Sigí wamá abagarida lau afiñeni

1. Ka uagu gunda lubéi meha apostolu Pábulu lau le lanúadirubei lidan libagari?

SUBUDIHALI meha lun apostolu Pábulu málühali lan afarúa hilagubei. Gama lumoun, dan le lasaminarun luagu le adüga láalibei lidan libagari kei kristiánu, sanditi óunwenbu ugundani. Ka uagu? Ligía guánarügü ariñagubei: “Eíbaguaadina chülǘ lúmoun lébeja, adǘga náali sun le rúlaalíbei Búngiu nun lun nadǘgüni” (2 Tim. 4:​6-8, Lerérun Búngiu to Lánina Iséri Darádu). Buiti lanúadirun apostolu Pábulu lau layusuruni libagari lun leseriwidun lun Heowá, ligía lachoururunbalin gunda lan Heowá lau. Ítara kei Pábulu, busentiwa giñe wanúadirun buidu lun gunda lan Heowá wau. Ida luba wibihini?

2. Ka mini lubéi wabagaridun lau afiñeni?

² Dan le layanuhanbei Pábulu luougua luma hawagu amu kristiánugu, aba lariñagun: Wabagariduña lau afiñeni, mama luagu le warihibei (2 Ko. 5:7). Dan le lariñawagún labagariduña lan aban gürigia lau afiñeni, mini lan larufuduñein lan afiñe lan luagu ladundehan Bungiu lidan libagari. Arufudati lau le lanúadirubei ladügün lidan libagari chouru lan líchuguba lan Heowá lafayeiruaha ani lasagaruba lan buiti lau lafalaruni ladundehan Heowá le tídanbei Bíbülia (Sal. 119:66; Ebü. 11:6). Luéigiñe le aban oubaü, gürigia le abagaridubei lau le larihibei, anúadira laali ladügüni le lasaminarubei, mini lan, le larihibei, le laganbubei luma le lasandirubei.

3. Ka buiti wasagarubei lau wabagaridun lau afiñeni? (2 Korintuna 4:18).

³ Inarüni anihein lan dan wanúadirun wadügün somu katei luágurügü le warihibei, le wasandirubei luma le waganbubei. Lau sun lira, mídinbei woun buidu ánhawa anúadira wadügün somu katei súdiniti luágurügü le wasandirubei. Ka uagu? Ladüga mama súnwandan gayara lan wafiñerun luagu le wasandirubei, luagu le waganbubei ni luagu le warihibei. Lanwoun lira, ánhawa abagarida luágurügü le warihibei, gayaraati wadügün katei le aubei magundan lan Heowá lau (Apur. 11:9; Mat. 24:​37-39). Ánhawa éibuga lidan afiñeni, chóuruti wanúadirubei lan le “hínsiñebei lun Wabureme” (Efe. 5:10). Ánhawa afalarei ladundehan Bungiu, wasandiruba darangilaü ani gúndaabadiwa (Sal. 16:​8, 9; Isa. 48:​17, 18). Ani ánhawa asigira abagarida lau afiñeni, gayaraabei wawinwandun lun súnwandan (aliiha huméi 2 Korintuna 4:18).

4. Ida liña wasubudiruni anhein wabagariduña lubéi lau afiñeni o wabagariduña lan lau le warihibei?

⁴ Ida liña wasubudiruni anhein wabagariduña lubéi lau afiñeni o wabagariduña lan lau le warihibei? Buídurügüti wadügüni álügüdahani burí le: “Ka adundehabalina dan le lunti lan nanúadahan? Luágurügüñein san le narihibei nafiñera, o afiñetina luagu ladundehan Heowá?”. Lidan aturiahani le wafurendeiruba ida luba lan wabagaridun lau afiñeni lidan ǘrüwa katei súdiniti le lunbei wadügüni lidan wabagari: 1) dan le wáluahan wadagimanu, 2) dan le waríaahan kaba lan uma wamarieida, luma 3) dan le weresibirun adundehani túmagiñeti lóundarun Heowá. Lidan kada kesi warihiba ka lan lunbei gabaroun wamani lun gayara lan wanúadirun buidu.

DAN LE WÁLUAHAN WADAGIMANU

5. Lúnrügüba san átiribei lan wagañeirun wetenira dan le wáluahan wadagimanu?

⁵ Maribanti busén wamá wawadigimaridun lun gayaraabei lan wagañeihani le wemegeirubei luma lun wanuriahaniña tílana waban (Apur. 7:12; 1 Tim. 5:8). Anihein wadagimanu fáyeiti ani adügati lira lun gayaraabei lan libihini gürigia le lemegeirubei luma lun lareidun lubá ámuñegü. Gama lumoun, anihein wadagimanu mafayeiti, lúnrügüñein wagañeihani létima hemegeirubei tílana waban. Ligíati, dan le wanúadahan kaba lan wadagimanu un wánhara, maribanti lun gabaroun wamani átiribei lan wagañeirun. Lau sun lira, anhein etenira aban gürigia lúnrügü katei le, mini lan, labagariduña lan lau le larihibei.

6. Ida liña warufuduni wabagariduña lan lau afiñeni dan le wáluahan wadagimanu? (Ebüréu 13:5).

⁶ Ánhawa abagarida lau afiñeni, gabaroun wabéi giñe ka lan lánibei wadagimanu luma wamadagua luma Heowá. Álügüdagua wamá woungua: “Ladügüba funa san wadagimanu le lun nadügün katei le iyereegubei lun Heowá? Ladügüba funa san lun leberesehani náhuduragun lun? Ladügüba funa san lun nígiruniña tílana nuban o niduheñu lun nidin awadigimarida dise luagu saragu dan?” (Ari. 6:​16-19; Fili. 1:10). Anhaün óunaba lun furumiñeguarügü álügüdahani le, anha, buídubei lun mánharun humá lun wadagimanu le, íbini hénrengu lan ladarirúniwa wadagimanu. Kei wabagariduña lubéi lau afiñeni, arufudati le wanúadirubei chouru wamani san luagu san líchugubei lan Heowá le wemegeirubei woun (Mat. 6:33; aliiha huméi Ebüréu 13:5).

7, 8. Ida liña larufudun aban íbiri le awinwandubei Suedi Meriga labagariduña lan lau afiñeni? (Ariha humóun giñe iyawaü).

⁷ Gabaroun lumuti aban íbiri le awinwandubei Suedi Meriga gíriti Javiera súdini lan labagaridúniwa lau afiñeni. Ariñagati: “Tidan kónpeni to ñein lubéi nawadigimarida, gachansitina yebe lun nibihin aban wadagimanu le fáyeitimati ani le yebe lunbei ladügün lun buidu lan dan nun”. Gama lumoun, busenti meha Javier lun prekursoru lan. Ariñagati: “Aba nidin ayanuha luma tábuti kónpeni le arihibei lau wadagimanu ligía lidan ageiraü. Lubaragiñe nebelurun ayanuha luma, aba nafurieidun lun Heowá, chóuruñu subudi lani ka lan buídutimabei nun. Busentina meha buídutima lan nagañeirun gama lumoun, mígirunbadina meha lun ladügün wadagimanu lun leberesehani numadagua luma Heowá”.

⁸ Ariñagati Javier: “Sun anaha lan ayanuha luma tábuti kónpeni, aba lariñagun nun gabügürüguabei lan náfuridun darü. Lau saragu inebesei aba nariñagun lun siñabei lan lugundun mosu nagunfulirun lau náhuduragun lun Bungiu”. Aba lamahadun Javier lun wadagimanu ligía, ani bián dimaasu lárigiñe, aba ladügagun lungua prekursorume. Dan lárigiñe, lídanmeme irumu ligía, aba ladarirun aban wadagimanu le gayaraabei ladügün lun leseriwidun kei prekursoru. Ariñagati: “Aganba lumuti Heowá nafurieidun, gúndaatina saragu lau wadagimanu le, lugundun ruti chansi nun lúntima neseriwidun lun Heowá luma houn níbirigu”.

9. Ka hafurendeirubei lídangiñe lásügürün Trésor?

⁹ Ka lunbei wadügüni ánhawa íchiga fe aniha lan wadagimanu eberesehei wamadagua luma Heowá? Ariha waméi le asuseredubei lun Trésor, aban íbiri kongona. Abahüdahati: “Aba nadarirun aban wadagimanu le buiti, gáñeitina ǘrüwa wéiyaasu sügǘ luéi meha nagañeirun luagu aban dan. Lanwoun lira, inebetina meha houn saragu gürigia”. Gama lumoun, anihein meha dan machülügubeiti Trésor adamuridagua ladüga darü lan meha láfuridun lídangiñe wadagimanu. Dǘgüdatiña meha giñe luagu lun lariñagun iyeeni lun gayaraabei lan laramuduni mabusigari le adügǘbei tidan kónpeni. Anihein meha dan busén lan lígiruni wadagimanu ligía, gama lumoun, nidiheriti meha luagu siñabei lan ladarirun amu. Ka íderagubalin? Ariñagati: “Íderagua lumutina dimurei le lídanbei Abakúku 3:​17-19 lun gunfuranda nani íbini lan nerederun maseinsunga, líderagubadina lan Heowá. Ligíati, aba nígiruni wadagimanu ligía”. Ábaya lariñagun: “Saminatiña saragu ábutigu buídurügaali lan lagañeirun aban gürigia, aranseñu liña lan lun másügürün lan dan hama tílana luban ni lun letenirun lun katei lánina leseriwidun lun Bungiu. Gúndaatina saragu lau nóunigiruni numadagua luma Bungiu luma lun nóunigiruniña niduheñu. Aban irumu lárigiñe, aba líderagunina Heowá adarira aban wadagimanu le adügübei lun nibihini le nemegeirubei luma lun gadaani nan lun neseriwidun lun. Dan le wíchuguni Heowá lidan furumiñeti lúgaaru, másiñati ñeinbei lan dan lóuguabei lan waseinsun o maseinsubadiwa lan, gama lumoun, Heowaba óunigirawa”. Ligíati, ánhawa afiñera luagu ladundehan Heowá luma luagu le füramase lubéi, wabagariduba lau afiñeni ani labinirubadiwa.

DAN LE WARÍAAHAN KABA LAN UMA WAMARIEIDA

10. Ida luba tarufudun somu íbiri anhein tabagariduña lubéi lau le tarihibei dan le taríaahan kaba lan uma tamarieida?

¹⁰ Aban idewesei lúmagiñeti Heowá maríei ani maribanti busén lan gürigia lamarieidun. Dan le busén tan aban íbiri tamarieidun luma ítaga íbiri, másiñati gabaroun tani ligaburi laríawagun, ligaburi lóuserun, le ariñawagúbei luagu, ligaburi lóuseruniña liduheñu, ligaburi lóuserunu lúmati anhein gaseinsun lubéi.b Íbini súdini lan katei le, anhoun etenira lúnrügü katei le, tabagariduña lau le tarihibei.

11. Ida liña warufuduni wabagariduña lan lau afiñeni dan le waríaahan kaba lan uma wamarieida? (1 Korintuna 7:39).

¹¹ Pántati Heowá hau íbirigu dandu wügüriña kei würiña ha afalarubalin ladundehan dan le haríaahan kaba lan uma hamarieida. Aban lídangiñe adundehani le lau hagurabahan lun derebugu lan hasaminan lun gadaradun hamá (1 Ko. 7:36). Ábaya katei le aubei lagundaara Heowá hau, lau háluahan igaburi buiti le lagurabubei hámagiñe ha busenbaña hamarieidun huma (Ari. 31:​10-13, 26-28; Efe. 5:33; 1 Tim. 5:8). Ani anhoun ladarihan aban wügüri le mama Gefenti aban íbiri, falá tumuti adundehani le lídanbei 1 Korintuna 7:39 (aliiha huméi), lun tamarieidun lúmarügü aban gefenti luagu Heowá. Ítarameme humá abagarida lau afiñeni, chóuruñu líchugubei lan Heowá le hemegeirubei hun lun gunda humá (Sal. 55:22).

12. Ka hafurendeirubei lídangiñe tikesin Rosa?

¹² Ariha waméi tikesin Rosa, aban prekursora kolonbiana. Lidan fulasu le ñein lubéi tawadigimarida, aba tasubudirun aban wügüri le mama gefenti luagu Heowá, ábati lagumeserun adarihoun. Ani hínsiñeti yebe giñe tun. Ariñagatu: “Genegeti aban lan eyeri buiti. Íderagua lumutiña gürigia ha lídanbaña fulasu le ñein lubéi lawinwanda, ani buiti lanügüni libagari. Hínsiñeti meha nun ida liña lan lóuserunina. Sun igaburi buiti le nagurabubei lúmagiñe aban eyeri, gagaburi lumuti, le turobulibei mama lan gefenti luagu Heowá”. Ariñagayatu Rosa: “Hénrenguti meha nun nariñagun lun uá lan, lau sun hénrengu lan yebe nun nariñaguni dimurei le lugundun hínsiñeti yebe nun. Lidan meha dan ligía, sandiguatina meha nungua nábuguarügü ani busentina meha namarieidun, gama lumoun, madaritina meha aban íbiri lidan inarüni lun namarieidun luma”. Lau sun lira, metenitu meha Rosa lúnrügü le tarihibei, aba tasaminarun ida luba lan buga gani lan le tanúadirubei luma tumadagua luma Heowá. Ítara liñati, aba tadüraaguni tumadagua luma wügüri ligía ani ábati beresegu tan lidan teseriwidun lun Heowá. Murusun dan lárigiñe, aba tagunbirahóun tidoun Leskuela houn Apurichihatiña Larúeihan Bungiu ani guentó ábanharu prekursora espechalitu. Abahüdaguatu: “Buíngüda laaru Heowá nanigi lau saragu ugundani”. Inarüni mama lan aban katei ménrengunti labagaridun gürigia lau afiñeni, dántima le busén lan gürigia ladügün aban katei, lau sun lira, sun le lamuriahabei Heowá wama, lun wabuidun guánarügü.

DAN LE WERESIBIRUN ADUNDEHANI TÚMAGIÑE LÓUNDARUN HEOWÁ

13. Ida luba larufudun aban íbiri labagariduña lan lau le larihibei dan le leresibirun adundehani túmagiñe lóundarun Heowá?

¹³ Súnwandan weresibirun adundehani túmagiñe lóundarun Heowá le íderagubaliwa lun weseriwidun lun, hámagiñe lan yebe wéiyaaña lidan afiñeni, hámagiñe lan yebe óunigirutiña sirkuitu, hámagiñe lan yebe íbirigu ha arihubaña tau Beteli o lúmagiñe lan yebe Musu Úaraguati. Gama lumoun, másiñati anihein lan dan ua lan gunfuranda wamani ka lan uagu lichugúa ítaga adundehani. Kaba wadüga? Weteniruña hamuga san asaminara anhein buidu lubéi o mabuidun lan ítaga adundehani le ichugúbei woun? Weteniruña hamuga san lun hachara ha íchugubalin woun? Ánhawa hamuga etenira lun katei burí le, wabagariduña hamuga lau le warihibei.

14. Kaba íderaguawa lun wabagaridun lau afiñeni dan le weresibirun adundehani túmagiñe lóundarun Heowá? (Ebüréu 13:17).

¹⁴ Dan le wabagaridun lau afiñeni, afiñetiwa tídangiñe sun wanigi ladundehañoun lan Heowá lóundarun ani subudi lan le gádanbaliwa lun. Ligíati gaganbadi wabéi lau sun wagundan luma lau lóufudagun lun adundehani le ichugúbei woun (aliiha huméi Ebüréu 13:17). Subudi wamuti ánhawa lan gaganbadi, wídehaña lan lun ñein lan úarani lidan damuriguaü (Efe. 4:​2, 3). Gabaroun wamuti labinirubadiwa lan Heowá ánhawa gaganbadi lun adundehani le ichugúbei woun íbini chará hamá íbirigu ha íchugubalin (1 Sam. 15:22). Ani anhein ariha Heowá lunti lan laransehan somu katei, ladügübei danme lachülürün oura ligía (Mik. 7:7).

15, 16. Ka íderagubalin Kevin lun labagaridun lau afiñeni? (Ariha humóun giñe iyawaü).

¹⁵ Ariha wamá aban sügǘ le arufudubalin buiti le lanügübei wabagaridun lau afiñeni. Lau sun ayanuhóua lan chumagü Perú, añahein giñe saragu gürigia ha ayanuhabalin amu burí iñeñein, kechua aban lídangiñe iñeñein ligía. Luagu saragu irumu, ñǘdüntiña meha íbirigu ha ayanuhabaña kechua áluahaña gürigia ha ayanuhabalin iñeñein le lidan fulasu le ñein lubéi hapurichihan. Gama lumoun, aba lasansirun ligaburi háluahoun ha ayanuhabaña kechua ladüga lasansirun lilurudun ageiraü (Rom. 13:1). Ábati hatatirun fiu íbirigu álügüdagua houngua ida luba lan hadüga lun hadariruniña gürigia ha ayanuhabaña kechua. Aba hafalaruni íbirigu iseri adundehani le ichugúbei houn, ani biní lumuti Heowá áfaaguni le hadügübei lun hadariruniña saragu gürigia ha ayanuhabaña kechua.

¹⁶ Kevin, aban wéiyaali lidan afiñeni le ayanuhabalin kechua, ligía aban hádangiñe ha meha machourunbaña luagu iseri adundehani le ichugúbei. Ariñagati Kevin: “Dan le naganbunbalin iseri adundehani le ichugúbei woun aba nálügüdagun nungua: ‘Ida lubati wadüga lun wadariruniña kechua guentó?’”. Ka ladügübei Kevin? Aba lariñagun: “Saminatina luagu dimurei burí le lídanbei Ariñawagúni 3:5. Lanwoun lira, aba nararamagun asaminara luagu le ladügübei Moisesi. Aba líchugun Heowá aban dasi lun Moisesi lun lasagaruniña ísüraelina Ehiptugiñe luma lun lanügüniña luagun Barana Funati, lau sun genege lan meha hénrengubei lan lun hesefurun hawéi ehiptuna. Gama lumoun, gaganbaditi Moisesi lun le lariñagubei Heowá lun, ani aba labiniruni Heowá lau ladügün aban lanarime milaguru” (Afu. 14:​1, 2, 9-11, 21, 22). Aranseñu liña meha Kevin lun ladügün asansiruni lidan ligaburi lapurichihan. Ida liña lidin lun? Aba lariñagun Kevin: “Wéiritu nanigi lau narihin ida liña lan labiniruniwa Heowá. Lau binadu ligaburi apurichihani, gíbeti meha wéibugun ani míbetiña kechua wadarirun. Ánheinti guentó, ñǘdüntiwa apurichiha lidan fulasu le ñein lubéi wadarira saragu hádangiñe. Adügaali lira lúntima wayanuhan hama gürigia, wadügün burí bisida, luma lun wíchugun aturiahani houn. Ani gíbetimahaña gürigia abasiihatiña lidoun adamuridaguni”. Furanguti dan lan le wabagaridun lau afiñeni, súnwandan labiniruniwa Heowá.

17. Ka furendei humaalibei lidan aturiahani le?

¹⁷ Lidan aturiahani le, furendeihadiwa ida luba lan wabagaridun lau afiñeni lidan ǘrüwa katei súdiniti. Ani lunti wasigirun abagarida lau afiñeni lidan furumiñeguarügü katei le wanúadirubei wadügün lidan wabagari, kéiburi katei luáguti isebáhari, hagüriahóun isaanigu, luma kaba lan luwuyeri aturiahani waturiahan. Sagü wanúadahan kaba lan wadüga lidan wabagari, mosu gabaroun wamani wamadagua luma Heowá, ladundehan luma füramasei le líchugubei woun luagu lóunigirubadiwa lan, ani meteni wamá lúnrügü le warihibei. Ítarati, ‘wafalarubei Heowá le Wabungiute ani gaganbadibadiwa lun súnwandan’ (Mik. 4:5).