Wéiritimahali liserunga ubouagu | Ka tariñagubei Bíbülia?

“Buinya gürigia lau turobuli lánina seinsu lidan sun ubóu”, liña le arihibei lau Sétanu le tídanbei Banku to lídanboun sun Ubóu, lidan aban ariñahani le áfuridubei lidan sisi-hati, irumu 2022. “Laganwounduña lebegi katei ani lóuguatimarügaali haseinsun gürigia”.

Según El Fondo Monetario Internacional: “Ma loufun liñurun lebegi gasi luma éigini, barüti lira turobuli houn gürigia hátima lídanbaña ageiraü le gudemebei”.

Íderagua tumutiwa Bíbülia gunfurandei ka lan uagu wásügüra lídangiñe lidere dan le, ida luba lan wagagibudagun luma ani kaba lan lárani.

Laserudun katei lidan “lagumuhóun dan” le

• Watu Bíbülia lun dan le ídanbei wawinwanda “lagumuhóun dan” (2 Timotéu 3:1).

• Ariñagati Hesusu “larihúba burí [lan] katei hanufunati”, le lunbei ladügün lun hanufudedun gürigia (Lúkasi 21:11). Dan le laserudun katei, aba hanufudedun gürigia. Ladüga ibidiñe lan houn kaba lan asusereda ámuñegü luma anhein gayaraabei lubéi hanuriahaniña haduheñu.

• Daritiwa aban profesía tidan líburu Arufudúni le ariñagubei hanarimebei lan liserun éigini lidan lagumuhóun dan le. “Aba naganbun lariñagun aban umalali [...]: ‘Biánrügüla líburu türigu luagu lebegi aban weyu wadagimanu, sisi líburu sewada ligiaméme ebegi’” (Arufudúni 6:6).

Lun hadarirun lanwoun ariñahani luáguti “lagumuhóun dan” luma tuáguti líburu Arufudúni, ariha huméi bidéu En 1914 el mundo cambió de rumbo, aliiha huméi giñe ariñahani “¿Qué representan los jinetes del Apocalipsis?”.

Lárani sun turobuli lánina seinsu

• “Hábunaguba gürigia haban ábame haganóun tidan, hábunaguba beibei ábame héiginu tin. Mábunagunbei gürigia muna laganóuame amu tidan, mábunagun ligíame mutu nadü, léigounme amu tin” (Isaíasi 65:21, 22).

• “Ñeinlá saragu türigu fulasurugu, gibelá türigu lábulugu burí wübü” (Sálumu 72:16).

• “Anihán le lariñagubei Aburemei: ‘Násaara guentó ladüga hamudirawaguña gudemetiña, agúarahatiña débilitiña lau igarigu. Níchugubei ídemuei le hemegeirubei houn’” (Sálumu 12:5).

Málühali Heowáa agumucha lau marichaü le gádanbalin ubóu lidan luáguti seinsu, lídanba sun ubóu ladügei, mama lídanrügü aban ageiraü. Lun hasubudiruni ida luba lan ladügüni, aliiha huméi ariñahani “¿Es realista esperar un sistema económico justo?”.

Sunme awanha lan agurabaha laransehani Heowá sun katei, gayaraati tíderaguniwa Bíbülia agagibudagua luma turobuli le. Ida? Lau adundehani huuti le tíchugubei libügürü ida luba lan wayusuruni seinsu lau lichú aau (Ariñawagúni 23:4, 5; Apurichihati 7:12). Lun hasigirun afurendeira, aliiha huméi ariñahani “Góunigi huméi hiseinsun” luma “Cómo vivir con menos”.