Katei san figoubei?
Óunabagülei le tíchugubei Bíbülia
Figóu, ligía furumiñeguarügü katei le wadügün, wasandirun o wasaminarun le adüraaguti lilurudun Bungiu (1 Huan 3:4; 5:17). Ariñagatu Bíbülia le lan mini lubéi figóu ladügün gürigia aban katei wuribati o marichati ligibugiñe Bungiu, o madügün lani le buídubei (Santiagu 4:17).
Lidan iñeñein le ídanbei tabürüdǘwa Bíbülia furumiñe, dimurei le ásügürawagüdübei kei “figóu”, mini lan lásiñarun lahitiruni gürigia le uágunbei lesemeiha o lachüüra. Kei hénpulu, ayanuhatu Bíbülia hawagu fiu súdaragu, lidan meha binadu Ísüraeli, ha meha gǘhünebaña tau chilinchádi, “machararaditiña” meha dan le hachüürün aban dübü luagun aban ídiburi. Lun hamuga lásügüragüdüniwa dimurei le ítara kei aubei labürüdǘwa furumiñe, lariñaguña hamuga ítara: “mafigounhaditiña” (Alidihatiña 20:16). Ligíati, wafigouhaña dan le mibihin wamá wagunfulirun lau lugumadin Bungiu le úabei mégeiti luagu.
Kei Bungiu lubéi adügübalin sun le aniheinbei, garichati lun lariñaguni houn gürigia ka lan buídubei lumoun le wuribabei (Arufudúni 4:11). Ani kada aban wádangiñe, “laguseruba luougua luma Bungiu” (Rómana 14:12).
Gayaraati san mafigouhan wamá?
Uá, lugundun ariñagatu Bíbülia: “Afigouhaaña sun gürigia ani díseeña luéi luéirigun Bungiu” (Rómana 3:23; 1 Urúeigu 8:46; Apurichihati 7:20; 1 Huan 1:8). Ka uagu lasusereda lira?
Dan ladügünbalin Bungiu Adán tuma Ewa, lenege guánarügü ladügaña, sin figóu (Agumesehani 1:27). Lau sun lira, aban gafigoun hamá dan le hadüraagunbalin lilurudun Bungiu (Agumesehani 3:5, 6, 17-19). Danti gasaanigu habéi, aba galagante hamani hasaanigu figóu (Rómana 5:12). Kei lariñagun Urúei Dawidi: “Gafigountina lúmagiñe turageirugugiñe núguchu” (Sálumu 51:5).
Anihein san figóu hanarimetimati luéi amu?
Anha, anihein. Kei hénpulu, ariñagatu Bíbülia luagu wuriba hamá meha gürigia ha Sodomabaña ani adaagua hamá meha “lanarime [burí] figóu ligibugiñe Bungiu” (Agumesehani 13:13; 18:20). Ariha wamá ǘrüwa katei le arufudubalin weiri lan aban figóu.
Figóu burí le wéinamuti. Adimurehatu Bíbülia luagu burí figóu le wéinamuti ani le moun lumuti wadügüni, kéiburi: agamariduni mamarieidunga, áhuduraguni houn guáriua, íweruhani, bacharuaü, áfarahani, abiñarahani luma lanügǘniwa hálagu amu lau ibibuni (1 Korintuna 6:9-11; Arufudúni 21:8). Arufudatu Bíbülia mama lan aban labu sun figóu, anihein figóu le ladügübei gürigia mabusenrunga o masaminarunga, kei hénpulu, lariñagun o lóuserun gürigia lidan aban igaburi le adügübei lun wuriba lan hasandiragun amu houngua (Ariñawagúni 12:18; Éfesuna 4:31, 32). Gama lumoun, ínchaha tumutiwa Bíbülia lun marihin wamá ni aban luwuyeri figóu kamá hamuga aban katei le maweirinti luriban, ladüga gayaraati lanügüniwa lidoun figóu le wéinamutimati (Matéu 5:27, 28).
Lébuna. Añahein gürigia afigouhatiña ladüga libidiñe lilurudun Bungiu houn (Adügaü 17:30; 1 Timotéu 1:13). Lau sun arufuda tan Bíbülia wuriba lan burí figóu le, arufuda tumuti mítaran lan luma burí figóu le ladügübei aban gürigia chuñu lau ani le ídanbei larufuda meberesehabuni luagu lilurudun Bungiu (1 Lúrudu 15:30, 31). Arufudahatu Bíbülia wuriba tan hanigi ha afigouhabaña subudiga houn (Heremíasi 16:12).
Gabügürügua lan ladügǘn. Arufudahatu Bíbülia mama lan ligiaméme lafigouhan gürigia aban wéiyaasu luma ladügüni ligiaméme figóu gabügürügua (1 Huan 3:4-8). Siadi lumutiña Bungiu ha asigirubaña afigouha lau hagundan íbini lárigiñe hasubudiruni inarüni (Ebüréu 10:26, 27).
Gürigia ha adügübaña figóu le wéinamuti, gayaraati hasandiragun houngua wuriba luagu le hadügübei. Kei hénpulu, ariñagati urúei Dawidi: “Buchagüda nuriban nuagu, ítara liña nun kei aban anügüni le siñá numuti awanda” (Sálumu 38:4). Gama lumoun, ru tumuti Bíbülia emenigini le: “Ígiralei wügüri le wuribabei lagübüri lémeri, ígiraleime salufuriti luriban lisaminan; giribu humá lun Aburemei ábame gudemehabu lan hun; giribu humá lun Wabungiute, le mánginbei lun feruduna lanün” (Isaíasi 55:7).