Uganu buiti le labürüdübei Matéu
19 Lárigiñebei lariñaguni Hesusu katei burí le, aba lidin Galiléagiñe. Ábati lachülürün luagun láfadaragun Hudéa, luéigiñe le aban oubaü libiti duna Hordán. 2 Aba houdin saragu gürigia lárigi, ábati lareidaguagüdüniña sun ha sándibaña hadan.
3 Ábati houdin fiu fariséugu óuchaguei lau hálügüdüni: “Gayaraati san lígiragun aban gürigia tuéi lúmari luagu furumiñeguarügü katei?”. 4 Ábati lóunabuniña: “Maliihangidün funagia le lan adügübaliña gürigia lúmagiñe furumiñeti dan adüga lani wügüri adüga würi, 5 ani ariñagati ‘Ligía lígirubei lubéi wügüri lúguchi tuma lúguchu lun lóundarun tuma lúmari, ábameti ítara hamá kei ábanrügü gürigia’? 6 Ligíati, mámaaña bián gürigia, ítaraaña kei ábanrügü gürigia. Le lubeiti lóundarubei Bungiu, ualá ni aban adügüti lun lafanreinragun”. 7 Ábati hálügüdüni: “Kati uagu líchiga Moisesi gumadi lun líchugun wügüri aban gárada lánina ígiraguni tun lúmari ani ábame lóunahanu lúbiñegiñe?”. 8 Aba lóunabuniña: “Lánharunbei Moisesi lun lígiragun wügüri tuma lani weiriou, ladüga tidere hanigi. Lau sun lira, mítaranti lúmagiñe lagumeseha. 9 Ánheinti au, ariñagatina hun sun lan le ígiraguti tuma lúmari, mámarügaali ligía ladüga tadügün magíaguni* ani aba lamarieidun tuma amu, lagabarahaña”.
10 Ábati hariñagun disipulugu: “Anhein ítara liña lubéi katei le, buítimaati mani lan wügüri weiriou”. 11 Ábati lariñagun houn: “Añahein gürigia siñati hadügüni lira, hárügüñanu gayaraaguabaña houngua lun herederun mániga weiriou. 12 Añahein erederutiña mániga weiriou ladüga somu danimaü le aubei hagüriahóua. Añahein amu, adügǘwarügüti houn ítara. Ani añahein amu, rédeitiña mániga weiriou lun híchaagun houngua lun Arúeihani le siélubei. Le lubeiti gabafubei lun lerederun mániga weiriou, redeilá ítara”.
13 Ábati hatatirun gürigia anaaha irahüñü lun Hesusu lun labiniruniña luma lun lafurieidun hawagu. Pero aba hadeinhan disipulugu houn. 14 Ligía lariñagunbei Hesusu: “Ígira humaña irahüñü ha houngua. Meredeha humaña luéi hayarafadun nun, lugundun hounbei ha ítarabaña kei hagía Arúeihani le siélubei”. 15 Lárigiñe lira, aba labiniruniña Hesusu irahüñü, ábati lidin ñéingiñe.
16 Ábati liabin aban wügüri álügüdei Hesusu: “Máisturu, ka burí katei buiti lunbei nadügüni lun nibihini ibagari magumuchaditi?”. 17 Aba lariñagun Hesusu lun: “Ka uagu au lubéi bálügüda luagu le buídubei? Ábanrügüñein buiti. Lau sun lira, anhein busén bubéi beresibiruni ibagari, lunti gaganbadi ban súnwandan lun lugumadin Bungiu”. 18 Ábati lóunabuni wügüri ligía Hesusu: “Kéiburi?”. Lariñaga Hesusu lun: “Kéiburi máfarahaba, magabarahabá, míweruhaba, mariñagabá iyeeni hawagu amu, 19 inebelá búguchi tuma búguchu bun, ani hínsiñela gürigia bíledi bun kei bínsiñegua bungua”. 20 Ábati lóunabuni nibureinti ligía: “Lúmagiñe furumiñeti dan gaganbadi nan lun gumadi burí le. Ka mégeigilibei nubá?”. 21 Ábati lóunabuni Hesusu: “Anhein busén bubéi bagunfulirun buidu buidu lau sun katei, beiba alugurei sun búmati, bíchigeime seinsu houn gudemetiña; ítarati, bóundaraguba irisini sielu. Lárigiñe, ábame biabin lun aban ban hádangiñe nani disipulugu”. 22 Dan le laganbunbalin nibureinti ligía katei le, aba lírudagun saragu ladüga gibe lan lúmati. 23 Ábati lariñagun Hesusu houn lani disipulugu: “Gayaraati nachoururuni hun hénrengubei lan lun lebelurun aban rísiti lidoun Arúeihani le siélubei. 24 Ariñagatina giñe hun ménrenguntimaabei lan lun aban kameyu lun lásügürün luéigiñe luhuyun aban agusa sügǘ lau lebelurun aban rísiti lidoun Larúeihan Bungiu”.
25 Aba taweiridun hanigi disipulugu dan le haganbunbalin lira ani aba hálügüdahan: “Kati gayaraabei lasalbarun?”. 26 Aba laríaguniña Hesusu ani aba lariñagun houn: “Lau sun hénrengu lan katei le houn gürigia, úati lásiñarun Bungiu adüga”.
27 Ábati lariñagun Féduru: “Ígira wamaalitia sun katei lun wafalarunibu, kábati wibiha luagu lira?”. 28 Aba lariñagun Hesusu houn: “Gayaraati nachoururuni hun, danme lan lachülürün dan lun ladügǘniwa sun katei iserime, nañuuruba lan, au le Liráü Wügüri,* luagu lálana narúeihan lidan uéiriguni ani huguya, ha afalarubalina, hañuuruba giñe luagu duusu lálana arúeihani lun haguseragüdüniña dúusugubei lani Ísraeli türibu. 29 Sunti le ígiraali luban, líbirigu, lítunu, lúguchi, lúguchu, lisaanigu o lumúan lun nani lan disipulu, leresibiruba san wéiyaasu lóugiñe, ibiha ligíame ibagari magumuchaditi.
30 ”Ani saragu ha furumiñebaña, herederuba agumuhóuni, hati agumuhóuni, hagíaañame furumiñe.