Ida liña lasalbaruniwa Hesusu?
Óunabagülei le tíchugubei Bíbülia
Sefu lumuti Hesusu habagari gürigia úaraguatiña lau lederegeruni libagari keisi sákürifisiu (Matéu 20:28). Ligía tariñagunbei Bíbülia lun lan lasalbaruniwa lóunahei Bungiu Hesusu ubouagun (1 Huan 4:14). Ariñagatu giñe Bíbülia ua lan “amu lun lasalbaruniwa luéidigia Hesukrístu, ladüga míchuti Bungiu amu iri ubouagu lun gayara lan wasalbarun luéigiñe” (Adügaü 4:12).
Hilati Hesusu hawagu sun “ha afiñerutiña luagu” (Ebüréu 2:9; Huan 3:16). Lárigiñe, “aba láguyuguagüdüni Bungiu”, ábati lagiribudun Hesusu sielun kei aban sífiri (Adügaü 3:15). Lúmagiñe siélugiñe gayaraati lasalbaruniña Hesusu gürigia “ha ayarafadubaña lun Bungiu lídangiñe le tímatimaati lun súnwandan, lugundun gabagariti súnwandan lun layumuragun lun Bungiu hawagu” (Ebüréu 7:25).
Ka uagu megei wabéi lun layumuragun Hesusu wawagu?
Sun wagía gafigountiwa (Rómana 3:23). Óunweni lafayeihabei figóu ani adügati le lun siñá lan wayarafadun lun Bungiu (Rómana 6:23). Ítara liña Hesusu kei aban awogóu le ayanuhabei luagu hafulesein sun ha afiñerubaña luagu lani sákürifisiu (1 Huan 2:1). Kei derege lani Heusu libagari wawagu, gayaraati layanuhan luagu wafulesein lun gayara lan laganbuni Bungiu wafurieidun luma lun feruduna lani wafigoun (Matéu 1:21; Rómana 8:34). Aganba lumuti Bungiu layumuragun Hesusu ladüga úarati le lamuriahabei luma lugundan Bungiu. Óunaha lumuti Heowá Hesusu ubouagun “lun hasalbarun ha ubouagubaña luagu” (Huan 3:17).
Buídurügüti san wafiñerun luagu Hesusu lun wasalbarun?
Uá. Lau sun mégeiwa lan wafiñerun luagu Hesusu lun wasalbarun, mosu wadügün amu katei (Adügaü 16:30, 31). Ariñagatu Bíbülia hilañu liña lan wafiñen anhein marufudun wamá lau katei buiti le wadügübei (Santiagu 2:26). Lun wasalbarun mosu:
Wafurendeirun luagu Hesusu luma luagu Heowá, le Lúguchi (Huan 17:3).
Wafiñerun luagu Heowá luma luagu Hesusu (Huan 12:44; 14:1).
Warufuduni afiñe wamá lau gaganbadi wamá lun lugumadin (Lúkasi 6:46; 1 Huan 2:17). Ariñagati Hesusu mámaba lan sun ha ariñagubaña lun “Nabureme” lun hasalbaruba lan, lubaragiñe lira, hasalbaruba sun ha adügübalin lugundan Lúguchi (Matéu 7:21).
Wasigirun arufudei wafiñen íbini wagagibudagun luma lénrengunga. Ariñagati Hesusu: “Le áfaaguti darí lumoun lagumuhóun, ligíaba asalbara” (Matéu 24:13).