Uganu buiti le labürüdübei Matéu

26 Lárigiñebei lariñaguni Hesusu sun katei le, aba lariñagun houn lani disipulugu: 2 “Kei subudi humaali lan, bián weyu lárigiñe le ligíaba lefeduhóun Luéyuri Esefuruni ani nederegerúba, au le Liráü Wügüri,* lun nádarawagun luagu wagabu”.*

3 Ábati hóundaragun hábutigu fádirigu hama hábutigu huríu lidan tibürürün* luban fádiri íñutimaati, le gíribei Kaifasi, 4 ani aba hayanuhan sun hagía hámagua luagu ida luba lan hadügün lun léiguadun Hesusu tidoun hasadaran gayara láamuga hárügüdüni, afarúa láamuga hilagubei. 5 Ábati hariñagun: “Moun lumuti wadügüni lidan lufedun Luéyuri Esefuruni luéi hachagaragun gürigia”.

6 Danti le Betaniañein lubéi Hesusu, lúbiñe Simón le meha gawagubei lépüra, 7 aba tiabin aban würi lau aban budéin lauti ibiñein hémeti le wéiriti liserun. Danti le léigiña lubéi Hesusu, aba téseruni ibiñein ligía lábulugun. 8 Dan le harihinbalin disipulugu katei le, aba hagañidun ani aba hariñagun: “Ka san uagu lewesirúa ibiñein le ítara? 9 Gayaraati hamuga buga waluguruni luagu saragu seinsu lun wíchuguni seinsu ligía houn gudemetiña”. 10 Kei aganbagu liña lubéi Hesusu lun le hariñagubei, aba lariñagun houn: “Ka uagu híchiga lidere dan tun würi to? Buiti katei le tadügübei nuagu. 11 Ladüga súnwandan ñéinbaña lan gudemetiña huma, ánheinti au, meredebadina huma súnwandan. 12 Lau téseruni würi to ibiñein hémeti le nuagun, taranseruñein núgubu lubá nabunún. 13 Gayaraati nachoururuni hun le lanme ñein lumuti lapurichihóua uganu buiti lidan sun Ubóu labahüdawagúba giñe le tadügübei würi to lun laritawagún tuagun”.

14 Ábati lidin Húdasi Iskarióte, le ábanbei hádangiñe duusu apostolugu hamoun hábutigu fádirigu 15 ani aba lálügüdüniña: “Kaba híchiga nun anhein nederegera Hesusu hun?”. Aba hariñagun lun híchuguba lan darandi murusun pülata lun. 16 Ligía lúmagiñe lubéi weyu ligía, aba latatirun Húdasi áluaha chansi lun lederegeruni Hesusu houn.

17 Lidan furumiñeti luéyuri fedu le ídanbei Teigúa Fein Maganatu Lébini, aba hayabin lani Hesusu disipulugu álügüdei: “Halía san babusenra lun waransehan lubá wéigini éigini le lánina Luéyuri Esefuruni?”. 18 Aba lóunabuniña: “Heiba uburugu, háluaheime ítaga gürigia ani ábame hariñagun lun: ‘Ariñagati Máisturu: “Yarafaali nóurate. Nefeduhabei Luéyuri Esefuruni hama nani disipulugu búbiñe”’”. 19 Ábati houdin lani Hesusu disipulugu adügei le lariñagubei houn. Aranseha hamuti sun katei lubá Luéyuri Esefuruni.

20 Ñun liña Hesusu luagu dábula hama duusu lani disipulugu dan le laguñeedunbei. 21 Sunti añaha lan eiga, aba lariñagun houn: “Ninarün hau luagu lagarabaaguba lan aban hídangiñe nuagun”. 22 Dan le haganbunbalin lani disipulugu katei le, aba hírudagun súngubei hagía ani kada aban hádangiñe, aba hálügüdüni: “Nabureme, mámatia au, adián?”. 23 Aba lóunabuniña: “Le ádaruti lúhabu úara numa lidoun asiedu, ligíaba agarabaagua nuagun. 24 Lau sun inarüni lan luagu lunti lan nounwen, au le Liráü Wügüri, ítara kei bürüwañu lan nuagu tidan Lererun Bungiu, fugiabume le alugurutina, au le Liráü Wügüri! Buídutimaati hamuga yebe lun úagubei lan nasirua* lan wügüri ligía”. 25 Ábati lálügüdahan Húdasi, wügüri le garabaguamémeelibei luagun Hesusu: “Mámatia au, adián, Máisturu?”. Aba lóunabuni Hesusu: “Anha, amürü guánarügü ariñagubalin”.

26 Sun añahagua lan eiga, aba lárügüdün Hesusu aban fein, lárigiñebeiti líchugun eteingiruni lun Bungiu tuagu, aba láhalahanu fein tuguya ani aba líchugunu houn lani disipulugu, ariñageina: “Hou humóun. Núgubu mini tubéi fein to”. 27 Aba giñe lárügüdün aban weru tau diwéin, aba líchugun eteingiruni lun Bungiu tuagu ani aba líchugunu houn lani disipulugu, ariñageina: “Gurá humá súngubei huguya tídangiñe, 28 ladüga nita mini tubéi diwéin to, ‘le añuuragüdübalin iseri daradu’, hitaü le lunbei lawiyurún luagu hafulesein saragu gürigia, gayara láamuga ferudunawa lan hafigoun. 29 Ninarün hau luagu mátundigiaadina lanme lídangiñe tira beibei darime lachülürün weyu lun natun iseri diwéin huma lídanme Larúeihan Núguchi”. 30 Lagumuhóun, aba heremuhan lun halawahani Bungiu ani aba houdin luagun wübü Oliwu.

31 Ábati lariñagun Hesusu houn lani disipulugu: “Áriebu to, hachugeraguba sun huguya ladüga le lunbei lasuseredun nun, lugundun bürüwañu liña tidan Lererun Bungiu: ‘Hawaraüdaguba mudún lárigiñeme nabuleseiruni hóuniri’. 32 Lau sun lira, lárigiñeme násaaragüdüniwa lídangiñe óunweni, ábame nidin hubá Galiléoun”. 33 Ábati lariñagun Féduru lun Hesusu: “Gayaraati hachugeragun sun ha híbiri ladüga le lunbei lasuseredun bun, anhein au, maweiyasunbadina achugeragua!”. 34 Aba lariñagun Hesusu lun: “Gayaraati nachoururuni bun áriebumeme lan to, lubaragiñe layuguruhan gayu, ǘrüwaalime wéiyaasu bariñagun ibidiñe nan bun”. 35 Aba lóunabun Féduru: “Íbini ánhana ounwe úara buma, maweiyasunbadina ariñaga ibidiñe ban nun”. Ligiaméme giñe hariñagubei sun ha híbiri disipulugu.

36 Lárigiñe, aba lidin Hesusu hau lidoun aban fulasu gíriti Hetsemaní ani aba lariñagun houn: “Ñurú humá ya, néibuga yebe afurieida yagüroun mémeraü”. 37 Ábati lanügüni Hesusu Féduru hama bián lirahüñü Sebedéu lúmagua. Aba latatirun Hesusu asandira saragu íruni ani aba giñe táhüchürün lanigi. 38 Ábati lariñagun houn: “Láfaraadina íruni. Redei humá ya ani agagudúañu humá úara numa”. 39 Lárigiñe ladisedun hawéi murusunraü, aba labuluchagun darí ladagarun lerebe múarugu ani aba layumuragun, ariñageina: “Núguchi, anhein gayara, díreibei uniñein le nuéi. Íbini ítara, adügüwalá le babusenrubei, mama le nabusenrubei”.

40 Lárigiñe katei le, aba lagiribudun le ñeinhin habéi lani disipulugu ani aba ladariruniña arumuga. Ábati lálügüdüni Hesusu Féduru: “Siñati san buga herederun agagudúañu úara numa nírügü luagu aban oura? 41 Agagudúañu humá ani furíei huguyame súnwandan méiguadun humaamuga lidoun óuchawaguni. Lau sun lira, inarüni katei le: íbini busén lan gürigia ladügüni le buídubei, anihein dan hénrengu lan lun”. 42 Ábaya lidin luagu libiaman wéiyaasu afurieida ítara: “Núguchi, anhein siñá lubéi badireiruni uniñein le nuéi, adügüwalá bugundan”. 43 Danya le lagiribudunbei Hesusu, ábaya ladariruniña disipulugu arumuga ladüga láfarahañanu lan lidabu hagu. 44 Ábaya lagararaagun Hesusu afurieida luagu lǘrüwan wéiyaasu ariñageinaléi ligiaméme dimurei. 45 Ábayati lagiribudun le ñeinhin habéi lani disipulugu ani aba lariñagun houn: “Ariha huméi dan le ídanbei harumuga luma hemeraagua! Dan le nederegerúa lan, au le Liráü Wügüri, háhaburugun gafigountiña. 46 Sará humá, keimoun. Anitén le lunbei lalugurunina”. 47 Másugili layanuhan Hesusu, ligía lachülaagun Húdasi, le ábanbei hádangiñe duusu apostolugu, úara hama saragu gürigia ha barüinabaña eféin luma burí wewe háhaburugu. Hóunahan hábutigu fádirigu hama hábutigu huríu gürigia hagía.

48 Ru laali bugati le agarabaagubei luagun Hesusu seini le houn gürigia hagía: “Leme nachuurun hádangiñe, ligía, ragǘ huméi”. 49 Aba lidin Húdasi sügülügü luagun Hesusu ani aba lariñagun lun “Máisturu wei!” rúina ligía aban chuti luagu lubuyubu. 50 Aba lubeiti lálügüdüni Hesusu Húdasi: “Numada, ka gabügürübalibu ñahoun?”. Ábati houdin gürigia hagía árügüdei Hesusu ani aba hanügüni. 51 Ábati lárügüdünu aban hádangiñe ha lúmabaña Hesusu lefeinte ani aba ladürürüni larigei lumusun fádiri le íñutimaabei. 52 Ábati lariñagun Hesusu lun: “Areidabóun befeinte, ladüga sun ha áfarahatiña tau eféin, tauba giñe eféin hafarúa. 53 Saminatibu funagia siñá lan namuriahan luma Núguchi lun lóunahan saragu milu ánheligu lun hageindagun nuéigiñe? 54 Anhein hamugati nadüga lira, ida luba hamugagia lagunfulirun le tariñagubei Lererun Bungiu luagu ítara luba lan lasuseredun katei le?”. 55 Ouraméme ligía, aba lariñagun Hesusu houn gürigia: “Hiábiña san árügüdana tau eféin luma lau wewe kamá hamuga le aban híweruti au? Sagü meha weyu nañuurun arufudaha ténpulurugu ani márügüdün humutina. 56 Lau sun lira, susereti katei le ítara, lun lagunfulirun le meha habürüdübei profetagu”. Ábati hígiruni sun lani disipulugu lábugua ani aba hanurahan.

57 Hati árügüdübalin Hesusu, aba hanügüni lúbiñoun Kaifasi, fádiri le íñutimaabei, le ñein lubéi óundaraguñu liña lan hama arufudahatiña Lilurudun Moisesi luma hama hábutigu huríu. 58 Ñǘdünti Féduru hárigi hárigi mayarafadunga houn, darí lachülürün lidoun tibürürün* luban fádiri le íñutimaabei. Danti le beluhali, aba lañuurun úara hama ha nadagimeinbaña ñein lun larihini kaba lan asusereda.

59 Añahán bugati hábutigu fádirigu hama sun lílana liñun-agei lúrudu huríu áluaha kaba lan iyeeni ariñawagúa luagu Hesusu lun lébuname háfaragüdüni hilagubei. 60 Lídangiñe sun iyeeni le hariñagubei yéetiña ha achülaagubaña, madaritiña ni kata le uágubei gayara lan háfaragüdüni Hesusu hilagubei. Lagumuhóun, aba hachülaagun biama 61 ha ariñagubaña: “Ariñagati wügüri le: ‘Gayaraati nagünrinchagunu litenpulun Bungiu to ani ábayame nararamagüdünu lidan ǘrüwa weyu’”. 62 Ábati lararamun fádiri le íñutimaabei ani aba lálügüdüni: “Móunabuntibu san ni kata? Kaba bariñaga luagu le hariñagubei wügüriña ha buagu?”. 63 Aba lerederun Hesusu maniñu. Ligía lariñagunbei fádiri le íñutimaabei lun: “Fiñubei nun lidan liri Bungiu le wínwanbei anhein amürü lubéi Krístubei, le Liráü Bungiu!”. 64 Ábati lóunabuni Hesusu: “Anha, buguya guánarügü ariñagubalin. Ani ariñagatina hun lúmagiñe lan guentó lun lubaruaguóun harihubadina, au le Liráü Wügüri, ñun luéigiñe lóunwenren Bungiu le gabafubei ararireina siélugiñe lidan dúeri”. 65 Ábati laheiridagunu fádiri le íñutimaabei ladaüragun, ariñageina: “Anabagua laali wügüri le Bungiu! Memegeirúntiwa amu lun híchugun lidurun. Huguya guánarügü aganba humaali lanabaguni. 66 Ka hisaminanbei?”. Ábati hóunabuni: “Lunti lafarún hilagubei!”. 67 Ábati hásueraguni ligibu, rugua hagía agufudein luagu. Ha híbiri, aba hapatarahani, 68 ábatiha hariñagun lun: “Kei amürü lubéi Krístubei, ariñagabéi woun ka lan agayuahabei buagu”.

69 Anihán bugati Féduru ñun lidan tibürürün* luban fádiri le íñutimaabei, aba tariñagun aban nadagimeintu lun: “Buguya giñe aban hádangiñe eyeriñu ha buga éibugubaña luma Hesusu le galiléana!”. 70 Aba lariñagun tun hagibugiñe sun ha ñéinbaña: “Ibidiñeti nun ka lan uagu bayanuha”. 71 Dan le lídinbei luagun lebelaagüle bürürü,* aba tarihini amu nibureintu ani aba tariñagun houn ha ñéinbaña: “Lúmañein bugatia Hesusu le Nasarétüna eyeri le”. 72 Ábaya lariñagun Féduru áfiñureina: “Ibidiñeti wügüri le nun!”. 73 Murusun dan lárigiñe, aba hayarafadun ha ñéinbaña lun Féduru ani aba hariñagun lun: “Furanguti buguya lan aban hádangiñe; lugundun aban ligaburi bayanuhan hama”. 74 Ábati lagumeserun Féduru íñaragua luma áfiñura: “Ibidiñeti wügüri le nun!”. Ouraméme ligía, aba layuguruhan aban gayu. 75 Ábati laritaguni Féduru le buga ariñaga láalibei Hesusu lun: “Lubaragiñe layuguruhan gayu, ǘrüwaalime wéiyaasu bariñagun ibidiñe nan bun”. Ábati láfuridun ani aba láhügüchün ayahuaha.