Afiñebá hínsiñe ban lun Heowá

1. Ka meha uagu bederegerunbalin bibagari lun Heowá? (Arihabóun giñe iyawaü).

HARITAGUA bágili san luéyuri bederegeragun bungua lun Heowá? Adüga bumuti ladüga aba bafurendeirun luagu ani aba línsiñedun bun saragu. Ligía aba lubéi füramase ban lun luagu bayusurubei lan bibagari lun badügüni lugundan ani luagu línsiñeduba lan bun tau sun banigi, tau sun buani, lau sun bisaminan luma lau sun bere (Mar. 12:30). Lúmagiñe dan ligía, gánwountimahali ínsiñeni le basandirubei luagu. Ligíati, lun hamuga liabin aban gürigia álügüdabu “Le san lúgubu hínsiñe lan Heowá bun?”, lau lóufudagun ábame bóunabuni: “Anha, hínsiñeti nun! Hínsiñetimati Heowá nun sügǘ lau línsiñe amu gürigia nun”.

2, 3. Ka labusenrubei Heowá? (Heremíasi 31:3). Kaba wariha lidan aturiahani le?

² Guentoti, kaba hamuga bóunaba ánhabu hamuga lálügüda somu gürigia “Chouru bumuti san hínsiñe ban lun Heowá?”. Másiñati hénrengubei lan hamuga bun bóunabuni álügüdahani le, ladüga saminatibu madüna bani ínsiñeni ligía. Ariñagatu aban íbiri to meha asandiruboun mínsiñewa tan dan le ñǘgiru: “Hínsiñeti Heowá nun, chouru numuti lira. Lau sun lira, anihein dan aba nálügüdagun nungua anhein inarüni lubéi hínsiñe nan lun”. Gama lumoun, ka lasandirubei Heowá buagu?

³ Busenti Heowá lun bachoururuni hínsiñe ban lun (aliihabéi Heremíasi 31:3). Le linarün aban katei, busenti Heowá lun gamadagua ban luma, ligía aba lubéi lachawahanibu luouguoun. Ani dan le bederegerunbalin bibagari lun badisei buguya, aba líchugun aban lubuidun idewesei bun, línsiñehabu le magumuchaditi. Mini lan lira, hínsiñe hamá sun lubúeingu Heowá lun, buguya haganagua. Ladüga ínsiñeni ligía gayara lubéi lariñagun lani ban (Mal. 3:17). Busenti Heowá lun basandiruni libe le lasandirubei apostolu Pábulu, le abürühabei: “Chouru numuti lubeiti luagu ua lan ni kata lun lafanreinraguniwa luéi línsiñehabu Bungiu —ni óunweni, ni ibagari, ni ánheligu, ni máfianu, ni katei le guentobei, ni le lunbei liabin, ni le siélubei, ni le ubouagubei, ni burí amu katei le ladügübei Bungiu —siñati lafanreinraguniwa luéi línsiñehabu le larufudubei woun” (Rom. 8:38, 39). Lidan aturiahani le, warihaali ka lan uagu súdini lubéi lun wachoururuni hínsiñe wamá lun Heowá luma kaba lan íderaguawa lúntima wachoururuni hínsiñe wamá lun.

KA SAN UAGU LUNTI LUBÉI WACHOURURUNI HÍNSIÑE WAMÁ LUN HEOWÁ?

4. Katoun san aban tídangiñe sádara tótima layusuruboun Mafia, ani ida luba méiguadun wamá tidoun?

⁴ Anhein chouru wabalin hínsiñe wamá lun Heowá, líderagubadiwa ‘lun deregüdagu wamá luéi leyeedaguniwa Mafia’ (Efe. 6:11). Busenti Mafia lun wígiruni weseriwidun lun Heowá ani láfaaguba lun libihini. Aban tídangiñe sádara tótima layusuruboun, louchun lun wasaminarun mínsiñe wamá lun Heowá ani aban lanarime iyeeni lira. Ariñagatu Bíbülia ítara liña lan Mafia kei aban liñún (1 Fe. 5:8, 9). Libe-agei dan, agayuahatiña liñún hawagu animaalugu ha débilibaña o ha siñabei hóunigiragun houngua. Ítarameme, libe-agei dan agayuahati Mafia wawagu dan le larihini lougua lan were, dan le labuchadun wawagu, o dan le nidiheri wamá luagu katei le meha asuseredubei woun lidan wabagari, o dan le larihini wagagibudaguña lan luma turobuli le lánina sagü weyu, o dan le wadiheridun luagu le lunbei lasuseredun ámuñegü (Ari. 24:10). Lun méiguadun wamá tidoun lisadaran Mafia, mosu wagagibudagun luma lau wadügüni sun wayaraati lun wachoururuni inarüni lan hínsiñe wamá lun Heowá (Sant. 4:7).

5. Ka uagu súdini lubéi wasandirun hínsiñe wamá lun Heowá ani gebegi wagía lun?

⁵ Anhein chouru wabalin hínsiñe wamá lun Heowá, ladügüba lira lúntima wayarafadun lun. Ka uagu wariñagei le? Ladüga adüga lumutiwa Heowá lau iyaraani lun hínsiñe hamá gürigia woun luma lun wínsiñedun houn. Dan le larufudun aban gürigia woun hínsiñe wamá lun, adügati lira lun giñe hínsiñe lan gürigia ligía woun. Ligíati, éibume wasandirun hínsiñe wamá lun Heowá ani gebegi wagíame lun, hínsiñetimabei woun (1 Huan 4:19). Ani éibutima línsiñedun woun, hínsiñetimabadiwa lun, lugundun ariñagatu Bíbülia: “Yarafa humá lun Bungiu, ábame giñe layarafadun hun” (Sant. 4:8). Guentó, ariha waméi kaba lan íderaguei kada aban wádangiñe lúntima wachoururuni hínsiñe wamá lun Heowá.

KABA ÍDERAGUABU LÚNTIMA BACHOURURUNI HÍNSIÑE BAN LUN HEOWÁ?

6. Ka gayaraabei bamuriahan luma Heowá anhein hénrengu lubéi bun bafiñerun hínsiñe ban lun?

⁶ Amuriahabá luma Heowá súnwandan lun líderagunibu lun gunfuranda bani ka lan uagu hínsiñe bubéi lun (Luk. 18:1; Rom. 12:12). Másiñati mosu lan bamuriahan luma saragu wéiyaasu luagu weyu lun líderagunibu arihei sun igaburi le buágubei. Ñeinbei dan gayaraabei lan wuriba lan basandiragun bungua darí lun hénrengu lan bun bafiñerun hínsiñe ban lun Heowá. Lau sun lira, haritaguabéi wéiritima lan Heowá sügǘ tau banigi (1 Huan 3:19, 20). Subudi lumutibu buidu buidu sügǘ lau basubudiragun bungua ani ariha lumuti giñe lubuidun igaburi le siñá bubéi ariha buougua (1 Sam. 16:7; 2 Kro. 6:30). Ligíati, manufudebá lun bariñaguni lun ídatima liña lan basandiragun bungua ani amuriahabá ídemuei luma lun bachoururuni hínsiñe ban lun (Sal. 62:8). Ani lárigiñe bafurieidun, merederabá chagu barüna. Wariha fiu katei le gayaraabei badügüni.

7, 8. Ida liña tíderaguniwa liliburun Sálumu lun wachoururuni hínsiñe wamá lun Heowá?

⁷ Afiñebá luagu le lariñagubei Heowá. Ru lumuti Bungiu lani sífiri sandu houn wügüriña ha abürüdübarun Bíbülia, ligía gayara lubéi bafiñerun luagu le hariñagubei luagu igaburi le larufudubei Bungiu. Kei hénpulu, saminabá luagu lubuidun dimurei le lariñagubei Dawidi: “Yarafati Aburemei lun lesefuruniña ha gáribei hasandirunu hanigi, ha féridi hamaalibei hemenigin” (Sal. 34:18). Anhein ítara liña lubéi basandiragun bungua, másiñati samina ban ua lan ni aban gürigia le gayaraabei gunfuranda lani le basandirubei o ua lan ni aban gürigia le gayaraabei líderagunibu. Lau sun lira, füramaseti Heowá ñeinbei lan burugabu lugundun subudi lumuti megei bani lídehan. Lidan amu sálumu, abürühati Dawidi: “Budá bumuti kada aban lídangiñe náguira” (Sal. 56:8). Dan le wasufurirun, gáriti lun Heowá ani ítara liña le kamá hamuga látuleruñein lan lúhabu lun lédederun báguira lúhaburugun lun larufuduni bun weiri lan bínsiñe lun. Ariñagati giñe Dawidi lun Heowá: “Subudi bumuti sun némeri” (Sal. 139:3). Subudi lumuti Heowá sun bémeri, mini lan lira, subudi lani sun katei le badügübei ani lun sun katei buiti le badügübei letenira (Ebü. 6:10). Ka uagu? Ladüga gebegiti sun katei le badügübei lun bagundaaraguagüdüni.a

⁸ Lau burí lubuidun bérusu le wakutihabei, ítara liña kamá hamuga lariñaguña Heowá bun: “Busentina basubudiruni hínsiñe ban nun saragu ani beresetina bau”. Lau sun lira, kei buga warihini, busenti Satanási lun bafiñerun mínsiñe ban lun Heowá. Ligíati, anhein anihein lubéi dan bálügüdagun bungua anhein inarüni lubéi hínsiñe ban lun Heowá, gayaraati basaminarun: “Kábati un nafiñera, lun ‘lúguchi iyeeni’ o lun ‘Lubungiute inarüni’?” (Huan 8:44; Sal. 31:5).

9. Ka füramase láalibei Heowá houn ha hínsiñehabubaña lun? (Áfuriduni 20:6).

⁹ Saminabá luagu le lasandirubei Heowá hawagu ha hínsiñehabubaña lun. Saminabá luagu le meha lariñagubei Heowá lun Moisesi luma houn ísüraelina (aliihabéi Áfuriduni 20:6). Füramaseti Heowá lasigiramémeba lan arufuda ínsiñeni inarüniti houn ha hínsiñehabubaña lun. Kei le úaragua lubéi, maweiyasunbei arufuda mínsiñehabuni houn ha hínsiñehabubaña lun (Neem. 1:5). Ligíati, anhein anihein lubéi dan hénrengu lan bun bafiñerun hínsiñe ban lun Heowá, álügüdaguaba bungua: “Hínsiñeti san Heowá nun?”. Ani lárigiñe saminabá luagu le: anhein hínsiñe lubéi Heowá bun ani aba báfaagun lun bagundaaraguagüdüni, chóurubei luagu hínsiñe ban lun saragu (Dan. 9:4; 1 Ko. 8:3). Lidan amu dimurei, anhein chouru bubalin hínsiñe lan Heowá bun, gayaraati bachoururuni hínsiñe ban lun saragu ani maweiyasunbei achagarabu.

10, 11. Ida liña labusenrun Heowá lun barihini lebegi esefuruni? (Galasiana 2:20).

¹⁰ Ráramaguaba asaminara luagu lebegi esefuruni. Lederegeruni Hesusu libagari wawagu ligía idewesei le wéiritimabei le líchugubei Heowá houn gürigia (Huan 3:16). Óunaha lumuti san Bungiu Liráü ubouagun lun líchuguni libagari buagu? Anha, ladügünbalin ítara ladüga bínsiñe lun. Saminabá luagun likesin apostolu Pábulu. Lubaragiñe ladügagun lungua kristiánume, adügati meha katei le hanarimeti luriban ani lárigiñe mosu buga lasigirun ageindagua luma lidebilin (Rom. 7:24, 25; 1 Tim. 1:12-14). Íbini ítara, aba larihini lebegi esefuruni kei aban idewesei le líchugubei Heowá lun (aliihabéi Galasiana 2:20). Haritaguabá yusu lani Bungiu lani sífiri sandu lun labürüdüni apostolu Pábulu dimurei burí le, ani anhein anihein lubéi tidan Bíbülia ladüga busén lan Heowá larufudahan somu katei woun (Rom. 15:4). Busenti giñe Heowá lun barihini lebegi esefuruni kei aban idewesei le ru laalibei bun. Ani ánhabu arihei ítara, bachoururatimabei hínsiñe ban lun.

¹¹ Wéiriti weteingiruni Heowá luagu lóunahani Lisaani lun líchuguni libagari wawagu. Gama lumoun, mámarügüñein luagu lira liabin Hesusu ubouagun. Ñǘbuinti giñe lun lasubudiragüdüni inarüni luagu Bungiu houn gürigia, íbini lun layanuhan luagu ínsiñeni le lasandirubei Heowá hawagu lisaanigu (Huan 18:37).

ARUFUDAHATI MEHA HESUSU HÍNSIÑE BAN LUN HEOWÁ

12. Ka uagu gayara lubéi wafiñerun luagu le meha lariñagubei Hesusu luagu Heowá?

¹² Dan le ya lubéi meha Hesusu ubouagu, hínsiñeti meha lun larufudahan luagu ligaburi Heowá (Luk. 10:22). Ani gayaraati wafiñerun sunsuinagubei inarüni lan sun le meha lariñagubei luagu Lúguchi. Ka uagu? Ladüga úati amu subudihabúti lun Heowá sügǘ lau Hesusu ladüga sügühali saragu milu míñunu irumu úara luma Lúguchi sielu (Kol. 1:15). Ariha laali lungua weiri lan ínsiñeni le larufudubei Heowá houn lubúeingu ha úaraguabaña, dandu ha siélubaña kei ha awinwandubaña ya ubouagu. Ariha waméi ida luba lan líderaguniwa le meha larufudahabei Hesusu lun wachoururuni hínsiñe wamá lun Heowá.

13. Ka labusenrubei Hesusu lun gunfuranda wamani luagu Heowá?

¹³ Busenti Hesusu lun warihini Heowá kei aban Úguchili hínsiñehabuti le unbei wínsiñeda saragu. Lidan burí Ewanhéliu, yusu lumuti meha dimurei “Úguchili” lóugiñe san wéiyaasu lun ladimurehan luagu Heowá. Ani dan le layanuhan hama lani disipulugu, yúsuti meha dimurei kéiburi “Húguchi” o “Wáguchi” le siélubei (Mat. 5:16; 6:26). Lubaragiñe meha liabin Hesusu ubouagun, yúsutiña meha lubúeingu Bungiu ha meha lánina binadu dan dimurei kéiburi ‘Suntigabafu’ o le ‘Íñutimabei’ lun hayanuhan luagu Heowá. Lau sun lira, dan le liábinbei Hesusu ubouagun, yusu lumuti dimurei “Úguchili” saragu wéiyaasu lun layanuhan luagu Heowá. Lau layusuruni dimurei le lígiruña furangu luagu busén lan Heowá lun yarafañaha hamá lubúeingu lun. Akutiha wamá bián sügǘ le ídanbei layusurei Hesusu dimurei “Úguchili” lun layanuhan luagu Heowá.

14. Ida liña meha larufuduni Hesusu luagu hínsiñe wamá lun Heowá saragu? (Matéu 10:29-31; arihabéi giñe dibuhu).

¹⁴ Furumiñe, teni wamá lun le lariñagubei Hesusu lidan Matéu 10:29-31 (aliihabéi). Ariñagati ñein subudi lan lun Wáguchi dan le lábürühan aban dunuru múarugun. Anhein teni lubéi Bungiu houn animaalugu ha, ha masandibaña ínsiñeni luagu, gayaraati wasaminarun luagu hínsiñe wamá, wagía le lubúeingu lun ladüga huduguatiwa lun lau ínsiñeni. Ariñagati giñe Hesusu lidan bérusu 30 luagu íbini lan “ídiburi le hábulugubei [gürigia], abahüdǘwati aban aban”. Kei le subudi lániña Heowá lubúeingu buidu buidu, gayaraati wachoururuni weiri lan ínsiñeni le lasandirubei Wáguchi Bungiu le siélubei wawagu.

15. Ka larufudahabei Huan 6:44 bun luagu Heowá?

¹⁵ Yusu lumuti giñe Hesusu dimurei “Úguchili” lidan Huan 6:44 (aliihabéi). Kei le aubei barihei, achawaha lumutibu Búguchi luouguoun ladüga aba lan larihini lubuidun igaburi le buágubei (Adü. 13:48). Dan le lariñagunbalin Hesusu dimurei le wadarirubei lidan Huan 6:44, másiñati lasaminaruña lan luagu le meha lariñagubei Heowá lidan Heremíasi 31:3, le ñein lubéi lariñaga: “Hínsiñegubeiñadibu nun […], lau ínsiñeni le magumuchaditi” (Her. 31:3; arihabéi giñe Oseasi 11:4). Saminabá luagu le mini lubéi le: sigimémeti Heowá asandira ínsiñeni buagu, mini lan le, anihagua lan Heowá arihei lubuidun igaburi le buágubei íbini mafiñen ban luagu ítara liña lan.

16. a) Ka larufudahabei Hesusu woun, ani ka uagu gayara lubéi wafiñerun luagu? b) Kaba íderaguawa lun wachoururuni Heowá lan Úguchili létima wemegeirubei? (Arihabéi rekuáduru le gíribei “Úguchili le buídutimabei”).

¹⁶ Kei le aubei warihei, ítara liña kamá hamuga lariñaguña Hesusu woun: “Mámarügüñein Núguchi Heowá, Búguchi giñe. Ani ninarün bau hínsiñetibu lun saragu ani gebegitibu giñe lun”. Ligíati, anhein anihein lubéi dan hénrengu lan bun bafiñerun hínsiñe ban lun Heowá, haritaguabéi le lariñagubei Hesusu ani afiñebá luagu, lugundun meyeehanti ani úati ni aban asubudiruti Bungiu buidu luéidigia (1 Fe. 2:22).

ADÜGABÉI SUN BIYARAATI LÚNTIMA BACHOURURUNI HÍNSIÑE BAN LUN HEOWÁ

17. Ka uagu lunti lubéi wachoururuni hínsiñe wamá lun Heowá?

¹⁷ Kei le aubei warihei, ladügübei Satanási le wágani, sun liyaraati lun wígiruni weseriwidun lun Heowá. Aban tídangiñe sádara to layusuruboun lun ledebilidagüdüni wafiñen, louchun lun ladügün lun wasaminarun mínsiñe wamá lun Heowá. Mígira wamá lun leyeeduniwa! (Hob. 27:5). Ligía mosu lubéi wasigirun áfaagua sagü weyu lun wachoururuni hínsiñe wamá lun Heowá.

18. Ka gayaraabei líderagunibu lúntima bachoururuni hínsiñe ban lun Heowá?

¹⁸ Lidan aturiahani le akutihaadiwa fiu katei le lunbei líderagunibu lúntima bachoururuni hínsiñe ban lun Heowá. Kei hénpulu, gayaraati bamuriahan luma lun líderagunibu arihei igaburi le buágubei luma lun bararamagun asaminara luagu bérusu tídangiñeti Bíbülia le arufudubalin weiri lan ínsiñeni le lasandirubei Heowá hawagu lubúeingu. Buídubei giñe baritaguni maweiyasunbei lan Heowá achagaraña lubúeingu ha hínsiñehabubaña lun. Mabulieidabei giñe óunaha lani Heowá Liráü lun líchuguni libagari buagu. Ani gabarounbéi giñe le lariñagubei Hesukrístu, gayara lan barihini Heowá kei Búguchi. Ligíati, anhein ñübuin somu gürigia álügüdabu “Chouru bumuti san hínsiñe ban lun Heowá?”, lau lóufudagun ábame bóunabun: “Anha, chouru numuti tídangiñe sun nanigi! Ani náfaaguña sagü weyu lun narufuduni lun hínsiñe lan giñe nun”.