Lanügüba saragu buiti woun gamadagua wamá hama wábirigu

1, 2. Ka aban lídangiñe katei súdinibei lun Heowá, ani ka labusenrunbei lun wadügün?

ABAN katei súdiniti lun Heowá, lun buidu lan wóuseruniña gürigia. Ariñagati Hesusu lunti lan hínsiñe hamá gürigia woun kei wínsiñe wóuniwagua (Mat. 22: 37-39). Lunti buidu lan wóuseruniña íbini gürigia ha máhuduragunbaña lun Heowá. Ítara liñati wáyeihani Wáguchi Bungiu le siélubei “le óunahabalin weyu houn buítiña hama wuribatiña, óunahalei huya dandu houn múarantiña keisi houn úaratiña” (Mat. 5:45).

² Íbini hínsiñe hamá sun gürigia lun Heowá, sanditi aban lanarime ínsiñeni hawagu ha gaganbadibaña lun (Huan 14:21). Busenti lun wáyeihani, ligía línchahabadiwa lun “ñeinlá saragu ínsiñeni” wadan. Ani ariñagati giñe: Hínsiñegua “humá húmagua keisi iduheñu” (1 Fe. 4:​8, Rom. 12:10). Ítara liña ínsiñeni le kei le wasandirubei luagu aban waduhe o luagu aban besi wamada.

3. Ka lunbei waritaguni luagu ínsiñeni?

³ Ítara liña ínsiñeni kei aban nadü, lun láhüchün mosu lounigirúniwa luma lun láturawagun. Ariñagati apostolu Pábulu houn kristiánugu: “Hínsiñeguamemegua humá húmagua keisi íbirigu” (Ebü. 13:1). Busenti Heowá lun wasigirun arufuda ínsiñeni houn amu. Lidan aturiahani le, wariha ka lan uagu lunti lan wasigirun ayarafada houn wábirigu lúmati ida luba lan wadüga lun wibihini.

KA UAGU LUNTI LUBÉI GAMADAGUA WAMÁ HAMA WÁBIRIGU

4. Kaba íderaguawa lun wasigirun etenira lun úarani le uágubei layanuhóua lidan Sálumu 133:1? (Ariha humóun giñe iyawaü).

⁴ (Aliiha huméi Sálumu 133:1). Ítara kei abürühati Sálumu ariñagatiwa buidu lan gamadagua wamá hama gürigia ha hínsiñebei Heowá houn. Lau sun lira, lau lásügürün dan gayaraati wéiguadun tidoun sádara lun meteni wamá lun úarani le hádanbei lumutuniña Heowá. Gayaraati lasuseredun woun kei lun aban gürigia le arihibei sagü weyu aban lanarime lubuidun tídibu wewe ani lau lásügürün dan, kei héchuhali lan arihoun sagü weyu aba meteni haali lan lun tubuidun. Ítarameme, másiñati héchuhadiwa lan arihaña wábirigu sagü weyu luma saragu wéiyaasu lidan dimaasu, kaba íderaguawa lun warihiniña kei meha warihiniña dan meha le wasubudirunbaliña? Líderagubadiwa wararamagun asaminara ka lan uagu gebegi habéi kada aban hádangiñe woun luma lun damuriguaü.

5. Ka ladügübei ínsiñeni le warufudubei wámagua hawagu amu gürigia?

⁵ Añahein gürigia aba taweiridun hanigi saragu dan le houdin luagu furumiñeti wéiyaasu lidoun wadamuridagun ladüga ínsiñeni le warufudubei. Dan le harihini ínsiñeni le aba hachoururuni anihán lan le inarünibei. Ariñagati Hesusu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Ariha waméi tikesin Chaithra, aban würi to aturiahaboun tidan luban furendei íñuti to giñe agumeseruboun aturiahoun Bíbülia. Aba teresibirun aban agunbirahagülei lubá aban adamurini wéiriti, lárigiñe furumiñeti weyu lani adamurini aba tariñagun tun íbiri to arufudahaboun tun tídangiñe Bíbülia: “Arihabá san, míchugiña nagübürigu ni aban óuburuni nun. Ánheinti lidan badamuri, furumiñetibei weyu le naubei ñein resibitina 52 salalaguaü! Adügaaña lumutuniña Heowá ha lun nasandiruni línsiñehabu. Busentina lun hádangiñe nan”. Sigitu Chaithra aturiahoun Bíbülia ani aba tabadiseirún lidan irumu 2024. Dan le harihini gürigia ha achülürübaña luagu furumiñeti wéiyaasu katei buiti le wadügübei dandu ínsiñeni le warufudubei wámagua, anihein dan aba línchahaniña igaburi le lun heseriwidun lun Heowá (Mat. 5:16).

6. Ida liña lóunigiruniwa wayarafaduntima houn wábirigu?

⁶ Barüti buiti woun wayarafadun houn wábirigu lugundun góunigi hamutiwa. Ariñagati Pábulu houn kristiánugu: “Lubaragiñe lira, ru humá gurasu húniwagua sagü weyu […]. Góunigi humá luéi leyeedagunün figóu, edereragüdounme hanigi” (Ebü. 3:13). Ánhawa asandiragua woungua siñá lan woun ani wáfurida lan lídangiñe üma le buídubei, gayaraati layusurun Heowá aban íbiri lun líderaguniwa lun wasigirun éibuga lidan üma le buídubei (Sal. 73:​2, 17, 23). Ma lubuidun gayara lan wibihini ídemuei le hámagiñe wábirigu!

7. Ka lánibei ínsiñeni luma úarani? (Éfesuna 4:32).

⁷ Hádangiñetiwa gürigia ha adügübalin sun hayaraati lun harufudun ínsiñehabuni, ligíati wibihibei saragu abiniruni (1 Huan 4:11). Kei hénpulu, ínchaha lumutiwa ínsiñeni lun gaguraasun wamá wabaruagua, ani adügati katei le lun ñein lan úarani inarüniti waganagua (Efe. 4:​2-6; aliiha huméi Éfesuna 4:32). Ligía lébubei larihín ínsiñeni le lidan wadamuridagun, ínsiñeni le marihínbei hadan gürigia ha geyegubaña wau.

INEBEGUA WAMÁ WÁMAGUA

8. Ida liña líderaguniwa Heowá akipuragua woungua lidan aban?

⁸ Anihein lubéi úarani hadan íbirigu lidan sun ubóu ladüga milaguru le ladügübei Heowá íbini gafigoun wamá (1 Ko. 12:25). Ariñagatu Bíbülia: “Arufudahaali Bungiu guánarügü hun lun hínsiñegua humá húmawagua” (1 Tesa. 4:9). Ida luba wadügüni? Ariñaga lumuti woun tidan lererun ka lan lunbei wadügüni lun buidu lan wanügagun wámagua. Ígiratiwa lun larufudahan Heowá woun lau waturiahanu Bíbülia le ñein lubéi layanuha wama, luma lau wawinwanduni le wafurendeirubei (Ebü. 4:12; Sant. 1:25). Luagu katei le wáfaagua wagía gefentiña luagu Heowá lun wadügüni.

9. Ka larufudahabei Rómana 12:​9-13 woun luagu lunti lan inebegua wamá wámagua?

⁹ Ida liña tíderaguniwa Lererun Bungiu lun wayarafadun houn wábirigu? Ariha waméi le lariñagubei apostolu Pábulu lidan Rómana 12:​9-13 (aliiha huméi). Teni wamá lun dimurei “hímeigua humá hungua inebegua huguyame húniwagua”. Ka mini lubéi le? Lunti lan wáluahan chansi lun warufuduni ínsiñeni le lidan ámuñegueinarügü igaburi, kei burí lau ferudunagua wamá wámagua geresibiradi wamá gürigia wábiñe luma lun gíchigadi wamá (Efe. 4:32). Magurabaha wamá lun larufudúniwa igaburi le woun furumiñe, wagía lan arufudei houn amu furumiñe. Ítara luba warihini lagunfulirun “dimúrei le laríñagubei Wabúreme Jesúsu dan le laríñagunbei: ‘Gúndaatimáati le íchugubei sügǘ láu le erésibirubei’” (Adü. 20:​35, Lerérun Búngiu to Lánina Iséri Darádu).

10. Ida luba hímeigua wamá wámagua dan le wawadigimaridun hama amu? (Ariha humóun giñe iyawaü).

¹⁰ Teni wamá lun le. Lárigiñebei lariñagun Pábulu lunti lan hímeigua wamá wámagua ani inebegua wagíame wámagua, aba lariñagun: “Mamagualigu humá lidan luadigimari Wabureme; seriwi huméi tau sun hanigi”. Aban wügüri le benefati, dan le lariñawagúniwa lun lun ladügün ítaga dasi, lau lóufudagun aba ladügüni. Ru lumuti Ariñawagúni 3:​27, 28 adundehani le: “Mamaharabá badügün fulesei lun le amuriahati buma dan le gayara lan badügüni”. Ánhawa ariha anihein lan somu gürigia le mégeibei ídemuei, adüga waméi sun wayaraati lun wíderaguni. Mígira waméi lun amu dan, ni lun wasaminarun híderagubei lan amu (1 Huan 3:​17, 18).

11. Ka gayaraabei líderaguniwa lúntima wayarafadun houn wábirigu?

¹¹ Ábanya igaburi le arufudubei inebe hamá amu woun lau feruduna wamaniña lau lóufudagun dan burí le hachararun woun. Ariñagati lidan Éfesuna 4:26: “Anhaün agañida, mafigouha humá; málüdala weyu hau gáñiñu”. Ka uagu? Lun míchugun “humá lúgaaru lun Mafia”, kei lariñawagúniwa lidan bérusu 27. Ariñagati Heowá tidan Lererun saragu wéiyaasu lunti lan feruduna wamaniña ha achararubaña woun. Ru tumuti gárada houn Kolosana adundehani le woun lidan kapítulu 3:​13, le ariñagubei: “Ferudunagua huguyame húmawagua”. Lau feruduna wamani hachara wábirigu ligía aban igaburi le buídutimabei lun wayarafadun houn. Ítara liña wídehan “lun lidan [wa]má aban súnwandan lau lídehan” sífiri, “lidan darangilaü le óundarubaliwa súngubei” (Efe. 4:3). Lidan amu dimurei, anhein ua feruduna wamaniña amu, siñabei ñein lan úarani ni darangilaü waganagua.

12. Ida liña líderaguniwa Heowá lun feruduna wamaniña ha achararubaña woun?

¹² Inarüni, anihein lan dan hénrengu lan lun feruduna wamaniña ha achararubaña woun. Lau sun lira, gayaraati feruduna wamaniña lau lídehan lani Bungiu sífiri. Lárigiñe tínchahaniwa Bíbülia lun warufudun inebehabu, ínsiñeni luma benefaü, ariñagatu: “Seriwi huméi tau sun hanigi”. Lun wadügüni lira, megei wamuti lídehan lani Bungiu sífiri sandu lun wadügüni le buídubei lau ubebeni, arufuda wagíame ínsiñeni luma lun feruduna wamaniña ha achararubaña woun tídangiñe sun wanigi (Rom. 12:11). Ligía lunti lubéi wayumuragun lun Heowá lun líderaguniwa (Luk. 11:13).

“LUN UA LAN FÁNREINGUAÜ” HAGANAGUA

13. Ka katei gayaraabei lafanreinraguagüdüniwa?

¹³ Añahein “sun [hawuyeri] gürigia” lidan damuriguaü (1 Tim. 2:​3, 4). Kei ámuñegueinarügü wabéi wawariuagua ligía múaran wabéi lidan katei le wanúadirubei, kei burí waranseragun woungua, árani le wanúadirubei lun lagaranihóun woun lúmati burí isebáhari. Ánhawa móunigi gayaraabei ladügün katei le lun ñein lan fánreinguaü wadan (Rom. 14:4; 1 Ko. 1:10). Gama lumoun, arufudahaali Bungiu woun lun hínsiñegua wamá wámagua, ligía siñá lubéi wariñagun buídutima lan le wanúadirubei luéi le hanúadirubei amu (Fili. 2:3).

14. Ka lunbei wáfaagun lun wadügüni súnwandan, ani ka uagu?

¹⁴ Ábanya katei le lunbei wadügüni lun ua lan fánreinguaü lidan damuriguaü lau wáfaagun súnwandan lun wíchugun gurasu luma dǘgüdaguaü houn amu (1 Tesa. 5:11). Málügili luéigiñe hagiribudun ha sagawaaña lídangiñe damuriguaü lun Heowá. Ani málügili giñe lúmagiñe hagumeserun adamuridagua ha meha madamuridagunbaña ani mapurichihan hagía. Resibi wamutiña íbirigu ha lau warüna daragu (2 Ko. 2:8). Ariñagatu aban íbiri to agiribuduboun lidoun damuriguaü lárigiñe 10 irumu le taubei madamuridagun tuguya ani mapurichihan: “Sun íbirigu aba hayabin abusura nun lau saragu ínsiñeni” (Adü. 3:19). Ida liña tasandiragun tungua lau ínsiñeni le harufudubei íbirigu tun? Ariñagatu: “Sanditina líderaguñadina lan Heowá lun gunda nan”. Dan le wáfaagun lun wíchugun dǘgüdaguaü, gayaraati layusuruniwa Hesusu lun wíderaguniña “ha buchaañabaña uagu” (Mat. 11:​28, 29).

15. Ka katei lunbei wadügüni lun ñein lan úarani? (Ariha wamóun giñe iyawaü).

¹⁵ Lau le wariñagubei gayaraati giñe wídehan lun ñein lan úarani. Ariñawagúati lidan Hobu 12:11: “Arigeirugu aganbubalin dimurei, ítara kei iyumulugu lan asandirubalin liguini éigini”. Aban gürigia le gábouguati súnwandan lóuchuni éigini lubaragiñe leseriwiduni lun lachoururuni anhein semé lubéi. Ítarameme, lubaragiñe wayanuhan lunti wasaminarun buidu libügürü le lunbei wariñaguni, lun wachoururuni dimurei lan le lunbei wariñaguni ru lan dǘgüdaguaü, gurasu luma lun hasagarun ha aganbubaliwa buiti lídangiñe le wariñagubei (Sal. 141:3; Efe. 4:29).

16. Kátaña lúnbaña háfaagun lun híchugun dǘgüdaguaü lau ligaburi hayanuhan?

¹⁶ Wügüriñatima maríeitiña, agübürigu, hama úguchurugu lúnbaña háfaagun lúntima hayanuhan lidan aban igaburi le íchuguti dǘgüdaguaü (Kol. 3:​19, 21; Titu 2:4). Wéiyaaña lidan afiñeni lunti giñe aban hamá gürigia ha íchugutiña dǘgüdaguaü luma gurasu houn lubúeingu Heowá (Isa. 32:​1, 2; Gal. 6:1). Ariñagati aban ariñawagúni: “Ma lubuidun dan le ladarirúniwa óunabagülei le richabei; dan létima liabin lidan dan!” (Ari. 15:23).

ARUFUDA WAMÁ ÍNSIÑENI LE INARÜNITI

17. Ka lunbei wadügüni lun warufudun ínsiñeni inarüniti houn wábirigu?

¹⁷ Ariñagati apostolu Huan: “Moun lumuti wayumárurügü lan wínsiñehabu; lunti aban lan ínsiñehabuni le arihúati lidan katei le wadügübei” (1 Huan 3:18). Ka lunbei wadügüni lun warufudun ínsiñeni inarüniti? Eibu wásügürün dan hama wábirigu, eibu wayarafadun houn ani ábame laganwoundun ínsiñeni le wasandirubei hawagu. Áluaha wamá chansi lun wayarafadun houn wábirigu lidan adamuridaguni luma lidan apurichihani. Lanwoun lira, sagá wamá dan lun wabisidahaniña. Anhein wadüga gayaraabei lariñawagúniwa wawagu: “Arufudahaali Bungiu guánarügü hun lun hínsiñegua humá húmawagua” (1 Tesa. 4:9). Anhein wadüga ítara, warihibei lagunfulirun dimurei le: “Ariha humá ida liña lan lubuidun lun haganóun íbirigu lidan aban hámagua!” (Sal. 133:1).