Aranse waméi waritagun buidu

1, 2. a) Ka íchugubalin waritagun woun? b) Ka uagu weteingirei Bungiu lau líchugun aban aritaguni woun?

ADÜGA lumutiwa Heowá lau ubafu lun desidírü wamá. Ani lun líderaguniwa lun desidírü wamá buidu, aba líchugun aban aritaguni woun. Ka san aritagunibei? Aban katei le wádanbei ani le ariñagubalin woun le buídubei lumoun le wuribabei (ariha huméi rekuáduru “Ka mini lubéi?”). Anhein aranse wabalin waritagun buidu, líderagubadiwa lun wadügüni katei le buídubei ani lun wadisedun luéi le wuribabei. Lau líchugun Heowá aban aritaguni woun, larufuduñein woun hínsiñe wamá lun ani busén lan lun gunda wamá.

² Añahein gürigia ibidiñeti lúrudu le tídanbei Bíbülia houn ani íbini ítara adügatiña katei buiti ani aba hadisedun luéi le wuribabei (aliiha huméi Rómana 2:14, 15). Ka uagu? Ladüga lariñaguni haritagun houn wuriba lan fiú katei. Lun hamuga úati aban aritaguni hawagu gürigia, wuribatimati hamuga ubóu sügǘ lau le gádanbalin. Ligía gayara lubéi weteingiruni Heowá luagu líchugun aban aritaguni houn sun gürigia.

3. Anhein waransera waritagun buidu, ida luba lahuudun le lun damuriguaü?

³ Maranserun hamuti hibe-agei gürigia haritagun. Ánheinti wagía busentiwa waranseruni waritagun lun líderaguniwa asubudirei le buídubei lumoun le wuribabei. Ani lun wadügüni katei le, mosu waliihanu Bíbülia ani furendei wameime le tariñagubei. Ani ligibuagun lira, mosu línsiñedun lilurudun Bungiu woun ani afiñe wagíame luagu buidu lan woun. Ligía labürühanbei Pábulu: “Le lunbei barufudahani houn afiñetiña hagía, lun hínsiñegua hamá houngua lugundun harumaaru tan hanigi, míchuhali haritagun duru hawagu, ani buíduhali hafiñerun” (1 Timotéu 1:5). Anhein waransera waritagun buidu ani gaganbadi wagíame lun, buídubei léibugun katei lidan damuriguaü, ladüga wídehaba lun ñein lan úarani hadan íbirigu. Línsiñedatimaba giñe Heowá woun ani afiñetimabadiwa luagu. Warufudubei giñe buidu lan wamadagua luma ani busén wamá wadügüni lugundan. Ítara luba larihín ka lan hawuyeri gürigia wagía.

4. Anhein busén wabéi waranseruni waritagun, ka lunbei wadügüni?

⁴ Lun waranseruni waritagun, úati buídurügü lan waliihanu Bíbülia lun wafurendeirun saragu lúrudu. Mosu waturiahanu Bíbülia súnwandan, wasaminarun luagun le waliihabei ani amuriaha wagíame luma Heowá lun líderaguniwa lun wawinwanduni le wafurendeirubei. Dan le waturiahanu Bíbülia, busentiwa wasubudiruni Heowá buidu. Busentiwa wasubudiruni ka lan ligaburibei, ka lan katei hínsiñebei lun luma ka lan mínsiñebei lun. Eibu waranseruni waritagun, ábame genegegua lan wasaminan luma lisaminan Bungiu.

5. Kaba wariha lidan arütíkulu le?

⁵ Háfuga wálügüdagun woungua: “Ida liña líderaguniwa waritagun lun desidírü wamá buidu? Ida luba warufuduni inebe lan haritagun amu woun? Ida liña líderaguniwa waritagun lun wadügün katei buiti?”. Lidan arütíkulu le warihiba ǘrüwa sügǘ le ídanbei gayara lan líderaguniwa aban aritaguni le aranserúali. Furumiñe, lidan wóunigiruni wátuadi. Libiaman, dan le wanúadahani wisebáhari. Luma lǘrüwan, dan le wayanuhan luagun wafiñen.

LIDAN WÓUNIGIRUNI WÁTUADI

6. Anhein sandi wabéi, ka katei lunbei desidírü wamani?

⁶ Rutu Bíbülia adundehani woun le íderagubadiwa lun buidu lan wátuadi. Ariñagatu woun lun meigin wamá katei le adügüti dañu woun ani lun wárügüdagun woungua lidan luáguti éigini luma átuni (Ariñawagúni 23:20; 2 Korintuna 7:1). Furanguti íbini lan wasigiruni adundehani le tídanbei Bíbülia, wasandiramémeba ani weiya wagíame. Ligíati, anhein sandi wabéi, háfuga mosu desidírü wamá kaba lan luwuyeri agaranihani wasigira. Lidan fiú ageiraü, gayarati íbini hanúadahan íbirigu hasigirun ámuñegueinarügü luwuyeri agaranihani. Gíbetiña íbirigu abürühatiña tidoun sukursáli lun hálügüdahan anhein gayara lubéi heresibirun somu luwuyeri agaranihani.

7. Kaba íderaguawa lun desidírü wamá buidu lidan luáguti hitaü?

⁷ Siñati lariñawagún woun tídangiñe somu sukursáli ni lun lariñaguni somu wéiyaali lidan afiñeni woun kaba lan luwuyeri agaranihani weresibira, ni ánhaña wálügüda (Galasiana 6:5). Gayarati híderaguniwa wéiyaaña lidan afiñeni lun desidírü wamá buidu. Gayarati haritaguagüdüni woun ka lan tariñagubei Bíbülia. Gayarati giñe haritaguagüdüni woun ariñaga lan Bungiu houn lubúeingu lun ‘meigin hamá o lun mayusurun hamá hitaü’ (Adügaü 15:29). Ladüga gumadi le subudi wamaali siñati lan wánharun lun agaranihani lau hitaü ni lau ni aban lídangiñe gádürü lagana hitaü le súdinitimabei. Agia san lirahüñü fánreinti le asagarúbei lídangiñe gádürü lagana hitaü le súdinitimabei? Gayarati san wánharun lun? Lunti desidírü lani kada kristiánu katei le según laritagun. Añahein fiú íbirigu ariñagati haritagun houn gayara lan hánharun lun lirahüñü fánreinti ligía, ani añahein amu ariñagati haritagun houn lun meresibirun hamani.a Ka amu burí bérusu tídangiñeti Bíbülia gayarabei líderaguniwa lun wanúadahan kaba lan luwuyeri agaranihani weresibira?

8. Ida liña líderaguniwa Filipuna 4:5 lun desidírü wamá buidu luagu wátuadi?

⁸ Uguñe weyu anihein saragu sandi máraninati. Gama lumoun, háfuga añahein gürigia ariñagutiña subudi hamá somu árani le gayarati lareidaguagüdün somu sandi. Góunigi wamá. Ariñagati Ariñawagúni 14:15 mafiñerun hamuti lan gürigia ha chúbaña aau sun le ariñawagúbei houn, saminatiña buidu lubaragiñe desidírü hamá. Luagu amu oubaü, ariñagati Pábulu moun lumuti lan wadügüdarun hawagu gürigia lun hadügün somu katei (Filipuna 4:5, TNM). Anhein wasigira adundehani le, mígirunbadiwa lun súdinitima lan átuadi lidan wabagari. Mabusenruntiwa lun wawouguounrügü lan wasaminara (Filipuna 2:4). Subudi wamuti wasandiramémeba lan lidan awanheingua lan lidan ubóu le. Ligía lunti lubéi wachoururuni wíchuguñein lan eseriwiduni lun Heowá lidan furumiñeti lúgaaru lidan wabagari (aliiha huméi Filipuna 1:10).

9. Ida liña líderaguniwa Rómana 14:13, 19 lun desidírü wamá buidu luagu wátuadi? b) Ka gayarabei lasuseredun anhein masigirun wamá ladundehan Pábulu?

⁹ Lidan binadu Roma, añahein meha fiú kristiánugu achuragutiña amu ladüga masaminarun hamá kei hagía luagu somu éigini luma somu fedu. Ani lau hadügüni katei le, híchuguñein meha úarani le lídanbei damuriguaü lidan peliguru. Ligía meha lariñagunbei Pábulu houn: “Añahein gürigia wéiriguti hanügüni aban weyu luéi amu weyu; añahein híbiri, afiñetiña luagu aban lan labu sun weyu. Kada aban lunti lachoururuni le uágubei laritagua” (aliiha huméi Rómana 14:5, 13, 15, 19, 20). Arufudahati le woun moun lumuti lan wasigenehan luagu somu katei ani lunti lan inebe lan hasaminan amu woun, moun lumuti wafosuruniña lun hasaminarun kei wagía. Anhein masigirun wamá ladundehan Pábulu, ka gayarabei lasuseredun? Gayarabei wariñagun somu katei le gáriti houn amu ani ábame wíchuguni úarani le lídanbei damuriguaü lidan peliguru. Lidan aban ageiraü, aba houchun aban feru maríeitiña hafosurun amu íbirigu lun hagañeinhan fiú árani luma lun hasigirun aban luwuyeri átüürüni le espechaliti. Añahein adüga hamuti le hariñagubei houn, añahein amu madügün hamuti. Dan le lachülürün oura, mibihin hamuti resultóu le hagurabubei, ani aba hagañidun saragu íbirigu. Ka turobulibei? Minebenti hasaminan amu houn feru maríeitiña ha. Garichatiña lun desidírü hamá anhein hátubei lubéi árani ligía. Gama lumoun, lau hafuudun houn amu lun giñe hadügüni, aba híchuguni úarani le lídanbei damuriguaü lidan peliguru.

10. Ka uagu lunti lubéi inebe lan le desidírü habéi amu woun? (Ariha huméi dibuhu le lídanbei lagumeseha arütíkulu.)

¹⁰ Háfuga aniheinbei dan magundan wamá lau le desidírü lubéi somu íbiri lidan libagari, kéiburi luagu látuadi. Gama lumoun, moun lumuti wayanuhan wuriba luagu ni wálugun lun lasansiruni lisaminan. Háfuga mégeibei lan íbiri ligía laranseruni laritagun (1 Korintuna 8:11, 12). O háfuga wagía lan mégeibei waranseruni waritagun buidu. Kada gürigia lunbei desidírü lan kaba lan ladüga ani lun lawanduni lani resultóu.

DAN LE WANÚADAHANI ISEBÁHARI

11, 12. Ida liña san líderaguniwa Apurichihati 3:4 luma Galasiana 5:19-21 lun desidírü wamá buidu luagu isebáhari?

¹¹ Súngubei wagía mégeitiwa wéherehan luma lun wagundaarun, ladüga ítara liña ladügüniwa Heowá (Apurichihati 3:4). Gama lumoun, anhein busén wabéi lun ladügün isebáhari buiti woun, mosu wanúadahani buidu ani desidírü wameime átiribei lan dan wásügürün lidan. Ida liña san líderaguniwa waritagun lun desidírü wamá buidu?

¹² Ariñagatu Bíbülia woun lun madügün wamá katei mabuidunti kéiburi agamariduni le kóntürati luagu lilurudun Bungiu, áhuduraguni houn guáriua, abiñarahani, ageindaguni, woudin lidan lanarime burí fedu luma átaguni. Ariñagati Pábulu “mebelurunbaña lan ha adügübalin katei le lidoun larúeihan Bungiu” (Galasiana 5:19-21). Ligía lunti lubéi wálügüdagun woungua: “Ígira lumutina san naritagun lun nagundaarun lau huraraü le gaganati anarimeni luma lanarime ínsiñeni luagu ageiraü, o somu isebáhari le adügüti lun nagañidun ani lun furunde nan? Ígira lumutina san naritagun lun naríagun pelikula le ídanbei furangu lan larufudún agamariduni, bacharuaü luma abiñarahani?”.

13. Ida liña líderaguniwa 1 Timotéu 4:8 luma Ariñawagúni 13:20 lun desidírü wamá buidu luagu isebáhari?

¹³ Ariha wamá amu burí bérusu tídangiñeti Bíbülia le gayarabei líderaguniwa lun desidírü wamá buidu luagu isebáhari. Kéiburi 1 Timotéu 4:8 afuranguagüdati buidu lan ladügǘn ehersísiu. Ani inarüni gayara lan buidu lan somu huraraü lun átuadi. Gama lumoun, úati mini lan le gayara lan wadügün ehersísiu hama furumiñeguarügü. Ariñagati Ariñawagúni 13:20: “Ha óundaragutiña hama chu tau, lachuuduba hau, ánhaña ha óundaragubaña hama ibidiougua tau, heferidiruba”. Furanguti anhein lan busén wabéi desidírü wamá buidu luagu isebáhari, mosu lan waranseruni waritagun buidu lau tídehan Bíbülia.

14. Ida liña líderaguniña adundehani le lídanbei Rómana 14:2-4 fiú iduheñu?

¹⁴ Ayanuha wamá hawagu aban feru maríeitiña gíritiña Christian tuma Daniela. Abahüdaguati Christian ayanuha hamá lidan haturiahan úara kei iduheñu luagu isebáhari hama bián hasaanigu aweinamudeinatiña. Ayanuhatiña luagu buidu lan fiú isebáhari ani anihein lan líbiri mabuidunti. Ayanuhatiña luagu ka lan umadagubaña buítiña. Aba tariñagun aban hádangiñe hasaanigu luagu añahein lan fiú gefentiña luagu Heowá tidan tileskuelan ha adügübaña katei burí le genegeti tun mabuidun lan. Ariñagatu giñe sandigua tan tungua kamá mosu tadügüni ligiaméme. Aba hafuranguagüdüni tagübürigu tun mosu lan hayusuruni kada gürigia haritagun lun desidírü hamani kaba lan hadüga luma kaba lan uma hadügei (aliiha huméi Rómana 14:2-4).

15. Ida liña líderaguniwa Matéu 6:33 lun desidírü wamani ida luba lan wayusuruni wadaani?

¹⁵ Ka súdinitimabei hun? Hidin adamuridagua, apurichiha luma haturiahanu Bíbülia? Odi háluahan somu isebáhari? Ruti Hesusu aban adundehani le gayarabei líderaguniwa lun desidírü wamá átiribei lan dan wásügürün lidan isebáhari. Ariñagati: “Áluaha huméi larúeihan luma liricha Bungiu furumiñe; ábame líchuguni sun le hemegeirubei hun” (Matéu 6:33). Dan le wasaminarun ida luba lan wayusuruni wadaani, lunti hamuga waritaguni ladundehan Hesusu le.

DAN LE WAYANUHAN LUAGU WAFIÑEN

16. Ka katei lunbei línchahaniwa waritagun lun wadügüni?

¹⁶ Anhein aranse wabalin waritagun buidu, lariñagubei woun lun madügün wamá katei wuribati. Ani ligibuagun lira, lariñaguba giñe woun lun wadügün katei buiti, kéiburi lun wapurichihan. Línchahabadiwa waritagun lun wayanuhan luagu Bungiu houn gürigia, dandu muna tuagu muna kei lidan furumiñeguarügü fulasu. Ligía meha asuseredubei lun Pábulu. Ariñagati meha siñati lan lerederun mapurichihanga, mégeiti meha ladügüni (1 Korintuna 9:16). Anhein wasigira lani hénpulu, wagunfuliruba lau wani buligasion ani darangilañu luba waritagun. Luagu amu oubaü, ariñagati Pábulu dan le lan wapurichihan, wóuchuña lan lun lúaradun haritagun gürigia luma uganu le wapurichihabei (2 Korintuna 4:2).

17. Ka meha tadügübei aban nibureintu to aranserubalin taritagun según le tariñagubei Bíbülia?

¹⁷ Ayanuha wamá tuagu aban íbiri gíritu Jacqueline. Dan le meha 16 lubéi irumu tau, aba larufudahóun tidan tileskuelan luagu saliguarügü lan sun katei lungua. Hínsiñeti meha tun tóunabun dan le hadügün máisturugu álügüdahani, gama lumoun, lidan külase ligía mígirun lumutu taritagun lun tóunabun. Ka uagu? Ladüga mabusenrun tan túaradun luma saminaü ligía. Ligía aba lubéi desidírü tan tariñaguni lun tumaisturun ka lan tafiñenbei. Saminatu yebe wuribabei lan lóunabun, gama lumoun, buiti lóunabun ani aba lariñagun tun lun tayanuhan hagibugiñe sun tánigu paaná luagu tafiñen luagu Bungiu lan adügübalin sun katei. Buiti meha tasandiragun tungua ladüga íderagua lanu taritagun le aranse táalibei tau Bíbülia lun tadügüni le buídubei. Agia huguya, nadagimeinti san haritagun buidu?

18. Ka uagu súdini lubéi waranseruni waritagun lun úara lan luma le tarufudahabei Bíbülia?

¹⁸ Anhoun waturiaha Bíbülia, wasaminarun luagun le wafurendeirubei ani winwan waméi, aranseñu luba wasaminan buidu. Súdiniti katei le, ladüga líderagubadiwa lun wasigiruni lilurudun Heowá luma larufudahan lidan wabagari. Ma ligía wabusenrubei sun wagía?