Mama wábuguarügüñadiwa

1, 2. a) Ka uagu gayara lubéi wariñagun mama lan wábuguarügüñadiwa dan le wagagibudagun luma turobuli? b) Kaba wariha lidan aturiahani le?

ANHEIN wásügürüña lubéi lídangiñe turobuli hénrenguti, másiñati wasandiragun woungua kamá wábuguarügüñadiwa tidan aban tiraüraü guríara baranaha lidan aban liñawan dan. Lau sun lira mama wábuguarügüñadiwa, ladüga ariha lumuti Wáguchi Bungiu hínsiñehabuti le siélubei le wasufurirubei ani füramasehaali woun wámabei lan. Ariñaga lumuti Heowá dimurei le lau ínsiñeni lun kada aban hádangiñe lubúeingu ha úaraguabaña: “Íderagua numutibu” (Isa. 41:10).

² Lidan aturiahani le wayanuhaba luagu gádürü igaburi le ídanbei líderaguawa Heowá: 1) adundeha lumutiwa, 2) ru lumuti le wemegeirubei woun, 3) góunigi lumutiwa ani 4) ruti gurasu woun. Füramasehaali woun meberesenga ka lan lénrengunga úmabei wagagibudagua lidan wabagari, maweiyasunbei abulieidagua wawéi ani mágurun lubadiwa. Ligíati gayaraati wachoururuni mámañadiwa lan wábuguarügü.

ADUNDEHA LUMUTIWA HEOWÁ

3, 4. Ida liña ladundehaniwa Heowá? (Sálumu 48:14).

³ (Aliiha huméi Sálumu 48:14). Subudi lumuti Heowá siñá lan wadundehani wabagari wagía wábugua, ligía líchugunbalin adundehani le wemegeirubei woun. Ida liña ladügüni? Yusu lumutu Bíbülia to Lererun (Sal. 119:105). Íderagua lumutiwa tau Lererun lun buidu lan le wanúadirubei luma lun gagaburi wamani igaburi le adügübei lúntima gunda wamá luma lun wemenigidun wawinwanduba lan lun súnwandan.a Kei hénpulu, arufudahati woun lun feruduna wamaniña amu, lun ua lan iyereehabu wamá, lun haruma wamá lidan sun katei luma lun hínsiñegua wamá wámagua tídangiñe sun wanigi (Sal. 37:8; Ebü. 13:18; 1 Fe. 1:22). Anhein warufuda sun burí igaburi le, ábanbadiwa agübürigu buítiña, ábanbadiwa maríeitiña buítiña ani ábanbadiwa giñe umadagu buítiña.

⁴ Adügaali Heowá lun labürüdǘniwa tidan Bíbülia sügǘ burí hawagu gürigia ha ásügürübaña lídangiñe turobuli ani sandiguatiña houngua kei wagía (1 Ko. 10:13; Sant. 5:17). Dan le waliihan luagu le hásügürübei gürigia burí ha, ani winwan waméi le wafurendeirubei lídangiñe, sagatiwa buiti lidan bián igaburi. Furumiñe, furendeitiwa mámarügüñadiwa lan wagía ásügüra lídangiñe lénrengunga lidan wabagari, añahein lan amu ha sügühaña lídangiñe turobuli le wásügürübei ani awanda hamuti lau lídehan Heowá (1 Fe. 5:9). Libiaman, furendeitiwa ida luba lan wagagibudagun luma burí turobuli le (Rom. 15:4).

5. Kátaña layusurubaña Heowá lun líchugun adundehani woun?

⁵ Yusu lumutiña giñe Heowá wábirigu lun ladundehaniwa.b Kéiburi, abisidaha hamuti óunigirutiña sirkuitu damuriguaü ani rútiña yanu le adügübei lun derebugu lan wafiñen, íderagua hamutiwa giñe lun meferidirun wamani lubuidun úarani le waganaguabei (Adü. 15:​40–16:5). Áfaaguatiña giñe wéiyaaña lidan afiñeni tídangiñe sun hanigi lun híderaguniwa lun yarafa wamá lun Heowá (1 Fe. 5:​2, 3). Arufudahatiña agübürigu houn hasaanigu lun línsiñedun Heowá houn, lun buidu lan le lunbei hanúadiruni luma lun hetenirun lun hamadagua luma Heowá (Ari. 22:6). Íderagua hamutiña íbirigu würiña ha derebuguti hafiñen íbirigu ha nibureingiña lau híchugun buiti hénpulu houn luma lau híchugun adundehani luma gurasu houn lau ínsiñehabuni (Titu 2:​3-5).

6. Ka lunbei wadügüni lun wasagarun saragu buiti lídangiñe adundehani le líchugubei Heowá woun?

⁶ Ru laali Heowá adundehani le wemegeirubei woun lun buidu lan le lunbei wanúadiruni luma lun gunda wamá lidan wabagari. Ka lunbei wadügüni lun wasagarun saragu buiti lídangiñe adundehani burí le luma lun warufuduni seremei wamani? Ariñagati Ariñawagúni 3:​5, 6: “Afiñebá luagu Bungiu tau sun banigi, mamalá luagu lualin bichügü”. Anhein wafalara adundehani le, kaba wibiha? Ariñagati bérusu sisi: “Ábame lanügünibu luéigiñe üma le surubei”. Lidan amu dimurei, líderagubadiwa lun wadireirun luéi turobuli luma lun gúndaatima wamá. Ma lueirin weteingiruni Heowá lau hínsiñe wamá lun saragu luma lau líchuguni adundehani le wemegeirubei woun! (Sal. 32:8).

RU LUMUTI HEOWÁ LE WEMEGEIRUBEI WOUN

7. Ida liña líderaguniwa Heowá según le lariñagubei Filipuna 4:19?

⁷ (Aliiha huméi Filipuna 4:19). Amu luéi ladundehaniwa, biní lumuti Heowá sun áfaaguni le wadügübei lun wibihini le wemegeirubei, kéiburi éigini, daüguaü luma aban fulasu lun wawinwandun ñein (Mat. 6:33; 2 Tesa. 3:12). Íbini mariban lan wadiheridun lun wibihini le wemegeirubei lidan wabagari, ariñagati Heowá woun moun lumuti lan wadiheridun saragu luagu burí katei le (Mat. 6:25). Ka uagu moun lubéi wadiheridun saragu? Lugundun füramasehaali lan Wáguchi Bungiu maweiyasunbei lan ígiraña lubúeingu ha úaraguabaña (Mat. 6:8; Ebü. 13:5). Gayaraati wachoururuni lagunfulirubei lan le füramase lubéi ani líchugubei lan le wemegeirubei woun.

8. Ida liña meha líderaguni Heowá Dawidi?

⁸ Samina wamá ida liña lan meha líderaguni Heowá Dawidi dan le lanurahanbei luéi urúei Saulu. Lidan burí sun irumu hénrenguti ligía, ru lumuti meha Heowá lun Dawidi luma houn luwügüriñanigu sun le hemegeirubei lun hawinwandun. Dan meha laritagun Dawidi luagun meha dan ligía, aba lariñagun: “Nibureintina meha, guentó wéiyaadina, ani marihingidina láguruniña Bungiu gürigia ha buídubaña, marihin naaña hasaanigu arihadiha” (Sal. 37:25). Gayaraati giñe ariha humaali lan lidan sun hibagari ida liña lan líchuguni Heowá lau ínsiñeni le hemegeirubei hun luma le hemegeirubei íbirigu.

9. Ida liña líchuguni Heowá le hemegeirubei lubúeingu houn uguñe weyu dan le hásügürün lídangiñe somu chagaguaü lánina liñawan dan? (Ariha humóun giñe iyawaü).

⁹ Ru lumuti giñe Heowá le hemegeirubei lubúeingu houn dan le hásügürün lídangiñe chagaguaü le lanügübei liñawan dan. Kei hénpulu, óunahatiña meha saragu kristiánugu ha lánina furumiñeti sígulu ha awinwandubaña lidan ámuñegueinarügü fulasu ídemuei le hemegeirubei hábirigu ha Herusalénbaña houn, lugundun hásügürüña meha íbirigu hagía lídangiñe aban lanarime ümi (Adü. 11:​27-30; Rom. 15:​25, 26) Uguñe weyu, gíchigaditiña giñe lubúeingu Heowá. Dan le lasuseredun chagaguaü lánina liñawan dan, ínchaha lumutiña Heowá lubúeingu lau ínsiñeni lun híchugun éigini, duna, daüguaü luma árani houn ha ásügürübaña lídangiñe burí turobuli le. Añahein giñe íbirigu ha aransehabarun Luban Adamuridaguni tuma burí haban íbirigu to agadeiruboun. Ani lau lóufudagun adügǘwati aransehani lun lichugún gurasu tídangiñeti Bíbülia houn íbirigu ha eferidirubarun haban o somu haduhe lidan óunweni.c

10, 11. Ka larufudahabei le lásügürübei Boris woun?

¹⁰ Ru lumuti Heowá le hemegeirubei sun gürigia houn lau areini íbini houn ha máhuduragunbaña lun. Áyeiha wamuti giñe Heowá lau wáluahan chansi lun wadügün katei buiti hawagu ha meseriwidunbaña lun (Gal. 6:10). Ídehati wadügüni katei le lun hafurendeirun gürigia luagu Heowá luma tuagu Bíbülia. Ariha waméi le asuseredubei lun Boris, aban máisturu le awinwandubei Ukrania le arihubei tau aban leskuela. Lau sun mama lan aban gefenti luagu Heowá ligía, súnwandan meha buidu lan lóuseruniña gefentiña luagu Heowá ha aturiahabaña tidan leskuela to ñein lubéi lawadigimarida. Dan le laduurunbei wuribu, aba lanurahan lidoun aban fulasu le chóurutimati ani aba híderaguni íbirigu. Dan lárigiñe aba lachülürün lidoun aban Aritaguagülei. Ani dan le laritagun luagu le hadügübei Gefentiña luagu, aba lariñagun Boris: “Seremei numutiña gefentiña luagu Heowá saragu, lugundun ténitiña nun ani góunigi hamana”.

¹¹ Sun wagía gayaraati wáyeihani lugudemehabu Wáguchi Bungiu le siélubei lau wíderaguniña ha mégeihabubaña íbini mama hamá gefentiña luagu Heowá (Luk. 6:​31, 36). Afiñetiwa línchahabaña lan ínsiñeni le warufudubei houn lun busén hamá hafurendeirun luagu Heowá luma lun heseriwidun lun úara wama (1 Fe. 2:12). Meberesenga ánhaña eseriwida lun Heowá o meseriwidun hamá lun buídubei wasandiragun woungua lugundun “gúndaatimati le íchugubei sügǘ láu le erésibirubei” (Adü. 20:​35, Lerérun Búngiu to Lánina Iséri Darádu).

GÓUNIGI LUMUTIWA HEOWÁ

12. Ka füramase lubéi Heowá ladügübei lan hawagu lumutuniña? (Sálumu 91:​1, 2, 14).

¹² (Aliiha huméi Sálumu 91:​1, 2, 14). Füramaseti Heowá lóunigirubaña lan lumutuniña lidan hamadagua luma. Maweiyasunbei Heowá ígira lun ladüraaguni Satanási wáhuduragun lun Heowá (Huan 17:15). Danme le lagumeserun “óunwenbu asufuriruni”, chouru wamuti sunsuinagubei lagunfulirubei lan Heowá le füramase lubéi luagu líderagubadiwa lan lun derebugu lan wafiñen ani sefu láwame (Aru. 7:​9, 14).

13. Ida liña lóunigiruni Heowá kada aban hádangiñe lubúeingu?

¹³ Ida liña lóunigiruniña Heowá kada aban hádangiñe lubúeingu? Luagu aban oubaü, yusu lumutu Bíbülia lun líderaguniwa asubudirei le buídubei lumoun le wuribabei (Ebü. 5:14). Dan le wafalaruni adundehani le tídanbei Bíbülia íderagua lumutiwa lun wóunigiruni wamadagua luma Heowá luéi lagadeirun, íderagua lumutiwa giñe lun buidu lan le lunbei wanúadiruni luma lun gúndaatima wamá lidan wabagari (Sal. 91:4). Luéigiñe le aban oubaü, yusu lumuti giñe Heowá damuriguaü lun lóunigiruniwa (Isa. 32:​1, 2). Dan le wóundarun hama gürigia ha hínsiñebei Heowá houn ani gaganbadi hagía lun, ibiha wamuti dǘgüdaguaü luma erei le wemegeirubei lun wamahadun lun wuribani le lídanbei ubóu le (Ari. 13: 20).

14. a) Ka uagu mama lubéi súnwandan lagidaruni Heowá waturobulin wawéi? b) Ka lachoururagüdübei Sálumu 9:10 woun? (Ariha huméi giñe abürüdǘni).

¹⁴ Lidan dan le sügühalibei anihein meha dan lóunigiruni Heowá habagari lubúeingu. Lau sun lira, mama súnwandan ladügüni, lugundun ariñagatu Bíbülia: “Chülüti dan luma sügǘ le magurabúnti houn sun gürigia” (Apur. 9:​11, TNM). Lanwoun lira, dandu lidan dan le sügühalibei kei guentó, ígirati Heowá lun hasufurirun lubúeingu éibaahouni áfarawagua hagía hilagubei. Ka uagu lígira lun lasuseredun le houn lubúeingu? Lun larufuduni marasualugu lan Satanási (Hob. 2:​4-6; Mat. 23:34). Mama súnwandan lagidaruni Heowá turobuli le wásügürübei, lau sun lira, gayaraati wachoururuni maweiyasunbei lan Heowá ígiraña ha hínsiñehabubaña lun (Sal. 9:10).d

RUTI HEOWÁ GURASU WOUN

15. Ida liña layusuruniña Heowá wábirigu, furíei tuma Lererun lun líchugun gurasu woun? (2 Korintuna 1:​3, 4).

¹⁵ (Aliiha huméi 2 Korintuna 1:​3, 4). Sun wagía anihein dan sanditiwa íruni, igarigu o lanarime idiheri. Másiñati wásügürüña lan lídangiñe sügǘ le íchugubei íruni woun ani le adügübei lun wasandiragun woungua wábuguarügüñadiwa lan. Íbini genege lan ua lan ni aban gunfurandei le wasufurirubei, mabulieida waméi gunfuranda lumutiwa lan Heowá buidu. Ani mama gunfurandarügü lumutiwa, “ruti giñe dǘgüdaguaü woun lidan sun wasufurirun”. Ida liña ladügüni? Lau laganbuniwa lidan furíei, lau líchugunu Lererun woun luma lau layusuruniña wábirigu. Dan le wafurieidun lun, aganba lumutiwa lau líchuguni “lidarangilan [wo]un, le wéiritimabei luéi sun subudi” (Fili. 4:​6, 7). Dan le waliihanu Lererun, ariha wamuti hínsiñe wamá lun saragu, ani furendeitiwa lídangiñe lichú lau ladundehan, ani sanditiwa awalidaguni seremei emenigini le líchugubei woun. Dan le hama wamá wábirigu lidan adamuridaguni, resibi wamuti hínsiñehabu luma dimurei tídangiñeti Bíbülia le íchugubei dǘgüdaguaü.

16. Ka larufudahabei likesin Nathan tuma Priscilla woun?

¹⁶ Lun warihini ida liña lan líchugun Heowá gurasu luma dǘgüdaguaü woun tídangiñe Lererun, ariha waméi le asuseredubei lun Nathan luma tun Priscilla, ha awinwandubaña Meriga. Fiu irumu guentó, aba háguyun lidoun amu fulasu lun gayaraabei lan hídehan lidan apurichihani. Abahüdahati Nathan: “Afiñetiwa yebe labinirubei lan Heowá wáfaagun”. Gama lumoun, dan le hachülürünbei lidoun iseri damuriguaü le ñeinba lubéi hídehan, aba hagagibudagun luma luriban átuadi luma maseinsuni le buga magurabun hamuti. Lagumuhóun mosu meha hagiribudun hárigoun, lau sun lira sigimémetiña lau turobuli lánina maseinsuni. Ariñagati: “Aba nálügüdagun nungua ka lan uagu mabinirun lubadiwa Heowá lidan igaburi le wagurabubei,darí lun nálügüdagun nungua anhein adügaadina lubéi somu katei wuribati”. Lau sun lira, lau lásügürün dan, aba híchugun biángubei hagía fe machaga lumutiña lan Bungiu. Ariñagati Nathan: “Naliihanu Bíbülia lidan lénrengunga ligía ítara liña kamá hamuga le naganbuñein aban umadaü le íchugubei dǘgüdaguaü luma adundehani buiti nun. Aba nafurendeirun au tuma Priscilla lun masaminarun wamá saragu luagu waturobulin, lun lan warihini ida liña lan líderaguniwa Heowá lun wawandun. Ani íderagua lumutiwa katei le lúntima aranseñu wamá lun wagagibudagun luma turobuli le ñǘbuinti”.

17. Ida liña teresibirun aban íbiri gíritu Helga gurasu? (Ariha humóun giñe iyawaü).

¹⁷ Kei le aubei warihei, gayaraati giñe híchugun wábirigu saragu gurasu woun. Ariha waméi tani Helga hénpulu, to awinwanduboun Ungüría. Súfuritu luagu saragu irumu ladüga bandi turobuli le úmabei tagagibudagua ani adügati katei le lun tasandirun saragu idiheri. Dan le taritagun luagu burí irumu ligía aba tíchugun fe yusu lániña Heowá íbirigu lun líchugun gurasu tun. Ariñagatu: “Súnwandan meha líderagunina Heowá dan le larihin méreedina lan ani siñá lan nun, lugundun mosu lan meha nawadigimaridun, mosu meha netenirun lun nisaani le sándibei, luma amu burí turobuli. Lidan lagumuhóun burí 30 irumu le, gayaraati nariñagun súnwandan lan lagunfuliruni Heowá le füramase lubéi lau líchugun gurasu nun. Yusu lumutiña íbirigu saragu wéiyaasu lun híchugun dǘgüdaguaü nun lau hariñagun dimurei le íchuguti gurasu nun. Saragu wéiyaasu resibihadina aban mensahe o aban tárüheta hámagiñe níbirigu dántima le nemegeiruni!”.

18. Ida luba wíchugun gurasu houn amu?

¹⁸ Gachansintiwa wáyeihani Wabungiute lau wíchugun gurasu houn amu. Ida lubati wadügüni? Lau waganbuniña lau gaguraasuni, lau wariñagun dimurei le ruti dǘgüdaguaü lúmati lau wíderaguniña lau le hemegeirubei (Ari. 3:27). Mámarügübei houn wábirigu wadügei lira, lunti giñe wadügüni houn sun gürigia ha asufurirubaña, íbini gürigia ha meseriwidunbaña lun Heowá. Anhein hásügürüña lubéi gürigia ha lídangiñe somu lénrengunga, somu sandi, o féridi haña lan somu haduhe lidan óunweni, lunti wabisidahaniña, waganbuniña luma lun wíchugun gurasu houn lau wayusurunu Bíbülia. Lau wáyeihani Wáguchi le gíchigadibei “gurasu”, mámarügübaña wábirigu wíderagua lun hagagibudagun luma haturobulin, gayaraabei giñe wíderaguniña gürigia ha meseriwidunbaña lun Heowá lun busén hamá hasubudiruni (Mat. 5:16).

WARUGABUBEI HEOWÁ SÚNWANDAN

19. Ka ladügübei Heowá wawagu, ani ida luba gayara lan wáyeihani?

¹⁹ Bereseti Heowá saragu hau sun ha hínsiñehabubaña lun ani mágurun lumutiña dan le hásügürün lídangiñe lénrengunga. Hínsiñetiwa lun ani góunigi lumutiwa ítara kei lóunigiruni aban úguchili buiti lisaani. Adundeha lumutiwa Heowá, ru lumuti le wemegeirubei woun, góunigi lumutiwa, ani ruti giñe gurasu woun. Ani gayaraati giñe wáyeihani lau wíderaguniña ha gaturobulinbaña luma lau wíchugun gurasu houn. Meberesenga turobuli le úmabei wagagibudagua lidan wabagari gayaraati wachoururuni warugabubei lan Heowá súnwandan lugundun füramaseti woun: “Manufudedabá, ladüga anahein buma” (Isa. 41:10). Ruti darangilaü woun wasubudiruni maweiyasunbei lan Heowá ígirawa wábugua!