Ka un wadügǘwa?

Óunabagülei le tíchugubei Bíbülia

Gayaraati lafuranguagüdüniwa katei le lidan ámuñegueinarügü igaburi. Gayaraati lálügüdagun somu gürigia lungua: “Ka uagu awanhein lubéi ya ubouagu?” o “Ka san un wadügǘwa?”. Arufudatu Bíbülia lun lan gamadagua wamá luma Bungiu wadügǘwa. Lun gunfuranda wamani katei le buidu, ariha wamá fiu inarüni le tarufudubei Lererun Bungiu.

• Bungiu adügübaliwa. Ariñagatu Bíbülia: “Subudi huméi luagu Aburemei lan Búngiubei; ligía adügübaliwa, lani wagía” (Sálumu 100:3; Arufudúni 4:11).

• Gébunati ladügüni Bungiu sun katei le adüga láalibei, gürigia haganagua (Isaíasi 45:18).

• Adüga lumutiña Bungiu gürigia lun “megei hamani lídehan”, laganagua le anihein wayumahan wadariruni lébuna wabagari (Matéu 5:3). Busenti Bungiu lun wibihini le wayumahabei (Sálumu 145:16).

• Arufuda wamuti megei wamani lídehan Bungiu dan le wáfagun lun wasubudiruni luma lun gamadagua wamá luma, ani lun wibihini katei le, adüga tumuti Bíbülia agunbirahani le woun: “Yarafa humá lun Bungiu, ábame giñe layarafadun hun” (Santiagu 4:8; 2:23).

• Lun lumadagu wamá Bungiu, mosu úaragua lan ligaburi wawinwandun luma le labusenrubei woun. Ariñaga lumuti Apurichihati 12:13 ka lan labusenrubei Bungiu woun: “Ruba inebesei lun Bungiu, gúnfulibei lugumadin lugundun ligía lunbei hadügüni gürigia”.

• Ámuñegü, danme le lagidaruni Bungiu asufuriruni, ru ligíame ibagari magumuchaditi houn sun lumadagu —ha eseriwidubaña lun lau úaraguni—, larihúba lagunfulirun le labusenrubei Bungiu houn gürigia sunsuinagubei (Sálumu 37:10, 11).