Furendeihadün san agundaara lau le húmati?

1. Ka mini lubéi gunda lan gürigia lau le lúmati?

GÚNDAATÜN san lau le húmati lidan hibagari? Gürigia le gúndaabei lau le lúmati, lagundaarunbei ladüga letenirun lun le líchugubei Heowá lun, meteniti lun le úabei luma. Ligía gunda lubéi ani darangila ligía. Gama lumoun, íbini gunda wamá lau le wámati, úati mini lan lira madiheridunbadiwa lan luagu ida liña lan wanügüni wabagari. Ligía buídubei lubéi lun wáfaagun lun waganwoundagüdüni weseriwidun lun Heowá (Rom. 12:1; 1 Tim. 3:1). Íbini ítara, gúndaamemebadiwa íbini meresibirun wamani dasi le hínsiñebei woun o le wayumahabei.

2. Ka uagu dencha lubéi magundan lan gürigia lau le lúmabei?

² Anhein magundan wabéi lau le wámati gayaraabei wéiguadun lidoun charati le wéinamuti. Kei hénpulu, añahein gürigia nadagimeintiña saragu oura lun hagañeihan katei le memegeirungubei hamuti. Ma lirun añahein lan wábirigu héiguaaña lidoun liweruhóun seinsu luma lun híweruhani katei le hayumahabei. Másiñati samina hamá: “Yuuti nun”, “buchá nuagu agurabaha” o samina hamá gayara lan hanügüni seinsu ligía ani ábame lan hagiribudagüdüni lárigiñe. Gama lumoun, meberesenga ka lan luwuyeri íweruhani ídounbei wéiguada, iyereeguti sun íweruhani lun Heowá ladüga dasei lumuti liri (Ari. 30:9). Añahein hagía beluti magundani houn ladüga meresibirun hamani dasi le hínsiñebei houn ábati hígiruni heseriwidun lun Heowá (Gal. 6:9). Ka gayaraabei ladügün lun léiguadun aban lubúein Heowá lidan aban katei ítarati? Háfuga ladüga lan lagumeserun asandira magundani lau le lúmabei.

3. Ka gayaraabei wafurendeirun lídangiñe Filipuna 4:​11, 12?

³ Lunti wafurendeirun agundaara lau wámati, íbini hénrengu lan. Ariñagati apostolu Pábulu luougua: “Furendeihadina lun gúndaañu nan lau le númati” (aliiha huméi Filipuna 4:​11, 12). Dan meha le labürühanbalin apostolu Pábulu dimurei burí le, ladaürǘña meha, lau sun lira, meferidirun lumuti lugundan. Anhein hénrengu lubéi woun wagundaarun lau le wámati, líderagubadiwa le lariñagubei Pábulu luma le lawinwandubei lun gúndaamemebadiwa lan. Ida luba wafurendeirun lun gunda wamá meberesenga le gádanbaliwa? Lidan aturiahani le warihiba ǘrüwa katei le gayaraabei líderaguniwa.

GETEINGIRADI WAMÁ

4. Ka uagu adüga lubéi geteingiradi lun gunda wamá? (1 Tesalónikana 5:18).

⁴ Eibu geteingiradi wamá éibume gúndaatima lan wasandiragun woungua (aliiha huméi 1 Tesalónikana 5:18). Kei hamuga guentó, ánhawa arufuda geteingiradi luagu le wámabei hénrengutimabei wayumahani le úabei wama. Anhein gebegi lubéi woun le wayaraabei adüga lidan weseriwidun lun Heowá, weteniruba lun wíchuguni le buídutimabei wámagiñegua lun ani meredebadiwa asaminara luagu dasi le hínsiñetimabei woun lun weresibiruni. Ligía tínchahabadiwa Bíbülia lun weteingiruni Heowá lidan wafurieidun! Íderagua lumutiwa geteingiradi lun wasandiruni lidarangilan Bungiu “le wéiritimabei luéi sun subudi” (Fili. 4:​6, 7).

5. Ka uagu lunti lubéi yebe geteingiradi hamá ísüraelina? (Ariha huméi giñe dibuhu).

⁵ Samina wamá hawagun ísüraelina ha meha erederubaña ekehara saragu wéiyaasu lun Heowá ladüga hálugun luagu éigini le Ehiptubei (1 Lur. 11:​4-6). Inarüni hénrengu lan meha ibagari lidan fulasu mageirawati. Lau sun lira, gúndaatimabaña hamuga lun hamuga meha gebegi lan houn le ladügübei Heowá hawagu. Lunti hamuga meha haritaguni óunaha lan Heowá 10 íñenaü lun lesefuruniña hawéi ehiptuna ha amudiragubaliña. Dan le háfuridunbei ísüraelina Ehiptugiñe gidá hamuti “hámati Ehiptuna hawéi”, gidatiña saragu pülata, golu tuma daüguaü hawéi (Afu. 12:​35, 36). Lanwoun lira, yusu lumuti Heowá lubafu lun lafanreinraguagüdüni barana Funati, ítara liña ladügün lun hesefurun ísüraelina luéi faraón luma hawéi lisudaranigu. Sagü weyu léigagüdüniña Heowá maná sun añahán lan ánhiñuraguei fulasu mageirawati. Kati lébunabei magundan habéi? Mama ladüga lúan éigini hama, le hawagubei meteingiradi hamá.

6. Kaba íderaguawa lun geteingiradi wamá?

⁶ Kaba íderaguawa lun geteingiradi wamá? Furumiñe, direi wamá dan lun wasaminarun luagu katei buiti le wámabei. Másiñati gayara lan wabürüdün bián o ǘrüwa katei le gayaraabei wíchugun eteingiruni lun Bungiu luagu (Aya. 3:​22, 23). Libiaman, teinki waméi Bungiu sagü weyu ani teinki wamaña gürigia ha adügübaña katei wawagun (Sal. 75:1). Lǘrüwan, anúadira wamá umadagu ha geteingiradibaña. Ánhawa ásügüra dan hama gürigia ha geteingiradibaña, geteingiradibadiwa giñe. Ánhawa ásügüra dan hama ha meteingiradibaña, meteingiradibadiwa giñe (2 Lur. 1:​26-28; 2 Tim. 3:​1, 2, 5). Ánhawa áluaha chansi lun warufudun geteingiradi, meredebadiwa asaminara saragu luagu le úabei wama.

7. Ka íderagubarun Aci lúntima gunda tan?

⁷ Ariha waméi tikesin aban íbiri to gíriboun Aci to awinwanduboun Indonesia. Abahüdahatu: “Lidan lidaani COVID-19, aba narihini le gádanbalina lumoun le gádanbaliña íbirigu, ábati nagumeserun asandira magundani” (Gal. 6:4). Ka íderagubarun asansirei ligaburi tisaminan? Ariñagatu Aci: “Aba nararamagun asaminara luagu abiniruni le neresibirubei sagü weyu luma luagu anahán lan tidan lóundarun Heowá. Aba neteingiruni Heowá, adügati katei le lun nasandirun saragu ugundani”. Gayaraati líderaguniwa tani íbiri to hénpulu anhein magundan wabéi lidan le gádanbaliwa lidan wabagari.

ǗNABUGU WAMÁ

8. Ka asuseredubei lun Baruku?

⁸ Samina wamá luagu Baruku le lani profeta Heremíasi sekretariu. Wuribati meha lasandiragun lungua luagu le gádanbalin. Hénrenguti meha lidasin wügüri le, lugundun mosu meha lasubudiragüdüni lasiadihan Heowá houn ísüraelina ladüga hamaganbadin lun Heowá. Chülüti aban dan aba marihin laali lan Baruku leseriwidun lun Heowá kei aban katei súdiniti, ligía aba lubéi lagumeserun asaminara saragu luougua luma luagu le labusenrunbei libihin. Ligía aba lubéi layusuruni Heowá profeta Heremíasi lun lariñagun lun: “Busentibu san bamuriahan somu katei bungua le hanarimeguti? Málugagubeibei” (Her. 45:​3-5). Lidan amu dimurei, kamá hamuga meha lariñaguña lun: “Gundaabá lau le búmati”. Ánhati Baruku lun adundehani le, ligía leresibirubei abiniruni lúmagiñe Heowá.

9. Ka larufudahabei 1 Korintuna 4:​6, 7 woun? (Ariha humóun giñe iyawaü).

⁹ Másiñati anihein lan dan samina lan somu íbiri yu lan lun leresibirun ítaga dasi. Másiñati anihein lan somu iyaraani luagu, nadagimein haali lan saragu o barühali lan saragu irumu eseriwida lun Heowá o gayaraagua lan lungua lun ladügüni ǘrüwa katei le. Íbini ítara, háfuga amu eresibirubalin dasi ligía. Kaba ladüga íbiri le lun meferidirun lani lugundan? Gayaraati lararamagun asaminara luagu le labürüdübei apostolu Pábulu lidan 1 Korintuna 4:​6, 7 (aliiha huméi). Sun iyaraani luma dasi le weresibirubei lúmagiñe Heowá liabin, mama ladüga súdini wamá hawéi amu gürigia weresibirunbalin, weresibirunbalin ladüga areida lan Heowá wama (Rom. 12:​3, 6; Efe. 2:​8, 9).

10. Kaba íderaguawa lun ǘnabugu wamá?

¹⁰ Líderagubadiwa wararamagun asaminara luagu lani Hesusu hénpulu lun ǘnabugu wamá. Íbini subudi lan lun ligía lan Liraübei Bungiu ani gabafu lan saragu, chibá lumuti meha hagudi lani apostolugu. Abürühati apostolu Huan: “Lau sun subudi lani Hesusu luagu lúmagiñe lan Bungiu liabin, ani lúmounba lan giñe Bungiu lagiribuda, […] aba lagumeserun achibei hagudi disipulugu” (Huan 13:​3-5). Gayaraati hamuga meha lasaminarun Hesusu hagía lan hamuga lúnbaña hachibuni lugudi. Lau sun lira, masaminarungubeiti Hesusu yu lan lun lanügün aban lubuidun ibagari ni lun risi lan (Luk. 9:58). Aban meha wügüri ǘnabuguti Hesusu, ligía meha gunda lubéi lau le lúmati. Ruti aban buiti hénpulu woun (Huan 13:15).

11. Ka íderagubalin Dennis lun gúndaatima lan lasandiragun lungua?

¹¹ Ariñagati aban íbiri gíriti Dennis le lídangiñebei Países Bajos áfaagua lan lun ǘnabugu lan kei Hesusu. Lau sun lira, anihein dan hénrengu lan lun. Ariñagayati: “Dan le narihin leresibirun aban íbiri dasi le hínsiñebei nun, anihein dan aba nagañidun o aba nasaminarun nun yebe lan yu lan dasi ligía. Dan le lasuseredun le nun, aba naturiahan luagu ǘnabuguni. Mákütina lidan JW Library^® fiu bérusu le ayanuhabei luagu igaburi le lun ménrengun lan nun nadariruni lunya naliihani. Súnwandan naganbaha yanu burí luagu tema le ani rarigüda numuti giñe lidoun nigagamurun.a Furendeihadina giñe sun lan le wadügübei, lun wíchugun uéiriguni lun Heowá wadügei, mama wóuniwagua. Lani Heowá dasi le wadügübei, ígirarügü lumutiwa lun wídehan luma”. Anhein anihein lubéi dan sandí wamá magundani kei íbiri le, áfaagua wamá lun ǘnabugu wamá. Ítara luba wederebudagüdüni wamadagua luma Heowá ani ábame gúndaatima wamá (Sant. 4:​6, 8).

RÁRAMAGUA WAMÁ ASAMINARA LUAGU WEMENIGIN

12. Ka emenigini íderagubaliwa lun gunda wamá lau le wámati luma lau le gádanbaliwa? (Isaíasi 65:​21-25).

¹² Líderagubadiwa wararamagun asaminara luagu le füramase lubéi Heowá lubá ámuñegü lun gúndaatima wamá lau le gádanbaliwa uguñe weyu. Ítara kei warihini tidan liliburun Isaíasi, gunfuranda lumuti Heowá hénrengu lan ibagari uguñe weyu, ani füramaseti giñe woun lagumuchuba lan lau sun waturobulin sunsuinagubei (aliiha huméi Isaíasi 65:​21-25). Buídubei ibagari lidan iseri ubóu, lugundun gábanbadiwa, gúndaabadiwa lau wawadigimari, ñeinbei éigini semeeti ani le buiti lun wátuadi. Madiheridunhadiwame luagu lasusereduba lan katei wuribati woun ni houn wasaanigu (Isa. 32:​17, 18; Ese. 34:25). Maame lubuidun ibagari le, ani chouru wamuti lagunfulirúba lan.

13. Ka idan sügǘ súdinitima lan lun wasaminarun luagu wemenigin?

¹³ Ka uagu súdinitimati lubéi wasaminarun uguñe weyu luagu wemenigin? Lugundun wawinwanduña lidan “lagumuhóun dan” ani sun wagía gagibuguatiwa luma turobuli le “hénrenguti” (2 Tim. 3:1). Íderagua lumutiwa Heowá sagü weyu lun wawandun lau líchuguni adundehani, erei luma ídemuei le wemegeirubei (Sal. 145:14). Lau ladügüni lira, ruti emenigini woun le ágüdahabaliwa lidan dan hénrenguti. Háfuga mosu lan wawadigimaridun saragu lun wéigagüdüniña tílana waban luma lun wibihini seinsu le wemegeirubei. Lau sun lira, subudi wamuti madurabei lan turobuli le lun sun dan, ladüga füramaseti Heowá líchugubei lan sun le wemegeirubei woun lídanme Paraísu (Sal. 9:18; 72:​12-14). Másiñati anihein lan saragu íruni huagu, o hásügürüña lan lídangiñe somu sandi le hanarimeti o láfarahañadün lan gáriti. Masaminara humá ítaradügaali lan ibagari ni luagu úaali lan emenigini, lugundun füramasehaali Bungiu lidan lanme iseri ubóu úaali lanme sandi ni óunweni (Aruf. 21:​3, 4). Íderagua lumutiwa füramasei le lun meferidirun wamani wagundan ni lun wagañidun luagu le gádanbaliwa uguñe weyu. Gayaraati meferidirun wamani wagundan íbini wasufurirun marichaü, sandi, lounwen somu waduhe, o furumiñeguarügü turobuli. Ka uagu? Mabulieida waméi ariñaga tan Bíbülia meberesenga le “wasufurirubei lidan ibagari le mahürüti ani fureseti lásügürün” ani lidan lanme iseri ubóu lagidarúba lan asufuriruni lun sun dan (2 Ko. 4:​17, 18).

14. Ida luba wederebudagüdüni wemenigin?

¹⁴ Ida luba wederebudagüdüni wemenigin lun gayara lan líderaguniwa akipurei wagundan lau le wámati? Gayaraati wariñagun ítara liña lan wemenigin kei aban gágülesi le íderagubaliwa lúntima warihini furangu ida luba lan wabagari lidan Paraísu. Kei hamuga guentó, danme le wásügürün lídangiñe maseinsuni, gayaraabei wasaminarun ida luba lan ibagari danme le mayusurúnwaali seinsu, ua ligíame gudemei ni dúeiti. Anhein ábürüha warüna ladüga meresibirun wamá ítaga dasi lidan damuriguaü, buídubei lun wasaminarun buídubei lan wabagari lídanme Paraísu eseriwida lun Heowá luagu saragu milu irumu danme le mafigounhadiwa (1 Tim. 6:19). Másiñati gibe lan katei lun wachügü darí lun hénrengu lan woun wasaminarun luagu dan le lunbei liabin. Eibu wasaminarun luagu lubuidun dan le lunbei líchuguni Heowá woun ámuñegü, ménrenguntimabei woun wagundaarun lau le wámabei.

15. Ka larufudahabei tani Christa hénpulu woun?

¹⁵ Ariha waméi ka lan gayaraabei wafurendeirun lídangiñe tikesin Christa, to lani Dennis weiriou, le buga uágubei layanuhóua lidan párafu 11. Ariñagatu Christa: “Anihein aban sandi nuagu le adügübei lun siñá lan néibugun ani adügati lun nayusurun haláü gabalabalanti. Ani liibe-agei dan rounñu niña lau gáriti. Málügili lúmagiñe lariñagun surusia nun máraninaali lan nuáguti. Ábati nasaminarun: ‘Ámuti ligaburi larihini surusia le katei, ánheinti nuguya mítaranti narihini’. Lun le lunbei nibihini ámuñegü, lun lira netenira, ani íderagua lumutina katei le lun darangilu nan. Lérügüñein lunbei nadügüni, nawanduni gádantina, lugundun aniteeli iseri ubóu le ñeinba lubéi gunda nan le gumuti!”.

“ÚABEI HEMEGEIRUN HA INEBEHABUBAÑA LUN HEOWÁ”

16. Ka uagu lariñaga Dawidi “úabei [lan] hemegeirun ha inebehabubaña lun” Heowá?

¹⁶ Íbini gunda wamá lidan wabagari wasigiramémeba agagibudagua luma turobuli. Samina wamá luagu urúei Dawidi. Fériditi ǘrüwa hádangiñe lisaanigu lidan óunweni. Lanwoun lira, aba liridahóuniwa luagu duru mama ladüga, ani éibaaha haméi láganigu luagu saragu irumu lun háfaruni hilagubei. Íbini sügǘ lani sun le, gúndaamemegili meha. Ligía lariñagubei luagu Heowá: “Úabei hemegeirun ha inebehabubaña lun” Heowá (Sal. 34:​9, 10). Ka uagu lariñagei le? Íbini subudi lan lun ígira lan Heowá lun wasufurirun, súnwandan líchugubei lan le wemegeirubei woun (Sal. 145:16). Ítara kei urúei Dawidi, gúndaatiwa lugundun chouru wamuti ñeinbei lan Heowá warugabu meberesenga le asusereduti.

17. Ka uagu busén hubéi hafurendeirun agundaara lau húmati meberesenga ka lan gádanbalün?

¹⁷ Busenti Heowá lun gúndaañu wamá meberesenga le gádanbaliwa (Sal. 131:​1, 2). Guentó, kei subudi wamaali lan ka lan lunbei wadügüni, áfaagua wamá lun geteingiradi wamá, ǘnabugu wagíame ani ráramagua wagíame asaminara luagu wemenigin. Ítarati, gayaraahalime wariñagun: “Furendeihadina lun gúndaañu nan lau le númati” (Fili. 4:11).