HÁLÜGÜDAHAN NIBUREINTIÑA
Le san lúgubu agamariduni lan layusuruni gürigia liyuma lidan agamariduni?
Arufudatu óundaruni merigana to gíriboun Centros para el Control y la Prevención de Enfermedades ariñaga hamá yarafa houn hamidan nibureintiña ha álügüdawagubaña, ha gúnfulihaña lúmagiñe 15 darí 19 irumu, yúsuñaha hamaali lan hayuma lidan agamariduni. “Ánhabu ayanuha luagu luwuyeri agamariduni le luma furumiñeguarügü nibureinti, lariñaguba bun ua lan ni kata wuribati luagu”, tiña Sharlene Azam, to abürügüdübarun líburu Oral Sex Is the New Goodnight Kiss (Layusurún iyumaü lidan agamariduni: iseri chuti le ichugúbei lubá arumuguni guñoun). Ani ariñagatu giñe: “Mafiñentiña luagu agamariduni lan lira”.
Ka basaminarubei luagu le?
Óunababa anha o uá.
Gayaraati san terederun aban nibureintu dageinañu láurügü tayusuruni tiyuma lidan agamariduni?
Anha
Uá
Gayaraati san basandirun lau ligaburi agamariduni le?
Anha
Uá
Le san lúgubu agamariduni lan layusuruni gürigia liyuma lidan agamariduni?
Anha
Uá
Kátima san inarünibei?
Arihabéi bóunabagüle lumoun le bürüwañubei ǘnabu.
Gayaraati san terederun aban nibureintu dageinañu láurügü tayusuruni tiyuma lidan agamariduni?
Óunabagülei: Uá. Anihán ábanbei lídangiñe lébuna hasaminarun saragu mariban lan luwuyeri agamariduni le.
Gayaraati san basandirun lau ligaburi agamariduni le?
Óunabagülei: Anha. Gürigia le ayusurubalin liyuma lidan agamariduni, gayaraati lalugurún lau sandi le gíribei labilu A o B, guméi, ónini, herpes, sida luma sífilisi.
Le san lúgubu agamariduni lan layusuruni gürigia liyuma lidan agamariduni?
Óunabagülei: Anha. Dandu larounrun wügüri tuma würi, hayusuruni hayuma o hanagangiñeti luma hamulidaagun hámagua, sun lira, agamariduni.
Lunti san bebereserun lau le?
Ariha waméi le tariñagubei Lererun Bungiu luagu layusurúniwa iyumaü lidan agamariduni.
Ariñagatu Lererun Bungiu: “Le labusenrúbei Bungiu [...] lun ua lan ni aban agamariduti mamarieidunga [o “adügüti magíaguni” TNM]” (1 Tesalónikana 4:3).
Lidan iñeñein le ídanbei tabürüdǘwa Bíbülia, sun luwuyeri agamariduni le hádanti gürigia ha mamarieiduntiña mini lubéi “magíaguni”, kéiburi agamariduni, layusurún iyumaü luma anagangiñeti lidan agamariduni luma hamulidaagun hámagua. Lasusereduba katei wuribati lun gürigia le adügübei magíaguni; lóugiñe sun katei, lagadeirubei lumadagua luma Bungiu (1 Féduru 3:12).
Ariñagatu Lererun Bungiu: “Ánjein le agámariduti mamárieidunga, ladǘgüña figoú luágu lúgubu guánarügü” (1 Corintios 6:18, Lerérun Búngiu to lánina Iséri Darádu).
Gürigia le ayusurubalin liyuma lidan agamariduni, láluahaña sandi lúniwagua ani lagadeirubei lumadagua luma Bungiu. Ani wuribabei giñe lasandiragun lungua. Ariñagatu líburu Cómo hablar de sexo con los adolescentes para que te escuchen: “Mámarügüñein dan le hagamaridun gürigia luéigiñe habaragiñeti, dan le moun lumuti lan hadügüni, hasandiragua houngua adibirihóuaña lan, hasakürihan luma hasandiragun houngua wuriba, gayaraati giñe hasandiragun houngua ítara lárigiñe gadan lániña furumiñeguarügü luwuyeri agamariduni le moun lumuti. Agamariduni agamariduni ka lan yebe luwuyeri”.
Ariñagatu Lererun Bungiu: “Au Aburemeibei le Bubungiute; arufudaha numuti le buídubei bun” (Isaíasi 48:17).
Afiñetibu san barǘ lan lilurudun Bungiu luáguti agamariduni buiti bun? O saminatibu eredeha lánibu luéi badügüni le babusenrun? Saminabá luagun aban üma le buinbei tau karü lau burí seini le arufudubalin átiribei lan loufun téibaagun ani halíaba lan tararamagua. Bariñaguña hamuga san anihán lan burí seini le ñein lun leberesehanibu o lun lóunigirunibu? Kaba hamuga san asusereda anhein mafalarun hamá abugahatiña lúrudu burí le?
Lau sun mígirun lan lúrudu lánina abugahani lun badügüni sun le babusenrun, góunigi lumutibu. Ligiaméme giñe asuseredubei lau lilurudun Bungiu.
Ligiaméme asuseredubei lau lilurudun Bungiu. Ánhabu meberesen lau, basufuriruba (Galasiana 6:7). “Éibume mafala bani le bafiñerubei luáguti laruman ibagari, adüga buguya katei le subudi bumuti wuriba lan, eferidireina bubéi inebesei le basandirubei buougua”, tiña líburu Sex Smart (Agamariduni lau lichú aau). Ánheinti bafalara lilurudun Bungiu, barufudubei haruma lan bibagari. Ani le buídutimabei, darangilubei bisaminan (1 Féduru 3:16).