Rúhali furumiñeti ínsiñeni le nasandirubei erei nun lun nasigirun nubaruaguóun

LIDAN sisi-hati irumu 1970 haspitaliruguñadina meha Pensilvania (Meriga). Wein meha irumu nau, ani súdara meha au, aba ladagarun aban lanarime sandi nuagu. Kada dimí oura lidin aban wügüri anosuhati arihei ida liña lan liñun nita. Madisedügüyati meha laweiridun nuéi, ani aba narihini nidiheri lan ladüga merederun lan lǘnabüdün nita. Ábati nálügüdüni: “Ma marihinñahagidibu lounwen aban gürigia?”. Aba lasansiragun ligibu aba lariñagun: “Uá, marihinñahagidina”. Genegeti yebe nóunweba lan, gama lumoun, séfutina. Hínsiñeti hamuga san hun lun hasubudirun murusun luagu nibagari?

ABA NIDIN AWURIBUHA

Aba nidin lidan wuribu Vietnam lidan sedü-hati irumu 1969. Dan le nachülürün ñein, aba híchugun aban dimaasu nun lun gayara lan néchudun luagu lárouga luma luagu lasansirun oura. Hínsiñeti meha nun níderaguniña sánditiña hama ǘnhürüwaaña, ani busentina meha surusia nan. ligía nawadigimaridunbei kei ídehati ñein lubéi operárua hamá gürigia. Lidan wadagimanu ligía aba ladagarun aban lanarime sandi nuagu le buga uágubei nayanuha furumiñe.

Nadagimeintina meha tidan aban háspitali hani súdara lurugabu liyumoun duna Mekong. Anuhein meha saragu elikópüteru anaahatu súdaragu ǘnhürüwaaña háspitalirugun. Hínsiñeti meha nageira nun, ani hínsiñeti giñe nun nawadigimaridun. Ligía meha náfaagunbei lun níderaguniña lílana nageira. Fulasu le meha ñein lubéi operárua hamá súdaragu aban meha óunwenbu gafu lautu gürabu lau garabali diliti tidan. Añahein meha bián surusiagu ñein hama bián wügüriña anosuhatiña ha adügübalin sun hayaraati lun hesefuhan ibagari. Arihatina meha giñe barǘ tan elikópüteru fiú sagü wéinamutu wuritu. Aba hariñagun nun marariragüdün hamanu ladüga hilaaña lan tídanbaña ha táfaragun bonba. Ligía meha katei hírutimaabei.

NAGUMESERUN ÁLUAHEI BUNGIU

Lúmagiñe nibureingidina nasubudiraña gefentiña luagu Heowá. Hagía meha íchugubaña aturiahani tun núguchu. Mabadiseruntu, gama lumoun hínsiñeti meha aturiahani ligía nun. Aban weyu, aba násügürün luma tani núguchu weiriei tigibugiñe Luban Adamuridaguni. Aba nálügüdüni katei lan fulasu ligía. Aba lariñagun nun lun maweiyasun nan ayarafada houn “gürigia hagía”. Afiñetina meha luagu tani núguchu weiriei, ligía nadügünbei gasu lau ani aba madimurehan nan hama Gefentiña.

Lau meha katei le nawinwandubei Vietnam, giributina lídangiñe wuribu lau saragu igarigu. Genegeti meha nun ua lan gunfuranda hamani gürigia le asuseredubei ñein. Haritagua náagili amarüchara hamá gürigia ǘmada Meriga kóntüra súdaragu merigana ladüga hariñagun áfara hamá irahüñü maduruntiña. Sun le adügati lun nasandirun mosu lan náluahani Bungiu.

Kei le náluahañei lan Bungiu, aba nagumeserun abisidaha ámuñegueinarügü ligilisi. Súnwandan meha nasandiruni hínsiñe lan Bungiu nun, gama lumoun mínsiñeti meha le narihibei tidan ligilisi burí tuguya nun. Lau lásügürün dan aba nidin tidan aban Luban Hadamuridagun Gefentiña luagu Heowá Delray Beach (Florida). Aban weyu dimaasu lidan bián-hati lidan irumu 1971 ligía furumiñeti adamuridaguni le ñein lubéi nidin.

Dan le nebelurunbei tidoun luban adamuridaguni, gumumémeeli furumiñeti fánreinti lidan adamuridaguni. Aba nerederun lubá taturiahóun Garüdia Atalaya. Naganbahañein sun le ariñawagubei ñein ani ténitina lun sun katei. Maritagun numuti ka lan uagu layanuha arütíkulu le aturiahóubei, gama lumoun haritagua nágili áluaha hamani irahüñü sun bérusu tidan habibülian. Wéirigüda lumutu katei le nanigi. Lubaragiñe náfuridun ñéingiñe, aba layarafadun aban íbiri nun kéiburi 80 irumu lau. Jim Gardner líribei. Aba líchugun aban líburu nun to gíriboun La verdad que lleva a vida eterna. Aba nárügüdünu, aba wadügüni daradu lun wagumeserun aturiaha luagu-gádürü binaafin.

Lárigiñe adamuridaguni aba nidin awadigimarida. Tidan meha aban háspitali nawadigimarida Boca Ratón (Florida). Nadagimeitina meha lúmagiñe ladaünrün unsu guñoun darí sedü binaafin. Kei le ua habéi saragu sánditiña lun netenirun houn, aba naliihanu líburu La verdad. Aba tarihinina aban anosuhatu aliihoun líburu tuguya. Aba tiabin ani aba tárügüdünu líburu aba tálügüdünina lau igañi anhein samina nubéi nadügagun nungua ábanme gefenti luagu Heowá. Aba nárügüdünu niliburun tuéi ani aba nariñagun tun íbini lan tamidanrügügili lan líburu naliirun, nasaminaruña lan lun aban nan Gefenti. Aba tidin würi tuguya, ani áriebumeme ligía aba nagumuchunu líburu aliiha.

Dan le naturiahanbei luma íbiri Gardner luagu furumiñeti weiyaasu, aba nálügüdüni: “Kaba san waturiaha?”. Aba lariñagun nun: “Líburu to níchuguboun bun”. Aba nóunabuni aliiha naaru lan súngubei. Ani aba lariñagun nun lau ínsiñeni: “Warihaali kapítulu aban”. Eibu nawanserun lidan naturiahan aba narihin gíbeti lan katei metenitina lun. Aba lamuriahan numa lun náluahan saragu bérusu tidan nibibülian. Chülüdüga buga dan lun nafurendeiruni le larufudahabei Bungiu inarüniti, Heowá. Aturiahatiwa ǘrüwa kapítulu tídangiñe líburu tuguya binaafin ligía. Ani sagü luagu-gádürü waturiahan ǘrüwa kapítulu. Gúndaatina meha lau le nafurendeirubei. Aban meha lubuidun chansi numaisturun lan íbiri ligía, ladüga aban lan kristiánu anuadirúaali ani subuditi meha íbiri Russell lun.

Lárigiñe naturiahanu Bíbülia luagu fiú dimaasu, aba nagumeserun apurichiha. Hénrenguti meha nun napurichihan muna tuagu muna, gama lumoun íderagua lumutina Jim lun manufudedun nan (Adügaü 20:20). Seremei líderagunina, aba línsiñedun apurichihani nun. Afiñetina narufudahan lan houn amu luagu Bungiu chansi wéiritimaati le nibihibei. Hínsiñeti nun nídehan lidan wadagimanu le (1 Korintuna 3:9).

NAGUMESERUN ASANDIRA ÍNSIÑENI LUAGU HEOWÁ

Guentó nadimureha luagu aban katei espechaliti nun. Luagu dan le nagumeserunbei asandira ínsiñeni luagu Heowá (Arufudúni 2:4). Íderagua láadina ínsiñeni ligía lun nadireiruni nisaminan luéi le narihibei lidan wuribu luma lun nawandun amu burí turóbuli (Isaíasi 65:17).

Lidan irumu 1971 aba nerederun ibidiñega nun halíaba lan nawinwanda. Lidan dan ligía nawinwanduña meha lidan aban rumu le hani nagübürigu. Aba lariñagun tani núguchu weiriei siñá lan lawinwandun aban gefenti luagu Heowá ñein. Lóuguati meha niseinsun, ani kada keinsi weyu ligía meha nafayeirún tidan háspitali. Gasta naali meha sun niseinsun agañeiha daüguaü lun náfuridun apurichiha. Anihein meha murusun seinsu nareidahan, gama lumoun Míchiganñein meha, lidan fulasu le ñein lubéi naweirida. Ligía mosu lubéi meha nawinwandun tidan nugune. Aba nagoun ani sagua au tidan kumú to tídanboun lalugurahagüle gasolina.

Aban weyu lidan anahagua lan awinwanda tidan nikarün, lárigiñe náfuridun lídangiñe nuadigimari aba nidin tidoun Luban Adamuridaguni. Ñeinba meha wóundaragua lun wáfuridun apurichiha. Ani mégeigili meha fiú oura lubá hachülürün íbirigu. Aba nañuurun agurabaha tanagangiñe luban adamuridaguni. Sódini aba nagumeserun aritaguei le nawinwandubei Vietnam. Aba naritagun luagun bandi hitaü le narihibei luma líhemen hágürügü gürigia le gudaali. Genegeti meha nun naganbuñein lan hamalali gürigia ha meha amuriahabaña ídemuei ani hálügüdüñadina lan anhein hawinwanduba lubéi. Subuditi meha nun luagu hóunweguba lan, gama lumoun áfaaguatina lun níchugun gurasu houn. Lidan oura ligía aba nasandirun aban lanarime íruni.

Aba nafurieidun lun Heowá lidan anaha lan ayahuaha (Sálumu 56:8). Aba nagumeserun asaminara luagun le mini lubéi emenigini lánina águyuguni. Masaminarungidina yebe luagun lubuidun emenigini ligía. Láguyuguagüdübaña Heowá nibureintiña hagía ha narihibaña óunwegua, ani gachansinbaña lun hafurendeiruni inarüni. Danme le lasuseredun katei le, wabulieidubei sun asufuriruni le meha wawinwandubei lidan wuribu (Adügaü 24:15). Adügati gunfuranda nani katei le lúntima línsiñedun Heowá nun. Abanmémegili weyu espechaliti weyu ligía nun. Sagü gaturóbulin nan, aba náfaagun lun naritaguni ínsiñeni le nasandirubei luagu Heowá lidan dan ligía.

GÓUNIGI LÁADINA HEOWÁ

Dan le houdin gürigia awuribuha, adügatiña katei wuribati. Adüga numuti giñe. Gama lumoun íderagua láadina nasaminarun luagun bián bérusu tídangiñeti Bíbülia. Le furumiñeti, Arufudúni 12:10, 11. Ariñagati ñein gañei lani lita Hesusu luma wapurichihan Mafia. Le libiaman Galasiana 2:20, le aritaguagüdübalin nun hilá lan Hesusu nuagu. Seremei lun lani Kristu sákürifisiu, gayara lubéi feruduna lánina Heowá luagu katei wuribati le meha nadügübei. Guentó darangilu haali nisaminan ani wéiriti nayumahan nabahüdahan houn amu aban lan Bungiu gudemehabuti Heowá (Ebüréu 9:14).

Anihein dan nasaminarun luagun le winwan náalibei, ani súnwandan nasaminarun buidu lan Heowá numa. Kei hénpulu, dan le líchugunbei íbiri le úmabei naturiahoun Bíbülia fe luagu tidan lan nikarün nawinwanda, aba ladügün aransehani lun nayanuhan tuma aban íbiri to áhayahaboun rumu. Chouru numuti Heowá lan ayusurubaliña íbirigu hagía lun líchugun aban rumu nun lun nawinwandun. Chóuruti aban lan Bungiu buiti Heowá! Súnwandan lóunigiruniña lubúeingu ha úaraguabaña.

NAFURENDEIRUN APURICHIHA LAU ÍNSIÑENI

Lidan seingü-hati irumu 1971 mosu meha nidin Míchigan. Lubaragiñe nidin Floridagiñe, aba nabúachun saragu agumeiraguagüdüni tidoun nikarün lun napurichihan lidan nuéiyasun. Machülügidina ni lamidan üma, aba tagumuchun agumeiraguagüdüni. Apurichihatina meha lidan sun fulasu lau ubebeni. Apurichihatina furisunrugu, rútina giñe agumeiraguagüdüni houn wügüriña ha nadarirubaña lidan fulasu le lánina emeraaguni. Álügüdaguagidina nungua anhein chülǘ habéi gürigia hagía asubudirei Heowá (1 Korintuna 3:6, 7).

Subuditi nun dan lan meha le nagumeserunbei aturiahoun Bíbülia wéiriti meha furangu nan dan le napurichihan. Susereti le dan le napurichihan houn niduheñu. Kei hínsiñe habéi níbirigu nun John luma Ron, álugatina nafosuruniña lun hánharun lun nafiñen. Lau lásügürün dan aba namuriahan ferudun hama luagu katei ligía. Darí lumoun dan le ámugili hafiñen nuéi, gama lumoun amuriahatina luma Heowá lun lachülürün dan lun aban lan hafiñen numa. Seremei ídemuei le líchugubei Heowá nun, guentó buídutimahali nigaburi dan le napurichihan luma dan le narufudahan.

AMU BURÍ GÜRIGIA HA GIÑE HÍNSIÑEBAÑA NUN

Súdinigubeiñein numadagua luma Heowá súnwandan lidan nibagari. Ani añahein giñe gürigia súdinitiña lidan nibagari ha hínsiñebaña nun. Kei Susan, to nani weiriou, to hínsiñeboun nun saragu. Súnwandan meha busén nan namarieidun tuma aban würi to lunboun tíderagunina asigira eseriwida lun Heowá. Subudi tumuti Susan ka lan tabusenrubei ani hínsiñeti Heowá tun. Dan meha le gadaradun wabéi, aban weyu aba nidin ebeluha tumoun hábiñe tagübürigu. Aba nadarirunu aturiahoun Garüdia Atalaya tau tibibülian. Wéiritu nanigi lau narihini táluahani sun bérusu le tídangiñeti Bíbülia íbini mama lan aban arütíkulu lánina aturiahani taliihabei. Ariha numuti súdini lan tumadagua luma Heowá tun. Aba wamarieidun lidan duusu-hati irumu 1971. Seremei numuti Heowá luagu luéirin ídemuei le tíchugubei nani weiriou nun. Le hínsiñetimabei nun tuagu íbini lan hínsiñe nan tun, hínsiñetimaati Heowá tun.

Rúhali Heowá bián isaanigu buítiña woun, Jesse luma Paul. Ígiraaña lun Heowá lan adundehei habagari ani buiti hamadagua luma (1 Samueli 3:19). Barüti katei le ugundani nun luma tun Susan. Biángubei hagía barühaña lóugiñe wein irumu eseriwida lun Heowá lidan dan dayarüti. Ani sigimémetiña adügei ladüga hínsiñe lan Heowá houn. Ani rútina giñe seremei luagu maríei hamá hama bián würiña ha hínsiñebei Heowá houn ani seriwitiña lun (Éfesuna 6:6). Stephanie tuma Racquel híribei, gúndaatina hau. Hínsiñetiña nun kamá hamuga nisaanigu.

Seriwitina 16 irumu Rhode Island. Adügatina meha saragu umadagu ñein. Haritagua nágiña nánigu paaná wéiyaaña lidan afiñeni. Seremei numutiña óunigirutiña sirkuitu ha íderagubadina. Aban óunwenbu chansi gayara lan neseriwidun úara hama wügüriña ha asigirubaña arufuda ínsiñeni luagu Heowá. Lidan irumu 1987 aba wáguyun Carolina del Norte lun wídehan lidan apurichihani. Adugatiwa giñe saragu umadagu buítiña ñein.a

Lidan widü-hati irumu 2002, aba namisurahóun tuma nani weiriou lun weseriwidun Betelirugu Patterson, Meriga. Nadagimentina lidan Departamentu lánina Eseriwiduni, anhoun Susan lidan chibaguaü. Hínsiñeti meha wadagimanu ligía tun. Lidan widü-hati irumu 2005 aba nagumeserun eseriwidan lidan Sétanu le Arihibei lau Hawadigimari Gefentiña luagu Heowá lidan sun ubóu. Saminatina yebe mabafubadina lan lun nagunfuliruni wadagimanu ligía. Sandiguatu yebe giñe Susan tungua siñabei lan tagunfulirun lau buligasion ligía. Ani mínsiñeti meha giñe tun Susan taweiyasuhan tidan awión. Ani guentó gabügürüguati waweiyasuhan tidan. Seriwiti adundehani le híchugubei hani íbirigu ha eseriwidubaña lidan sétanu ligía weiriou tun. Aranseñutiña lun tíderagunina, ligía tínsiñebei nun.

Tidan nani áfisi anuhein saragu iyawaü numa to aritaguagüdübadina luagun katei buiti le násügürübei lidan nibagari. Biní láadina Heowá saragu ladüga nakipuruni furumiñeti ínsiñeni le nasandirubei luagu.