ARUFUDAHANI 58
Úaragua humá lun Heowá súnwandan
Wagía kristiánugu inarünitiña, anúadiraadiwa lun mígirun wamá lun ñein lan somu katei o somu gürigia adügüti lun máhuduragun wamá lun Heowá. Chouru wamuti luagu ítara liña lan hasandiragun hungua, ani lun Heowá, gebegiti úaraguni le harufudubei (aliiha huméi 1 Krónikasi 28:9). Ka burí sügǘ gayaraabei ladügün lun hénrengu lan hun lun úaragua humá lun Heowá, ani ka gayaraabei líderagunün?
1. Ka burí katei gayaraabei hadügüni amu lun hénrengu lan woun lun warufudun úaraguni lun Heowá?
Ñéinbaña gürigia áfaagutiña lun hadügün lun wígiruni weseriwidun lun Heowá. Ka gayaraabei ladügün aban katei ítarati? Añahein gürigia ígira hamaali inarüni ani guentó hayanuhaña iyeeni tuagu lóundarun Bungiu lun hagumuchun lau wafiñen. Añahein giñe tábutigu relihión ha aburuchaguagüdübaña iyeeni wawagu, ani ha úabei duari hamá, aba hadisedun luéi inarüni ladüga burí iyeeni ligía. Mabuidunti lasigenehóun hama háganiñu lumutuniña Bungiu, taliihóun haliburun, larihín bidéu le híchugubei o le habürühabei lidan Internet. Dan le layanuhanbei Hesusu hawagu ha álugubaña hadügün lun múaragun wamá lun Heowá, ariñagati: “Ígira humaña; marihintiña ha adundehatiña marihintiña háledi hagía. Ani anhein adundeha aban marihinti aban marihinti líledi, héiguaduba biángubei hagía lidoun aban huyu” (Matéu 15:14).
2. Ka katei lídangiñe le wanúadirubei gayaraabei ladügün lun hénrengu lan woun warufudun úaraguni lun Heowá?
Kei hínsiñe lan Heowá woun, mabusenrúntiwa lun gadan lániwa ni kata le tánina relihión mama inarünitu. Ligíati, ni wawadigimari ni óundaruni to ñein wabéi ni ni kata lídangiñe le wadügübei, moun lumuti gani lan tuma relihión mama inarünitu. Wéridi lumutiña Heowá lumutuniña: “Furí humá Babilóniagiñe”, o lidan amu dimurei, tídangiñe Babilónia to wéiriboun (Arufudúni 18:2, 4).
SIGÍ HUMÁ AFURENDEIRA
Ariha huméi ka lan gayaraabei hadügüni lun mígirun humá lun ñein lan somu katei adügüti lun múaragun humá lun Heowá. Ariha huméi giñe warufuduña lan úaraguni lun Heowá dan le wakipuragun woungua dise tuéi Babilónia to wéiriboun.
3. Góunigigua humá hungua hawéi ha arufudahabaña iyeeni
Ka lunbei wadügüni ánhawa aganba iyeeni tuagu lóundarun Heowá? Aliiha huméi Ariñawagúni 14:15, ábameti hayanuhan luagu álügüdahani le:
Ka uagu lunti lubéi duari wamá ani mafiñerun wameime sun le waganbubei?
Aliiha huméi 2 Huan 9-11, ábameti hayanuhan luagu álügüdahani burí le:
Ida luba wóuseruniña gürigia ha agarabaagubaña houngua luagun Heowá?
Lau sun mayanuhan wamá hama gürigia ha, ida luba hamuga gabafu lan ligaburi hasaminan wawagu?
Ida luba hamuga lasandiragun Heowá lungua ánhawa íchiga arigei lun katei wuribati le ariñawagúbei luagu o tuagu lóundarun?
4. Úaragua humá lun Bungiu dan le lafigouhan aban íbiri
Ánhawa íchiga fe adügaali lan aban lílana damuriguaü aban figóu le wéiriti, ka lunbei wadügüni? Ariha humá aban adundehani lídangiñe Lúrudu le meha líchugubei Bungiu houn binadu ísüraelina. Aliiha huméi Fádirigu 5:1.
Kei larufuduni bérusu le, ánhawa íchiga fe adügaali lan aban gürigia aban figóu le wéiriti, lunti wabahüdaguni houn wéiyaaña lidan afiñeni. Ani lubaragiñe wadügüni lira, lunti wínchahani gürigia le afigouhaalibei lun layanuhan hama wéiyaaña lidan afiñeni lun lagufeseruni le ladügübei. Anhein madügün lan, línchahabadiwa úaraguni lun Heowá lun wayanuhan hama wéiyaaña lidan afiñeni. Anhein wadüga ítara, ka uagu warufuduña lubéi ínsiñeni luma úaraguni...
... lun Heowá?
... lun gürigia le afigouhaalibei?
... houn lílana damuriguaü?
Anhein dáguaali lubéi aban íbiri lungua lidoun turobuli, íderagua huméi!
5. Kípugua humá hungua dise tuéi Babilónia to wéiriboun
Aliiha huméi Lúkasi 4:8 luma Arufudúni 18:4, 5, ábameti hóunabuni álügüdahani burí le:
Anihagua san niri bürüwañu tidan somu relihión to mama inarünitu?
Tílana san somu óundaruni nuguya to gánitu tuma relihión mama inarünitu?
Ídehati san nuadigimari tuma somu relihión mama inarünitu?
Mosu san nafanreinragun tuéi relihión mama inarünitu lidan somu igaburi?
Anhein “anha” lubéi hóunabubei lun aban lídangiñe álügüdahani le, ka asansiruni lunbei hadügüni?
Lidan furumiñeguarügü kesi, anúadira huméi katei le ígirubalin hisaminan darangilu ani arufuda huguyame úaraguni lun Heowá.
Kaba hamuga hadüga anhein amuriahóua huma lun hídehan tuma somu óundaruni to gánitu tuma relihión mama inarünitu?
LE HARIÑAGUBEI FIU GÜRIGIA: “Lun gayara lan nageindagun luagu inarüni hama gürigia ha agarabaagubaña houngua luagun Heowá, mégeitina nasubudiruni ka lan hariñagubei hawagu Gefentiña”.
Warufuduña san lichú aau anhein wadüga katei le? Ka uagu?
LE HAFURENDEIRUBEI
Anhein busén wabéi úaragua wamá lun Heowá, moun lumuti wóundaragun hama ha álugubaña lun heferidiraguagüdüniwa.
Águyuguagüdüni
Ka uagu moun lumuti lubéi waganbahani le hariñagubei gürigia ha garabaguaañabaña houngua luagun Bungiu?
Ka lunbei wadügüni ánhawa íchiga fe adügaali lan aban íbiri somu figóu wéiriti?
Ka lunbei wadügüni lun gaganbadi wamá lun eweridihani luáguti lunti lan wafanreinragun tuéi relihión mama inarünitu?
FURENDEI HUMÁ LANWOUN
Furendei huméi ka lan lunbei hadügüni danme le haganbun iyeeni hawagu gefentiña luagu Heowá.
“Anihein san sun ariñahani wama?” (Garüdia Awisahatu, widü-hati, irumu 2018)
Ida luba hasubudiruni anhein ídeha tubéi aban óundaruni tuma Babilónia to wéiriboun?
Ka hadügübei fiu láganiñu inarüni lun hadebelidagüdüni wafiñen?
Lidan abahüdaguni luáguti ibagari le gíribei “Había buscado a Dios desde niño”, aliiha huméi ida liña lan lígirunu aban fádiri relihión mama inarünitu.
“La Biblia les cambió la vida” (La Atalaya, to lánina 1 lidan sedü-hati, irumu 2011)