HÁLÜGÜDAHAN NIBUREINTIÑA
Ida luba tíderagunina Bíbülia? Fánreinti 1: Áluahaba arufudahani tidan Bíbülia
“Áfaaguatina lun naliihanu Bíbülia, lau sun lira, hanufudedagüda lumutina lueirin timigifen!” (Briana, 15 irumu tau).
Susereti san ligiaméme bun? Gayaraati líderagunibu aturiahani le!
Ka uagu lunti lubéi taliihóuniwa Bíbülia?
Lidan bisaminan mínsiñeti san taliihóun Bíbülia bun? Anhein ítara liña lubéi, gunfurandawati. Másiñati ariha banu Bíbülia kei aban líburu tau saragu milu ubanaü luma burí liraüraü dimurei ani úatu iyawaü tidan ni dibuhu. Ligía línsiñebei taríawagun bigibigitu luma burí bidéu bun!
Íbini ítara, saminabá luagu le: Anhein badarira aban gafu buin lau golu, pülata luma ámuñegueinarügü dübü buíduburiti, ma busenbadibu hamuga badaarunun furese furese?
Ítara tiña Bíbülia kei aban gafu to buíntiña lau katei buiti. Anihein lichú aau le wéiriti lebegi tidan le gayaraabei líderagunibu lun:
Buidu lan le lunbei banúadiruni
Buidu lan banaagun bungua hama bagübürigu
Badarirun umadagu buítiña
Mígiraguagüdün ban bungua lun lagibedagun katei lun bichügü
Ida lubati tahuudun aban líburu to binaduharu uguñe weyu? Lugundun “sun le bürüwañubei tidan [...] Bungiu guánarügü íchugubalin haritagunrugun wügüriña lun habürüdüni” (2 Timotéu 3:16). Mini lan lúmagiñeti lan Bungiu, le súdinitimabei lidan sun ubóu, liabin sun adundehani le tídanbei Bíbülia.
Ítara tiña Bíbülia kei aban gafu lau irisini, buíntiña lau lichú aau lúmagiñeti Bungiu le wéiriti lebegi.
Ida luba naliihanu Bíbülia?
Furumiñe, gayaraati baliihanu lúmagiñe tagumeserun darí tagumuchun. Ítara luba basubudiruni ka lan uganu tídanbei Bíbülia. Anihein ámuñegueinarügü igaburi; ariha wamá bián hénpulu:
Gayaraati baliihanu 66 líburu to tídanboun Bíbülia lúmagiñe Agumesehani darí Arufudúni.
Gayaraati baliihanu Bíbülia según lidaani lasuseredun kada sügǘ le abahüdawagúbei tidan.
Adundehani: Lidan fánreinti A7 tidan Traducción del Nuevo Mundo, barihuba aban lísüta lau burí sügǘ súdinitimati lidan libagari Hesusu dan le lawinwandubei ya ubouagu ani bürüwañu liña según lidaani lasuseredun kada sügǘ.
Libiaman, gayaraati banúadirun aban sügǘ le úarati luma turobuli le úmabei bagagibudagua. Kei hénpulu:
Busentibu badarirun umadagu ha gayaraabei lafiñerun hawagu? Aliihabei sügǘ luáguti Dawidi luma Yónatan (1 Samueli 18-20). Lárigiñe yusu huméi ubanaü lauti dasi houn nibureintiña “Cómo encontrar amigos de verdad” lun bafurendeirun igaburi buiti lídangiñe sügǘ le.
Busentibu san lun here ban lun bawandun óuchawaguni? Aliihabei abahüdaguni luáguti lawandun Hosé óuchawaguni (Agumesehani kapítulu 39). Lárigiñe yusu huméi ubanaü lauti dasi houn nibureintiña “Cómo resistir las tentaciones: José” (primera parte) luma “Acusado falsamente: José” (segunda parte) lun bafurendeirun igaburi buiti lídangiñe sügǘ le.
Busentibu bafurendeirun ida luba líderagunibu furíei? Aliihabei sügǘ luáguti Neemíasi (Neemíasi, kapítulu 2). Lárigiñe yusu huméi ubanaü lauti dasi houn nibureintiña “Jehová contestó su oración” lun bafureindeirun igaburi buiti lídangiñe sügǘ le.
Adundehani: Dan le baliihanu Bíbülia, áluahaba aban fulasu darangilati lun madireirun humani bisaminan luéi le baliihabei.
Lǘrüwan, anúadiraba aban sügǘ o aban sálumu, aliihabei, lárigiñe, saminabá ida luba lan líderagunibu. Lárigiñe baliiha, álügüdaguaba bungua!
Ka uagu líchigei Heowá le tidan Bíbülia?
Ka larufudahabei nun luagu ligaburi Heowá luma luagu ligaburi ladügüni katei?
Ida luba lan nawinwanduni le nafurendeirubei?
Adundehani: Yusu humoun Traducción del Nuevo Mundo to lánina aturiahani lun hakutihan bidéu, mapa luma burí amu katei le gayarabei líderagunün dan le haliihanu Bíbülia.