Áyeiha humaña ánheligu úaraguatiña

1, 2. a) Ka burí katei adügübei lun amu wamá hawéi ánheligu? b) Ka burí katei gayaraabei gagaburi wamani o wadügüni ítara kei ánheligu?

DAN le lachawahan báadiwa Heowá lidoun inarüni, aba lagunbirahaniwa lun aban wamá hádangiñe liduheñu ha áhuduragubaña lun. Iduheñu ha hínsiñehabunitña ani lídangiñetiña ámuñegueinarügü fulasu ubouagu, mámarügüñanu gürigia hadan iduheñu ha, añahein giñe saragu míñunu ánheligu úaraguatiña haganagua (Dan. 7:​9, 10). Dan le wasaminarun hawagu ánheligu, másiñati liabin wachügüwagun sun le adügübei lun amu wamá hawéi. Kei hénpulu, adügǘwatiña saragu dan lubaragiñe hadügün gürigia (Hob. 38:​4, 7). Gabafutimatiña wawéi, sándutiña giñe ani richaguatiña lidan aban igaburi le siñá wamuti ibiha ladüga gafigoun wamá (Luk. 9:26).

² Lau sun lira, íbini amu wamá hawéi ánheligu anihein saragu katei le ídanbei úara wamá hama. Kéiburi, dandu hagía kei wagía gayaraati gagaburi wamani lubuidun ligaburi Heowá, gayaraati wanúadiruni kei hagía kaba lan wadüga, gíritiña ítara kei wagía, kada gürigia lau ligaburi ani ámuñegueinarügüti wadasin lidan weseriwidun lun Heowá. Lanwoun lira, ítara kei ánheligu mégeitiwa giñe wáhuduragun lun Heowá, Bungiu le adügübaliwa (1 Fe. 1:12).

3. Ka gayaraabei wafurendeirun hámagiñe ánheligu úaraguatiña?

³ Ligíati kei anihein lan saragu katei le adügübei lun gagaburi wamá igaburi libe le hawagubei ánheligu, ruti hani hénpulu dǘgüdaguaü woun ani arufudahati saragu katei huuti woun. Lidan aturiahani le warihibei ida luba lan wáyeihani ǘnabugu hamá ánheligu, ínsiñeni le hasandirubei hawagu gürigia, hawandun luma áfaaguni le hadügübei lun hakipuruni damuriguaü harumañu.

ǗNABUGUTIÑA ÁNHELIGU

4. a) Ida liña harufuduni ánheligu ǘnabugu hamá? b) Ka uagu ǘnabugu habéi ánheligu? (Sálumu 89:7).

⁴ Ǘnabugutiña ánheligu ha úaraguabaña. Lau sun gibe lan hasubudin, gabafu hagía saragu ani chu ligía hau, súnwandan gaganbadi hamá lun ladundehan Heowá (Sal. 103:20). Gúnfuli hamuti hadasin le líchugubei Heowá houn sin hapantahan lau le hadügübei ni luagu ubafu le hawagubei. Gúndaatiña dan le hadügüni lugundan Bungiu, íbini ua lan ni aban asubudiruti hiri (Agu. 32:​24, 29; 2 Uru. 19:35).a Máhatiña heresibiruni uéiriguni le yuubei lun Heowá. Ka uéigiñe ǘnabugu habéi ánheligu? Ladüga hínsiñe lan Heowá houn ani inebe ligía houn saragu (aliiha huméi Sálumu 89:7).

5. Ida liña larufudun aban ánheli ǘnabuguni dan le lererehanbei lun apostolu Huan? (Ariha huméi giñe dibuhu).

⁵ Ariha wamá aban abahüdaguni le ñein lubéi larihíwa furangu ǘnabugu hamá ánheligu. Kei burí lidan irumu 96, lidan furumiñeti sígulu aba larufudun aban ánheli ibidiñewati liri aban lubuidun arufudúni lun apostolu Huan (Aruf. 1:1). Ida liña lasandiragun apostolu Huan lungua dan le larihinbalin lubuidun arufudúni burí le? Aba labuluchagun lun láhuduragun lun ánheli ligía. Aba lararamuni ánheli ligía lau lóufudagun aba lariñagun lun: “Madügabéi le; lubúein Bungiu au kei buguya hama bíbirigu […]; lunlá Bungiu báhuduragua” (Aruf. 19:10). Arufudati lóunabagüle ánheli le ǘnabuguni. Mabusenrunti ánheli le leresibirun uéiriguni ni alawahóuni. Lau lóufudagun aba lariñagun lun Huan lun lúnrügü lan Heowá láhuduragua. Lau sun lira, masandiragunti giñe ánheli le lungua súdini lan luéi Huan. Lau sun barühali lan saragu dan eseriwida lun Heowá ani gabafutima ligía luéi apostolu le, ǘnabuguti ánheli le ani aba lariñagun lun Huan: “Lubúein Bungiu au kei buguya”. Íbini erereha lan ánheli ligía lun apostolu derebuguhali le, madeinhanti lun ani móuserunlei lau furundei. Ayanuharügüti lun lau ínsiñeni. Chóuruti ru lan ánheli le fe ladüga lan taweiridun lanigi Huan luagu le larihinbei lidan arufudúni, ligía lan lálugubei láhuduragun lun.

6. Ida liña wáyeihani ǘnabuguni le harufudubei ánheligu?

⁶ Ida liña wáyeihani ǘnabuguni le harufudubei ánheligu? Lau wagunfulirun lau wadasin mapantahanga lau le wadügübei kamá hamuga anihein somu iyaraani espechaliti wawagu (1 Ko. 4:7). Moun lumuti giñe wasaminarun íñutima wamá hawéi amu ladügarügü barühadiwa lan saragu dan eseriwida lun Heowá o ladüga wadügüña lan ítaga dasi. Le linarün katei éibutima laganwoundun wadasin tidan lóundarun Heowá, ligíatima wemegeirun wóuserun kei aban hádangiñe ha ǘnabugutimabaña (Luk. 9:48). Ítara kei ánheligu busentiwa weseriwidun houn amu, mabusenrúntiwa lun hasandiragun houngua súdini wamá hawéi.

7. Ida liña warufudun ǘnabuguni dan le wererehan o dan le wíchugun adundehani lun somu gürigia?

⁷ Gayaraati warufudun ǘnabuguni dan le wererehan o wíchugun adundehani lun somu gürigia, aba lan yebe íbiri o aban lan wasaani. Ítara kei furangu lan lererehan ánheli lun Huan luma lau ínsiñeni. Wagía giñe gayaraati wadügüni ligiaméme dan le wererehan houn amu furangu ani lau ínsiñeni sin lasandiragun gürigia lungua wuriba. Ánhawa masandiragun woungua íñutima wamá hawéi amu wíchuguba adundehani tídangiñeti Bíbülia lau inebesei luma lau ínsiñeni (Kol. 4:6).

HÍNSIÑETIÑA GÜRIGIA HOUN ÁNHELIGU

8. a) Según Lúkasi 15:​10, ka hadügübei ánheligu lun harufuduni hínsiñe hamá gürigia houn? b) Ka hagaradanboun ánheligu lidan apurichihani? (Ariha humoun giñe iyawaü to luáguboun).

⁸ Beresetiña ánheligu lau le asuseredubei houn gürigia. Lugundun hínsiñetiña gürigia houn. Gúndaatiña ánheligu dan le lasaküriha aban afigouhati ani giribu ligía lun Heowá o dan le lasubudiruni aban gürigia inarüni ani aba ladügün asansiruni lidan libagari lun leseriwidun lun Heowá (aliiha huméi Lúkasi 15:10). Bereseguñanu giñe ánheligu lidan lapurichihóun uganu buiti luáguti Larúeiha Bungiu (Aruf. 14:6). Lau sun mama lan hagía apurichihabaña houn gürigia, gayaraati hadundehaniwa hamóun gürigia ha busenbaña hafurendeirun luagu Heowá. Lau sun lira, siñati wariñagun lau ichouruni aban lan ánheli adügübei lun woudin apurichiha lun somu gürigia. Gayaraati layusurun Heowá amu katei —kei burí lani sífiri sandu — lun líderaguniña gürigia o lun ladundehaniña lubúeingu (Adü. 16:​6, 7). Íderagua lumutiña Heowá ánheligu saragu. Ligíati, danme le wapurichihaña lan, chouru waméi ñéinbaña lan wamá lun híderaguniwa (ariha huméi rekuáduru “Ounabúati hafurieidun”).b

9. Ida luba wáyeihani ínsiñeni le hasandirubei ánheligu hawagu gürigia?

⁹ Ida luba wáyeihani ínsiñeni le hasandirubei ánheligu hawagu gürigia? Dan le lawisahóun lidan damuriguaü giribuharu lan o giribuhali lan aban sagawaali, gayaraati wagundaarun ítara kei hagundaarun ánheligu. Resibi wamaña wábiri ha agiribudubaña lidoun damuriguaü lau ínsiñeni ani subudigüda waméi houn hínsiñe hamá woun (Luk. 15:​4-7; 2 Ko. 2:​6-8). Ábaya igaburi lun wáyeihaniña ánheligu lau wadügüni sun wayaraati lidan apurichihani (Apur. 11:6). Ítara kei híderaguniwa ánheligu lidan wapurichihan gayaraati giñe wáluahan ida luba lan wíderaguniña wábirigu lidan hani ministeriu. Kei hamuga guentó, gayaraati wáfuridun apurichiha luma aban iseri íbiri. Gayaraati giñe wagunbirahan aban íbiri derebuguhali o sánditi lun lapurichiha úara wama.

10. Ka gayaraabei wafurendeiruni túmagiñe Sara?

¹⁰ Kábati wadüga anhein siñá lubéi wadügün saragu lidan weseriwidun lun Heowá kei meha? Íbini ítara, gayaraati wadarirun iseri ligaburi wídehan hama ánheligu lidan apurichihani. Ariha waméi le tadügübei aban íbiri gíritu Sarac to lídangiñeboun ageiraü India. Prekursora meha tuguya kei burí luagu 20 irumu, aba tasandirun darí lun lásiñarun tiñuragun gabanarugugiñe. Adügati katei le lun tasandirun aban óunwenbu íruni. Gama lumoun, seremei ídemuei luma ínsiñeni le harufudubei íbirigu tun luma giñe taliihanu Bíbülia, aba tagumeserun árügüdagua tungua murusun murusun íbini sándimemegiru lan. Ábati tasansiruni ligaburi tapurichihan. Luéigiñerügüñein gágamuru tapurichihan lugundun siñati meha tañuurun lun tabürühan gárada. Watu meha houn gürigia ha meha tabisidahabaña, ani aba meha habahüdahani gürigia hagía tun hawagu gürigia ha másiñati busén hamá haturiahanu Bíbülia. Ida liña lidin tun? Lídanrügü fiu hati gumesetu aturiahoun Bíbülia hamá 70 gürigia. Gíbetiña meha tun darí lun siñá lan tíchugun aturiahani houn súngubei! Ligíati mosu meha tásügüragüdün fiu hádangiñe aturiahatiña hagía houn amu íbirigu. Saragu hádangiñe aturiahatiña ha abasihaaña lidoun adamuridaguni. Chóuruti gunda hamá ánheligu lau hídehan hama íbirigu ha ítaratiña kei Sara, to adügübalin sun tiyaraati lidan apurichihani.

AWANDATIÑA ÁNHELIGU

11. Ida liña híchugun ánheligu úaraguatiña aban lubuidun hénpulu lánina awanduni woun?

¹¹ Rútiña ánheligu ha úaraguabaña aban buiti hénpulu woun lánina awanduni. Barǘ haña saragu milu irumu awanda marichaü luma wuribani. Ariha hamuti lagarabaagun Satanási luagu Bungiu hama saragu ánheligu ha meha eseriwidubaña lun Bungiu luagu aban dan úara hama (Agu. 3:1; 6:​1, 2; Hud. 6). Ayanuhatu Bíbülia luagu aban ánheli le agagibudagubei luma aban hádangiñe máfianu gabafuti (Dan. 10:13). Lanwoun lira, lidan sun dan le sügühalibei ariha hamaali ánheligu mibe hamá gürigia anúadirutiña heseriwidun lun Heowá. Íbini ítara, sigitiña ánheligu ha eseriwida lun Heowá lau úaraguni, lau ugundani luma lau ubebeni. Subudi hamuti lachülürüba lan dan lun lagumuchun Bungiu lau sun marichaü.

12. Kaba íderaguawa lun wawandun?

¹² Ida luba wáyeihani awanduni le harufudubei ánheligu? Másiñati wagagibudaguba lan luma marichaü o lichugún lidere dan woun, lau sun lira chouru wamuti, ítara kei hagía lachülürüba lan aban dan lun lagumuchun Bungiu lau sun wuribani. Ligíati, ítara kei ánheligu ha úaraguabaña, “moun lumuti lubeiti labuchadun wawagu adügei katei le buídubei” (Gal. 6:9). Ani ariñagati Heowá líderagubadiwa lan awanda (1 Ko. 10:13). Gayaraati wamuriahan luma lun líchuguni lani sífiri sandu woun le gayaraabei líderaguniwa lun gaguraasun wamá luma lun gunda wamá (Gal. 5:22; Kol. 1:11). Ka gayaraabei hadügüni anhein lichugúña lubéi lidere dan hun? Afiñe humá sunsuinagubei luagu Heowá ani manufudeda humá. Ñeinbei Heowá súnwandan huma ani líchuguba erei hun (Ebü. 13:6).

ÍDEHATIÑA ÁNHELIGU LUN LAKIPURUN DAMURIGUAÜ HARUMAÑU

13. Ka dasi espechaliti hadügübei ánheligu lidan lagumuhóun dan le? (Matéu 13:​47-49).

¹³ Rúhali Heowá aban dasi espechaliti houn ánheligu lidan lagumuhóun dan le (aliiha huméi Matéu 13:​47-49). Lachawahañanu wapurichihan saragu míñunu gürigia ha lídanbaña sun ubóu lun haturiahanu Bíbülia. Añahein hádangiñe adüga hamuti le mégeiwabei lun lubúeingu hamá Heowá, ha híbiri madügün hamuti. Ánheligu gadasinbalin lun hafanreinraguniña “ha buídubaña hádangiñe ha wuribabaña”. Ítarati, adügatiña lun haruma lan damuriguaü. Úati mini lan lira anhein lan adiseda somu gürigia lídangiñe damuriguaü siñaali lan lagiribudun, úati giñe mini lan úabei lan turobuli lidan damuriguaü. Gayaraati wachoururuni adüga hamani ánheligu sun hayaraati lun hídehan akipurei damuriguaü harumañu.

14, 15. Ida luba wáyeihaniña ánheligu lidan lakipurun damuriguaü harumañu? (Ariha humóun giñe iyawaü).

¹⁴ Ida luba wáyeihaniña ánheligu lun wakipuruni damuriguaü harumañu? Lau wáfaagun lun haruma wamá lidan ligaburi wamadagua luma Heowá luma lidan ligaburi wóuserun. Kada aban wádangiñe lunti lóunigirunu lanigi lau lanúadirun umadagu buítiña luma lamaharun lun furumiñeguarügü katei le gayaraabei lagadeiruni lumadagua luma Heowá. Ítara luba wídehan lun lakipurun damuriguaü harumañu (Sal. 101:3). Gayaraati giñe wíderaguniña íbirigu lun úaragua hamá lun Heowá. Kei hamuga guentó, lun hamuga wíchugun fe adügaali lan aban íbiri aban figóu wéiriti, ka lunbei wadügüni? Ladüga ínsiñeni le wasandirubei luagu íbiri ligía, ligíaba adüga lun wínchahani lun layanuhan hama wéiyaaña lidan afiñeni. Anhein madügün lan, wagíaba ayanuha hama wéiyaaña lidan afiñeni. Lugundun busentiwa lun libihini wábiri le débilibei ídemuei le lemegeirubei lau lóufudagun (Sant. 5:​14, 15).

¹⁵ Lau saragu íruni, añahein hádangiñe íbirigu ladüga figóu burí wéinamuti le hadügübei mosu burí hasagarun lídangiñe damuriguaü. Lidan kesi burí le aba móundaragun háadiwa lan hamad (1 Ko. 5:​9-13). Ídehati katei le lun lakipurun damuriguaü harumañu. Lanwoun lira, warufuduñein wínsiñehabu houn ha sagawaañabaña lau mamadagua wamá hama. Lau wadügüni lira wínchahañanu lun hagiribudun lun Heowá. Ánhaña agiribuda lun Heowá gúndaabadiwa saragu, ítara kei Heowá hama ánheligu (Luk. 15:7).

16. Lidan ka igaburi gayara lan wáfaagun lun wáyeihaniña ánheligu?

¹⁶ Ma lubuidun chansi le líchugubei Heowá woun lun wafurendeirun hawagun ánheligu luma lun wawadigimaridun úara hama. Ligíati, áfaagua wamá lun wáyeihaniña ánheligu lidan ǘnabuguni le harufudubei, lidan ínsiñeni le hasandirubei hawagu gürigia, lidan hawandun, luma giñe lidan hakipuruni damuriguaü harumañu. Ánhaña wáyeiha ánheligu ha úaraguabaña, gayaraabei hádangiñe wamá iduheñu ha áhuduragubaña lun Heowá lun súnwandan.