Ida luba harufudun ínsiñehabuni

Eibu lásügürün dan, ábatima manarimeli lan ínsiñehabuni harufudun maríeitiña hámagua. Lunti san hadiheridun anhein lasusereduña lubéi le lidan habagari keisi maríeitiña?

• Le lunbei hadügüni

• Le gayaraabei hadügüni

Le lunbei hadügüni

Súdiniti larufudún ínsiñehabuni lun derebugu lan maríei. Ítara kei megei wamani éigini luma duna lun buidu lan wátuadi luma lun here wamá, adügati larufudún ínsiñehabuni estodi lun derebugu lan maríei. Íbini lásügürün saragu irumu hau gürigia maríeiñu, lunti hasandirun maríeitiña hínsiñe hamá houn hani weiriei o weiriou.

Le asandirúbei ínsiñeni inarüniti mámarügüñein luougua laritagua. Áfaagua humá lun hadügün lun gúndaañu lan hani weiriou o hani weiriei. Ligíati, lubaragiñe harufudun ínsiñeni dan lérügü busén humá hadügüni, gürigia le hínsiñehabuti, ruti fe dan le megei lan lupaaná larufudún ínsiñeni lun o tun ani adüga lumuti sun liyaraati lun ladügüni.

Libe-agei dan, mégeitimatiña würiña maríeitiña lun larufudún ínsiñeni houn sügǘ hawéi wügüriña. Másiñati hínsiñe tan lani wügüri weiriou lun. Anhein larufudaha ínsiñeni le lasandirubei tuagu dan lérügü lagumeserun o lagumuchun weyu luma lubaragiñe harounrun hámagua, másiñati machourun tubéi lan würi anhein hínsiñe tubéi lun tani weiriei. Buídutimati lun larufudún ínsiñeni sun weyu.

Le gayaraabei hadügüni

Arufudaha huméi hínsiñehabu lau le hariñagubei. Láurügü hariñagun katei kéiburi “hínsiñetibu nun” o “wéiriti bínsiñe nun” gayaraati hadügün lun lasandirun hani weiriei o hani weiriou ínsiñeni huagu.

Adundehani tídangiñeti Bíbülia: “Katei le buinbei tidan anigi, ligía lariñagubei iyumaü” (Matéu 12:34).

Amu adundehani: Meredera humá maniñu lau le hasandirubei tuagu hani weiriou o luagu hani weiriei. Bürǘ humá tirahüñü gárada, ñunsu luéigiñe gágamuru o koréu tuéigiñe konputadora lun hupaaná.

Arufudaha huméi hínsiñehabu lau katei le hadügübei. Dan le hariñagun “hínsiñetibu nun” gayaraati harufuduni ínsiñeni le hasandirunbei lira lau aban salalaguaü, aban chuti o lau hárügüdüni háhabu. Gayaraati giñe harufuduni ínsiñehabuni le hasandirubei lau aban supáü, lau ligaburi harihinu o harihini o aban idewesei dan gayara lan. Anihein amu igaburi le ídanbei gayara lan larufuduni wügüri maríeiti línsiñehabu tun lani weiriou, kéiburi lau lanügüni tanügün dan le tidin agañeiha, ladaaruni bena tubá, lachibagun asiedu o ílagu ani lau giñe lábougun. Houn saragu würiña maríeitiña mámarügüñein ídemuei le, aban igaburi le ídanbei harufudei hínsiñe hamá houn.

Adundehani tídangiñeti Bíbülia: “Moun lumuti wayumárurügü lan wínsiñehabu; lunti aban lan ínsiñehabuni le arihúati lidan katei le wadügübei” (1 Huan 3:18).

Amu adundehani: Óusera humóun hani weiriou o weiriei kei meha hóuserunu dan le adarigu habéi.

Sügǘ humá dan úara. Adügati hásügürün dan hábuguarúgü lun lederebugudun habagari keisi maríeitiña ani chóurugüda humuti lun o tun hupaaná gunda humá lau dan le hásügürünbei úara. Inarüni hénrengu lan gadaani hamá lun hadügüni lira, anhein gasaanigu habéi o anihein lan saragu beresegu súdini le lunti hadügüni. Lau sun lira, háfuga gayaraabei lan hadügün aransehani ñein lan dan íbini lúnrügü háfuridun éibuga hábuguarügü.

Adundehani tídangiñeti Bíbülia: “Chouru huméi heteniruña lan lun le súdinitimabei” (Filipuna 1:10, TNM).

Amu adundehani: Íbini anhein beresegu habéi maríeitiña añahein ha adügübaña aransehani sagü ítaga dan lun hadügün aban “éigini espechaliti” o hásügürün “aban samudi luma dimaasu espechaliti”.

Subudi huméi hupaaná. Ámuñegueinarügüti ínsiñehabuni le lemegeirubei kada gürigia. Ayanuha humá hámagua luagu kátima ligaburi larufudún ínsiñehabuni hínsiñebei hun ani anhein megei hubalin. Lárigiñe, áfaagua humá lun hagunfulirun lau le lemegeirubei hupaaná. Haritagua huméi, súdiniti lan larufudún ínsiñehabuni lun derebugu lan maríei.

Adundehani tídangiñeti Bíbülia: “Le hínsiñehabubei [...] mámarügüñein luougua laritagua” (1 Korintuna 13:4, 5).

Amu adundehani: Lubaragiñe hamuriahan lun larufudún ínsiñehabuni hun, álügüdagua humá hungua: “Ka gayaraabei nadügüni lúntima hínsiñehabu lan nani weiriei o weiriou numa?”.