Aban san katei le hanügübei gürigia tidan hanigi Larúeihan Bungiu?

Óunabagülei le tíchugubei Bíbülia

Uá. Mama aban katei le hanügübei kristiánugu tidan hanigi Larúeihan Bungiu.a Furanguti tarufuduni Bíbülia halíañein lan arúeihani le, lau tariñagun “arúeihani le siélubei” (Matéu 7:21). Arufuda tumuti giñe aban lan arúeihani inarüniti Larúeihan Bungiu ani lagumadihaña lan siélugiñe. Ariha waméi.

• Lidan Larúeihan Bungiu, añahein agumadihatiña, añahein giñe gürigia ha lábugiñebaña agumadihani ligía, anihein burí lúrudu luma dasi lun ladügǘn lugundan Bungiu sielu luma ubouagu (Matéu 6:​10; Arufudúni 5:​10).

• Lagumadirubaña Larúeihan Bungiu sun “néchanigu” ha ubouagubaña (Danieli 7:​13, 14). Mama gürigia anúadirubalin arúeihani le; Bungiu íchugubalin ani rúhali ubafu lun lun lalidihaniña gürigia (Sálumu 2:​4-6; Isaíasi 9:7).

• Ariñagati Hesusu houn lani apostolugu ha úaraguabaña luagu lúmabaña lan lidan Larúeihan sielu. Kaba san hadüga ñein? Hesusu guánarügü ariñagubalin: Lun hañuurun “luagu [...] lálana burí urúei”, mini lan le, lun harúeihan úara luma (Lúkasi 22:​28, 30).

• Lagumuchuba Larúeihan Bungiu hau sun láganiñu (Sálumu 2:​1, 2, 8, 9; 110:​1, 2; 1 Korintuna 15:​25, 26).

Ligíati, mariñaguntu Bíbülia tídangiñeba lan wanigi lagumadiha Larúeihan Bungiu. Mini lan le, mama lan aban katei le wanügübei tidan wanigi Larúeihan Bungiu. Le tarufudahabei Bíbülia gabafu lan “uganu luáguti larúeihan Bungiu” tidan wanigi (Matéu 13:19; 24:14).

Ma ariñagati Hesusu: “Hídanñein larúeihan Bungiu”?

Sügügüda tumuti saragu Bíbülia dimurei le lídanbei Lúkasi 17:21 lau dimurei kéiburi “hídanñein larúeihan Bungiu” (Biblia Americana San Jerónimo). Ligíati añahein lubéi gürigia asaminarutiña tídanñein lan anigi Larúeihan Bungiu. Lun gunfuranda wamani bérusu le buidu, mosu waliihani dimurei burí le lubaragiñebei bérusu le luma le lárigiñebei.

Haritagua waméi houn lan fariséugu lariñagei Hesusu dimurei le, aban sétanu tábutigu ligilisi ha meha unbei iyereegu lan Hesusu darí lun hadügün aransehani lun háfaruni hilagubei (Matéu 12:14; Lúkasi 17:20). Mini lan san le tídanñein lan hanigi wügüriña wuribatiña hagía Larúeihan Bungiu? Uá, Hesusu guánarügü ariñagubei houn: “Múnadagiñe hibiti, buin hiña lau marasualugu luma figóu” (Matéu 23:​27, 28).

Arufuda lumuti ligaburi lásügürawagüdün Lúkasi 17:21 tidan amu burí Bíbülia kátima lan labusenrubei bérusu le lariñagun. Ariñagatu El Nuevo Testamento original: “Aniheinhali Larúeihan Bungiu hóubagiñe”, ánhounti Sandu Bürütu, ariñagatu: “Aniheinhali larúeihan Bungiu haganagua”. Ida liñati haganaguañein lan fariséugu, o hóubagiñeñein lan Larúeihan Bungiu? Ladüga anihein lan meha Hesusu ñein haganagua, le lanúadirubei Bungiu lun Lurúeiteme Larúeihan (Lúkasi 1:​32, 33).