Áyeiha waméi Hesusu ani apurichiha wamá lau ubebeni

1. Ka idan amu wamá wagía gefentiña luagu Heowá hawéi gürigia ha ariñagubaña hawougua kristiánugu hamá?

WAGÍA gefentiña luagu Heowá, wéiriti ubebeni le wasandirubei luagu apurichihani, ani adügati le lun amu wamá hawéi ha ariñagubaña hawougua kristiánugu hamá (Titu 2:14). Lau sun lira, anihein dan añahein lan wádangiñe lóuguati ubebeni wasandirun luagu apurichihani. Másiñati susere lan woun kei lun aban íbiri le nadagimeinbei saragu kei wéiyaali lidan afiñeni le ariñagubei: “Anihein dan nasandiragun nungua henren lan nun nidin apurichiha”.

2. Ka uagu anihein lan dan hénrengu lan woun lun wasandirun ubebeni luagu apurichihani?

² Másiñati samina wamá wadügün amu katei lidan weseriwidun lun Bungiu sügǘ luéi wáfuridun apurichiha. Ka uagu? Lugundun dan le wábunagun o waransehanu Luban Wadamuridagun, o wíderaguniña wábirigu dan le ñein lan mégeiti houn o wíchugun gurasu houn, ariha wamuti lau lóufudagun buiti le lanügübei, ani sandiguatiwa woungua buidu. Lanwoun lira, dan le wawadigimaridun hama wábirigu buiti giñe wasandiragun woungua, sanditiwa giñe ínsiñeni, darangilaü ani subudi wamuti seremei hamani áfaaguni le wadügübei ani gebegiti houn. Luagu le aban oubaü, gayaraati barühadiwa lan saragu irumu apurichiha lidan ligiaméme fulasu ani míbetiña gürigia íchugutiña arigei lun uganu le wapurichihabei. Gayaraati añahein lan hádangiñe wuribati hounabún lun uganu le wapurichihabei. Ani lanwoun lira, subudi wamuti eibu lan ayarafadeina wamá lun lagumuchagüle ubóu le, chóuruti lichugúbatima lan lidere dan woun (Mat. 10:22). Kaba íderaguawa akipurei o aganwoundagüdei ubebeni luagu apurichihani?

3. Ka wafurendeirubei luagu Hesusu lídangiñe Lúkasi 13:​6-9?

³ Le gayaraabei líderaguniwa asandira ubebeni luagu apurichihani, wakutihani lani Hesusu hénpulu. Dan le ya lubéi Hesusu Ubouagu, meferidirun lumuti ubebeni luagu lani ministeriu, lubaragiñe lira, aba laganwoundagüdüni (aliiha huméi Lúkasi 13:​6-9). Agoubaguagüdati Hesusu lungua luma aban wügüri le ásügürübei ǘrüwa irumu óunigira aban tídibu igu le minti. Ítarameme, sügüti Hesusu ǘrüwa irumu apurichiha houn huríu, gama lumoun, fiúrügüñanu adügagutiña houngua lánime disipulugu. Lau sun lira, ítara kei wügüri le uágubei labahüdaha, le mábürühanbei larüna ani áfaagua ligía lun tagindun tídibu wewe tuguya, mábürühanti giñe larüna Hesusu lidan lani ministeriu. Lubaragiñe lira, áfaaguarügüti lun lachülürün tidoun hanigi gürigia.

4. Kaba gádürü katei wakutiha lidan aturiahani le?

⁴ Lidan aturiahani le, warihiba ida liña lan larufudun Hesusu ubebeni lídantima lagumuhóun sisi hati le laubei ya Ubouagu (Luk. 10:1). Wakutihaba gádürü igaburi le ñein lubéi líchiga buiti hénpulu woun: 1) letenirun lun ladügüni lugundan Heowá, 2) gunfuranda lumuti ani adügaléi le lariñagubei profesía, 3) afiñeti luagu líderagubei lan Heowá luma 4) arufudati lubuidun igaburi ani hemenigiti luagu haganbubei lan fiu hádangiñe gürigia.

TÉNITI HESUSU LUN LADÜGÜNI LUGUNDAN HEOWÁ

5. Ida liña larufuduni Hesusu teni lan lun ladügüni lugundan Bungiu?

⁵ Apurichiha lumuti meha Hesusu “uganu le luáguti larúeihan Bungiu” lau ubebeni, lugundun subuditi meha lun ligía lan labusenrunbei Bungiu lun ladügüni (Luk. 4:43). Ligíatima katei le súdinitimabei lun Hesusu lidan libagari. Íbini lidan meha lagumuhóun burí hati le laubei lidan lani ministeriu, aweiyasuhati meha “arufudaheina ligía lidan burí sun aüdü luma lirahüñü fulasu le ídangiñebei lásügüra” (Luk. 13:22). Arufudahati meha giñe houn saragu lani disipulugu lun hapurichihan ítara kei ladügüni (Luk. 10:1).

6. Ida liña gani lan apurichihani luma furumiñeguarügü dasi le wadügübei lidan weseriwidun lun Bungiu? (Ariha humóun giñe iyawaü).

⁶ Lapurichihóun uganu buiti ligía súdinitimabei woun uguñe weyu, ladüga ligía lan labusenrunbei Heowá luma Hesusu lun wadügüni (Mat. 24:14; 28:​19, 20). Sun dasi le wadügübei lidan weseriwidun lun Heowá gániti luma lapurichihóun uganu buiti. Kei hénpulu, bunaguatiwa Luban Adamuridaguni lun houdin gürigia ha únbaña wapurichiha áhuduragua lun Heowá ñein. Sun le burí adügǘbei Betelirugu luma burí lidan fulasu líbeina lira, gániti luma apurichihani. Dan le wíderaguniña wábirigu ha asufurirubaña ladüga somu liñawan dan, hárabaganali o katei líbeina lira, adügati lun gayara lan hadamuridagun luma lun hapurichihan. Gabaroun waméi súnwandan, lapurichihóun lan uganu, ligía lan dasi létima súdinitimabei le labusenrunbei Heowá lun wadügün. Ítarati, laganwounduba wayumahan lúntima busén wamá wapurichihani uganu buiti. Ariñagati aban íbiri wéiyaali lidan afiñeni le lídangiñebei ageiraü Ungüría gíriti János: “Súnwandan naritaguni ua lan ni aban dasi le gayaraati lagidaruni lilugaarun apurichihani. Apurichihani ligía dasi le súdinitimabei”.

7. Ka uagu busén lubéi Heowá lun wasigirun apurichiha? (1 Timotéu 2:​3, 4).

⁷ Aban katei le gayaraabei líderaguniwa lun wasandirun ubebeni lidan apurichihani, warihiniña gürigia kei larihiniña Heowá. Busenti lun haganbuni saragu gürigia uganu buiti ani anha hagíame lun (aliiha huméi 1 Timotéu 2:​3, 4). Kei le esefuha lubéi uganu le ibagari, busenti Heowá líderaguniwa lun chubalugu wamá lidan ligaburi wapurichihan. Kei hénpulu, rutu garüdia Laulá ínsiñeni wadüga disipulugu adundehani huuti lun watatirun ayanuha hama gürigia lau lumenrengun, lun gayara lan lagumeserúniwa aturiahani tídangiñeti Bíbülia hama lun hadügagun houngua disipulugume. Íbini ánhaña maha lun uganu le guentó, másiñati gachansin hamá lun hánharun lun lubaragiñeme lagumuchun saragu asufuriruni. Le wapurichihabei houn uguñe weyu, másiñati línchahabaña lan lun hánharun lun uganu le ámuñegü. Lun lasuseredun lira mosu wasigirun apurichiha.

GUNFURANDA LUMUTI HESUSU PROFESÍA ANI ADÜGA LUMUTI LE LARIÑAGUBEI

8. Ka profesía tídangiñeti Bíbülia íderagubalin Hesusu ayusurei lidaani buidu?

⁸ Subudi lumuti meha Hesusu ida luba lan lagunfulirun profesía le tídanbei Bíbülia, ligía lasubudirunbalin ǘrüwarügübei lan irumu dimí ladurarun lani ministeriu (Dan. 9:​26, 27). Subudi lumuti meha luagu ariñaga lan profesía ida luba lan lounwen luma ídaba lan (Luk. 18:​31-34). Adügati lasubudiruni Hesusu le lariñagubei profesía lun meferidirun lan chansi lun lapurichihan lau ubebeni, lun lagumuchuni dasi le líchugubei Bungiu lun lun ladügüni.

9. Ka uagu línchahawa profesía le tídanbei Bíbülia lun wapurichihan lau ubebeni?

⁹ Ínchaha lumutiwa profesía le tídanbei Bíbülia lun wapurichihan lau ubebeni. Subudi wamuti murusunrügaali lan dan lun ubóu le. Dan le warihini le asuseredubei uguñe weyu luma hagaburi gürigia, aba wíchugun fe lagunfuliruña lan le tariñagubei Bíbülia lidan lagumuhóun dan le. Gunfuranda wamuti ida liña lan lagunfulirun profesía luagu burí wuribu le lánibei lurúeite suru (mini lan le, Reino Unido luma Meriga) luma lurúeite nórute (mini lan, Rusia hama ha lúmagiñebaña) (Dan. 11:40). Gunfuranda wamuti giñe lugudi lan guáriua le uágubei layanuhóua lidan Danieli 2:​43-45, mini lan, Reino Unido luma Meriga, ligía ageiraü le gabafubei ubouagu uguñe weyu. Lau waturiahani profesía le tídanbei Bíbülia, chóurugüda lumuti woun yarafa madise lan lagünrinchaguni Larúeihan Bungiu harúeihan gürigia. Arufudati sun burí profesía le ka lan dan ídanbei wawinwanda ani adügati lun busén wamá wapurichihan madarasahanga.

10. Ka amu igaburi le lídanbei profesía ínchahabaliwa lun wapurichihan lau ubebeni?

¹⁰ Ruti giñe profesía le tídanbei Bíbülia aban ñunsu le wabusenrubei wapurichihan houn gürigia. Ariñagatu Carrie, aban íbiri to eseriwiduboun Repúblika Dominikana: “Dan le nasaminarun luagu lubuidun füramasei le ladügübei Heowá lubá ámuñegü, aba nasaminarun mosu lan nabahüdahani houn amu. Dan le narihini sun turobuli le gádanbaliña gürigia, aba nasaminarun mámarügüñein lan nun füramase lani Heowá lubuidun burí füramasei le, füramase lumuti giñe houn”. Ínchaha lumutiwa profesía le tídanbei Bíbülia lun wasigirun apurichiha lugundun haritaguagüda lumutiwa aniha lan Heowá ñein lun líderaguniwa lidan dasi le. Ariñagatu aban íbiri ungüriana gíritu Leila: “Arufudahati Isaíasi 11:​6-9 nun gayara lan líderaguniña Heowá furumiñeguarügü gürigia asansirei hagaburi. Ínchaha lumutina katei le lun napurichihan íbini houn ha genegebei mabuseerun hamá haganbun”. Ariñagati aban íbiri sambiana gíriti Christopher: “Kei lariñawagúniwa lidan Márükosu 13:​10, lapurichihóuña uganu buiti lidan sun ubóu, ariha numuti nídehan lidan lagunfulirun profesía le kei aban lubuidun chansi”. Agia huguya? Ka profesía ínchahabalün lun hasigirun apurichiha?

AFIÑETI MEHA HESUSU LÍDERAGUBEI LAN HEOWÁ

11. Ka meha uagu megei lubéi Hesusu lafiñerun luagu Heowá lun lasigirun apurichiha lau ubebeni? (Lúkasi 12:​49, 53).

¹¹ Afiñeti meha Hesusu líderagubei lan Heowá lun lapurichihan lau ubebeni. Íbini lau lan meha inebesei lapurichihan Hesusu, subudi lumuti lanügüba lan uganu buiti luáguti Larúeihan Bungiu aban lanarime sigenei, ani ladügüba lan lun lichugún lidere dan woun (aliiha huméi Lúkasi 12:​49, 53). Lanwoun lira, iyereeguti meha Hesusu houn alidihatiña relihión saragu ladüga lanarime lapurichihan darí lun hálugun saragu wéiyaasu lun háfaruni (Huan 8:59; 10:​31, 39). Íbini ítara, mígirun lumuti Hesusu lapurichihan, ladüga subudi lumuti anihein lan Heowá lurugabu. Ligía lariñagunbei: “Mama […] nábuguañadina ladüga anihein Núguchi numa” (Huan 16:32). Ariñagati giñe: “Mígirun lágidina Núguchi nábugua, ladüga adüga nani le aubei lagundaara súnwandan” (Huan 8:29).

12. Ida liña meha laransehaniña Hesusu lani disipulugu lun hasigirun apurichiha íbini lichugúniwa lidere dan houn?

¹² Haritaguagüda lumutiña Hesusu lani disipulugu gayara lan hafiñerun líderagubaña lan Heowá. Kei le subudi lubéi lun héibaahouba lan, aba lachoururagüdüni houn saragu wéiyaasu aniheinbei lan Heowá hama lun líderaguniña (Mat. 10:​18-20; Luk. 12:​11, 12). Ligibuagu lira, aba lamuriahan hama lun hóunigiragun houngua (Mat. 10:16; Luk. 10:3). Ariñagati giñe houn ánhaña lan mabusenrun gürigia haganbuni uganu le hanügübei houn mama lan mosu hafosuruniña (Luk. 10:​10, 11). Ani ariñagati houn lun lan hanurahan danme le héibaahouniwa (Mat. 10:23). Íbini afiñe lan Hesusu luagu Heowá ani apurichiha ligía lau ubebeni, góunigiguati meha lungua, míchugun lumuti libagari lidoun denchaü (Huan 11:​53, 54).

13. Ka uagu gayara lubéi hachoururuni líderagubadün lan Heowá?

¹³ Uguñe weyu, lichugúña lidere dan woun, ligíati megei wabéi lun líderaguniwa Heowá lun wasigirun apurichiha lau ubebeni (Aruf. 12:17). Kati uagu wachoururei líderagubadiwa lan Heowá kada aban wádangiñe? Ladüga furíei le ladügübei Hesusu le wadarirubei lidan kapítulu 17 tidan liliburun Huan. Amuriahati Hesusu luma Lúguchi lun lóunigiruniña lani apostolugu, ani óunaba lumuti Heowá. Abahüdawagúati tidan líburu to gíriboun Adügaü luagu ida liña lan meha líderaguniña Heowá apostolugu lun hapurichihan lau ubebeni íbini lichugúniwa lidere dan houn. Amuriahati giñe Hesusu lidan furíei luma Heowá lun lóunigiruniña gürigia ha afiñerubaña luagu uganu le hapurichihabei apostolugu. Ani amuriahati giñe luagu kada aban wádangiñe. Ligíati gayara lubéi wachoururuni ítarameme luba lan Heowá óunabei furíei le ladügübei Hesusu ani íderagua láwame ítara kei líderaguniña apostolugu (Huan 17:​11, 15, 20).

14. Ka uagu wachoururei gayara lan wasigirun apurichiha lau ubebeni? (Ariha humóun giñe iyawaü).

¹⁴ Másiñati eibu lanme ayarafadeina lan lagumuchagüle ubóu le lénrengudütimaaba lapurichihóun lau ubebeni. Gama lumoun, chóurugüda lumuti Hesusu woun weresibirubei lan ídemuei le wemegeirubei (Luk. 21:​12-15). Ítara kei Hesusu hama lani disipulugu, wígiruba lun gürigia lan anúadira anhein busén habéi haganbun o mabusenrun hamá, ani wáfaaguba lun masigenehan wamá hama. Íbini lidan ageiraü le ñein lubéi siñá lan hapurichihan wábirigu kei le aubei habusenra, añahagua apurichihei uganu buiti ladüga hafiñen luagu Heowá ani mama luagu habafu guánarügü hafiñera. Ítara kei lidan furumiñeti sígulu ruti Heowá ubafu houn lubúeingu lun ‘gayara lan hapurichihani uganu le lánina asalbaruni’, ani ligiaméme giñe wadügübei uguñe weyu, darí lariñagun Heowá ya lébeda (2 Tim. 4:17). Chouru wamuti ánhawa lan afiñera luagu Heowá gayaraabei lan wapurichihan lau ubebeni.

HEMENIGITI HESUSU LAGANBÚBA LAN

15. Ida liña wasubudiruni arufuda lan Hesusu aban lubuidun igaburi luáguti apurichihani?

¹⁵ Afiñeti meha Hesusu haganbubei lan gürigia uganu buiti ani buiti meha igaburi le lugundun íderagua lumuti meha lun lapurichihan lau ubebeni. Lidan meha irumu 30 dan le ya lubéi Hesusu Ubouagu, ariha lumuti añahein lan saragu gürigia ha busenbaña haganbuni uganu ligía, ligía lagoubaguagüdübaliña luma ichari le buíduhalibei lun lalubahóun (Huan 4:35). Kei burí aban irumu lárigiñe, aba lariñagun houn lani disipulugu: “Saragu haña gürigia busentiña haganbuni uganu luáguti asalbaruni” (Mat. 9:​37, 38). Ani murusun dan lárigiñe, ábaya lariñagun houn: “Inarüni, gíbeti nadü le lunbei lalubahóuniwa, […] ligía lunti lubéi hamuriahan luma Bungiu lun lóunahan nadagimeintiña haganaguóun” (Luk. 10:2). Súnwandan meha gabaroun lani Hesusu añahein lan saragu gürigia ha gayaraati haganbuni uganu buiti, danti le haganbuni gürigia uganu le ábati hagundaarun (Luk. 10:21).

16. Ka hénpulu layusurubei Hesusu lun larufuduni lúntima lan larihín apurichihani lau aban lubuidun igaburi? (Lúkasi 13:​18-21; ariha humóun giñe iyawaü).

¹⁶ Arufudahati Hesusu houn lani disipulugu líderagubaña lan lubuidun saminaü luma ugundani lun hakipuragun houngua lau ubebeni lidan apurichihani. Ariha waméi bián hénpulu le líchugubei (aliiha huméi Lúkasi 13:​18-21). Luagu aban oubaü, ariñagati ítara liña lan uganu luáguti Larúeihan Bungiu kei tila aban mosutása le áhüchübei darí lun aban lan tídibu wewe le wéiriti. Lau dimurei le lariñaguña hánharuba lan saragu gürigia lun uganu buiti, úabaña lan ni aban adügütiña lun maganbun hamani. Luagu le ábanya oubaü, ariñagati ítara liña lan Larúeihan Bungiu kei lébini. Ítara liñati lafuranguagüdüni lapurichihóuba lan uganu buiti lidan saragu fulasu Ubouagu ani ladügüba lan lun hadügün gürigia asansiruni lidan habagari, íbini marihíniwa lan lidan lagumeseha. Lau hénpulu le, íderagua lumutiña lani disipulugu lun harihini lanügüba lan lapurichihóuniwa uganu saragu buiti houn saragu gürigia.

17. Ka lébunabei lunti lan warufudun aban lubuidun igaburi luagu ministeriu?

¹⁷ Aban katei le ínchahabaliwa lun wapurichihan lau ubebeni lau warihini sun le ibiha táalibei lóundarun Heowá lidan sun ubóu uguñe weyu seremei dasi le. Sagü irumu hachülürün saragu míñunu gürigia lidoun Aritaguagülei ani aturiaha hamutu Bíbülia wama. Ani saraguñanu san-milu agumeserutiña apurichiha wama ani badisei hagía. Ibidiñeti woun átirirügaaña lan gürigia lúntiña hánharun lun uganu le. Lérügüñein wasubudira lóundaraguñanu lan Heowá saragu gürigia ha lúnbaña hásügürün lau ibagari lídangiñe saragu asufuriruni le yarafaalibei (Aruf. 7:​9, 14). Heowá, ligía Laburemebei ichari, subuditi lun gíbegiña lan gürigia lúntiña hánharun lun inarüni. Ligía gébuna lubéi lun wasigirun apurichiha.

18. Ka wabusenrubei lun harihini gürigia dan le wapurichihan?

¹⁸ Súnwandan subudiwa hamá lani Hesusu disipulugu ha inarünitiña lau hapurichihan lau ubebeni. Dan le harihinbalin gürigia ganigi luma ubebeni le hawagubei apostolugu, “ábati hasubudiruni luagu hádangiñetiña lan ha meha éibugubaña luma Hesusu” (Adü. 4:13). Busentiwa giñe, danme lan le harihiniwa gürigia apurichiha, lun harihini wapurichihaña lan lau ubebeni ítara kei meha lapurichiha Hesusu.