Ida liña lahuudun lani Hesusu sákürifisiu “lebegime hasalbarun saragu”?
Óunabagülei le tíchugubei Bíbülia
Lani Hesusu sákürifisiu layusurubei Heowá lun lesefuruniña o lasalbaruniña gürigia lídangiñe figóu luma óunweni. Ariñagatu Bíbülia lita lan Hesusu ebegi le afayeirúbei lun hasalbaruniña gürigia (Éfesuna 1:7; 1 Féduru 1:18, 19). Ligía lariñagunbei Hesusu: “Niábiña [...] lun níchuguni nibagari lebegime hasalbarun saragu” (Matéu 20:28).
Ka meha uagu mégeiwa lubéi lebegi asalbaruni?
Mafigounti meha Adán, furumiñeti wügüri le ladügübei Bungiu. Ani lau sun gachansin lan yebe lun lawinwandun lun súnwandan, féridi lumuti chansi ligía ladüga maganbadi lan lun Bungiu (Agumesehani 3:17-19). Galagante hamuti sun lisaanigu Adán figóu (Rómana 5:12). Ligía tariñagunbei Bíbülia alugurúañu liña lan Adán hau sun ladügawagun kei idamuni lun figóu luma óunweni (Rómana 7:14). Siñati libihini ni aban gürigia le leferidirubei Adán ladüga gafigoun wamá súngubei (Sálumu 49:7, 8).
Aba gudemehabu lan Bungiu houn ladügawagun Adán ladüga memeniginhaaña lan meha (Huan 3:16). Keiti richagua lubéi Bungiu, siñati meha feruduna lániña ítaraguarügü (Sálumu 89:14; Rómana 3:23-26). Ani kei hínsiñe habéi gürigia lun, aba líchuguni le mégeiwabei, mámarügü lun ferudunawa lan figóu, aransehati giñe lun lagidarúniwa figóu sunsuinagubei (Rómana 5:6-8). Lebegi asalbaruni layusurubei Bungiu lun ladügüni katei le lábugiñe lúrudu.
Ka mini lubéi lebegi asalbaruni?
Tidan Bíbülia, ǘrüwañein katei mini lan lebegi asalbaruni:
Ebegi le afayeirúbei (1 Lúrudu 3:46, 47).
Adügati le lun lígirawagüdün aban gürigia o lagiribudawagüdün lumegen lun (Áfuriduni 21:30).
Ligiaméme ebegi le afayeirúbei luma lebegi le uágubei lafayeihóua.a
Guentó, ariha waméi ida liña lan lagoubadaguagüdüniwa saminaü le luma lani Hesusu sákürifisiu.
Ebegi le afayeirúbei. Ariñagatu Bíbülia fáyeiwaali lan aban “óunwenbu ebegi” lun hagañeihóun kristiánugu “(1 Korintuna 6:20; 7:23). Lita Hesusu ebegi le afayeirúbei, le aubei lagañeiha “lun Bungiu gürigia lídangiñe sun rasa, sun iñeñein, fulasu luma néchani” (Arufudúni 5:8, 9).
Lígirawagüdün aban gürigia. Adügati lani Hesusu sákürifisiu lun wesefurun lídangiñe figóu (1 Korintuna 1:30; Kolosana 1:14; Ebüréu 9:15).
Ligiaméme ebegi. Ibagari le lederegerubei Hesusu keisi sákürifisiu, ítara liña kei ibagari mafigounti le meha leferidirubei Adán (1 Korintuna 15:21, 22, 45, 46). Ariñagatu Bíbülia: “Ladüga lubeiti lumaganbadin ábanrügü wügüri [Adán], ñǘbuintiña sun gürigia lun hafigouhaba lan; ítarameme giñe, ladüga laganbadi ábanrügü wügüri [Hesukrístu], gayaraati hayabin sun gürigia lun richaguabaña lan” (Rómana 5:19). Afuranguagüda lumuti katei le seriwi lan lounwen ábanrügü wügüri lun hesefurún saragu gafigountiña. Lau lani Hesusu sákürifisiu lafayeirei “lebegi hasalbarún sun gürigia” ha adügübalin le mégeiwabei lun hasagarun buiti lídangiñe (1 Timotéu 2:5, 6).
a Lidan iñeñein le ídanbei tabürüdǘwa Bíbülia furumiñe, dimurei le ásügürawagüdübei kei lebegi asalbaruni, adügati lun hasaminarun gürigia luagu aban ebegi le afayeirúbei luagu somu katei o ebegi lan le ichugúbei leweñegua somu katei. Kei hénpulu, dimurei ebüréu kafár mini lan aputiha o adouragua lau (Agumesehani 6:14). Yúsuati dimurei le dan le layanuhóun luagu ladourawagun lau figóu (Sálumu 65:3). Gániti dimurei kófer luma dimurei kafár, ani layanuhaña luagu ebegi le ichugúbei luagu le lunbei libihíniwa o lagiribudun lun labureme (Áfuriduni 21:30). Ítarameme, dimurei güriegu lýtron, sügügüdawati kei “lebegime hasalbarun saragu” (Matéu 20:28). Yusu hamuti meha abürühatiña güriegu dimurei le dan le hayanuhan luagu ebegi le afayeirúbei lun lígirawagüdün aban adaürǘti lánina wuribu o lígirawagüdün aban idamuni.