Ida liña líderaguniwa Heowá awanda?

1. Ka uagu megei wabéi wawandun, ani ka gayaraabei líderaguniwa? (1 Féduru 5:10).

WAWINWANDUÑA lidan aban dan hénrenguti, ani súngubei wagía gaturobulintiwa. Añahein wádangiñe, barühadiwa saragu irumu lau somu sandi, añahein amu féridihaña somu haduhe lidan óunweni ani añahein giñe amu, rútiña haduheñu o gumadimatiña lidere dan houn (Mat. 10:18, 36, 37). Chóuruti súngubei lan wagía mégeitiwa wawandun, ani gayaraati wachoururuni líderagubaña lan Heowá lubúeingu lun hawandun, íbini huguya (aliiha huméi 1 Féduru 5:10).

2. Ka íderagubaliwa wagía kristiánugu lun wawandun?

² Mini lan lawandun aban gürigia lakipurun úaraguni lun Heowá meferidirungaléi lemenigin luma lugundan, íbini lagagibudagun luma lénrengunga, óuchawaguni, éibaahouni luma turobuli. Ka íderagubaliwa wagía kristiánugu lun wawandun? Mama lau wabafu guánarügü wawanda, awandatiwa ladüga “lúmagiñe lan Bungiu liabin óunwenbu ubafu le wawagubei” (2 Ko. 4:7). Lidan aturiahani le, warihuba gádürü ídemuei le ru laalibei Heowá woun lun gayaraabei lan wawandun luma ida luba lan wasagarun saragu buiti lídangiñe kada aban lídangiñe.

FURÍEI

3. Ka uagu gayara lubéi wariñagun aban lan lubuidun idewesei gayara lan wayanuhan luma Heowá?

³ Rúhali Heowá ídemuei woun lun gayara lan wawandun. Íbini gafigoun wamá, ígiraali lun gayaraabei lan wayanuhan luma (Ebü. 4:16). Samina wamá luagu le mini lubéi katei le: gayaraati wayanuhan luma Heowá furumiñeguarügü oura, luagu furumiñeguarügü katei, lidan furumiñeguarügü iñeñein, luma lidan furumiñeguarügü fulasu, íbini dan le wadaürǘña lan (Hon. 2:1, 2; Adü. 16:25, 26). Gabafuti lun gunfuranda lani le wabusenrubei wariñagun íbini dan le ladügün idiheri lun hénrengu lan woun wariñaguni le wabusenrubei wariñagun lun (Rom. 8:26, 27). Ma aban lubuidun idewesei lúmagiñeti Heowá gayara lan wayanuhan luma?

4. Ka uagu buidu lubéi lun wamuriahan luma Heowá lun líderaguniwa awanda?

⁴ Chóurugüda lumuti Heowá woun tidan Lererun “ánhawa lan amuriaha furumiñeguarügü katei keisi lugundan, laganbubadiwa lan” (1 Huan 5:14). Ligíati, buídubei funa san wamuriahan ídemuei luma lun gayara lan wawandun? Anha, lugundun úarati furíei ligía luma lugundan. Ida liña wasubudiruni? Lugundun ariñagatu Bíbülia dan lan le wawandun lénrengunga, gayaraabei lóunabuni Heowá lasigenehan Mafia (Ari. 27:11). Ariñagatu giñe luagu aranseñu liña lan Heowá “lun líchugun erei houn ha hemenigibaña luagu le tímatimaati” (2 Kro. 16:9). Ligía gayara lubéi wachoururuni busén lan Heowá líderaguniwa awanda ani gayaraati ladügüni (Isa. 30:18; 41:10; Luk. 11:13).

5. Ida liña líderaguniwa furíei lun darangilu lan wasaminan? (Isaíasi 26:3).

⁵ Ínchaha tumutiña Bíbülia kristiánugu lun hafurieidun luagu le adiheridagüdübaliña. Ariñagatu: “Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan” (Fili. 4:7). Wéiriti weteingiruni Heowá luagu idewesei le! Gürigia ha meseriwidunbaña lun Heowá adügatiña sun luwuyeri katei lun habulieidagun luéi haturobulin luma lun nege habihin lun darangilu lan hasaminan. Kei hénpulu, añahein gürigia aba hálugun lun hagidaruni sun saminaü hachügüwagugiñe, íbini le adiheridagüdübaliña, lun darangilu lan hasandiragun houngua. Gama lumoun, denchati ladügǘniwa katei le, lugundun gayaraati ladügün lira lun lebelurun Mafia lidoun hasaminan (ariha huméi giñe Matéu 12:43-45). Ábanya giñe katei, mítaranti darangilaü le hasandirubei gürigia hagía lumoun darangilaü le gayaraabei líchuguni Bungiu woun dan le wafurieidun lun. Wagía afiñetiwa luagu Heowá sunsuinagubei ani góunigi lumuti wasaminan tuma wanigi lau líchugun “darangilaü” woun (aliiha huméi Isaíasi 26:3). Ida liña ladügüni? Lau ladügün lun waritaguni bérusu tídangiñeti Bíbülia le arufudubalin woun hínsiñe wamá lun ani busén lan líderaguniwa (Sal. 62:1, 2).

6. Ka gayaraabei wadügüni lúntima líderaguniwa furíei? (Ariha humóun giñe iyawaü).

⁶ Le lunbei wadügüni lun wasagarun saragu buiti lídangiñe ídemuei le. Danme le wásügürün lídangiñe lénrengunga, furíei wamá lun Heowá lun wígiruni wadiheri lúhaburugu, amuriaha wagíame darangilaü luma lichú aau luma lun gayaraabei lan wasubudiruni kaba lan wadüga (Sal. 55:22; Ari. 2:10, 11). Amu luéi wayumuragun lun Heowá lun líderaguniwa awanda, mabulieida waméi wíchugun seremei lun luagu le ladügübei wawagu (Fili. 4:6). Aranseñu wamá lun warihini ida liña lan líderaguniwa lidan lidaani lénrengunga ani ru wamá seremei lun luagu ídemuei le líchugubei woun. Mígira wamá lun ladügün turobuli lun marihin wamani abiniruni le líchugubei Bungiu woun (Sal. 16:5, 6).

BÍBÜLIA

7. Ida liña líderaguniwa waturiahanu Bíbülia lun wawandun?

⁷ Ru laaru Heowá Lererun woun lun líderaguniwa awanda. Tidan, daritiwa saragu bérusu le achoururagüdübalin woun anihein lan Heowá warugabu súnwandan lun líderaguniwa. Ariha wamá aban hénpulu. Ariñagati Matéu 6:8: “Lubaragiñe hafurieidun lun Bungiu subudi laali ka lan habusenrubei”. Hesusu meha ariñagubalin dimurei burí le, ani ligía subudihabutimabei lun Heowá sügǘ luéi furumiñeguarügü gürigia. Ligíati, dan le wasufurirun, gayaraati wachoururuni subudi lan lun Heowá ka lan wemegeirubei ani chóuruti líderagubadiwa lan. Buin tiña Bíbülia lau lubuidun burí füramasei le ladügübei Bungiu woun le íchugubei erei woun lun wawandun (Sal. 94:19).

8. a) Ru humá aban hénpulu luagu aban adundehani tídangiñeti Bíbülia le lunbei líderaguniwa awanda. b) Kaba íderaguawa aritaguei adundehani tídangiñeti Bíbülia danme le wemegeiruni?

⁸ Anihein burí adundehani tidan Bíbülia le íderagubaliwa awanda. Íderagua lumutiwa burí adundehani ligía lun wasubudiruni kaba lan wadüga lidan ítaga kesi (Ari. 2:6, 7). Kei hénpulu, ínchaha tumutiwa Bíbülia lun merederun wamá asaminara saragu luagu katei le lunbei lasuseredun ámuñegü. Lubaragiñe lira, lunti wetenirun lun waturobulin le lánina sagü weyu (Mat. 6:34). Anhein hechu wabéi aliihoun Bíbülia ani ráramagua wagía asaminara luagu le waliihabei tidan, ménrenguntimabei waritaguni adundehani le lunbei líderaguniwa lidan le gádanbaliwa.

9. Ka un línchahawa wararamagun asaminara luagu abahüdaguni tídangiñeti Bíbülia?

⁹ Lanwoun lira, daritiwa abahüdaguni tidan Bíbülia hawagu gürigia ha meha afiñebaña luagu Heowá ani aba heresibirun ídemuei lúmagiñe (Ebü. 11:32-34; Sant. 5:17). Dan le wararamagun asaminara luagu burí abahüdaguni le, aba lederebugudun wafiñen luagu “Bungiu [lan] waramudaguagülebei, ligía giñe wérebei; ligía íderagubaliwa lidan nidiheri wamá” (Sal. 46:1). Ánhawa etenira lun afiñeni luma awanduni le meha harufudubei lubúeingu Bungiu ha lánina binadu dan, línchahabadiwa lira lun wáyeihaniña (Sant. 5:10, 11).

10. Ka gayaraabei líderaguniwa asagara buiti lídangiñe waturiahanu Bíbülia?

¹⁰ Le lunbei wadügüni lun wasagarun saragu buiti lídangiñe ídemuei le. Aliiha wamóun Bíbülia sagü weyu ani bürǘ wameime bérusu le lunbei lahuudun woun. Ariha hamaali saragu íbirigu buídutima lan haliihani bérusu lánina sagü weyu binaafin ladüga sanditiña ru lan bérusu le gurasu houn sun weyu. Ligía asuseredubei tun aban íbiri gíritu Marie.a Aba ladagarun kánserü hawagu tagübürigu ani mosu buga tetenirun houn lidan lagumuhóun hati le haubei wínwanñu. Ariñaga tumuti Marie ka lan íchugubalin erei le temegeirubei lun tawandun: “Sagü weyu héchutina meha aliihei bérusu le áfuachubei tidan garüdia to gíriboun Taturiahóun Lererun Bungiu sagü weyu ani ráramagua nuguya asaminara luagu le naliihabei. Ligía meha íderagubalina asaminara luagu Heowá luma luagu lubuidun arufudahani le tídanbei Lererun luma lun merede nan asaminara luagu katei wuribati le násügürübei” (Sal. 61:2).

WÁBIRIGU

11. Ka uagu ru lubéi gurasu woun wasubudiruni awanda hamani wábirigu lénrengunga le úmabei hagagibudagua?

¹¹ Ábanya idewesei le líchugubei Heowá woun lun wawandun, wábirigu ha lídanbaña sun ubóu. Ruti gurasu woun wasubudiruni luagu hásügürüña lan wábirigu ha lídanbaña sun ubóu lídangiñe ligiaméme asufuriruni (1 Fe. 5:9). Ka uagu? Lugundun dan le warihini hagagibudaguña lan wábirigu luma ligiaméme turobuli le wásügürübei ani awanda hamuti lau úaraguni, adügati lira lun wachoururuni gayaraabei lan giñe wawandun furumiñeguarügü lénrengunga (Adü. 14:22).

12. Ida luba gayara lan wíchugun gurasu wóuniwagua? (2 Korintuna 1:3, 4).

¹² Gayaraabei giñe híchugun wábirigu gurasu woun lau le hariñagubei luma lau katei le hadügübei wawagu. Ligía meha hadügübei íbirigu luagu apostolu Pábulu. Dan meha ladaürǘnbei lúbiñe, resibiti meha ídemuei hámagiñe íbirigu lidan ámuñegueinarügü igaburi ani írida lumutiña tidan gárada to labürühaboun, aba giñe leteingiruniña luagu gurasu luma dǘgüdaguaü le híchugubei lun (Fili. 2:25, 29, 30; Kol. 4:10, 11). Uguñe weyu, íderagua hamutiwa giñe wábirigu lun gayara lan wawandun, ani wagía, gayaraati giñe wadügüni ligiaméme hawagu (aliiha huméi 2 Korintuna 1:3, 4).

13. Ka íderagubarun aban íbiri gíritu Maya lun tawandun?

¹³ Ariha waméi tikesin aban íbiri rúsiana gíritu Maya. Lidan irumu 2020, aba houdin fiu súdaragu asagarahoun tuban. Lárigiñe, aba tanügǘn Maya agusera ladüga tayanuhan luagu tafiñen hama amu gürigia. Ida liña híchugun íbirigu ídemuei tun? Ariñagatu Maya: “Luagu aban dan, dan le nasandirubei siñá lan nun, aba hagúarun íbirigu nun, añahein hádangiñe aba habürühan gárada nun ani aba hariñagun nun hínsiñe nan houn saragu”. Ani ariñagatu giñe: “Subudigubei numuti tídanñadina lan aban óundaruni hama saragu íbirigu ha ítarabaña kei iduheñu. Lau sun lira, lúmagiñe irumu 2020 ariha naali buidu buidu inarüni lan katei le”.

14. Ida luba gayara lan wasagarun saragu buiti lídangiñe ídemuei le híchugubei íbirigu woun? (Ariha humóun giñe iyawaü).

¹⁴ Le lunbei wadügüni lun wasagarun saragu buiti lídangiñe ídemuei le. Danme le wásügürün lídangiñe lénrengunga, áfaagua wamá lun wakipuragun woungua yarafañu houn wábirigu lidan afiñeni. Haritagua waméi gayara lan wamuriahan ídemuei hama wéiyaaña lidan afiñeni, ha ítarabaña “kei aramudaguagülei luéi garabali luma luéi luriban dan” (Isa. 32:2). Luéigiñe le aban oubaü, mabulieida waméi gagibugua hamá giñe wábirigu luma turobuli. Ánhawa adüga katei buiti hawagu amu, gúndaabadiwa ani líderagubadiwa giñe lira lun wawanduni turobuli le úmabei wagagibudagua (Adü. 20:35).

WEMENIGIN

15. Ida liña meha líderaguni emenigini Hesusu, ani ida liña gayara lan líderaguniwa emenigini uguñe weyu? (Ebüréu 12:2).

¹⁵ Rúhali Heowá aban lubuidun emenigini woun le íderagubaliwa awanda (Rom. 15:13). Haritagua waméi le lan íderagubalin Hesusu awanda lidan weyu le hénrengutimabei lun ya ubouagu, emenigini le luágubei (aliiha huméi Ebüréu 12:2). Subudi lumuti meha anhein lan úaragua lun Heowá, lídehaba lan lira lun larumadahóun liri Heowá. Memeniha meha giñe lanigi lun lagiribudun sielun lumoun Lúguchi luma lun lachülürün dan lun lagumeserun arúeiha úara hama líbirigu ha anuadirúbaña. Ítarameme, líderagubadiwa giñe wemenigin lun wawinwandun lun súnwandan lidan aban paraísu ya ubouagu lun wawandun furumiñeguarügü lénrengunga le úmabei wagagibudagua lidan ubóu le lábugiñebei lubafu Satanási.

16. Ida liña líderagunu emenigini aban íbiri, ani ka gayaraabei hafurendeirun lídangiñe le tariñagubei?

¹⁶ Ariha waméi ida liña lan líchugun emenigini le líchugubei Bungiu woun lubá ámuñegü erei tun aban íbiri rúsiana gíritu Anna. Dan le meha ladaürǘnbei tani weiriei, aba tariñagun: “Anihein bián katei le íderagubalina saragu lun nawandun: nafurieidun luma nararamagun asaminara luagu lubuidun ibagari le lunbei wawinwanduni ámuñegü. Subudi numuti luagu madurabei lan turobuli burí le lun súnwandan. Heowaba agañeira ani wagañeiruba giñe”.

17. Ida liña warufuduni gebegi lan wemenigin woun? (Ariha humóun giñe iyawaü).

¹⁷ Le lunbei wadügüni lun wasagarun saragu buiti lídangiñe ídemuei le. Direi wamá dan lun wasaminarun luagu le lunbei ladügüni Heowá ámuñegü. Samina wamá lídanñadiwa lan paraísu gúndaañu lau burí abiniruni le lunbei weresibiruni. Danme le wadügüni, warihibei luagu ‘mahürü’ lan turobuli le úmabei wagagibudagua ‘ani furesebei lásügürün’ (2 Ko. 4:17). Áfaagua wamá giñe lun wayanuhan luagu wafiñen hama amu gürigia. Samina wamá hawagu gürigia ha meseriwidunbaña lun Heowá. Gaturobulintiña giñe, lau sun lira, ibidiñeti ni kata houn luáguti le lunbei ladügüni Bungiu ámuñegü. Másiñati buídurügübei lan lun mibe lan wayanuhan hama lun busén hamá hasigirun afurendeira luagu füramasei le ladügübei Heowá lubá ámuñegü.

18. Ka uagu gayara lubéi wafiñerun luagu füramasei le ladügübei Heowá?

¹⁸ Lárigiñe lawandun Hobu saragu lénrengunga lau úaraguni, aba lariñagun lun Heowá: “Subudi numuti luagu gayara bani sun katei ani úa lan ni kata básiñarun adüga” (Hob. 42:2). Aba gunfuranda lani Hobu úabei lan ni kata le gayaraabei lararamuni Heowá luéi lagunfuliruni le füramase lubéi. Dan le gunfuranda wamani katei le, aba weresibiruni erei le wemegeirubei lun wawandun. Ru wamá aban hénpulu. Samina wamá tuagu aban würi to sándiboun ani féridi taali temenigin lugundun ñǘdünharu hamoun saragu surusiagu gama lumoun, úagili ni aban le gayaraati líderagunu. Aban weyu, aba tadarirun aban surusia le subudihabúti lun tisandi ani aba lafuranguagüdüni tun ida luba lan lahandilihani sandi le tuágubei. Íbini sándimemegiru lan, sandiharu awalidaguni ani ligía íderagubarun lun ménrenguntima lan tawandun, lugundun guentó, subudi taali luagu tóuchadaguba lan. Ítarameme, sigimémetiwa awanda ladüga chouru wamani lagunfulirubei lan Bungiu füramasei le ladügübei woun lubá ámuñegü.

19. Ka wemegeirubei lun gayara lan wawandun?

¹⁹ Kei le aubei warihei, rúhali Heowá fiu katei woun lun líderaguniwa awanda, kei burí furíei, Bíbülia, wábirigu luma wemenigin. Ánhawati áfaagua lúntima wasagarun saragu buiti lídangiñe idewesei burí le, líderagubadiwa Heowá lun wagagibudagun luma saragu turobuli darime lachülürün weyu lun lagumuchun lau ubóu le lábugiñebei lubafu Mafia luma burí turobuli le gádanbaliwa uguñe weyu (Fili. 4:13).