Lunti lagúarun houn wéiyaaña lidan afiñeni

1. Ida liña larufuduni Heowá hínsiñe hamá sun lubúeingu lun?

HÍNSIÑETIÑA sun lubúeingu Heowá lun. Agañeinha laaña lau lita Hesusu, ani ru laali dasi houn wéiyaaña lidan afiñeni lun hóunigiruniña (Adü. 20:28). Busenti Bungiu lun hounigirúniwa lubúeingu lau saragu ínsiñeni. Ani falá hamuti wéiyaaña ladundehan Hesusu —le lichügüdinabei damuriguaü—, rútiña gurasu houn lubúeingu Heowá ani góunigi hamutiña luéi lagadeirun hamadagua luma (Isa. 32:​1, 2).

2. Kátima un letenira Heowá? (Esekiéli 34:​15, 16).

² Wéiriti letenirun Heowá houn sun lubúeingu, hóuntima ha asufurirubaña. Yusu lumutiña wéiyaaña lidan afiñeni lun híderaguniña ha asufurirubaña ladüga charati le hadügübei (aliihabéi Esekiéli 34:​15, 16). Ligíati, ka lunbei wadügüni anhein megei wabéi wíderawagun? Íbini busén lan Bungiu lun wafurieidun lun, busenti giñe lun wáluahani hídehan “máisturugu” o wéiyaaña ha lídanbaña damuriguaü (Efe. 4:​11, 12).

3. Kaba buiti wibiha súngubei wagía lídangiñe aturiahani le?

³ Layanuhóuba lidan aturiahani le luagu ida liña lan layusuruniña Heowá wéiyaaña lidan afiñeni lun híderaguniwa abuiduragüdei wamadagua luma. Lounabúba álügüdahani burí le: ka dan lunti lan wáwarun houn wéiyaaña lidan afiñeni?, ka uagu lunti lubéi wadügüni?, ani ida liña híderaguniwa? Íbini here lan wamadagua luma Heowá guentó, lahuuduba giñe aturiahani le woun ladüga líderagubadiwa lun gebegi lan ídemuei le líchugubei Heowá woun lau layusuruniña wéiyaaña lidan afiñeni, larufudubei giñe woun ka lan lunbei wadügüni anhein wemegeira hídehan wéiyaaña ámuñegü.

KA DAN LUNTI LAN WAGÚARUN HOUN WÉIYAAÑA LIDAN AFIÑENI?

4. Ida liña wasubudiruni layanuhaña lan Santiagu 5:​14-16, 19, 20 luagu aban gürigia le débilibei lumadagua luma Bungiu? (Arihabóun giñe iyawaü).

⁴ Afuranguagüda lumuti disipulu Santiagu ida liña lan layusuruniña Heowá wéiyaaña lidan afiñeni lun híderaguniwa. Abürühati: ‘Anhein sándiñein lubéi aban gürigia, lunti lagúarun houn wéiyaaña lidan afiñeni’ (aliihabéi Santiagu 5:​14-16, 19, 20). Layanuhaña Santiagu lidan bérusu le luagu aban gürigia le débilibei lumadagua luma Bungiu. Ida liña wasubudiruni? Luagu le abürüdǘbei dandu lubaragiñe kei lárigiñe bérusu le. Mariñagunti lunti lan laguarún lun aban surusia, le lariñagubei, lunti lan laguarún houn wéiyaaña lidan afiñeni. Afuranguagüdati areidagua lan gürigia le sándibei dan le ferudunawa lan lifigoun. Le linarün katei, gíbeti katei le ídanbei genegegua lan lasandirun aban gürigia luma dan le débili lan lumadagua luma Bungiu. Dan le wasandirun, ñǘdüntiwa lumoun surusia, afuranguagüda wamuti lun ka lan wasandirubei ani falá wamuti ladundehan. Ítarameme, dan le débiliñu lan wamadagua luma Bungiu, ñǘdüntiwa áluahaña wéiyaaña lidan afiñeni, afuranguagüda wamuti houn ka lan wadebilinbei ani falá wamuti adundehani tídangiñeti Bíbülia le híchugubei woun.

5. Ka gayaraabei wadügüni lun wasubudiruni ida liña lan wamadagua luma Bungiu?

⁵ Ínchaha lumutiwa Santiagu kapítulu 5 lun wáluahani hídehan wéiyaaña dan le wasandirun ledebiliduña lan wafiñen. Lau sun lira, mama mosu wagurabahan lun lagadeirun wamadagua luma Bungiu, lunti wáluahani hídehan lubaragiñe lasuseredun. Ani lunti wóunigiragun woungua lugundun wéridi tumutiwa Bíbülia gayara lan weyeedagun woungua asaminara buíduñein lan wamadagua luma Heowá, íbini mítaran lan (Sant. 1:22). Ligía meha asuseredubei houn kristiánugu ha Sárüdisibaña: saminatiña yebe buíduñu liña lan hamadagua luma Bungiu, lau sun lira, aba lariñagun Hesusu houn lunti lan hasansiruni hagaburi (Aruf. 3:​1, 2). Ida luba wasubudiruni ida liña lan wamadagua luma Bungiu? Gayaraati wasubudiruni lau wagoubaguagüdüni ubebeni le wasandirubei guentó, lumoun le meha wasandirubei dan le wabadiseirúnbei (Aruf. 2:​4, 5). Gayaraati wálügüdagun woungua: “Hínsiñememegili san taliihóun Bíbülia nun, ráramagua nuguya asaminara luagu le naliihabei? Anahagua san abasiiha lidoun sun adamuridaguni, ani aranse nuguya buidu lubá? Súdinimemegili san apurichihani nun? Wéiriti san lisudinin isebáhari luma umegeguni nun?”. Líderagubadiwa óunabagülei lun álügüdahani burí le lun wasubudiruni anhein anihein lubéi somu débili wawagu le gayaraabei lawosudun ánhawa metenirun lun. Anhein siñá lubéi waranseruni wagía woungua, ani barǘ láadiwa adüga katei le aubei magundan lan Heowá, lunti wáluahani hídehan wéiyaaña lidan afiñeni.

6. Ka lunbei ladügüni aban gürigia le adügaalibei aban figóu wéiriti?

⁶ Le linarün katei, anhein adüga aban gürigia aban figóu wéiriti le gayaraabei ladügün lun lasagarúniwa lídangiñe damuriguaü, lunti layanuhan luma aban wéiyaali (1 Ko. 5:​11-13). Mégeiti gürigia ligía ídemuei lunya gamadagua lan luma Heowá. Lun feruduna lániwa Heowá, mosu warufudun lau le “wadügübei” asakürihaadiwa lan lídangiñe wafigoun (Adü. 26:20). Lun lira, mosu wagufeseruni wafigoun houn wéiyaaña lau wariñagun houn, adügaadiwa lan aban figóu wéiriti.

7. Kátaña giñe mégeibalin hídehan wéiyaaña lidan afiñeni?

⁷ Mámarügüñanu ha adügaañabaña aban figóu wéiriti híderagua wéiyaaña lidan afiñeni. Íderagua hamutiña giñe ha débilibei hafiñen (Adü. 20:35). Kei hénpulu, másiñati bageindaguña lan luma luriban ayumahani le adügübei lun lábürühan barüna. Háfuga hénrengutimati lan bun anhein yusu bubéi meha düroga, aríagu bubéi meha iyawaü luma burí bidéu lánina magíaguni o anhein meha wiye lubéi banügüni bibagari. Le buídubei mama lan bábuguarügüñadibu lidan ageindaguni le. Gayaraati badaarunu banigi lun aban wéiyaali lidan afiñeni le aranseñubei lun laganbunibu. Chóuruti líchuguba lan adundehani huuti bun ani laritaguagüdübadibu gayaraagili lan gamadagua ban luma Heowá ánhabu mígiraguagüdün bungua lun luriban ayumahani (Apur. 4:12). Ánhabu asandira íruni ladüga midin lan luriban ayumahani ligía buéi, haritaguagüdübadibu wéiyaaña barufuduña lan súdini lan bumadagua luma Heowá bun, ani mama lan buougua bafiñera (1 Ko. 10:12).

8. Ka burí charati mámabei mosu labahüdahóuniwa houn wéiyaaña lidan afiñeni?

⁸ Mama mosu wabahüdahani sun charati le wadügübei houn wéiyaaña lidan afiñeni. Kéiburi hamuga, anhein ariñagaadibu lubéi somu katei gáriti lun aban íbiri o gáñigüda láadibu lan. Lubaragiñe bidin ayanuha luma aban wéiyaali, gayaraati bafalaruni adundehani le líchugubei Hesusu luáguti laransehóuniwa turobuli hama amu (Mat. 5:​23, 24). Gayaraati giñe báluahan ariñahani tidan wani agumeiraguagüdüni le ayanuhabei luagu darangilaü, gurasu, luma ragüguaü unguaü. Ánheinti siñá lubéi baranseruni biturobulin lau sun badügüni sun burí katei le, gayaraati bamuriahan ídemuei luma aban wéiyaali. Tidan gárada to labürühaboun Pábulu houn filipuna, ariñagati lun aban íbiri lidan damuriguaü lun líderagunu Ewodía tuma Síntike aransehei haturobulin. Gayaraati giñe ladügüni aban wéiyaali lidan afiñeni ligiaméme buagu (Fili. 4:​2, 3).

KA UAGU LUNTI LUBÉI WÁWARUN HOUN WÉIYAAÑA LIDAN AFIÑENI?

9. Íbini sandí wamá busiganu, ka uagu lunti lubéi wayanuhan hama wéiyaaña lidan afiñeni? (Ariñawagúni 28:13).

⁹ Anhein sandí wabéi hénrenguhaali lan woun lun wárügüdagun woungua luéi luriban ayumahani o anhein adügaadiwa lubéi aban figóu wéiriti, mégeibadiwa ganigi luma afiñeni lun wayanuhan hama wéiyaaña lidan afiñeni. Lau sun lira, mígira wamá lun ladügün busiganu lun máluahan wamani hídehan wéiyaaña. Haritagua waméi ru laaña lan Heowá wéiyaaña woun lun híderaguniwa lun here wamá luma lun buidu lan wamadagua luma. Ligíati, dan le wáluahani hídehan, warufuduña afiñe wamá luagu Bungiu, gaganbadi wagía lun ladundehan. Chouru wamuti luagu líderagubadiwa lan Heowá lun wiñuragun lídangiñe le gádanbaliwa (Sal. 94:18). Subudi wamuti gudemehabubei lan Bungiu woun ani feruduna láwame ánhawa agufeserei wafigoun, ígira wameime (aliihabéi Ariñawagúni 28:13).

10. Ka gayaraabei lasuseredun ánhawa áluaha waramuduni wafigoun?

¹⁰ Kei le aubei warihei, ibihatiwa saragu buiti dan le wamuriahan hama wéiyaaña lun híderaguniwa. Ánheinti dan le waramudahani wafigoun wadügüña dañu wóuniwagua. Samina wamá luagu likesin urúei Dawidi. Dan le laramudunbalin lifigoun, gadei lumuti meha lumadagua luma Heowá, mederaguagüdünti meha lisaminan, ani sandiguati meha lungua kamá hamuga le sándiñein (Sal. 32:​3-5). Dan le wabuleseirun, eibu wadarasarun lun lagaranihóun woun, ábatima laweiridun gáriti. Ítarameme, anhein adügaadiwa lubéi aban figóu wéiriti, éibutima wadarasarun lun wáluahaniña wéiyaaña lidan afiñeni ábatima laganwoundun turobuli. Subudi lumuti Heowá lira, ligía lariñagubei woun: “Higougu, wadimureha libügürü katei le” (Isa. 1:​5, 6, 18).

11. Ka amu katei gayaraabei lasuseredun dan le laramudahóun aban figóu le wéiriti?

¹¹ Mámarügüñein wóuniwagua wadüga dañu dan le waramudahani wafigoun, gayaraati giñe ladügün lira lun lagidaruni Heowá lani sífiri sandu hawéi lílana damuriguaü luma lun ua lan darangilaü (Efe. 4:30). Luagu le aban oubaü, ánhawa íchiga fe adügaali lan aban íbiri aban figóu wéiriti, lunti wariñagun lun lunti lan layanuhan hama wéiyaaña lidan afiñeni.a Mabulieida waméi ánhawa lan ámanicha lau, gadurunbadiwa lan giñe lidan lifigoun (Fad. 5:1). Línchahabadiwa ínsiñeni le wasandirubei luagu Heowá lun wabahüdahani le asuseredubei houn wéiyaaña. Ítara luba wídehan lun harumañu lan damuriguaü luma lunya labuidurun lumadagua gürigia ligía luma Bungiu.

IDA LIÑA HÍDERAGUNIWA WÉIYAAÑA LIDAN AFIÑENI?

12. Ida liña híderaguniña wéiyaaña lidan afiñeni íbirigu ha mégeibaña haransehani hamadagua luma Heowá?

¹² Ariñagatu Bíbülia houn wéiyaaña lidan afiñeni lun híderaguniña ha mégeibaña haransehani hamadagua luma Heowá (1 Tesa. 5:14). Anhein gadei baali lubéi bumadagua luma Heowá, háfuga hadügüba lan wéiyaaña álügüdahani bun le lunbei líderaguniña asubudirei ka lan basaminarubei luma ida liña lan basandiragun bungua (Ari. 20:5). Adügabá lun ménrengun lan houn hibihini lira, lau furangu lan bariñaguni katei houn íbini hénrengu lan bun ladüga ligaburi bagüriarún o sandí ban busiganu luagu le asuseredubei. Mahüchürabá anhein hénrengu lubéi bun bóunigiruni le bariñagubei o ligaburi bariñaguni (Hob. 6:3). Mafuresehanbaña wéiyaaña lidan afiñeni asaminara wuriba buagu, lubaragiñe lira, háfaaguba lun hetenirun lun le bariñagubei gayara láamuga gunfuranda hamani sun le asuseredubei lubaragiñe híchugun somu adundehani bun (Ari. 18:13). Subudi hamuti mégeiwa lan dan lun hounigirúniwa lílana damuriguaü, ani anihein lan turobuli le siñabei laranserúniwa láurügü hayanuhan aban wéiyaasu luma gürigia.

13. Ka amu katei gayaraabei hadügüni wéiyaaña lidan afiñeni lun híderaguniwa? (Arihabóun giñe iyawaü).

¹³ Háfaaguba wéiyaaña lidan afiñeni lun maweiridaguagüdün hamani bigarigu. Lubaragiñe lira, hafurieiduba buagu. Háfuga taweiridun banigi lau barihini weiri lan “lubafu afurieidúni” le hadügübei buagu. Híderagubadibu giñe lau háhurudagunibu lau “garaba lidan liri [Heowá]” (Sant. 5:​14-16). Inarüni le tídanbei Lererun Bungiu mini lubéi “garaba” le. Ligía hayusuruboun lubéi Bíbülia buidu lun híchugun gurasu bun luma lun híderagunibu abuiduragüdei bumadagua luma Heowá (Isa. 57:18). Híderagubadibu adügei le buídubei. Lau baganbuniña, ítara luba kamá hamuga lariñaguña Heowá bun: ‘Anihán ǘmabei, ñéingiñela bidin’ (Isa. 30:21).

14. Según Galasiana 6:​1, ida liña híderaguniña wéiyaaña lidan afiñeni ha “éiguadubaña lidoun aban figóu”? (Arihabóun giñe iyawaü).

¹⁴ (Aliihabéi Galasiana 6:1). Dan le layanuhan bérusu le luagu “ábürühaali lan” aban gürigia lidoun figóu, layanuhaña luagu mafalarun lani gürigia lilurudun Bungiu. Dan le lasuseredun katei le, gayaraati afigouha lan gürigia ligía ladüga masaminarun lani katei buidu o ladüga ladüraaguni lilurudun Heowá. Ínchaha lumutiña ínsiñeni wéiyaaña lidan afiñeni lun houchun híderaguni gürigia ligía lun lígiruni figóu ligía. Dimurei güriegu le ásügüragüdüwabei kei “híderaguni”, ítara liña kéigubeirügü hamuga lagaranihóun lun aban gürigia le luguguaali luéi lerederun danimañu. Ítara kei láfaagun aban surusia le buiti lóunigiruni lagaranihan lun aban gürigia luguguaali luéitima laganwoundun gáriti le lasandirubei, áfaaguatiña giñe wéiyaaña lidan afiñeni hóuseruni gürigia le afigouhaalibei lau ínsiñehabuni luéi haganwoundagüdüni gáriti le lasandirubei. Ani ariñagatu giñe Bíbülia houn wéiyaaña danme lan le hererehan lun aban gürigia, “lunti lan hóunigiragun houngua” lugundun kei le chará habéi, gayaraati giñe héiguadun lidoun figóu. Ligíati, lubaragiñe hasaminarun wuriba luagu íbiri, o hóuserun kamá hamuga buídutimatiña luéi, áfaaguatiña wéiyaaña lun harufudun ǘnabugu hamá, arufuda hagía gudemehabu (1 Fe. 3:8).

15. Ka gayaraabei wadügün anhein gaturobulin wabéi?

¹⁵ Gayaraati wafiñerun hawagu wéiyaaña lidan afiñeni. Subudi hamuti moun lumuti lan habahüdaguni houn amu le abahüdawagúbei houn, ani arufudahóuaali houn lunti lan hayusurunu Lererun Bungiu dan le híchugun adundehani lubaragiñe hariñaguni le hasaminarubei, ani ariñawagúati giñe houn lunti lan aranseñu hamá lun híderaguniwa agagibudagua luma waturobulin (Ari. 11:13; Gal. 6:2). Inarüni ámuñegueinarügü lan hagaburi wéiyaaña lidan afiñeni hawariuagua, ani añahein hádangiñe lǘhaña eseriwida kei wéiyaaña, lau sun lira, gayaraati wabahüdaguni waturobulin lun furumiñeguarügü hádangiñe. Ani moun lumuti woudin ayanuha hama ámuñegueinarügü wéiyaaña darí lun wadarirun aban le ariñagubalin woun le wabusenrúbei waganbun. Mabusenrúntiwa ítara wamá kei ha hímeibalin lariñawagún “lérügü habusenrunbei haganbun houn”, lubaragiñe lira, busentiwa wafurendeiruni “arufudahani harumati” le tídanbei Lererun Bungiu (2 Tim. 4:3). Dan le wabahüdahani waturobulin lun aban wéiyaali, másiñati lálügüdüniwa anhein ayanuhaadiwa lubéi luagu katei le hama amu wéiyaaña ani ka lan amu adundehani ru hamaalibei woun. Línchahabei giñe ǘnabuguni wéiyaali ligía lun layanuhan luma amu wéiyaali lun lálügüdahan luagu le gayaraabei ladügüni (Ari. 13:10).

KA KATEI LUNBEI WADÜGÜNI KADA ABAN WÁDANGIÑE?

16. Ka lunbei ladügüni kada aban wádangiñe?

¹⁶ Góunigi hamutiwa wéiyaaña lidan afiñeni ani rútiña adundehani woun. Lau sun lira, mariñagun hamuti woun ka lan lunbei wadügüni. Kada aban wádangiñe lunti warihini ida luba lan warufuduni lun Heowá sagü weyu hínsiñe lan woun ani busén wamá wagundaaragüdüni dandu lau le wariñagubei kei lau le wadügübei (Rom. 14:12). Líderagubadiwa Heowá lun wanúadirun buidu luma lun úaragua wamá lun. Ligía hayusurubarun wéiyaaña lidan afiñeni Bíbülia lun híderaguniwa arihei ida liña lan larihini Heowá katei ani lárigiñe aba hígirun lun wagíaba lan anúadirei kaba lan wadüga. Ídehati lira lun wafurendeirun asubudirei ka lan “buídubei lumoun le wuribabei” (Ebü. 5:14).

17. Ka katei aranseñu wabéi lun wadügün?

¹⁷ Ma wagundan luagu lóunigiruniwa Heowá lau ínsiñeni kei lóunigiruniña hóuniri mudún mudún! Óunaha laali Heowá Hesusu, ‘hóuniri mudún le buiti’, lun lesefuruniwa luma lun líchugun chansi woun lun wawinwandun lun súnwandan (Huan 10:11). Yusu lumutiña giñe wéiyaaña ha lídanbaña damuriguaü lun lagunfuliruni füramasei le: “Níchuguba arúeihatiña hun ha áutiña nagundaara, lun hadundehanün lau lichú aau luma gunfurandaü” (Her. 3:15). Ítarati, danme le wasandirun lóuguaali lan wafiñen o lagadeiruña lan wamadagua luma Heowá, másuha wamá lun wáwarun houn wéiyaaña lun wamuriahan ídemuei hama. Aranseñu wamá lun wasagarun buiti lídangiñe idewesei le ru laalibei Heowá woun.