Ka tariñagubei Bíbülia luagu haragachún irahüñü?

Óunabagülei le tíchugubei Bíbülia

Mayusurun tumuti Bíbülia dimurei haragachún irahüñü lun tayanuhan luagu laragachún aban irahü le úagili nasirua lan. Lau sun lira, anihein saragu bérusu tidan Bíbülia le íderagubaliwa gunfunrandei ida liña lan larihini Bungiu habagari gürigia, íbini libagari aban irahü le úagili nasirua lan.

Aban idewesei lúmagiñeti Bungiu ibagari (Agumesehani 9:6; Sálumu 36:9). Le linarün katei, gebegiti sun luwuyeri ibagari lun Bungiu, íbini libagari aban irahü le anihagua turageirugu lúguchu. Ligíati, láfarahaña aban gürigia dan le ladügün lau sun lichú lau lun lounwen aban irahü le úagili nasirua lan.

Ariñagati meha lúrudu le líchugubei Bungiu houn ísüraelina ítara: “Ánhaña ageindagua bián wügüriña hámagua, habuleseirame aban würi dageinatu, adüga ítara lun tágurahan lubaragiñe dan, anhein ua óunweti, mosu lafayeiruni le gadurunbei sun damichi le ladügübei ítara kei lamuriahani tani würi tuguya weiriei hagibugiñe aguseragüdütiña. Ánheinti ñein óunweti, mosu lafayeirúniwa ibagari luagu ibagari” (Áfuriduni 21:22, 23, TNM).a

• Ka dan lagumesera libagari aban gürigia?

• Gayaraati san feruduna lanu Bungiu gürigia to ragaaruboun tiráü?

• Wuribati san laragachún aban irahü anhein lídanñein lubéi peliguru tibagari úguchuru o libagari irahü?

Ka dan lagumesera libagari aban gürigia?

Lun Bungiu, gumeseti libagari aban gürigia lúmagiñe tadageinadun aban würi. Tidan Lererun, súnwandan ariha lani Bungiu aban irahü le úagili nasirua lan kei aban gürigia. Ariha wamá fiu hénpulu le arufudubalin ligiaméme lan larihini Bungiu libagari aban irahü le turageirugugili lúguchu luma libagari aban irahü le nasiruaali.

• Ariñagati urúei Dawidi lun Bungiu: “Ariha lumuti bagu ladügǘn núgubu” (Sálumu 139:16). Ligíati, ariha laali meha Bungiu Dawidi kei aban gürigia lubaragiñe nasirua lan.

• Ariha wamá ábanya sügǘ. Anihein meha aban dasi espechaliti le lunbei líchuguni Bungiu lun Heremíasi lubaragiñe nasirua lan. Ariñagati Bungiu lun: “Lubaragiñebei bágurahouniwa, lídanbei turageirugugidibu búguchu, anúadira náadibu ani direi numutibu lun profetabadibu lan houn néchanigu” (Heremíasi 1:5).

• Yusu lumuti Lúkasi, aban abürühati Bíbülia ani surusia, ligiaméme dimurei güriegu lun layanuhan luagu aban irahü le turageirugugili lúguchu luma lun layanuhan luagu aban irahü le málügili lúmagiñe nasirua lan (Lúkasi 1:41; 2:12, 16).

Gayaraati san feruduna lanu Bungiu gürigia to ragaaruboun tiráü?

Anha, gayaraati feruduna lániña Bungiu gürigia ha ragaañabaña haráü. Ánhaña agumesera arihei ibagari kei larihini Bungiu, mébunati lun hasigirun asandiragua houngua wuriba luagu le meha hadügübei. Ariñagatu Lererun Bungiu: “Areidati Aburemei, gudemehabu ligía [...]. Dísegüda laali wafigoun wawéi, kei ladisedagüdüni labouchagüle weyu luéi lálüdagüle” (Sálumu 103:8-12).b Feruduna lubaña Heowá gürigia ha asakürihabaña tídangiñe sun hanigi luagu figóu le meha hadügübei, íbini gürigia ha meha aragachubaña hasaani (Sálumu 86:5).

Wuribati san laragachún aban irahü anhein lídanñein lubéi peliguru tibagari úguchuru o libagari irahü?

Según le tariñagubei Lererun Bungiu luagu libagari aban irahü le úagili nasirua lan, mébunati lun laragachún aban irahü lau sun barǘ lan peliguru tun lúguchu o lun irahü.

Anhein hamugati asusereda aban sügǘ sódiniti dan le tagüriahaña lan aban würi ani mosu lanuadirúniwa anhein lesefurúba lubéi tibagari úguchuru o libagari irahü, ka lunbei ladügǘniwa lidan kesi le? Lau sun dísegua lan lasuseredun aban katei kei le, gürigiarügübaña ha ásügürübaña lídangiñe sügǘ le anúadira kaba lan hadüga.