Furendei wamá asaminara kei Heowá luma kei Hesusu

1, 2. a) Ka lílabei hínsiñe lan Heowá woun? b) Ida liña larufuduni Hesusu hínsiñe lan Heowá lun íbini lau ligaburi lisaminan?

FURANGUTI lariñaguni Hesusu ka lan gumadi súdinitimabei lidan Lilurudun Moisesi dan le lariñagunbei: “Hínsiñela lubeiti Babureme le Bubungiute bun tau sun banigi, tau sun buani, lau sun bisaminan, lau sun bere” (Mar. 12:30). Ligía lunti lubéi hínsiñe lan Heowá woun tídangiñe sun wanigi, mini lan le mosu lan línsiñedun woun lau le wayumahabei, lau le wasandirubei luma lau sun were. Mosu giñe wasubudiruni ida luba lan wayusuruni wasaminan. Ínchaha lumutiwa ínsiñeni le wasandirubei luagu Heowá lun wáyeihani ligaburi lisaminan. Lau sun hénrengubei lan woun gunfuranda wamani ligaburi lisaminan Heowá sunsuinagubei, líderagubadiwa waturiahani ligaburi “lisaminan Kristu”, lugundun áyeiha lumuti ligaburi lisaminan Lúguchi buidu buidu (1 Ko. 2:16).

² Arufuda lumuti meha Hesusu hínsiñe lan Heowá lun íbini lau ligaburi lisaminan. Subudi lumuti meha ka lan lugundanbei Bungiu ani busenti meha ladügüni, íbini subudi lan meha lun lasufuriruba lan. Kei meha le aranseñu liña lubéi lun lagundaaragüdüni Lúguchi, mígirunti lun leberesehani ni kata luéi ladügüni.

3. Ka lafurendeirubei apostolu Féduru lúmagiñe Hesusu, ani ka un línchahaña kristiánugu? (1 Féduru 4:1).

³ Ibihati meha Féduru hama amu apostolugu aban lubuidun chansi lau hásügürün dan luma Hesusu lun hafurendeirun lídangiñe ligaburi lisaminan. Dan le labürüdünbarun Féduru furumiñetu ligaradan, ínchaha lumutiña kristiánugu lun aranseñu hamá lun hasaminarun kei Kristu (aliiha huméi 1 Féduru 4:1). Dan le labürüdünbalin Féduru dimurei güriegu le ásügürawagüdübei kei “aranseñu wamá”, yúsuti aban dimurei le meha hayusurubei súdaragu lun hayanuhan luagu hárügüdünu hárumate lun houdin ageindagua. Arufudati dimurei le gabafu lan wáyeihani ligaburi lisaminan Kristu lun wagagibudagun dandu luma luriban wayumahan kei luma ubóu le lábugiñebei lubafu Satanási (2 Ko. 10:​3-5; Efe. 6:12).

4. Kaba wariha lidan aturiahani le?

⁴ Lidan aturiahani le, wakutihabei ida liña lan ligaburi lisaminan Hesusu lúmati ida luba lan wáyeihani. Wafurendeiruba giñe 1) ida luba lan wafurendeirun asaminara kei ligaburi lisaminan Heowá, 2) ida luba lan ǘnabugu wamá luma 3) ida luba lan warufudun ragüguaü unguaü.

FURENDEI WAMÁ ASAMINARA KEI HEOWÁ

5. Ka meha sügǘ ídanbei larufudei Féduru múaran lan lisaminan luma Heowá?

⁵ Luagu aban dan, arufudati Féduru amu lan lisaminan luéi lisaminan Heowá. Aba meha lariñagun Hesusu houn lani apostolugu luagu léibuga lan Herusalén, le ñeinba lubéi hárügüdei tábutigu relihión lun hasufuriragüdüni, áfara hameime hilagubei (Mat. 16:21). Subudi lumuti meha Féduru Hesusu lan Mesíasi le füramasewabei le lunbei meha lasalbaruniña lumutuniña Bungiu, ligíati hénrengu lubéi meha lun Féduru lafiñerun lígiruba lan Heowá lun lafarúniwa Hesusu hilagubei (Mat. 16:16). Ligía ladireirunbei Féduru lau Hesusu murusunraü ani aba lariñagun lun: “Mabusenraléi Bungiu lira, Nabureme! Siñati lasuseredun katei le bun!” (Mat. 16:22). Kei méhati masaminarun lubéi Féduru kei lasaminarun Heowá luagu katei le, múaranti meha ligaburi lisaminan Hesusu luma Féduru.

6. Ida liña larufuduni Hesusu úara lan lisaminan luma lisaminan Heowá?

⁶ Úarati lisaminan Hesusu luma lisaminan Lúguchi le siélubei. Ligía lariñagunbei lun Féduru: “Disebá nuéi, Mafia! Babusenrúña berederuni ladügǘniwa lugundan Bungiu. Masaminaruntibu kei Bungiu, basaminarun kei wügüri” (Mat. 16:23). Mama meha aban katei ménrengunti lagunfulirúniwa lau lugundan Heowá, subudi lumuti meha Hesusu lira ladüga meha lasufuriruba lan ani afarúa ligíame hilagubei. Ligía maha lubéi lun dimurei le lariñagubei Féduru lun lau sun yebe buidu lan le labusenrubei Féduru lariñagun. Íderagua lumuti katei le apostolu le lun gunfuranda lani mosu lan lafurendeirun asaminara kei lasaminarun Heowá. Ma lubuidun hénpulu le woun!

7. Ida liña larufuduni Féduru láfaaguña lan meha lun lasaminarun kei Heowá? (Ariha huméi dibuhu le luágubei ).

⁷ Dan lárigiñe, aba larufuduni Féduru luagu láfaaguña lan meha lun lasaminarun kei Heowá. Ariha laali meha Bungiu dánhali lan lun lánharun houn gürigia ha lílana amu néchani, ligíati lariñagunbei lun Féduru lun lidin apurichiha lun Korunéliu, ligíaba meha furumiñe wügüri hádangiñe gürigia ha mámabaña huríu adügaguti lungua kristiánume. Chóuruti meha adüga hamani huríu sun hayaraati lun móundarun hamá hamoun lílana amu néchani, ligía méhati agurabúa lubéi lun hénrengubei lan lun Féduru lun lánharun lun dasi le. Gama lumoun, dan le gunfuranda lubalin ka lan lugundanbei Heowá, aba lasansiruni ligaburi larihini katei. Ligía lánharunbei lidin lúbiñe Korunéliu dan le lóunahanbei luagu (Adü. 10:​28, 29). Aba lapurichihan lun Korunéliu luma houn tílana luban, ani aba habadiseirun (Adü. 10:​21-23, 34, 35, 44-48).

8. Ida liña warufuduni úara lan wasaminan luma Heowá? (1 Féduru 3:8).

⁸ Irumu lárigiñe, aba líchuguni Féduru adundehani le houn kristiánugu: “Abagarida humá sun huguya lidan úarani” (aliiha huméi 1 Féduru 3:8). Lun úara lan wasaminan sun wagía keisi gefentiña luagu Heowá, mosu wáyeihani ligaburi lisaminan Heowá, le wadarirubei tidan Lererun. Kei hénpulu, ínchaha lumutiña Hesusu lani disipulugu lun híchuguni Larúeihan Bungiu furumiñe lidan habagari (Mat. 6:33). Lau dimurei le wachügüwagu, samina wamá aba lan lagumeserun aban lílana damuriguaü eseriwida lidan dan dayarüti. Wariñaguña hamuga san dimurei libe le lariñagubei Féduru lun Hesusu lun íbiri ligía? Uá. Wariñagarügüña hamuga lun buidu lan ladüga ani wíderaguñein hamuga.

ǗNABUGU WAMÁ

9, 10. Ida liña larufudahan Hesusu ǘnabuguni?

⁹ Guñoun le lubaragiñebei lafarúniwa Hesusu, arufudahati lun Féduru luma houn ha híbiri apostolugu súdini lan lun ǘnabugu hamá. Ariñagaali meha Hesusu lun Féduru luma lun Huan lun haransehan lubá lagumuhóun ladinerun hama lani disipulugu lubaragiñe lounwen. Másiñati chouru hamani ñeinbei lan meha aban wachabesini tuma aban tuaya lun gayaraabei lan lachibúniwa hagudi ha agunbirahóubaña lubá éigini. Kaba méhati adügei dasi ǘnabuguti le?

¹⁰ Kamaniti meha ladügüni aban idamuni dasi le. Gama lumoun, weyu ligía, Hesusu adügübalin, masaminarunga bián wéiyaasu, aba lachibuni hagudi. Ma tueirin hanigi apostolugu dan le harihinbalin lagidarunu Hesusu lidáü, ani aba lagüürün aban tuaya liranaagua, aba léserun duna lidoun aban wachabesini ani aba lagumeserun achibei hagudi! (Huan 13:​4, 5). Átiriñein funa san dan lanügün Hesusu adügei dasi le? Chibá lumuti hagudi 12 lani apostolugu, chibá lumuti íbini lugudi Húdasi, wügüri le meha lunbei laluguruni. Ma meha ǘnabugu lan Hesusu! Lau gaguraasuni, aba lafuranguagüdüni houn lárigiñe le mini lubéi le ladügübei houn, aba lálügüdüniña: “Gunfuranda humuti san le nadügübei hun? Huguya agúahatün nun Máisturu luma Nabureme, ani richatün ladüga ítara liña; ánheinti chibá nubalin hugudi lau sun Humaisturun nan ani Habureme, lunti giñe hachibuni hugudi húmagua” (Huan 13:​12-14).

11. Ida liña larufuduni Féduru furendeihali lan ǘnabuguni? (1 Féduru 5:5; ariha huméi giñe dibuhu).

¹¹ Furendeiti Féduru lídangiñe lǘnabugun Hesusu. Lárigiñebei lagiribudun Hesusu sielun, aba lareidaguagüdün Féduru lau aban milaguru aban wügüri danimati lúmagiñe lágurahoun (Adü. 1:​8, 9; 3:​2, 6-8). Kei le aubei warihei, wéirigüda lumutu katei le hanigi saragu gürigia (Adü. 3:11). Ida liña lóunabun Féduru? Haritagua waméi hínsiñe lan meha uéiriguni houn huríu. Busenbei meha san Féduru libihini sun uéiriguni le? Uá, ǘnabuguti meha Féduru ani aba líchuguni sun uéiriguni lun Heowá luma lun Hesusu. Dan le layanuhanbei luagu Hesusu, aba lariñagun: “Anihán wügüri le harihubei ani subudi huméi; lau lubafumeme Hesusu ligía, leresibira erei” (Adü. 3:​12-16). Dan lárigiñe, aba labürühan Féduru houn kristiánugu luagu súdini lan ǘnabuguni. Dimurei le layusurubei, másiñati haritaguagüda lániwa luagu le ladügübei Hesusu dan le lagüürünu tuaya liranaagua ani aba lachibuni hagudi lani apostolugu (aliiha huméi 1 Féduru 5:5).

12. Ítara kei Féduru, ida luba warufuduni ǘnabugu wamá?

¹² Ítara kei Féduru, gayaraati giñe warufudun ǘnabuguni. Aban katei le gayaraabei líderaguniwa lun ǘnabugu wamá, waritaguni mámarügü lan lau le wariñagubei warufudei ǘnabuguni le inarüniti, lugundun lídangiñe lilulin-agei wasaminan liabin. Ligía mini lubéi dimurei le ásügürawagüdübei kei “ǘnabuguni” lidan 1 Féduru 5:5. Mama ladüga busén wamá weresibirun uéiriguni wadüga katei buiti hawagu amu, ladüga ínsiñeni le wasandirubei luagu Heowá luma hawagu gürigia wáledigu, wadügei. Ánhawa eseriwida lun Heowá lau ugundani seriwi wagíame houn wábirigu magurabahanga weresibirun uéiriguni, warufuduñein ǘnabugu wamá (Mat. 6:​1-4).

RAGÜGUA WAMÁ WOUNGUA

13. Ka mini lubéi ragüguaü unguaü?

¹³ Ka mini lubéi ragüguaü unguaü? (1 Fe. 4:7). Mini lan áfaagua lan aban kristiánu lun ladügüni katei buidu, le arufudubalin ligaburi lisaminan Heowá. Gabaroun lumuti giñe lumadagua lan luma Heowá súdinitimabei. Anhein buidu lubéi wasaminan, masaminarunbadiwa chútima lan wau hawéi amu o subudi lan sun katei woun. Lanwoun lira, wáluahabei giñe Heowá lun wamuriahani ladundehan lau ǘnabuguni lidan furíei súnwandan.a

14. Ka sügǘ ídanbei marabachun lan Féduru luagun Heowá?

¹⁴ Guñoun le lubaragiñebei lounwen Hesusu, aba lariñagun houn lani disipulugu: “Hasandiraguba sun huguya hungua lau maguraasuni nuagu áriebu to”. Lau saragu ichouruni, aba lóunabun Féduru: “Gayaraati hígirunibu súngubei bábugua, anhein au mígirun nubadibu!”. Gúñounmeme ligía, aba líchuguni Hesusu adundehani le houn fiu lani disipulugu: “Agagudúañu humá afurieida huguyame” (Mat. 26:​31, 33, 41). Lun hamuga sigí lani Féduru adundehani le, másiñati ganigibei lan hamuga lun lariñaguni ligía lan aban hádangiñe lani Hesusu disipulugu. Gama lumoun, kei le mafala lubalin adundehani le, aba leyeedagun ibidiñe lan Labureme lun… ani asakürihati lárigiñe! (Mat. 26:​69-75).

15. Ka íderagubalin Hesusu lun lárügüdagun lungua luma lun ganigi lan guñoun le lubaragiñebei lounwen?

¹⁵ Afiñeti Hesusu sunsuinagubei luagu Heowá. Íbini mafigoun lan meha Hesusu, aba lafurieidun saragu wéiyaasu lubaragiñe lounwen. Ítara liña larufudun ganigi lun gayaraabei lan buga ladügüni lugundan Lúguchi (Mat. 26:​39, 42, 44; Huan 18:​4, 5). Ariha lumuti Féduru Hesusu afurieida, chóuruti mabulieidun lani Féduru furíei lan Hesusu saragu wéiyaasu lagumuhóunbei guñoun le laubei ya ubouagu.

16. Ida liña larufuduni Féduru áyeiha laali lan meha igaburi lánina ragüguaü unguaü? (1 Féduru 4:7).

¹⁶ Lau lásügürün dan, furendeiti Féduru arabacha luagun Heowá lidan furíei. Lárigiñebei láguyugun Hesusu, ariñagati lun Féduru luma houn ha híbiri apostolugu heresibiruba lan sífiri sandu lun gayara lan hapurichihan. Gama lumoun, aba lariñagun houn lun lan herederun Herusalén agurabaha (Luk. 24:49; Adü. 1:​4, 5). Ka ladügübei Féduru sun aniha lan agurabaha? Ariñagatu Bíbülia aba lan lerederun ligía úara hama amu kristiánugu “afurieida súnwandan” (Adü. 1:​13, 14). Lárigiñe, tidan furumiñetu ligaradan ínchaha lumutiña kristiánugu lun hárügüdagun houngua luma lun harabachun luagun Heowá lidan furíei (aliiha huméi 1 Féduru 4:7). Furendeiti Féduru arabacha luagun Heowá ani ábanhali meha wügüri le íchugubei iderebugu lun damuriguaü (Gal. 2:9).

17. Íbini anihein lan somu iyaraani wawagu, ka lunbei wadügüni súnwandan? (Ariha humóun iyawaü).

¹⁷ Lun warufudun ragüguaü unguaü, mosu wafurieidun saragu lun Heowá. Subudi wamuti mosu lan wamuriahani ladundehan íbini lidan burí katei le ménrengunti o le ñǘbüriti. Danti le wadügün katei súdiniti, aba wamuriahan ídemuei luma Heowá ladüga chouru wamuti subudi lani le buídubei woun.

18. Ítara kei Féduru, ka gayaraabei wadügüni?

¹⁸ Teinki wamuti Heowá lau ladügüniwa lau iyaraani lun wáyeihani ligaburi (Agu. 1:26). Subudi wamuti siñabei lan wáyeihani Heowá buidu buidu (Isa. 55:9). Gama lumoun, ítara kei Féduru, gayaraati giñe wafurendeirun asaminara kei Heowá, warufudun ragüguaü unguaü luma ǘnabuguni.