Nibureinti, áyeihabei Márükosu luma Timotéu

1, 2. Ka hamuga katei gayaraabei ladügün lun maganwoundagüdün lani Márükosu luma Timotéu heseriwidun lun Heowá?

ANHEIN aban bubéi íbiri nibureingili, chóuruti busén ban baganwoundagüdüni beseriwidun lun Heowá lúntima hu ban lidan damuriguaü. Gúndaatiwa lau warihin saragu wügüriña nibureintiña ha busenbaña heseriwidun houn amu (Sal. 110:3). Lau sun lira, anihein dan hénrenguti ladügǘniwa katei le, lugundun ibidiñeti bun ida luba lan bibagari ámuñegü ni halíaba lan ladüga Heowá lun beseriwidun lun. O másiña lan bamahadun lun somu dasi lidan beseriwidun lun Heowá ladüga samina ban madügün bubéi lan buidu. Darangilubá, mámarügüñein bun lasusereda le.

² Gagibuguati meha giñe Márükosu labu Timotéu luma sügǘ ítarati. Lau sun lira, mígiraguagüdüntiña houngua lun ladügün anufudei luma lilouguan hasubudin lun meseriwidunbaña lan houn amu. Másiñati buidu lan meha dan tun lúguchu Márükosu ani tuma meha lawinwanda dan le lagunbirahanbalin apostolu Pábulu luma Berünawé lun lóundarun hamoun lidoun furumiñeti haweiyasun kei misionéru (Adü. 12:​12, 13, 25). Gama lumoun, aranseñu liña meha Márükosu lun lígiruni lubuidun libagari lun laganwoundagüdüni leseriwidun lun Heowá. Furumiñe, aba lidin Antiokía ani lárigiñe aba laweiyasuhan luma Pábulu labu Berünawé lidoun amu fulasu díseti (Adü. 13:​1-5). Ítarameme, másiñati giñe lawinwanduña lan meha Timotéu hama lagübürigu dan le lagunbirahanbalin apostolu Pábulu apurichiha luma. Gayaraati hamuga lasaminarun Timotéu nibureingili lan ani lougua ligía lisubudin lun lánharun lun agunbirahani le (ariha huméi giñe 1 Korintuna 16:​10, 11 luma 1 Timotéu 4:12). Lau sun lira, aba lidin luma Pábulu ani resibiti saragu abiniruni (Adü. 16:​3-5).

3. a) Ida liña wasubudiruni gebegi lan Márükosu labu Timotéu lun Pábulu? (2 Timotéu 4:​6, 9, 11; arihabéi giñe dibuhu). b) Kaba álügüdahani wakutiha lidan aturiahani le?

³ Furendeiti Márükosu labu Timotéu etenira lun saragu dasi lidan damuriguaü dan meha le nibureingiña. Gebegitiña meha saragu lun Pábulu, ligíati, dan meha le yarafaali lun lounwen, aba lamuriahan hama lun houdin arihei (aliihabéi 2 Timotéu 4:​6, 9, 11). Ka igaburi luágubei Márükosu labu Timotéu adügübei lun lasandirun Pábulu ínsiñeni hawagu? Ida luba hasigiruni íbirigu wügüriña nibureingiña hani hénpulu? Ka adundehani léñaha líchugubei Pábulu gayaraabei líderaguniña wügüriña nibureintiña?

ÍTARABA KEI MÁRÜKOSU ARANSEÑU LUN BESERIWIDUN HOUN AMU

4, 5. Ida liña larufuduni Márükosu aranseñu liña lan lun leseriwidun houn amu?

⁴ Según aban líburu, le mini lubéi leseriwidúniwa houn amu, lawadigimaridun gürigia saragu lun líderaguniña luma lasigirun adügei íbini hénrengu lan. Ligía ladügübei Márükosu. Dan le lamahadunbei Pábulu lun lanügüni lidoun libiaman luéiyasun kei misionéru, másiñati aba lan laribadun lasandiragun Márükosu lungua (Adü. 15:​37, 38). Aba san lábürühan larüna Márükosu ani aba lígiruni leseriwidun houn íbirigu? Uá, madügün lumuti.

⁵ Aba lidin Márükosu luma Berünawé, le liduhe eseriwida lidoun amu fulasu. Kei burí 11 irumu lárigiñe, dan le ladaürǘnbei Pábulu uburugu Roma, ñǘdünti Márükosu íderaguei (Fil. 23, 24). Seremei lumuti apostolu Pábulu le ladügübei Márükosu luma le hadügübei amu ha íderagubalin darí lun lariñagun: “Hayabin nun kei aban óunwenbu dǘgüdaguaü” (Kol. 4:​10, 11).

6. Ida liña lasagarun Márükosu buiti lau lásügürün dan hama kristiánugu ha derebugu tafiñen? (Arihabéi abürüdǘni).

⁶ Aban katei le íderagubalin Márükosu saragu, lásügürün dan ídeha hama kristiánugu derebugu tafiñen. Lárigiñebei lidin íderaguei apostolu Pábulu Roma, aba lidin Babilónia íderaguei apostolu Féduru. Gamadaguatiña meha saragu darí lun lariñagun Féduru luagu, “niráü” (1 Fe. 5:13). Másiñati sun lan meha dan le úara lubéi Márükosu luma apostolu Féduru, aba labahüdahan Féduru lun luagu libagari Hesusu luma lani ministeriu ani dan lárigiñe, aba labürüdüni Márükosu tidan lani Ewanhéliu.a

7. Ida liña lafalaruni aban nibureinti lani Márükosu hénpulu? (Arihabóun giñe iyawaü).

⁷ Kípuguati meha Márükosu lungua beresegu lidan leseriwidun lun Heowá ani geyegu liña meha hau kristiánugu ha derebugu tafiñen. Ida luba basigiruni lani Márükosu hénpulu? Anhein busén bubéi bibihin ítaga dasi lidan damuriguaü ani mibihin bágili, gaguraasunbá ani sigiba áluaha amu igaburi lidan beseriwidun lun Heowá luma houn íbirigu. Saminabá luagu le asuseredubei lun Seung-Woo, le ábanhalibei wéiyaali lidan afiñeni guentó. Dan meha le nibureingili, aba larihin lichugúniwa dasi burí houn íbirigu nibureintiña ha liseisingu ani lun, michugúnti. Ábati laribadun lasandiragun lungua, aba lasaminarun meteni hamá wéiyaaña lidan afiñeni lun áfaaguni le ladügübei. Lagumuhóun, aba layanuhan luagu katei le hama wéiyaaña lidan afiñeni, ani aban hádangiñe aba lariñagun lun lunti lan láfaagun lun líderaguniña amu íbini marihin hamani ha híbiri le ladügübei. Ligía aba lubéi ladügün aransehani lun líderaguniña íbirigu derebuguhaña ha mégeibaña ugunei lun houdin adamuridagua. Lau meha laritaguni dan ligía, aba lariñagun: “Aba gunfuranda nani ka lan mini lubéi leseriwidúniwa houn amu, aba níchugun fe gúndaatimati lan gürigia dan le líderaguniña líbirigu”.

ÍTARABA KEI TIMOTÉU LAU BARUFUDUN BERESE BAN HAU AMU

8. Ka uagu labusenra Pábulu lun lidin Timotéu luma lidan laweiyasuhan? (Filipuna 2:​19-22).

⁸ Dan meha le lagiribudunbei Pábulu lidoun fulasu burí le ñein lubéi leibaahóua, mégeiti meha íbirigu ganigitiña lun houdin luma. Furumiñe, aba lanúadiruni Sílasi ladüga aban lan íbiri le barühali saragu irumu eseriwida lun Heowá (Adü. 15:​22, 40). Lárigiñe, aba giñe lanúadiruni Timotéu. Ka uagu labusenra Pábulu lidin nibureinti le luma? Luéigiñe aban oubaü, ladüga buidu lan ladimurehóun luagu (Adü. 16:​1, 2). Luéigiñe le aban oubaü, ladüga subudi lani Pábulu weiri lan hínsiñe gürigia lun Timotéu (aliihabéi Filipuna 2:​19-22).

9. Ida liña larufuduni Timotéu berese lan hau líbirigu?

⁹ Lúmagiñe dan le lagumeserunbei Timotéu eseriwida luma Pábulu, arufudati saminatima lan hawagu amu sügǘ lau lasaminarun luougua. Ligíati afiñe lubéi Pábulu lígiruni Beréa lun líchugun dǘgüdaguaü houn iseri disipulugu (Adü. 17:​13, 14). Lidan dan ligía, chóuruti furendei lan Timotéu saragu katei lúmagiñe Sílasi ladüga aba giñe lerederun Sílasi Beréa. Gama lumoun, dan lárigiñe, aba lóunahani Pábulu Timotéu Tesalónika lun lederebudagüdüni damuriguaü le ñeinbei (1 Tesa. 3:2). Lidan 15 irumu le laubei Timotéu eseriwida, aba hínsiñedun íbirigu lun saragu darí lun layahun hama ha ayahubaña (Rom. 12:15; 2 Tim. 1:4). Ida luba hafalaruni íbirigu nibureintiña lani Timotéu hénpulu?

10. Ida liña lafurendeirun aban íbiri lúntima berese lan hau amu gürigia?

¹⁰ Furendeiti aban íbiri gíriti Woo Jae arufuda ínsiñeni hawagu amu gürigia, lugundun dan meha le nibureingili, hénrenguti meha lun layanuhan hama íbirigu ha derebuguhañabaña. Ligíati, dan meha le larihiniña tidan Luban Adamuridaguni, aba meha gufuruma lan láurügü labusurun houn. Aba lariñagun aban wéiyaali lidan afiñeni lun lun lariñaguni houn íbirigu somu katei le hínsiñebei lun hawagu, lun gayara lan lagumeserun ayanuha hama. Ariñagati giñe lun lun lasaminarun luagu katei le hínsiñebei houn íbirigu. Aba lafalaruni Woo Jae adundehani le ichugúbei lun. Uguñe weyu, ábanhali wéiyaali lidan afiñeni ani ariñagati: “Guentó ménrengunhali nun nayanuhan hama gürigia ha ámuñegueinarügüti harumudiri. Buiti nasandiragun nungua ladüga gunfuranda nani buidu haturobulin amu ani adügati katei le lun gayara lan níderaguniña lidan le hemegeirubei”.

11. Ida luba hafurendeirun wügüriña nibureintiña arufuda ínsiñeni hawagu hábirigu ha lílana damuriguaü? (Arihabóun giñe iyawaü).

¹¹ Nibureinti, gayaraati giñe bafurendeirun arufuda ínsiñeni hawagu amu. Ayanuhabá hama súngubei lidan adamuridaguni meberesenga harumudiri. Álügüdabaña ida haña lan ani aganbabéi le lunbei hariñaguni. Lau lásügürün dan, líderagubadibu katei le lun barihini ka lan hemegeirubei. Másiñati bíchugun fe megei hamá aban feru maríeitiña derebuguhaña ídemuei lun hebelurun lidoun JW Library^® o megei hamá hapaaná lun hapurichihan. Gayaraati san bíderaguniña lidan layusurúniwa gágamuru o konputadora o lun báfuridun apurichiha hama? Ánhabu íchaagua bungua lun bíderaguniña amu, ábanbadibu hénpulu buiti houn sun lílana damuriguaü.

GAYARAATI LÍDERAGUNIBU ADUNDEHANI LE LÍCHUGUBEI PÁBULU

12. Ka gayaraabei hadügüni wügüriña nibureintiña lun hasagarun saragu buiti lídangiñe adundehani le líchugubei Pábulu lun Timotéu?

¹² Ariha lumuti meha Pábulu Timotéu kei lisaani, ligíati líchugubei adundehani lun lun buidu lan lidin lun lidan libagari luma lidan lani ministeriu (1 Tim. 1:18; 2 Tim. 4:5). Ka gayaraabei badügüni lun giñe líderagunibu adundehani burí le? Aliihabóun bián gárada to labürühaboun Pábulu lun Timotéu kamá hamuga bun labürühóun ani houchabá barihini ida luba lan bafalaruni adundehani le tídanbei lidan bibagari. Ariha wamá fiu hénpulu.

13. Nibureinti, kaba íderaguabu lidan báfaagun lun bagunfulirun luma Bungiu?

¹³ “Áfaaguaba lun bagunfulirun luma Bungiu” (1 Tim. 4:7b). Lau dimurei le busenti Pábulu lariñagun lun Timotéu lunti lan úaragua lan lun Heowá luma lun busén lan ladügüni lugundan. Magüriahóuntiwa lau igaburi burí le, mosu wáfaagun lun wadügüni. Ida lubagia wibihini? Dan le lariñagunbalin Pábulu dimurei “áfaaguaba”, yúsuti aban dimurei lidan güriegu le ayusurúbei lun layanuhóun luagu laranserun aban éibaaguti buidu lubá aban ásügüraguni. Mosu ladügüni éibaaguti sun le mégeiwabei lun gayaraabei lan lagañeirun. Wagía sun, mosu giñe wadügüni sun le lunbei líderaguniwa lun wéredagüdüni wamadagua luma Heowá.

14. Ka babusenrubei bibihin lau baliihanu Bíbülia? Ruba aban hénpulu.

¹⁴ Aban katei le lunbei badügüni, béchudun aliihoun Bíbülia sagü weyu. Haritaguabá le lan babusenrubei bibihin dan le baliihanu Bíbülia bederebudagüdüni bumadagua luma Heowá. Arihabá san, saminabá baliihañein lan abahüdaguni luáguti Hesusu luma nibureinti le rísibei (Mar. 10:​17-22). Afiñeti meha nibureinti ligía luagu Hesusu lan Mesíasibei, lau sun lira, lóuguati lafiñen lun gayaraabei lan ladügagun lungua lánime Hesusu disipulu. Ariñagati abahüdaguni luagu sandí lan Hesusu ínsiñeni luagu nibureinti le. Másiñati wéirigüda lanu banigi layanuhan Hesusu lau saragu ínsiñeni lun nibureinti le. Furanguti busén lan meha Hesusu lun buidu lan libagari nibureinti le lau leseriwidun lun Bungiu. Ka gayaraabei bafurendeirun luagu Heowá lídangiñe baliihani abahüdaguni le? Kei arufuda lani Hesusu ligaburi Lúguchi, arufuda lumuti abahüdaguni le bun sandí lan giñe Heowá ínsiñeni luagu nibureinti le (Huan 14:9). Ánhabu araramagua asaminara luagu nibureinti le luma le gádanbalibu, gayaraati bálügüdagun bungua: “Ka lunbei nadügüni lúntima nayarafadun lun Heowá luma lúntima nadügün katei buiti hawagu amu?”.

15. Ka uagu súdini lubéi lun háfaagun wügüriña nibureintiña lun aban hamá hénpulu buiti? (1 Timotéu 4:​12, 13).

¹⁵ “Lunti aban ban hénpulu buiti houn ha afiñebaña” (aliihabéi 1 Timotéu 4:​12, 13). Ariñagati Pábulu lun Timotéu luagu súdini lan lun lafurendeirun aliiha buidu luma lun aban lan máisturu buiti. Ariñagati giñe lun lun larufudun lubuidun igaburi kei burí ínsiñeni, afiñeni luma laruman ibagari. Ka uagu? Ladüga gabafutimati le wadügübei sügǘ lau le wariñagubei. Saminabá aba lan lichugún aban dasi bun lun bíchugun aban yanu le ayanuhabei luagu laganwoundagüdüni gürigia lapurichihan. Buítimabei basandiragun bungua ayanuha luagu apurichihani anhein badügüñein lubéi sun biyaraati lun baganwoundagüdüni bani ministeriu. Aransetimabaña íbirigu lun hafalaruni adundehani le bíchugubei houn ánhaña ariha aban ban hénpulu buiti lidan apurichihani (1 Tim. 3:13).

16. a) Lidan ka seingü igaburi gayaraabei aban hamá hénpulu buiti wügüriña nibureintiña? b) Ka gayaraabei ladügün aban nibureinti lun aban lan hénpulu buiti lau ligaburi ladimurehan?

¹⁶ Lidan 1 Timotéu 4:​12, ayanuhati Pábulu luagu seingü igaburi le ídanbei gayara lan líchugun aban nibureinti hénpulu buiti. Gayaraati san badügün aransehani lun bakutihani kada aban lídangiñe igaburi le lidan baturiahan bábuguarügü? Saminabá busén ban babuiduragüdüni “ligaburi badimurehan”. Gayaraati basaminarun luagu katei le gayaraabei bariñagun houn amu lun bíchugun dǘgüdaguaü houn. Anhein bawinwanduña lubéi hama bagübürigu, gayaraati gabügürüguatima lan beteingiruniña luagu sun le hadügübei buagu. Lidan adamuridaguni, gayaraati báfaagun lun bíchugun óunabagülei lidan bererun guánarügü. Dan le lagumuchun adamuridaguni, gayaraabei bariñaguni lun íbiri le íchugubalin yanu le hínsiñebei bun lídangiñe liyanun. Ánhabu áfaagua lun aban ban hénpulu buiti lau ligaburi bayanuhan, harihibei íbirigu bawanserun kei lubúein Bungiu (1 Tim. 4:15).

17. Ka gayaraabei líderaguni aban íbiri nibureinti lun libihini le labusenrubei lidan leseriwidun lun Heowá? (2 Timotéu 2:22).

¹⁷ “Anurahabá lubeiti luéi luriban hayumahan nibureingiña; barüba aban ibagari le lánina richaguaü” (aliihabéi 2 Timotéu 2:22). Ariñagati Pábulu lun Timotéu lun lanurahan luéi luriban ayumahani le gayaraabei ladügün lun ladisedun luéi Heowá. Másiñati anihein lan katei lidan bibagari, lau sun mariban lan, adügati lun madaani ban lun beresegu ban lidan beseriwidun lun Heowá. Kéiburi, saminabá luagu sun dan le básügürübei áhurera somu huraraü, aríagua katei luéigiñe Internet o áhurera lídangiñe bigagamurun o katei líbeina lira. Gayaraati san bayusurun lídangiñe dan le lun baganwoundagüdüni beseriwidun lun Heowá luma houn íbirigu? Másiñati gayara lan bídehan lidan tounigirún Luban Adamuridaguni o lun bapurichihan tau tarufudaagüle agumeiraguagüdüni. Líderagubadibu katei le lun gamadagua ban hama íbirigu ha gayaraabei híderagunibu lun bibihini le babusenrubei lidan beseriwidun lun Heowá.

ABINIRUNI LE LANÜGÜBEI LESERIWIDUNIWA HOUN AMU

18. Ka uagu gayara lubéi wariñagun buidu lan ani gunda ligía libagari Márükosu labu Timotéu?

¹⁸ Adüga lumuti Márükosu labu Timotéu saragu áfaaguni lun heseriwidun houn amu ani adügati lira lun buidu lan habagari ani gunda hagía (Adü. 20:35). Lun leseriwidun Márükosu houn líbirigu, aweiyasuhati lidan ámuñegueinarügü fulasu ubouagu. Lanwoun lira, abürühati aban tubuidun líburu luagu libagari Hesusu. Ánheinti Timotéu, íderagua lumuti Pábulu lidan ladügǘn iseri damuriguaü luma lidan lichugún dǘgüdaguaü houn íbirigu. Furanguti gunda lan Heowá dandu lau Márükosu kei lau Timotéu luagu áfaaguni le meha hadügübei lun heseriwidun lun.

19. Ka uagu súdini lubéi lun hafalaruni wügüriña nibureintiña adundehani le líchugubei Pábulu, ani kaba hibiha?

¹⁹ Ka wafurendeirubei tídangiñe gárada burí to labürüdüboun Pábulu lun Timotéu lau lídehan Bungiu? Luagu aban oubaü, gayaraati warihini weiri lan ínsiñeni le lasandirubei apostolu luagu Timotéu, le lumada. Luagu le aban oubaü, wéiriti giñe ínsiñeni le lasandirubei Heowá buagu ani busenti lun buidu lan lidin bun luma lun gunda ban. Ligía súdini lubéi lun bafalaruni adundehani le líchugubei Pábulu, luma lun busentima ban beseriwidun houn íbirigu. Anhein badüga, gúndaabei bibagari guentó, ani ámuñegü bibihuba “ibagari magumuchaditi” (1 Tim. 6:​18, 19).