Súdiniti liri Heowá woun

1, 2. Ida liña wasubudiruni ua lan amu katei súdinitimati lun Hesusu luéi liri Heowá?

UATI amu katei súdinitimati lun Hesusu luéidügü liri Heowá. Ligíatima gürigia le ayanuha liibe luagu liri Lúguchi. Kei le aubei warihei lidan aturiahani le lubaragiñebei le, aranseñu liña meha Hesusu lun lounwen luagu liri Heowá le Lúguchi lun gayara lan larumadahani lídangiñe sun iyeeni le ariñawagúbei luagu iri le (Mar. 14:36; Ebü. 10:​7-9). Lárigiñeme Arúeihani lánina Milu Irumu, aranseñu luba Hesusu lun lagiribudagüdüni sun ubafu lun Lúguchi lugundun busenti lun líchuguniwa sun uéiriguni lun Lúguchi (1 Ko. 15:​26-28). Sun le ladügübei Hesusu luma le lunbei ladügüni luagu liri Heowá arufudati lueirin ínsiñeni le lasandirubei luagu Lúguchi.

² Ñǘbuinti Hesusu ya Ubouagun luagu liri Lúguchi (Huan 5:43; 12:13). Arufudaha lumuti Hesusu liri Lúguchi houn lani disipulugu (Huan 17:​6, 26, TNM). Arufudahati ani adüga ligía milaguru lidan liri Heowá (Huan 10:25). Lidan aban furíei le ladügübei lun Heowá hawagu lani disipulugu, ariñagati: “Góunigibaña ha bíchugubaña nun luagu biri” (Huan 17:​11, TNM). Furanguti weiri lan lisudinin liri Heowá lun Hesusu, ida lubati lariñagun aban gürigia kristiánu lan anhein ibidiñe lubéi liri Heowá lun ani mayusulei?

3. Kaba wariha lidan aturiahani le?

³ Wagía kristiánugu inarünitiña áfaaguatiwa lun wafalaruni Hesusu, ligía súdini lubéi giñe liri Lúguchi woun (1 Fe. 2:21). Lidan aturiahani le, warihibei ha lan apurichihabalin “uganu buiti le luáguti larúeihan Bungiu” barǘ hamuti liri Heowá (Mat. 24:14). Warihibei giñe ka lan mini lubéi liri Heowá lun kada aban wádangiñe.

LUN LUMUTUNIÑA HAMÁ “LUN HANÜGÜNI LIRI”

4. a) Ka lariñagubei Hesusu houn lani disipulugu lubaragiñebei lagiribudun sielun? b) Kaba álügüdahani wóunaba lidan aturiahani le?

⁴ Murusun dan lubaragiñe lamudeirun Hesusu sielun aba lariñagun houn lani disipulugu: “danme le liabin [s]ífiri [s]andu huagun, hibihuba ubafu lun gefén humá nuagu, dandu Herusalén kei sun lóubawagu Hudéa, Samaria, chülǘ lumoun lidise-agei fulasu ubouagu” (Adü. 1:8). Ligíati, mámarügübei meha Ísüraeli lapurichihóua uganu buiti, lau lásügürün dan gachansinbaña meha giñe lílana sun néchani lun lani hamá Hesusu disipulugu (Mat. 28:​19, 20). Gama lumoun, ariñagati Hesusu luagu: “gefenbaña lan luagu”. Mini lan san le ha lan iseri disipulugu luágunrügüba lan Hesusu gefén hamá, o mosu giñe hasubudiruni liri Heowá? Líderagubadiwa Adügaü kapítulu 15 adarirei óunabagülei lun álügüdahani le.

5. Ida liña harufuduni apostolugu hama wéiyaaña lidan afiñeni ha meha Herusalénbaña súdini lan lasubudiruniwa liri Heowá? (Ariha huméi giñe dibuhu).

⁵ Lidan irumu 49, lidan furumiñeti sígulu aba hóundaragun apostolugu hama wéiyaaña lidan afiñeni ha Herusalénbaña lun hayanuhani le lunbei hadügüni ha mámabaña huríu lun gayaraabei lan kristiánugu hamá. Lidan lagumuchagüle adamuridaguni ligía, aba lariñagun Santiagu, le lamulen Hesusu: “Abahüdaguaali Simón Féduru woun ida liña lan fulesei lániña Bungiu sun néchanigu luagu furumiñeti wéiyaasu lau lasagarun hádangiñe lun lumutuniñame lun hanügüni liri”. Ka iri? Ariñaga lumuti Santiagu le lariñagubei profeta Amosu, dan le lariñagunbei: “Lun [ . . . ] háluahani sun híbiri gürigia Heowá; úara hama gürigia ha lílana sun burí néchani, gürigia ha anúadiranañabaña lun hanügüni niri. Liña lariñagun Heowá” (Adü. 15:​14-18, TNM). Ligíati mama furendeirügübaña iseri disipulugu luagu Heowá, lagúaruba giñe houn luagu liri Bungiu. Lidan amu dimurei, hasubudiruaba lau liri ani hasubudiragüdübei giñe iri le houn amu.

6, 7. a) Ka uagu liabin Hesusu Ubouagun? b) Kátima lébunatimabei liabin Hesusu Ubouagun?

⁶ Haritagua waméi le lan mini lubéi liri Hesusu “Heowá Asalbarunibei”, ani ítara liña, yusu lumuti Heowá lun gayaraabei lan lesefuruniña sun gürigia ha afiñebaña. Ñǘbuinti Hesusu Ubouagu lun líchuguni libagari hawagu sun gürigia (Mat. 20:28). Lau ladügüni lira, adügati lun ferudunawa lan hafigoun sun gürigia luma lun hibihin ibagari magumuchaditi (Huan 3:16).

⁷ Ka uagu megei habéi gürigia lun hesefuruniwa? Ladüga le asuseredubei lidan fuluri-agei Edén. Kei warihini lidan aturiahani le lubaragiñebei le, aba hebedaagun furumiñetiña gürigia lun Heowá, Adán tuma Ewa, ábanti heferidiruni chansi lun hawinwandun lun súnwandan (Agu. 3:​6, 24). Gama lumoun, mámarügü lun lesefuruniña Hesusu gürigia liabin ubouagu, ñǘbuinti giñe lun ladügün aban katei súdinitimati: larumadahani liri Lúguchi lídangiñe iyeeni le lariñagubei Satanási luagu (Agu. 3:​4, 5). Lunti meha giñe hasubudiruni sun gürigia madügün lan Heowá ni kata wuribati ani sandu lan liri ani aban lan Úguchili hínsiñehabuti ligía. Kei Hesusu lubéi ayanuhabei lidan liri Lúguchi ligía Hesusu lubéi gürigia le buídutimabei lun larumadahani liri Lúguchi.

8. Ka meha lunbei gunfuranda hamani sun ha adügagubaña houngua lánime Hesusu disipulugu ani anha hagíame lun?

⁸ Sun kristiánugu dandu huríu kei mama huríu, mosu gunfuranda hamani ani anha hagíame luagu Heowá lan le Lúguchi Hesusu adügübei lun hesefurun (Huan 17:3). Lanwoun lira, ítara kei lanügüni Hesusu liri Bungiu hasubudirúaba giñe kristiánugu ha luagu liri Bungiu. Mosu meha giñe gunfuranda hamani súdini lan harufudun inebesei luagu liri Bungiu. Mosu meha hadügüni katei le lun gayara lan hesefurun (Adü 2:​21, 22). Ligíati, súngubei meha lani Hesusu disipulugu ha úaraguabaña mosu meha hafurendeirun dandu luagu Heowá kei luagu Hesusu. Ligíati lagumuchunbalin Hesusu furíei le wadarirubei lidan Huan 17 lau burí dimurei le: “Subudigüda naali Biri houn, ani nasubudiragüdamémebei, lun ñein lan ínsiñeni le basandirubei nuagu hadan, lun giñe ñein nan hadan” (Huan 17:​26, TNM).

“HUGUYA NÁNIBEI GEFENTIÑA”

9. Ida luba harihini kristiánugu inarünitiña liri Heowá?

⁹ Kei le aubei warihei, lunti súdinitima lan liri Heowá houn sun kristiánugu inarünitiña (Mat. 6:​9, 10). Íñutimati liri Heowá woun wagía kristiánugu inarünitiña sügǘ lau furumiñeguarügü iri. Ani lunti warufuduni lau le wadügübei. Ka lunbei wadügüni lun gayaraabei lan wídehan lun inebewa lan liri Heowá luma lun warufuduni iyeeni lan sun le lariñagubei Satanási luagu?

10. Ka uagu layanuha kapítulu 42 darí 44 le tídanbei liliburun Isaíasi? (Isaíasi 43:9; 44:​7-9; ariha huméi giñe dibuhu).

¹⁰ Lidan kapítulu 42 darí 44 tidan liliburun Isaíasi, furendeitiwa ka lan lunbei wadügüni lun warumadahani liri Heowá. Lidan kapítulu burí le adügati Heowá álügüdahani houn ha máhuduragunbaña lun lun harufuduni anhein inarünitiña lubéi habungiutegu. Amuriahati giñe hama lun hanügün gefentiña lun harufuduni anhein inarüni lubéi le hariñagubei búngiugu hagía. Úati ni aban lun harufuduni (aliiha huméi Isaíasi 43:9; 44:​7-9).

11. Según Isaíasi 43:​10-12, ka lariñagubei Heowá houn lubúeingu?

¹¹ (Aliiha huméi Isaíasi 43:​10-13). Ariñagati Heowá houn lubúeingu: “Huguya nánibei gefentiña [ . . . ]. Bungiu au”. Amuriahati hama lubúeingu lun hóunabuni álügüdahani le: “Anihein funagia amu Bungiu nuéi?” (Isa. 44:8). Ligíati, gachansintiwa lun gayaraabei lan wóunabuni álügüdahani le. Dandu lau le wariñagubei kei lau le wadügübei, arufuda wamuti Heowarügüñein lan Bungiu inarüniti ani úati amu iri íñutimati luéi liri. Arufuda wamuti giñe lau ligaburi wabagaridun hínsiñe lan Heowá woun tídangiñe sun wanigi ani úaraguatiwa giñe lun meberesenga lénrengunga le líchugubei Satanási lidan wabagari. Ítara luba wídehan lun larumadahóun liri Bungiu.

12. Ida liña lagunfulirun profesía le tídanbei líburu Isaíasi 40:​3, 5?

¹² Ariñagati giñe Isaíasi ñeinbei lan aban wügüri le lunbei laransehan “aban émeri lubá Wabungiute” (Isa. 40:3). Ida liña lagunfulirun profesía le? Huan le Abadiseihabei ligía aransehabalin üma lubá Hesusu, ñǘbuinti Hesusu ani ayanuha ligía lidan liri Heowá (Mat. 3:3; Mar. 1:​2-4; Luk. 3:​3-6). Ariñagati giñe profeta Isaíasi: “Ábameti larufuduni Aburemei luéirigun” (Isa. 40:5). Ida liña lagunfulirun dimurei le? Dan le liábinbei Hesusu Ubouagun, ñǘbuinti Hesusu lidan liri Heowá ani adüga lumuti sun le lariñagubei Heowá lun, ítara liña kamá hamuga Heowá guánarügü ñǘbuinbei Ubouagun (Huan 12:45).

13. Ida luba wáyeihani Hesusu?

¹³ Dan le wídehan lun larumadahóun liri Heowá, wáyeihañein Hesukrístu. Ítara kei Hesusu, gefentiña giñe luagu Heowá wagía. Barǘ wamuti liri Heowá ani ayanuhatiwa houn sun gürigia luagu lubuidun burí katei le ladügübei. Gama lumoun, lun gayaraabei lan wagunfulirun lau dasi le, lunti giñe wayanuhan luagu sun katei le adüga láalibei Hesusu luma le lunbei ladügüni lun gayaraabei lan larumadahani liri Heowá (Adü 1:8). Hesusu ligía aban gefenti luagu Heowá le buídutimabei ani wasigiruñein giñe lubudarigirugu (Aruf. 1:5). Ligíati, ka au amu igaburi warufudei súdini lan liri Heowá lun kada aban wádangiñe?

AMU IGABURI LE ARUFUDUBALIN SÚDINI LAN LIRI HEOWÁ WOUN

14. Ítara kei lariñaguni Sálumu 105:​3, ka wasandirubei luagu liri Heowá?

¹⁴ Pántatiwa lau liri Heowá (aliiha huméi Sálumu 105:3). Gúndaati Heowá lau wayanuhan luagu liri luma lau wapantahan lau (Her. 9:​23, 24; 1 Cor. 1:​31, TNM). Pántatiwa lau Heowá lan wabungiutebei. Ariha wamuti kei aban lubuidun chansi lun wíchugun inebesei lun liri luma lun warumadahani lídangiñe iyeeni le ariñawagúaalibei luagu. Moun lumuti wabusigaridun wariñagun houn amu gefén wamá luagu Heowá, ni lidan wawadigimari, ni leskuelarugu, ni lidan fulasu le ñein lubéi wawinwanda. Busenti Mafia lun masubudiragüdün wamani liri Heowá (Her. 11:21; Aruf. 12:17). Le linarün katei, busenti Mafia hama ha aburuchaguagüdübalin liyeeni lun habulieiduni gürigia liri Heowá (Her. 23:​26, 27). Gama lumoun, hínsiñeti liri Heowá woun saragu darí lun busén wamá walawahani “sun dan” (Sal. 5:11; 89:16).

15. Ka mini lubéi wagúaruni liri Heowá?

¹⁵ Wawamuti liri Heowá (Hoeli 2:32; Rom. 10:​13, 14). Mini lan wagúaruni liri Heowá wasubudiruni iri le luma lun wayusuruni. Mini lan giñe wasubudiruni ida liña lan Bungiu, wafiñerun luagu wáluahani lun líderaguniwa luma lun ladundehaniwa (Sal. 20:7; 99:6; 116:4; 145:18). Mosu giñe wayanuhan houn amu gürigia luagu liri Heowá luma luagu lubuidun burí ligaburi, lun wínchahaniña lun hasakürihan luma lun hadügüni asansiruni le mégeiwabei lun gayaraabei lan harandarun luma Bungiu (Isa. 12:4; Adü. 2:​21, 38).

16. Ida luba warufuduni yee lan Satanási?

¹⁶ Aranseñu waña lun wasufurirun luéigiñe liri Heowá (Sant. 5:​10, 11). Dan le wasufurirun ladüga úaragua wamá lun Heowá, warufuduñein luagu yee lan Satanási. Lidan lidaani Hobu, ariñagati Satanási aban iyeeni hawagu sun lubúeingu Heowá, aba lariñagun: “Aranseñu liña gürigia lun ladügüni liyaraati lun lesefuruni libagari” (Hob 2:4). Lidan amu dimurei, lariñaguña heseriwiduba lan gürigia lun Heowá dan le buidu lan lidin houn, gama lumoun, anhein wuriba lidin houn hígirubei lan heseriwidun lun Heowá. Arufuda lumuti Hobu iyeeni lan sun lira lau úaragua lan. Gachansintiwa giñe lun warufudun úaraguni meberesenga saragu lénrengunga le líchugubei Satanási lidan wémeri, maweiyasunbadiwa íchigei wanagan luagun Heowá. Chouru wamuti giñe buidu buidu lasigiruba lan Heowá óunigirawa luagu liri (Huan 17:11).

17. Ítara kei lariñaguni 1 Féduru 2:​12, ida luba wíchugun uéiriguni lun liri Heowá?

¹⁷ Arufudatiwa inebesei luagu liri Heowá (Ari. 30:9; Her. 7:​8-11). Kei barǘ wabalin liri Heowá ani ayanuhatiwa luagu, gayaraati ladügün ligaburi wóuserun lun líchuguniwa uéiriguni lun Heowá o layanuhóuniwa wuriba luagu (aliiha huméi 1 Féduru 2:12). Ligíati, busentiwa wadügüni sun wayaraati lun walawahani Heowá lau le wariñagubei luma lau le wadügübei. Gayaraati wídehan lun lichugún uéiriguni lun liri Heowá anhein wadüga le, íbini chará wamá.

18. Ka idan amu igaburi warufudei súdini lan liri Heowá woun? (Ariha huméi giñe abürüdǘni).

¹⁸ Súdinitimati liri Heowá sügǘ lau le hasaminarubei gürigia wawagu (Sal. 138:2). Ka uagu wariñagei katei le? Kei hínsiñe lubéi liri Heowá, woun adüga wamuti katei le aubei lagundaara. Anihein dan adügati katei le lun hadügün gürigia bula wau o hayanuhan wuriba wawagu.a Dan meha le lóunwenbei Hesusu ariha hamuti meha gürigia kei aban wügüri wuribati ani iyereeguti meha houn, aranseñu liña meha Hesusu lun lounwen ítara, lun gayaraabei lan líchuguniwa uéiriguni lun liri Heowá. Kei lariñaguni Ebüréu: 12:​2-4, adüga lumuti “meberesenga ligía lau nibusigarídüna lan luwuyeri óunweni ligía”, mini lan le, meberesen lan lau le hasaminarubei amu luagu. Létima súdinitimabei lun ladügüni lugundan Bungiu (Mat. 26:39).

19. Ka hasandirubei luagu liri Heowá, ani ka uagu?

¹⁹ Pántatiwa lau liri Heowá ani aban lubuidun chansi woun wasubudirúniwa kei gefentiña luagu Heowá. Ligíati madiheridun wabéi lau hadügün gürigia bula wau ni lau hayanuhan wuriba wawagu. Súdinitimati liri Heowá woun sügǘ lau le hasaminarubei amu wawagu. Ligíati aranseñu waña lun wasigirun alawahei liri Heowá íbini lálugun Satanási lun lábürühan warüna o lararamuniwa. Ítarati, warufudubei súdinitima lan liri Heowá woun kei súdini lan lun Hesusu.