Uganu buiti le labürüdübei Matéu
5 Dan le larihinbei Hesusu saragu gürigia, aba lamudeirun luagun aban wübü, danti le ñuruhali, aba hayarafadun lani disipulugu lun. 2 Ábati lagumeserun arufudaha houn, ariñageina:
3 “Gúndaatiña ha subudibalin luagu megei hamani ladundehan Bungiu lugundun hounti Arúeihani le siélubei.
4 ”Gúndaatiña ha hírubaña lugundun lichugúba gurasu houn.
5 ”Gúndaatiña gürigia ha ǘnabugubaña lugundun heresibirubei Ubóu keisi alagan.
6 ”Gúndaatiña ha wéiribei hayumahan lun ñein lan irichaü lugundun líchugubei Bungiu le hayumahabei houn.
7 ”Gúndaatiña ha gudemehabubaña lugundun houserúba lau gudemehabu.
8 ”Gúndaatiña ha harumabaña anigi lugundun harihibei Bungiu.
9 ”Gúndaatiña ha áfaagubaña lun ñein lan darangilaü hama amu lugundun lariñawagúba hawagu lirahüñü lan Bungiu.
10 ”Gúndaatiña ha éibaahoubaña ladüga hadügüni le buídubei lugundun hounti Arúeihani le siélubei.
11 ”Gúndaabadün danme le hanabunün luma hóuserunün gürigia wuriba ani ariñaga hagía sun luwuyeri iyeeni luma katei wuribati huagu ladüga nánigu humá. 12 Buin humá lau ugundani lugundun wéiribei afayeiruahaü le lunbei líchuguni Bungiu hun. Ítara liña meha giñe heibaahóun profetagu ha hubaabaña.
13 ”Huguya lisalunbei ubóu. Ánheinti leferidira salu lubasuan, gayaraayati san labasuadun? Meseriwínhali lun ni kata, lúnrügaali lagurún bóugudin lahuuda, lun hadügüraguni gürigia.
14 ”Huguya lilanpunbei ubóu. Siñati laramudún aban uburugu le ligibuagubei aban wübü. 15 Úati ébeduti aban lanpu ani aba láfamuchun aban faniñe ligibuagun, lubaragiñe lira, aba líchuguni luagu lebu lun larugoungadagüdün hau sun ha múnadabaña. 16 Ítarameme, adüga humá lun ladurangun hilanpun hagibugiñe gürigia lau harihini katei buiti le hadügübei. Ítarati, híchuguba uéiriguni lun Húguchi le siélubei.
17 ”Masaminara humá niábiña lan adüga lun mebegihali lan Lúrudu o le hariñagubei Profetagu. Uá, mama niábiña agidarei Lúrudu, niábiña agunfulirei. 18 Gayaraati lagumuchagun sielu luma Ubóu, mama lerederun dimurei le lídanbei Lúrudu magunfulirunga! 19 Ligíati, furumiñeguarügü le maganbaditi lun gumadi létima ñǘraübei lídangiñe Lúrudu, arufudaha ligía houn amu lun hadügüni ligiaméme, máhawabei lun lidan Arúeihani le siélubei. Ánheinti gürigia le gaganbaditi lun Lúrudu, arufudahaléi houn amu, wéiribei lanügǘn lidan Arúeihani le siélubei. 20 Ninarün hau anhein lan ua gaganbaditima humá hawéi fariséugu hama arufudahatiña Lilurudun Moisesi, mebelubadün lidoun Arúeihani le siélubei.
21 ”Aganbaadün ariñawagúa lan houn hagüchagu: ‘Máfarahaba, furumiñeguarügü le áfarahati laguseruba ligibugiñe lúrudu’. 22 Ánheinti au, ariñagatina hun furumiñeguarügü lan le asigiruti gáñiñu luma líbiri, laguseruba lan ligibugiñe lúrudu. Ani sun le anabuti líbiri, laguseruba lan ligibugiñe Liñun-agei Lúrudu. Ánheinti le ariñaguti lun gürigia líledi: ‘Ibidiougua tau buguya le!’ láluahaña lun lachüürǘn lidoun Heena.*
23 ”Ligía lubeiti, ánhabu aritagua luagu gadurun ban lun bíbiri dan le abungurán lan lau badagaragüdün luagun latarü,* 24 ígirabei bidewese ñein ligibugiñe latarü, ábameti bidin aransehei biturobulin luma bíbiri. Lárigiñe, ábame bagiribudun lun bíchuguni badagaragüdün.
25 ”Ánhabu lanüga bágani agusera, houchabá baransehani biturobulin luma lau lóufudagun lidan héibuguniwagu, lubaragiñe hachülürün ligibugiñoun lúrudu, lueime lederegerunibu bágani lun aguseragüdüti, lederegerabume aguseragüdüti lun túniri furisun ani ábame badaürǘn. 26 Ninarün bau luagu máfuridunbadibu lan ñéingiñe darime bafayeiruni íbini lagumuhóun gáwanaü.
27 ”Aganbaadün ariñawagúa lan: ‘Magabarahabá’.* 28 Ánheinti au, ariñagatina hun furumiñeguarügü lan le erederuti aríagua aban würi darí lun lawamadirunu, agabarahaali tuma tidan lanigi. 29 Ligíati, anhein ladügüña lubéi bagu le bóunwenren lun bafigouhan, sagabei buáriua ani fuibei dise. Hímeiwatimaati lun leferidirun aban lídangiñe lumegegun búgubu sügǘ lau bachüürǘn dayarügü lidoun Heena.* 30 Ítarameme, anhein ladügüña lubéi búhabu le bóunwenren lun bafigouhan, dürübei buáriua ani fuibei dise. Hímeiwatimaati lun leferidirun aban lídangiñe lumegegun búgubu sügǘ lau bachüürǘn dayarügü lidoun Heena.*
31 ”Ariñawagúati giñe: ‘Furumiñeguarügü le ígiraguti tuma lúmari, rula aban gárada lánina ígiraguni tun’. 32 Ánheinti au, ariñagatina hun furumiñeguarügü lan le ígiraguti tuma lúmari —anhein mama lubéi ladüga adügaaru lan magíaguni—* ladügüña lun gayara lan tagabarahan, ani lagabarahaña giñe furumiñeguarügü le amarieiduti tuma aban würi ígiraguaaru.
33 ”Aganbaadün giñe ariñawagúa lan houn hagüchagu: ‘Mariñagabá badügüba lan aban katei ani lárigiñe madügün bumuti; adügabéi le bariñagubei lun Heowá* badügübei lan’. 34 Ánheinti au, ariñagatina hun: máfiñura humá luagu ni kata. Ni luagu sielu, ladüga ñeinñein lan lálana larúeihan Bungiu; 35 ni luagu Ubóu, ladüga ligía lan lébubei lugudi; ni luagu Herusalén, ladüga ligía lan luburugutebei Urúei le wéirigubei. 36 Máfiñuraba giñe ni luagu bábulugu, lugundun siñati badügün lun láharudun o láwuridun nírügü aban lídangiñe lugule bídiburi. 37 Anhaün ariñaga hadügüba lan aban katei, adüga huméi, anhaün ariñaga madügün hubéi lan, madüga huméi. Lugundun anhein madügün humá ítara, háyeihañein Mafia.
38 ”Aganbaadün ariñawagúa lan: ‘Le abuleseiruti lagu amu, buleseiwalá giñe lagu, le áhalachuti lari amu, halaguawalá giñe lari’. 39 Ánheinti au, ariñagatina hun: magagibudaguabá luma gürigia wuribati. Lubaragiñe lira, anhein lapataara aban gürigia louba bigibu le bóunwenren, rubei giñe le aban louba bigibu lun. 40 Ani ánhabu lanüga aban gürigia ligibugiñoun lúrudu lun lagidarunu bisimisin buéi, deregebóun giñe to badaürüboun tábugiñe lun. 41 Ani ánhabu lafosura aban gumadimati lun bagunfulirun lau aban dasi luagu aban maili,* adügabéi luagu bián maili. 42 Le amuriahati somu katei buma, rubei lun. Ani míchigaba mabahüdǘni lun gürigia le amuriahati furedeiti buma.*
43 ”Aganbaadün ariñawagúa lan: ‘Hínsiñela bíbiri bun, liyereegudáme bágani bun’. 44 Ánheinti au, ariñagatina hun lunti lan hínsiñe hamá háganiñu hun ani furíei humá hawagu ha éibaahabalün. 45 Ítara luba harufuduni lirahüñü humá Húguchi le siélubei, le adügübei lun láfuachun Weyu dandu houn buítiña kei houn wuribatiña, adüga ligía lun láhuyun huya dandu hawagun ha adügübaña katei buiti kei hawagun ha adügübaña katei wuribati. 46 Anhein hawagurügüñein lubéi ha hínsiñehabubaña hun hasandira ínsiñeni, kagia afayeiruahaü hadünabei luagu lira? Ma funagia adüga hamuti aguburahatiña liseinsuna gumadi ligiaméme? 47 Ánheinti hóunrügüñein lubéi híbirigu habusura, adügati funagia lira lun buídutima humá hawéi ha híbiri gürigia? Ma funagia ligía hadügübei lílana amu burí néchani? 48 Lunti hínsiñehabu humá le gumuti kei hínsiñehabu lan Húguchi le siélubei.