Ka uagu mefeduhan habalin gefentiña luagu Heowá luéyuri nasirua lan Hesusu, o Fedu?
Iyeeni luma inarüni
Iyeeni: Ladüga mafiñen hamá gefentiña luagu Heowá luagu Hesusu mefeduhan habalin Fedu.
Inarüni: Kristiánugu wagía ani chouru wamuti ua lan amu le uéigiñeti gayara lan wasalbarun luéidigia Hesukrístu (Adügaü 4:12).
Iyeeni: Fánreingua hamutiña gefentiña luagu Heowá iduheñu lau harufudahan houn moun lumuti lan hefeduhani luéyuri nasirua lan Hesusu.
Inarüni: Wéiriti hasudinin iduheñu woun; ligía wínchahanbaliña lun hafalaruni adundehani le tídanbei Bíbülia lun hederebudagüdüni habagari keisi iduheñu.
Iyeeni: Mínsiñeti burí “igaburi le arihúbei Fédurugu” houn gefentiña luagu Heowá kéiburi gíchigadi, darangilaü luma úarani.
Inarüni: Hóuchatiwa sagü weyu lun gíchigadi wamá luma lun wabagaridun lidan darangilaü hama súngubei (Ariñawagúni 11:25; Rómana 12:18). Samina humá luagun le: mamuriahantiwa seinsu lidan wadamuridagun maguburahantiwa giñe luagu wapurichihan houn gürigia ladüga gúnfulitiwa lau gumadi lúmagiñeti Hesusu le: “Mafayeihantün [...], maguburaha humá giñe” (Matéu 10:8). Subudigüda wamuti giñe houn gürigia Larúeihanrügübei lan Bungiu anüga darangilaü ubouagun (Matéu 10:7).
Ka uagu mefeduhan habalin gefentiña luagu Heowá luéyuri nasirua lan Hesusu, o Fedu?
Ruti Hesusu gumadi houn lánigu lun haritaguni luéyuri lounwen, mama luéyuri nasirua lan (Lúkasi 22:19, 20).
Mefeduhan hamuti meha lani Hesusu apostolugu ni furumiñetiña lani disipulugu Fedu. Ariñagatu Diccionario del cristianismo, Roma lan lagumesera fedu le “lidan irumu 330” lárigiñe lidaani Hesusu, lóugiñe aban sígulu lárigiñe lounwen lagumuhóun apostolu.
Úati ni kata arufuduti 25 lan lidan duusu-hati nasirua lan Hesusu; mariñawagúnti tidan Bíbülia kátima lan weyu nasirua lan.
Gunfuranda wamuti magundan lan Bungiu lau Fedu le ladüga lídangiñe lan échuni luma áhuduraguni mama inarüniti liabin (2 Korintuna 6:17).
Ka uagu madügün habalin gefentiña luagu Heowá le hadügübei hiibe-agei gürigia?
Íbini subudi hamani saragu gürigia múaran lan lefeduhóun luéyuri nasirua lan Hesusu, o Fedu, luma le tarufudahabei Bíbülia ani mama lan kristiánugu inarünitiña agumeserubalin fedu le, efeduha hamuti ladüga samina hamá maweirin lan luriban lun madügün hamani le hadügübei hiibe-agei gürigia.
Ínchaha tumutiwa Bíbülia ayusurei wasaminan lun desidírü wamani kaba lan wadüga (Rómana 12:1, 2). Arufudahatu giñe woun lunti lan gebegi lan inarüni woun (Huan 4:23, 24). Mama hamugatia ladüga meberesen wamá luagu le hasaminarubei amu wawagu wadügei ítara, gama lumoun madüraagun wabéi gumadi le tídanbei Bíbülia lúnrügü wíchugun ugundani houn gürigia lau wadügüni lememe hadaagubei.
Lau sun inarüni lan mafeduhan wamani fedu le, gunfuranda wamuti kada lan gürigia desidírübalin anhein lefeduhabei lubéi o mefeduhan lubéi lan, ligía mafosurun wabéi ni aban lun mefeduhan lani.