Haritagua humagili san?
Aliiha humaaru san sun Garüdia Awisahatu to lánina irumu le? Ariha huméi anhein gayara lubéi hóunabuni álügüdahani burí le:
Ka hénpulu líchugubei Heowá luáguti houserún würiña?
Buiti lóuseruniña Heowá würiña ítara kei lóuseruniña amu ani úati himei lániña wügüriña hawéi. Aganba lumutiña würiña, bereseti lau le hasandirubei luma lau haturobulin, ani afiñeti hawagu hadügübei lan dasi le líchugubei houn (w24.01, páhina 15 luma 16).
Ida luba gaganbadi wamá lun le ariñawagúbei lidan Éfesuna 5:7, le ariñagubei: “Direi humá lubeiti hawéi gürigia ítaratiña”?
Wéridi lumutiwa apostolu Pábulu lun móundarun wamá hamoun gürigia ha adügübaña lun gürewei lan woun gaganbadi wamá lun lilurudun Heowá. Mámarügü lun másügürün wamá dan hama, moun lumuti giñe gamadagua wamá hama ni lidan páhina le ñein lubéi hadügǘwa umadagu (w24.03, páhina 22 luma 23).
Ka ariñahani mabuidunti lunbei wadisedun luéi?
Lunti wóunigiragun woungua luéi ariñahani le machourunti meberesenga anhein hámagiñe lubéi wamadagu liabin íbini lau lan lubuidun aritaguni hóunahei woun, lunti giñe wóunigiragun woungua luéi koréu le magurabun wamuti le ñǘbuinbei hámagiñe gürigia ha ibidiñebaña woun o le ñǘbuinbei hámagiñe gürigia ha agarabagunbaña houngua luagun Bungiu lau hafamurun busén hamá hafurendeirun tuagu Bíbülia (w24.04, páhina 12).
Ka wasubudirubei ani ka ibidiñebei woun luagu ida luba lan laguseragüdüni Heowá urúei Salomón, gürigia ha óunwegubaña Sodoma luma Gomora, hama ha óunwegubaña lidan Guran?
Ibidiñeti woun lau ichouruni anhein günringua laaña lubéi Heowá gürigia ha lun súnwandan, le wasubudirubei subudi lan sun katei lun ani aban lan Bungiu gudemehabuti ligía (w24.05, páhina 3 luma 4).
Ka larufudahabei woun ítara liña lan Heowá kamá aban óunwenbu “Dübü”? (2 Sam. 22:3).
Gayaraati waramudagun lurugabu Heowá. Gayaraati lafiñerúniwa luagu, ladüga súnwandan lagunfuliruni le füramase lubéi. Masansiragunti Heowá ni ligaburi ni le labusenrunbei ladügün (w24.06, páhina 26 darí 28).
Kaba íderaguawa lun wéchudun luagu aban iseri damuriguaü?
Wafiñerun luagu líderagubadiwa lan Heowá kei líderaguniña lubúeingu ha lánina binadu dan, aban giñe katei lun magoubaguagüdün wamani damuriguaü le ñein wabéi lumoun le ñéingiñe lubéi wayabin, áfaagua wagíame lun beresegu wamá lidan iseri damuriguaü ani áluaha wagíame iseri umadagu (w24.07, páhina 26 darí 28).
Ka wafurendeirubei lídangiñe ǘrüwa abahüdaguni le lídanbei Matéu kapítulu 25?
Arufudahati abahüdaguni hawaguti mudún hama gábara woun lunti lan warufudun úaraguni lun Heowá, ánheinti abahüdaguni hawaguti diisi nibureintiña, arufudahati lunti lan aranseñu wamá ani agagudúañu wagíame lidan wamadagua luma Heowá, ánheinti abahüdaguni luáguti talentu arufudahati woun súdini lan benefa wamá lidan weseriwidun (w24.09, páhina 20 darí 24).
Átiriñein meha san liñun rumu le ebelaagülei le ligibugiñebei tebelaagüle ténpulu to lábunaguboun Salomón?
Ariñagatu meha Traducción del Nuevo Mundo lidan 2 Krónikasi 3:4, san lan meha wein kodu liñun rumu le ebelaagülei le ligibugiñebei tebelaagüle ténpulu, mini lan le aban lan wáyelesi le 53 méturu (175 ugudi) liñun. Anihein ámuya abürüdǘni le gayaraati lafiñerúniwa luagu, ani ariñagati 20 kodu, mini lan 9 méturu (30 ugudi) liñun. Buiti lagumuhóun ariñahani le ladüga gayara lan lawanduni touba ténpulu (w24.10, páhina 31).
Ka mini lubéi “lunti túmari lan ábanrügü würi” ídehati lidan damuriguaü? (1 Tim. 3:12).
Aban ídehati lidan damuriguaü le maríeiti lunti ábanrügü tan lani weiriou ani moun lumuti magíagu lan. Ani moun lumuti giñe ladarihan amu würi (w24.11, páhina 19).
Ida liña wasubudiruni mama lan le ariñawagúbei lidan Huan 6:53 lébubei ladügǘn Ladinerun Aburemei?
Lidan Huan 6:53, ayanuhati Hesusu luagu lunti lan leigín lǘgürügü luma latún lita. Galiléa lariñagei dimurei le lidan irumu 32 houn saragu huríu ha meha mafiñerungiñabaña luagu. Gama lumoun, aban irumu lárigiñe dan le ladügünbalin Ladinerun Aburemei Herusalén, aba layanuha houn ha lúnbaña harúeihan luma sielu (w24.12, páhina 10 luma 11).