜRIHABEI?

7. Ka meha ibihúbei lau lasagarún afigouhati le masakürihanbei lídangiñe damuriguaü? (2 Korintuna 2:​5-8).

⁷ (Aliiha huméi 2 Korintuna 2:​5-8). Ariñagati Pábulu: “Buídurügüti ebechúni le meha híchugubei luagu gürigia ligía”. Lidan amu dimurei, adügaali meha ebechúni ligía lun lasakürihan wügüri le afigouhabei (Ebü. 12:11).

8. Ka meha lariñagubei Pábulu houn lílana damuriguaü le Korintubei?

⁸ Lárigiñe, ariñaga lumuti Pábulu houn ka lan lunbei hadügüni lau íbiri le asakürihaalibei: “Lunti feruduna humani, ru huguyame gurasu lun”. Ani ariñagati giñe: “Ligía nayumuragunbei hun lunya harufuduni hínsiñehabu lun”. Kei warihini, mama meha busenrügüti Pábulu lunya hígiruni lílana damuriguaü íbiri ligía lun lagiribudun, mósuya meha giñe harufuduni lun, dandu lau le hariñagubei kei lau le hadügübei, le lan lúgubu feruduna hamaali lan ani hínsiñe lan houn. Ítarati, lasandirubei meha wügüri asakürihaali ligía gunda hamá íbirigu lau lagiribudun lidoun damuriguaü.

9. Ka uagu másiña lubéi añahein lan meha úntiña hénrengu lan feruduna hamani afigouhati le asakürihaalibei?

⁹ Añahein meha san íbirigu ha úntiña hénrengu lan harufudun ínsiñeni lau heresibiruni íbiri le asakürihaalibei? Mariñagun tumuti Bíbülia, lau sun lira, gayaraati susere lan. Lugundun, barühali meha lóuserun gürigia ligía luriban iri lun damuriguaü ani háfuga bulesei laaru lan meha hanigi fiu hádangiñe íbirigu. Másiñati samina hamá meha fiu hádangiñe mabuidun lan leresibirúniwa aban gürigia lau saragu ínsiñeni lárigiñe adügaali lan meha katei le wéinamuti luriban sun añaha lan ha híbiri áfaagua lun gaganbadi hamá lun lilurudun Heowá (ariha huméi giñe Lúkasi 15:​28-30). Ka méhati uagu lunti lubéi harufudun ínsiñeni inarüniti lun íbiri le giribuhalibei lidoun damuriguaü?

10, 11. Ka hamuga meha gayaraabei lasuseredun lun hamuga ua lan feruduna hamani wéiyaaña lidan afiñeni gürigia le asakürihabei?

¹⁰ Ka meha gayaraabei lasuseredun lun hamuga mígirun hamá wéiyaaña lidan afiñeni lun lagiribudun gürigia le asakürihabei lidoun damuriguaü, móuserun haméi íbirigu lau ínsiñehabuni? Másiñati ladügüña lan hamuga saragu íruni wuribati lun gürigia le asakürihabei. Gayaraati hamuga meha lasaminarun máraninaali lan luáguti, masigi ligía áfaagua lun labuiduragüdüni lumadagua luma Heowá.

¹¹ Leti wuribatimabei, lun hamuga meha ua lan feruduna hamani lílana damuriguaü gürigia le asakürihabei, hagadeiruñein hamuga hamadagua luma Bungiu. Ka uagu? Ladüga mama hamuga harufuduñein ligaburi Heowá le aranseñubei lun feruduna lániña ha asakürihabaña, háyeihañein hamuga luriban ligaburi Satanási le fásibei. Ani hígiruña hamuga giñe lun layusuruniña Mafia lun lagadeiruni lumadagua gürigia ligía luma Bungiu (2 Ko. 2:​10, 11; Efe. 4:27).

12. Ida luba meha gayara lan háyeihani lílana damuriguaü ligaburi Heowá?

¹² Ida luba méhati háyeihani lílana damuriguaü le Korintubei ligaburi Heowá, mama ligaburi Satanási? Lau hóuseruniña gürigia ha asakürihabaña kei ladügüni Heowá. Ariha huméi le hariñagubei fiu abürühatiña Bíbülia luagu Heowá. Ariñagati Dawidi: “Buítibu ani gíchigadi buguya ferudun” (Sal. 86:5). Abürühati Mikeasi: “Úati amu Bungiu kei buguya, ladüga feruduna bumuti wuribani, bulíei bumuti hariban [ . . . ] bumutuniña” (Mik. 7:18). Ariñagati giñe Isaíasi: “Ígiralei wügüri le wuribabei lagübüri lémeri, ígiraleime salufuriti luriban lisaminan; giribu humá lun Aburemei ábame gudemehabu lan hun; giribu humá lun Wabungiute, le mánginbei lun feruduna lanün” (Isa. 55:7).

13. Ka meha uagu buidu lubéi lunya lanharún lun gürigia le asakürihabei lidan damuriguaü? (Ariha huméi rekuáduru “Átiriñein meha san dan lau wügüri korintuna bóugudi luéi damuriguaü?”).

¹³ Lun háyeihani Heowá, lunti meha buidu lan heresibiruni lílana damuriguaü le Korintubei wügüri le asakürihabei, arufuda hagíame hínsiñe lan houn. Ariñagati Pábulu anhein lan feruduna hamá wügüri ligía, harufuduña lan gaganbadi hamá lun le lubeibei houn (2 Ko. 2:9). Inarüni fiúrügügili lan meha hati ásügürüti lúmagiñe lasagarún wügüri ligía lídangiñe damuriguaü, íbini ítara, adügaali meha abeichúni ligía lun lasakürihan. Ligíati, mébunati meha lun hásuhan wéiyaaña lidan afiñeni lunya hánharun lun gürigia ligía lidan damuriguaü.

IDA LUBA WÁYEIHANI LIRICHA LUMA LUGUDEMEHABU HEOWÁ?

14, 15. Ka wafurendeirubei lídangiñe ligaburi lahandilihóun likesin wügüri le afigouhabei lidan damuriguaü le Korintubei? (2 Féduru 3:9; ariha humóun giñe iyawaü).

¹⁴ Adügati Heowá lun labürüdǘn tidan Lererun ida liña lan meha lahandilihóun katei le asuseredubei lidan damuriguaü le Korintubei “lun larufudahóun woun” (Rom. 15:4). Arufudahati le woun mígirun lániña Heowá gafigountiña ha masakürihanbaña hadan lumutuniña. Añahein asaminarutiña kei lan gudemehabu lan Heowá ígira lan lun herederun afigouhatiña ha masakürihanbaña lidan damuriguaü. Mítaranti katei le. Lau sun inarüni lan luagu gudemehabu lan Heowá, mama sun usa lun lánharuba lan lun, ani manügün lumuti lilurudun kei ni kata (Hud. 4). Le linarün katei, mama hamuga larufuduña Heowá gudemehabu anhein hamuga lígira gürigia le afigouhabei ani masakürihanti lidan damuriguaü lugundun gayaraabei hamuga aban lan peliguru lira houn lílana (Apur. 13:20; 1 Ko. 15:33).

¹⁵ Íbini ítara, arufudahati abahüdaguni le woun mabuseerun lan Heowá lun lounwen ni aban gürigia, busenrügüti lesefuruniña anhein gayara. Arufudati gudemehabu houn ha asansirubalin hagaburi ani áfaagua hagía lun harandarun luma (Ese. 33:11; aliiha huméi 2 Féduru 3:9). Ligíati, dan le meha lasakürihanbei wügüri korintuna ligía, ígiralei luriban lóuserun, aba layusuruni Heowá apostolu Pábulu lun lariñagun houn lílana damuriguaü lunti lan feruduna hamani, ánhara hagíame lun.

16. Ka hasandirubei luagu Heowá dan le hararamagun asaminara luagu ida liña lan meha lahandilihóun likesin wügüri le afigouhabei lidan damuriguaü le Korintubei?

¹⁶ Íderagua láadiwa wakutihani le asuseredubei lidan damuriguaü Korintu lun warihini línsiñehabu, liricha luma lúaragun Heowá (Sal. 33:5). Ma inarüni adüga lan wasubudiruni anihein lan igaburi burí le luagu Heowá lúntima busén wamá lun walawahani? Lugundun súngubei wagía afigouhatiwa ani mégeitiwa lun feruduna lániwa. Wéiriti weteingiruni luagu lebegi esefuruni le adügübei lun gayara lan feruduna lani wafigoun. Wéiriti gurasu le líchugubei woun wasubudiruni le lan lúgubu hínsiñehabu lan Heowá houn lumutuniña ani busén lani le buídutimabei woun.

17. Kaba wakutiha lidan leweñegua aturiahani?

¹⁷ Agia uguñe weyu? Anhein adüga aban gürigia aban figóu le wéiriti, ka lunbei hadügüni wéiyaaña lidan afiñeni lun háyeihani línsiñehabu Heowá lau híderaguni gürigia ligía lun lasakürihan? Ani ka lunbei wadügüni dan le hawisahan wéiyaaña lidan afiñeni mámaali lan gefenti luagu Heowá aban gürigia o dan le hánharunya lun lidan damuriguaü? Wóunabubei álügüdahani le lidan leweñegua aturiahani.