Ka tariñagubei Bíbülia hawagu ánheligu?

Busenti Heowá lun wasubudiruniña liduheñu ha siélubaña. Hadan iduheñu ha, añahein ánheligu, ha giñe subudiwabaña kei “lirahüñü Bungiu” (Agumesehani 6:4; Hobu 38:7). Ka tarufudahabei Bíbülia hawagu ánheligu? Ida liña hayusuruni habafu hawagu gürigia? Liduheñu san Bungiu sun ánheligu?

1. Kátaña san ánheligubaña?

Lubaragiñe meha ladügüni Heowá Ubóu, adüga lumutiña ánheligu. Sífirigu marihúaditiña hagía kei ligía ani sielu hawinwanda (Ebüréu 1:14). Añahein saragu míñunu ánheligu ani ámuñegueinarügütiña hawariuagua (Arufudúni 5:11). Gúnfuli hamuti lererun Heowá ani aranseñu haña “lun hidin lau le lubeibei” (Sálumu 103:20). Lidan binadu dan, óunahati meha Heowá ánheligu asubudiragüdei luganute, íderaguaña lumutuniña luma esefuraña. Uguñe weyu, adundeha hamutiña ánheligu kristiánugu lun hadariruniña gürigia ha busenbaña hasubudiruni Bungiu.

2. Katei san Satanásibei hama lumafianu?

Añahein meha ánheligu agarabaagutiña luagun Heowá. Ánheli “le gíribei Mafia, o Satanási, le eyeehabalin sun ubóu”, ligía furumiñetibei agarabaaguti luagun Bungiu (Arufudúni 12:9). Busenti meha Satanási gabafu lan hawagu amu, ligía leyeedunbaliña furumiñetiña gürigia lun hóundarun lumoun lidan lebedaagun. Dan lárigiñe, adügati giñe lun hóundarun amu ánheligu lumoun. Máfianu liña laguarúniwa houn ánheligu ha ebedaagubaña. Aba labugaguniña Heowá siélugiñe lun ubouagun ani málühali agumucha hau (aliiha huméi Arufudúni 12:9, 12).

3. Ida liña louchun Satanási hama máfianu lun heyeeduniwa?

Yeeda laaña Satanási hama lumafianu saragu gürigia lau burí katei le aubei hádaragua gürigia houngua hamoun. Kéiburi gürigia ha aliihabaña oroskopo, ha áluahabaña buyei, garíaahatiña, burú, egesihatiña o agaranihatiña. Añahein amu, áluahatiña árani le gániti hama máfianu. Añahein giñe gürigia, yéedawaaña lun hasaminarun gayara lan hayanuhan hama hilaaña. Wéridi lumutiwa Heowá: “Midin humá álügüdaha hama garíaahatiña” (Fádirigu 19:31). Busenti Heowá lóunigiruniwa luéi Satanási hama lumafianu ladüga láganiñu lan hagía ani busentiña hadügün wuribani woun.

SIGÍ HUMÁ AFURENDEIRA

4. Íderagua hamutiña ánheligu gürigia lun hasubudiruni Heowá

Mapurichihantiña ánheligu houn gürigia, adundeharügü hamutiña lumutuniña Bungiu lun hadariruniña gürigia ha busenbaña hasubudiruni. Aliiha huméi Arufudúni 14:6, 7, ábameti hayanuhan luagu álügüdahani burí le:

• Ka uagu megei wabaliña ánheligu lun híderaguniwa lidan apurichihani?

• Ma gúndaagüda lumutün hasubudiruni gayara lan hadundehanün ánheligu hamoun gürigia ha busenbaña hasubudiruni uganu le tídanbei Bíbülia? Ka uagu?

5. Mánhara humá lun furumiñeguarügü échuni le gánibei hama máfianu

Láganiñu Heowá Satanási hama lumafianu. Ani wáganiñu giñe. Aliiha huméi Lúkasi 9:38-42, ábameti hayanuhan luagu álügüdahani le:

• Ka hadügübei máfianu houn gürigia?

Mabusenrúntiwa wádaragun woungua hamoun máfianu. Aliiha huméi 2 Lúrudu 18:10-12, ábameti hayanuhan luagu álügüdahani burí le:

• Ka burí katei hayusurubei máfianu lun houchun gabafu hamá wawagu luma lun hayanuhan wama? Ka burí katei hámagiñeti máfianu kamanibei lidan fulasu le ñein lubéi hawinwanda?

• Buiti funa san leweridiruniwa Heowá luéi wádaragun woungua lidoun échuni le hámagiñeti máfianu? Ka uagu?

Ariha huméi BIDÉU, ábameti hayanuhan luagu álügüdahani burí le:

BIDÉU: “Gagibugua humá luma Mafia” (5:02)

• Afiñetün san peliguru lan lúyawa uraü le tuágubei tisaani Palesa? Ka uagu?

• Ka tadügübei Palesa lun tóunigiragun tungua hawéi máfianu?

Súnwandan maha hamá kristiánugu inarünitiña lun gadan lániña katei le hámagiñeti máfianu. Ariñagatu Bíbülia: “Siñati heigin luagu ‘lidabulan Heowá’ ǘnhame eiga luagu hadabulan máfianu” (1 Korintuna 10:21, TNM). Aliiha huméi Adügaü 19:19, ábameti hayanuhan luagu álügüdahani le:

• Ka uagu lunti lubéi hagumuchun lau furumiñeguarügü humegen le gániti hama máfianu?

6. Gañei huméi wuribu luma Satanási hama lumafianu

Satanási agumadirubaliña máfianu. Ánhañati ánheligu ha úaraguabaña, adundeha lumutiña arükánheli Migeli, amu iri le aubei lasubudirúa Hesusu. Wéiriti san lubafu Migeli? Aliiha huméi Arufudúni 12:7-9, ábameti hayanuhan luagu álügüdahani burí le:

• Kátaña gabafutimabaña? Migeli hama lani ánheligu o Satanási hama lumafianu?

• Lunti san hanufudedun lánigu Kristu luéi Satanási hama lumafianu?

Gayaraati hagañeiruni wuribu luma Satanási hama lumafianu. Aliiha huméi Santiagu 4:7, ábameti hayanuhan luagu álügüdahani le:

• Ida luba hóunigiragun hungua luéi Satanási hama máfianu?

LE HAFURENDEIRUBEI

Íderagua hamutiwa ánheligu ha úaraguabaña. Láganigu Heowá Satanási hama lumafianu, ha burí ayusurubaña ámuñegueinarügü katei lun heyeeduniña gürigia.

Águyuguagüdüni

• Ka hadügübei ánheligu ha úaraguabaña lun híderaguniña gürigia asubudirei Heowá?

• Katei san Satanásibei hama lumafianu?

• Ka uagu mabusenrun hubéi lun gadan lanün katei le hámagiñeti máfianu?

FURENDEI HUMÁ LANWOUN

Ariha huméi ka lan uagu Hesusu lubéi arükánhelibei Migeli.

“Katei san arükánhelibei Migeli?” (Ariñahani lídangiñeti jw.org)

Aliiha huméi ka lan arufudubalin mama lan wuribani le wádanbei Máfiabei.

“Inarüni san anihein lan Mafia?” (Ariñahani lídangiñeti jw.org)

Ariha huméi ida liña lan tesefurun aban würi lídangiñe habafu máfianu.

“Halló propósito en la vida” (La Atalaya, to lánina 1 lidan sedü-hati, irumu 1993)

Furendei huméi ida liña lan layusuruni Satanási katei le hámagiñeti máfianu lun leyeeduniña gürigia.

“La verdad acerca de la magia, la hechicería y la brujería” (¿Ha encontrado usted el camino a la vida eterna?, fánreinti 5)