ÁLÜGÜDAHANI 5

Ka lunbei nadügüni anhein añawarihóua nun leskuelarugu?

KA UAGU SÚDINI LUBÉI?

Lídehaba ligaburi bóuserun lun lagumuchun turobuli o lun laganwoundun.

KABA HAMUGA BADÜGA?

Saminabá luagun sügǘ le: mabusenrunti Thomas lidin leskuela uguñe. Ni haruga. Ani mabusenrundigiaali lidin. Ǘrüwa hati guentó lúmagiñe hagumeserun lupaanágu abahüdagua marasualugu luagu. Lárigiñe, aba hagumeserun áchaha liri. Anihein dan, ábaha lafamurun aban hádangiñe labuguchuña lan luagu lúnrügü lachagarunu liliburun múarugun. Ani anihein dan ládaruni aban hádangiñe lanagangiñe, danti le ladigiragun, aba hafamurun súngubei kamá hamuga ibidiñeti houn. Wurinougatima lagadeira katei: siádiwati Thomas luéigiñe Internet...

Lun hamuga buguya lan Thomas, kaba hamuga badüga?

RÁRAMABA ASAMINARA

Aniheingua emenigini. Gayaraati bageindagun buéigiñegua magayuahanga. Ida?

MAFALARAGUABÁ BUNGUA HAMA. Ariñagatu Bíbülia: “Ha ibidiouguabaña aau, falaguatiña houngua luma hagañi; ánhañati ha chúbaña aau, gáluma hamuti” (Ariñawagúni 29:11). Ánhabu ibiha lun darangilu lan baríawagun, íbini báhabuhaña lan múnadagiñe bibiti, másiñati labuchaduba lan hawagu ha añawarihabaña bun, ábameti hígirunibu bungua.
MAFAYEIRABÁ WURIBANI LUAGU WURIBANI. Ariñagatu Bíbülia: “Mafayeira humá wuribani luagu wuribani lun ni aban” (Rómana 12:17). Ánhabu afayeira wuribani luagu wuribani gánwounguagüdarügü bubéi turobuli.
ANURAHABÁ LUÉI TUROBULI. Ariñagatu Bíbülia: “Ha buídubaña ichügü harihini denchaü hegeyedun luéi” (Ariñawagúni 22:3). Ságüme gayara lan, anurahabá hawéi ha íchugubaña lidere dan bun luma lídangiñe furumiñeguarügü sügǘ denchati.
WÉIRIGÜDABOUN HANIGI LAU BÓUNABAGÜLE. Ariñagatu Bíbülia: “Óunabagülei le buiti, gáluma lumuti igañi” (Ariñawagúni 15:1). Gayaraati íbini bariñagun somu katei le halületi houn. Kéiburi anhein ariñaga somu gürigia bun weiri lan bidibunen, gayaraati biñuruni bege ariñageina lun: “Binarüntia, buídubei hamuga lun nararirun fiuraü líburu”.
MEREDERABÁ ÑEIN. Ariñagatu Nora, to gúnfuliharuboun 19 irumu: “Ánhabu ñüdün ñéingiñe mariñagunga ni kata houn, barufudubei aban lan gürigia saminati, derebuguti ani ragüguati lungua buguya, magaburi hamuti gürigia ha edemahabaña houn amu igaburi burí le” (2 Timotéu 2:24).
HÉREGÜDABEI BAFIÑEN BUOUGUA. Rútiña ha ganigibaña hañawarihan houn amu fe ka lan gürigia lóuguabei lafiñerun luougua ani anhein lígiraguagüdüba lubéi lungua houn. Gama lumoun, habakürüba saragu hádangiñe hárigoun anhein hariha mígiraguagüdün ban bungua.
ABAHÜDAGUABÉI LUN SOMU GÜRIGIA. Ariñagatu aban binadu máistura: “Ariñagatina houn sun ha únbaña hañawariha amu lun habuyaaruniña. Ligía lunbei ladügǘniwa, lídehaba lira lun mañawarihóuniwa lan houn amu”.

Aban nibureinti le afiñeti luougua agagibudagua luma le añawarihabei lun — Ladügüba bafiñerun buougua lun basandirun aban erei le lásiñarubei le añawarihabei bun asandira.

SUBUDITI SAN BUN?

Mámarügüñein lau agayuahani ladügǘwa bullying o lañawarihóua houn amu, adügǘwati giñe lau:

Anabúni. “Mabulieidun nubéi ida liña lan meha hanabunina luma sun le hadügübei nun. Adügatiña meha lun nasandiragun nungua kei aban hagübüri mutu to meseriwíntu lun ni kata. Manarimebei hamuga ligari nun lun hamuga meha agayuaharügütiña nigibuagun” (Celine, 20 irumu tau).
Máhawa lan lun gürigia. “Aba hagumeserun nupanaagu amahada lun nóundarun hama. Ánhana meha ayarafada luagun dábula le ñein habéi lun neigin úara hama, aba meha hadügün lun gunfuranda nan ua lan ubaraü nun ñein, lau sun meha anihein lan. Sun irumu nau ayahuaha luma eiga nábugua” (Haley, 18 irumu tau).
Lañawarihóuniwa tídangiñe Internet. “Kamá hamuga iyeeni, gama lumoun, gayaraati lawiyedúniwa liri aban gürigia —o íbini lagadeirúniwa libagari— láurügü labürüdǘniwa fiuraü dimurei tidan konputadora” (Daniel, 14 irumu lau).

**AKUTIHABÉI BISUBUDIN**
INARÜNI ODI IYEENI?	ÓUNABAGÜLEI
1 Añaheingubeiñanu añawarihatiña houn amu lúmagiñe binadu dan.	1 Inarüni. Abahüdaguatu Bíbülia hawagu hígandei ha meha subudiwabaña kei néfilim lidan iñeñein Ebüréu, mini lan iri le, “ábürügüdütiña” o “ha ábürügüdübaliña amu” (Agumesehani 6:4).
2 Madügünti bullying wuribati ni ka un. Úati dencha lan.	2 Iyeeni. Gíbeeña nibureintiña áfaragutiña houngua hilagubei ladüga hasufurirun bullying.
3 Bagayuahan luagu le añawarihabei bun láranibei turobuli le.	3 Iyeeni. Liibe-agei dan, héretimatiña ha añawarihabaña sügǘ hau ha únbaña hañawariha; moun lumuti bárügüdagun hama.
4 Buídutimabei berederun maniñu ánhabu ariha lañawarihóuña lan houn amu.	4 Iyeeni. Ánhabu eredera maniñu, luéigiñeñadibu lóubadina le añawarihabei. Bíchuguñame lanwoun turobuli lubaragiñe bídehan lun laranserun.
5 Liibe-agei dan, arufudaguatiña ha añawarihabaña houn amu houngua kei gürigia ganigitiña lun haramuduni machouruni le hasandirubei hawougua.	5 Inarüni. Lau sun samina hamá hiibe-agei gürigia ha héchubaña hañawarihan houn amu súdinitima hamá, gíbetiña hádangiñe machouruntiña hawougua ani mégeitiña hadügüraguniña amu lun hasandiragun houngua buidu.
6 Gayaraati hasansirun ha ganigibaña hañawarihan houn amu.	6 Inarüni. Lau hídehan amu, gayaraati hasansiruni gürigia ha ligaburi hóuserun luma hasaminan.