Inebeti san hafiñen lílana amu relihión houn gefentiña luagu Heowá?

Wagía, gefentiña luagu Heowá, falá wamuti adundehani tídangiñeti Bíbülia le: “Inebe hamá sun gürigia hun” (1 Féduru 2:17). Ligíati, inebetiña sun gürigia woun meberesenga ka lan hánibei relihión. Lau sun anihein lan ageiraü le ñein hamuti saragu milu gefentiña luagu Heowá móuchuntiwa wadügüdarun hawagu lílana polítika o hawagu lúrudugu lun híchugun gumadi lun lararamúniwa hawadigimari lílana amu burí relihión. Máfuriduntiwa giñe amarüchara ǘmada lun wabihin lun lichugún lúrudu le afosurutiña amu lun hanügüni habagari kei wanügüni o hafiñeruni le wafiñerubei. Téinkirügü wamuti wouserúniwa laumeme inebesei le aubei wóuseraña ha híbiri gürigia (Matéu 7:12).