Lidan sun wabagari furendeihadiwa lúmagiñe Wamaisturun

LE NAFURENDEIRUBEI HÁMAGIÑE NAGÜBÜRIGU

Lubaragiñe irumu 1960, aba háguyun nagübürigu Italiagiñe lun Kanadaoun lidoun aban aüdü le gíribei Kindersley, lóubawagu Saskatchewan. Fiu dan lárigiñe, aba wasubudiruni inarüni. Ani ligíaali meha aban katei súdiniti lidan wabagari. Haritagua nágili dan le meha ñǘgidina sügütina meha saragu oura apurichiha hama nagübürigu. Ligía meha aba lubéi nasiñegiha lúmagiñe lan 8 irumu nau aban nan prekursoru.

Íbini gudeme hamá meha nagübürigu, aranseñu haña meha lun híchuguni sun hámati lidan heseriwidun lun Heowá. Kei hénpulu, lidan irumu 1963, aba ladügǘn aban adamurini le ñein lubéi hachülüra íbirigu ha lídangiñetiña ámuñegueinarügü ageiraü, Pasadena (Kalifórnia, Meriga). Keiti le busén habéi meha nagübürigu houdin, aluguratiña saragu lídangiñe hálagu lun houdin. Lidan irumu 1972, aba wáguyun lidoun aban aüdü gíriti Trail, le mílubei kilometuru lidise (kéiburi 620 maili), lóubawagu Columbia Británica (Kanadá), lun gayaraabei lan wapurichihan houn italianu. Nadagimeinti meha núguchi arumadaha luma aranseha katei le agadeiruti tidan aban budigü wéiritu. Kei le busén lubéi letenirun lun leseriwidun lun Heowá, aba lamahadun lun chansi le libihibei le ñeinba lubéi yebe lagañeira saragu seinsu.

Seremei numutiña nagübürigu luagu hénpulu le híchugubei dandu nun kei houn ǘrüwa níbirigu. Arufudahatiña woun ida luba lan wanügüni wabagari lidan weseriwidun. Arufudahatiña giñe aban katei nun le buga lunbei lahuudun nun: ánhana lan áluahei Larúeihan Heowá furumiñe, lóunigirubadina lan súnwandan (Mat. 6:33).

NAGUMESERUN ESERIWIDA LIDAN DAN DAYARÜTI

Lidan irumu 1980, aba namarieidun tuma aban tubuidunmeraü íbiri gíritu Debbie, aban íbiri to eteniruboun lun teseriwidun lun Heowá. Biángubei wagía busentiwa meha wagumeserun eseriwida lidan dan dayarüti. Ítara liñati aba lubéi tagumeserun Debbie eseriwida kei prekursora ǘrüwa hati lárigiñe wamarieidun. Aban irumu lárigiñe wamarieidun, aba wáguyun lidoun aban liraüraü damuriguaü ñein lubéi mégeiwa hamá apurichihatiña, ani aba giñe nadügagun nungua prekursorume.

Lau lásügürün dan, aba lábürühan warüna, ani busentiwa yebe wagiribudun wárigoun. Ábati wayanuhan luma óunigiruti sirkuitu, aba lariñagun woun furangu luma lau saragu ínsiñeni: “Huguya turobulibei, lugundun heteniruña lun turobuli. Anhaün etenira lun katei buiti le hadügübei amu, harihibei”. Anihán burí dimurei le meha wemegeirubei waganbun (Sal. 141:5). Lau lóufudagun, aba wadügüni le lariñagubei woun, ábati warihini anihein lan saragu igaburi buiti hawagu íbirigu. Aranseñu haña meha lílana damuriguaü lun haganwoundagüdüni heseriwidun lun Heowá, dandu irahüñü kei würiña ha meha mámabaña Gefentiña hani weiriei. Arufudahati sügǘ ligía aban katei súdiniti woun: lun wáluahani igaburi buiti le hawagubei amu lúmati lun wafiñerun laransehabei lan Heowá furumiñeguarügü turobuli lidan dan le buídutimabei lun (Mik. 7:7). Ábaya gunda wamá ani aba abuidureina lan léibugun katei lidan weseriwidun.

Tidan meha furumiñetu leskuela houn prekursoru to ñein lubéi meha woudin, gádürüñanu meha arufudahatiña woun. Ani ǘrüwa hádangiñe, seriwitiña meha lidan amu ageiraü. Arufudatiña iyawaü woun ani ayanuhatiña luagu lénrengunga le hásügürübei luma abiniruni le hibihibei. Adügatiti lira lun busén wamá weseriwidun keisi misionéru. Ligía wáfaagunbei lun wibihini.

Kei busén wabéi waranserun lun misionéru wamá, lidan irumu 1984 aba wáguyun Kebekün, le erederubei 4,000 kilometuru (2,485 maili) lidise luéi Columbia Británica. Faransu ayanuhóubei ñein. Ligía mosu lubéi meha wafurendeirun amu iñeñein luma iseri échuni. Ábanya meha turobuli, lougua lan waseinsun. Luagu aban dan, aba líchugun aban ábunaguti papas üma woun lun woudin abudahoun tígiragun papas to lígiruboun lárigiñe lalubahan. Tugíarügüñoun meha wama lun weigin. Aba meha tábougunu Debbie papas lidan ámuñegueinarügü igaburi lun gayaraabei lan wasandiruni tisemén. Íbini laganagua sun lénrengunga le, adüga wamuti sun wayaraati lun wawandun lau ugundani. Lanwoun lira, ariha wamuti woungua ida liña lan lóunigiruniwa Heowá (Sal. 64:10).

Aban weyu, aba lasuseredun aban katei le magurabun wamuti. Aba wagunbirahóun tidoun Beteli to Kanadaboun. Furumiñe, aba wagundaarun dan le wagunbirahóunbei. Gama lumoun, aba wírudun ladüga buíngüdadiwa lan gárada lun woudin tidoun leskuela Galaadü. Lau sun lira, ánhatiwa lun agunbirahóuni le. Dan le wachülürünbei Betelirugu, aba wálügüdüni íbiri Kenneth Little, aban hádangiñe íbirigu ha arihibaña tau Beteli: “Íbiri, kábati asusereda tau gárada to wabuinchagüdüboun lun woudin tidan leskuela Galaadü?”. Aba lóunabuniwa: “Warihiba luagu danme le lachülürün oura ligía”.

Chülüti weyu ligía aban dimaasu lárigiñe, dan le wagunbirahóunbei tidoun leskuela Galaadü. Guentoti, mosu meha wanúadahan kaba lan wadüga. Aba lariñagun íbiri Little woun: “Meberesenga kaba lan hanúadira, ñeinbei dan hasaminarun buídutimabei lan hamuga hanúadiruni le aban. Buiti biángubei, gayaraati labiniruni Heowá furumiñeguarügü lídangiñe”. Aba wanúadirun lun woudin tidan leskuela to. Ani ariha wamaali lidan dan le sügühalibei linarün lan íbiri Little. Ariñaga wamaali ligiaméme dimurei houn íbirigu dan le mosu lan hanúadahan kaba lan idan dasi heseriwida lun Heowá.

WABAGARI KEI MISIONERU

Ma meha wagundan lau awanhein lan haganagua 24 aturiahatiña ha lánina külase 83, le meha agumeserubei lidan gádürü-hati irumu 1987 Brooklyn (Newayóru). Íbiri Ulysses Glass luma Jack Redford hagíatima arufudahabaña woun. Éibaagueina meha lásügürün seingü hati le waubei ñein. Aba weresibihan weyu 6 lidan nefu-hati, irumu 1987. Lárigiñe, aba wounahóun Aitíoun, au tuma nani weiriou, úara hama John tuma Marie Goode.

Wagía furumiñetibaña misionérugu achülüra Aitíon, lárigiñe habugún misionérugu ha meha ñéinbaña lidan irumu 1962. Ǘrüwa dimaasu lárigiñe weresibihan, aba wagumeserun eseriwida lidan aban liraüraü damuriguaü labadinagua áraabu, le ñein habéi 35 íbirigu. Nibureingidiwa meha, ani gíbeti meha katei lunti wafurendeiruni, ani wábuguarügü meha wawinwanda tidan haban misionéru. Wéiriti meha hagudemen gürigia ha Aitíbaña, ani hiibe-agei maliiraditiña meha. Sun dan le waubei Aití, arihatiwa chagaguaü lánina polítika, kei burí: lasagarúniwa urúei lídangiñe larúeihan, furunde hamá gürigia, hageindagun gürigia luéigiñe haricha, hágudahan katei ǘmadarugu lúmati ladagarun herigini lidan ageiraü.

Furendeitiwa saragu hámagiñe íbirigu ha Aitíbaña lau warihini iderebugu luma ugundani le hasandirubei dan le hagagibudagun luma turobuli. Saragu hádangiñe, dereti meha habagari. Lau sun lira, hínsiñeti meha Heowá houn luma apurichihani. Anuhein meha aban íbiri derebuguharu ani maliireitu, lau sun lira, furendeiharu meha kei burí 150 bérusu tídangiñeti Bíbülia tichügüwagu. Sun le meha warihibei sagü weyu, ínchaha lumutiwa lun wabahüdahani houn gürigia Larúeihanrügüñein lan Bungiu lárani haturobulin. Lau lásügürün dan, sanditiwa ugundani dan le warihiniña fiu hádangiñe furumiñetiña aturiahatiña wama eseriwida kei prekursorugu, eseriwida kei wéiyaaña lidan afiñeni luma kei prekursorugu espechalitiña.

Anihein meha aban nibureinti wasubudirun Aití misionéru hani mormón gíriti Trevor. Ayanuhatiwa meha tuagu Bíbülia luma saragu wéiyaasu. Átiri irumu lárigiñe, resibitina aban gárada lúmagiñe, le ñein lubéi lariñaga nun: “Nabadiseira lidan leweñegua adamurini. Ani busentina nagiribudun Aitíoun lun neseriwidun kei prekursoru espechaliti lidan fulasu le meha ñein lubéi neseriwida kei misionéru hani mormón”. Aba taweiridun nanigi dan le naganbuni ariñagei lira. Ani ítara liña lasuseredun. Sügüti saragu dan ñein, ligía úara tuma lani weiriou eseriwida kei prekursoru.

FURUMIÑE, YUROPA ANI LÁRIGIÑE, ÁFÜRIKA

Lau lásügürün dan aba wounahóun eseriwida Yuropa, le ñein lubéi meha lanharúña lan lun wapurichihan. Lidan irumu 1992, ligía wachülürün Liubliana (Eslowénia), yarafa lun fulasu le ñein lubéi hagüriahóua nagübürigu lubaragiñe háguyun Italioun. Lidan dan ligía, lagumeseruña aban wuribu lidan fulasu le meha asubudirúabei kei Yugoslavia. Sukursáli meha to Vienaboun tuma áfisi to Zagrebuboun (Kuroásia) tuma to Belgraduboun (Sérübia) arihiboun lau apurichihani lidan burí ageiraü ligía. Guentoti ñeinboun meha aban sukursáli lidan kada ageiraü.

Ligía mosu lubéi meha wafurendeirun amu iñeñein luma amu échuni. Héchutiña meha esloweniana ariñaga woun: “Jezik je težek”, le mini lubéi hénrengu lan iñeñein ligía. Ani hanarün meha! Ma wagundan lau warihini úaraguni luma lubuidun igaburi le harufudubei íbirigu lau hánharun lun asansiruni le tadügübei lóundarun Heowá. Ani ariha wamuti ida liña lan labiniruniña Heowá. Arihaya wamuti súnwandan lan laranseruni Heowá katei lau ínsiñeni luma lidan lidaani. Sun burí irumu le wásügürübei Eslowénia, adügati lúntima lerederun wachügüwagun le furendei wamaalibei, ani arufudahati giñe amu burí katei woun.

Ábayati lachülürün iseri asansiruni woun. Lidan irumu 2000, aba wounahóun eseriwida Kosu Marüfíli, Áfürika. Aba lagumeserun aban wuribu le ñein lubéi hageindagua gürigia hámagua. Lidan unsu-hati irumu 2002, aba wasagarún ñéingiñe lun wounahóun Siera Leona, le ñein lubéi lagumuchuña lan giñe aban wuribu libe le, le meha adurarubei 11 irumu. Hénrenguti meha woun wáfuridun Kosu Marüfíligiñe sódini. Lau sun lira, íderagua lumutiwa le furendei wamaalibei lun meferidirun wamani wagundan.

Aba wetenirun lun ligaburi hóunabun gürigia ha únbaña wapurichiha luma lun ínsiñeni le harufudubei wíbirigu ha awandaañabaña saragu irumu ladüga wuribu. Íbini gudeme hamá, busentiña meha hedewehan lídangiñe le hámabei. Aban weyu, busentu meha aban íbiri tedeweha daüguaü tun Debbie. Lau inebesei, aba tariñagun Debbie tun uá. Lau sun lira, ariñagatu íbiri to tun Debbie: “Lidan lidaani wuribu, íderagua hamutiwa íbirigu ha lílana ámuñegueinarügü ageiraü. Guenleti, wagíaali lun wídehan”. Ligía wadügübei aransehani, au tuma Debbie, lun wáyeihani lubuidun hénpulu le.

Lau lásügürün dan, ábaya wagiribudun Kosu Marüfílioun, gama lumoun, adügati polítika lunya lagumeserun anarimeni ñein. Ligíati, lidan unsu-hati, irumu 2004, ábaya wasagarún ñéingiñe tidan elikópteru, ani ábanrügüñoun baliha gayara lan lanügün kada gürigia. Múarugu warumuga áriebu ligía, lidan fulasu le ñein habéi súdaragu faransuna, ani larugan, aba wanügǘn tidan awión Suisoun. Chülütiwa tidoun sukursáli yarafa lun amidi áriebu. Ábati taweiridun wanigi warihiniña lílana Sétanu le arihibei tau sukursáli hama ha arufudahabaña tidan leskuela to aransehabaliña íbirigu lun aban ministeriu espechaliti úara tuma hani weiriou agurabahawa lun heresibiruniwa lau ínsiñeni, lau éigini sǘgili lúmati tau saragu chugulaadi.

Aba wounahóun eseriwida Gana luagu fiu dan, ani dan le agalumareina lan katei Kosu Marüfíli, ábaya wagiribudun ñeinhin. Lidan dan hénrenguti ligía, le ñein lubéi wasagarúa saragu wéiyaasu ani resibi wagía ámuñegueinarügü dasi, íderagua lumutiwa ínsiñeni le harufudubei íbirigu woun. Íbini kamani lan ínsiñeni tidan lóundarun Heowá, maweiyasunbadiwa, au tuma Debbie, arihei katei le kei aban katei mebegiti. Chóuruti arufudaha lan dan hénrenguti le woun katei súdiniti le lunbei lahuudun woun lidan weseriwidun lun Heowá.

ÁMUYA ASANSIRUNI LIDAN WESERIWIDUN

Lidan irumu 2006, aba weresibirun aban gárada tídangiñe Beteli to Merigaboun, ñein lubéi lariñawagúa woun wounahóua lan eseriwida Asia. Mósuya wagagibudagun luma lénrengunga, wafurendeirun amu iñeñein luma amu échuni. Anihein meha saragu katei lunti wafurendeiruni, ladüga anihein meha saragu turobuli lidan fulasu ligía ladüga polítika luma relihión. Luéigiñe le aban oubaü, gúndaatiwa warihini ámuñegueinarügü lan iñeñein ayanuhóuti lidan burí damuriguaü lúmati úarani le hádanbei íbirigu ladüga hafalaruni adundehani le tíchugubei lóundarun Heowá. Wéiritu wanigi lau warihini ganigi le harufudubei íbirigu lau hawanduni lidere dan le híchugubei haduheñu, habesinanigu, hapanaagu dandu leskuelarugu kei lidan wadagimanu houn.

Lidan irumu 2012, ñǘdüntiwa lidoun aban adamurini espechaliti Tel Aviv (Ísüraeli). Mabulieidun wamuti adamurini ligía lugundun lúmagiñe Pentekosutesi le lánina irumu 33 móundaragun hamá saragu lubúeingu Heowá lidan fulasu ligía.

Lidan burí irumu ligía, aba wounahóun abisidaha aban ageiraü le ñein lubéi máhawa lan lun wapurichihan. Barütiwa fiu agumeiraguagüdüni, furitiwa apurichiha ani ñǘdüntiwa lidan fiu adamurini ñǘbüriti. Añahein meha súdaragu tau hárumate araramahaña gürigia ǘmadarugu lidan sun fulasu. Lau sun lira, chóuruti meha wasandiragun woungua ladüga houdin fiu íbirigu wama ani aba híderaguniwa lun wóuserun lau duari.

WAGIRIBUDUN ÁFÜRIKOUN

Lidan irumu 2013, aba wamisurahóun lun weseriwidun tidan sukursáli to Kinsasaboun (Kongo). Wéiriti ageiraü le, ani buin liña lau katei buíduburiti. Wéiriti gudemei ñein ani súnwandan ñein lan wuribu. Furumiñe, aba wariñagun wóuniwagua: “Subudi wamaali Áfürika, lugundun wínwanhadiwa meha ñein. Subudi wamaali ida liña lan katei ñein”. Lau sun lira, anihagua buga saragu katei lunti wafurendeiruni. Kéiburi, waweiyasuhan lídangiñe fulasu le úabei üma buiti ñein ni burichi. Gúndaatiña meha íbirigu ha lau sun maseinsun hamá, ani áfaaguatiña lun houdin adamuridagua, hínsiñeti apurichihani houn ani ñǘdüntiña giñe lidoun adamurini. Lúntiha igaburi buiti le wetenira. Seremei lídehan luma labinihan Heowá, ariha wamuti ida liña lan haganwoundun íbirigu. Lidan sun dan le wásügürübei Kinsasa, furendeitiwa saragu katei súdiniti. Ani ibihatiwa giñe umadagu ha ítarabaña woun kei iduheñu.

Lidan lagumuchagüle irumu 2017, aba wounahóun tidoun Beteli to Sudafürikaboun —tuguya sukursáli to wéiritimaboun to ídanboun weseriwida— ani aba híchugun dasi woun léñaha madügün wamagili. Aniheinya saragu katei lunti wafurendeiruni. Lau sun lira, íderagua lumutiwa katei le meha furendei wamaalibei. Añahein saragu íbirigu ha eseriwidubaña lun Heowá luagu saragu irumu ani wéiriti hínsiñe woun. Wéiritu wanigi warihini úarani le hádanbei íbirigu ha Betelirugubaña, íbini lídangiñetiña lan ámuñegueinarügü rasa luma échuni. Furanguti biní laaña lan Heowá lumutuniña lau darangilaü, lugundun dáüguaaña lan lau iseri igaburi lau hafalaruni adundehani le tídanbei Bíbülia.

Lidan sun dan le waubei eseriwida lun Heowá, resibihadiwa saragu dasi buíduburiti, héchuhadiwa luagu ámuñegueinarügü échuni ani furendeihadiwa iseri burí iñeñein. Íbini anihein lan dan hénrengu lan katei, ariha wamuti yusu lanu Heowá lóundarun hama íbirigu lun larufuduni weiri lan wínsiñe lun (Sal. 144:2). Sun le furendei wamaalibei lidan weseriwidun lidan dan dayarüti, íderagua láadiwa lúntima buidu wamá kei lubúeingu Heowá.

Wéiriti lebegi hagüriahanina nagübürigu luma ídemuei le tíchugubei Debbie nun, lúmati lubuidun hénpulu le híchugubei íbirigu nun. Lau wasaminarun luagun le lunbei liabin, aranseñu waña lun wasigirun afurendeira saragu katei lúmagiñe Heowá, Wamaisturun le buídutimabei.