Lau sun barǘ lan taturiahóun Bíbülia saragu buiti, anihein dan hénrengu lan. Ñeinbei dan hálügüdagun hungua anhein gayaraabei lubéi hasigirun aturiahoun. Ka uagu buidu lubéi lun hasigirun aturiaha íbini dan le hénrengu lan? Kaba íderaguaün lun hasigirun íbini laganagua turobuli?

1. Ka uagu gebegi lubéi taturiahóun Bíbülia?

“Wínwantu Lererun Bungiu ani gabafu tuguya” (Ebüréu 4:​12). Gebegitu Bíbülia ladüga ariñaga tani le lasaminarubei luma le lasandirubei Bungiu huagu. Tíderagubadün lun laganwoundun hisubudin, lun hanúadirun lau lichú aau luma lun hemenigi humá lubá ámuñegü. Ani le súdinitimabei, tíderagubadün lun lumada humá Heowá. Dan le haturiahanu, hígiruña lun ladügün tubafu lun buídutima lan hibagari.

2. Ka uagu súdini lubéi lun mabulieidun humani weiri lan lebegi inarüni le tídanbei Bíbülia?

Wéiriti lebegi inarüni le tídanbei Bíbülia. Tuguya guánarügü agunbirahabaliwa: “Agañeihabei inarüni [...] ani malugurabéi” (Ariñawagúni 23:​23). Anhein mabulieidun wamá weiri lan lebegi inarüni le tídanbei Bíbülia, wáfaaguba lun wasigirun aturiaha íbini wadunragun luma turobuli (aliiha huméi Ariñawagúni 2:​4, 5).

3. Ida luba líderagunün Heowá lun hasigirun aturiaha?

Kei humada lan Heowá, Bungiu suntigabafu le adügübaliwa, busenti líderagunün lúntima hasubudiruni. “Bungiu íchugubalin lubuidun aritaguni hun [...] íderagualaün lun hadügün kei labusenruni” (aliiha huméi Filipuna 2:​13). Ligíati, danme le henren lan hun aturiaha o hawinwanduni le hafurendeirubei, líderagubadün. Líchuguba erei hun danme le hemegeiruni lun hiñuragun lídangiñe somu turobuli o dan le híchuguña lan amu lidere dan hun. Amuriaha humá luma Heowá lun líderagunün lun mígirun humani haturiahan (1 Tesalónikana 5:​17).

SIGÍ HUMÁ AFURENDEIRA

4. Sudinilá taturiahóun Bíbülia hun

Anihein dan gibe lan waberesegun darí lun wasaminarun madaani wamá lun waturiahanu Bíbülia. Ka gayaraabei wadügüni? Aliiha huméi Filipuna 1:​10, ábameti hayanuhan luagu álügüdahani burí le:

• Ka burí “katei [...] buídubei” o súdinitimabei lidan hibagari?

• Ida luba híchuguni haturiahanu Bíbülia lidan furumiñeti lúgaaru?

1. Anhaün áluga híchugun dübü lidoun aban búngidu le buíngüda humaali lau sagoun, mabaraalime dübü.

2. Ánheinti híchiga dübü furumiñe, gabarabei sun sagoun le lunbei híchuguni lanwoun. Ítarameme, anhaün etenira lun le súdinitimabei, gayaraabei hagunfulirun lau ani gadaanibadün lun amu katei.

Megei wamuti lídehan Bungiu ani dan le waturiahanu Bíbülia, ibiha wamuti le wemegeirubei: wasubudiruni Bungiu luma wáhuduragun lun. Aliiha huméi Matéu 5:3, ábameti hayanuhan luagu álügüdahani le:

• Ka buiti wasagarubei dan le wíchuguni taturiahóun Bíbülia furumiñe?

5. Sigí humá aturiaha íbini hálugun amu heredehanün

BIDÉU: Ibihati afayeiruahaü ladüga sigí lan lubaruaguóun (5:​22)

• Ida liña hóunabun liduheñu hama lumadagu Francesco dan le layanuhanbei houn luagu le lafurendeirubei?

• Ka afayeiruahaü libihubei ladüga lasigirun lubaruaguóun?

Aliiha huméi 2 Timotéu 2:​24, 25, ábameti hayanuhan luagu álügüdahani burí le:

• Ka hasaminarubei hiduheñu hama humadagu luagu le hafurendeirubei?

• Según bérusu le, ka lunbei hadügüni dan le magundan lan somu gürigia lau haturiahanu Bíbülia? Ka uagu?

6. Afiñe humá líderagubadün lan Heowá

BIDÉU: Íderagua lumutiwa Heowá adüga asansiruni (3:​56)

• Según le warihibei lidan bidéu, ka asansiruni ladügübei Jim lun lagundaaragüdüni Heowá?

• Ka aweiridagüdübarun hanigi lídangiñe le asuseredubei lun?

Aliiha huméi Ebüréu 11:6, ábameti hayanuhan luagu álügüdahani burí le:

• Kaba ladüga Heowá hawagu ha áfaagubaña lun hasubudiruni luma lun hagundaaragüdüni?

• Ida liña funa san lasandiragun Heowá lungua lau larihini áfaaguni le hadügübei lun haturiahanu Bíbülia?

LE HAFURENDEIRUBEI

Íbini ñeinbei lan dan hénrengu lan hun haturiahanu Bíbülia, líderagubadün haturiahanu lun hibihin ibagari magumuchaditi. Anhaün asigira afiñera luagu Heowá, líchuguba hafayeiruaha.

Águyuguagüdüni

• Ka uagu gebegi lubéi inarüni le tídanbei Bíbülia hun?

• Ka lunbei hadügüni lárigiñe hasubudiruni ka lan katei súdinitimabei?

• Ka uagu lunti lubéi hamuriahan luma Heowá lun líderagunün lun hasigirun aturiahoun Bíbülia?

FURENDEI HUMÁ LANWOUN

Ariha humá gádürü katei le íderagubaliña saragu gürigia lun hayusuruni hadaani buidu.

“Cómo invertir sabiamente el tiempo” (¡Despertad!, to lánina bián-hati, irumu 2014)

Ariha huméi ida liña lan líderagun Heowá aban würi dan le ua lubéi gunfuranda lani tani weiriei sun áfaaguni le tadügübei lun tagundaaragüdüni Bungiu.

Ruti Heowá erei woun lun wawandun lénrengunga (5:​05)

Ariha huméi buiti le libihubei aban wügüri lídangiñe tawandun lani weiriou.

Aba meha naguseragüdüni inarüni (6:​30)

Anihein dan hiridahóun gefentiña luagu Heowá luagu fánreinguagüda hamaniña iduheñu. Inarüni san lira?

“Fánreinguagüda hamutiña san gefentiña luagu Heowá iduheñu o óundaraguagüdarügü hamutiña?” (Ariñahani lídangiñeti jw.org)

Mosu hanúadiruni sun gürigia kaba lan hadüga. Saragu lídangiñe katei le wanúadirubei wadügün, gayaraati lanügün buiti o wuribati dandu woun kei lun wamadagua luma Heowá. Kéiburi dan le mosu lan wanúadiruni halíaba lan wawinwanda, ida luba lan wanuriagun woungua, anhein wamarieiduba lubéi o mamarieidunbadiwa lan. Ánhawa anúadira buidu, gúndaabadiwa ani wagundaaragüdübei giñe Heowá.

1. Ida luba tíderagunün Bíbülia anúadira buidu?

Lubaragiñe hanúadirun somu katei, amuriaha humá luma Heowá lun líderagunün ani houcha humá lun hadariruni tidan Bíbülia ka lan lisaminanbei luagu katei ligía (aliiha huméi Ariñawagúni 2:3-6). Anihein dan furangu lan gumadi le líchugubei Heowá. Anhein ítara liña lubéi, buítimati gaganbadi humá lun.

Ánheinti ua lubéi aban gumadi furanguti tidan Bíbülia luáguti kaba lan wadüga? Súnwandan ladundehabadiwa lan Heowá “luéigiñe üma le lunbei” wafalaruni (Isaíasi 48:17). Ida? Líderagubadün lau adundehani le tídanbei Lererun. Adundehani le tídanbei Bíbülia, ligía inarüni méiniti le íderagubaliwa gunfurandei ka lan lasandirubei luma le lasaminarubei Heowá. Dan le waliihan somu abahüdaguni tídangiñeti Bíbülia, anihein dan wasubudiruni ka lan lisaminanbei Heowá luagu aban katei. Dan le gunfuranda wamani ka lan lasaminarubei Heowá, gayaraati úara lan le wanúadirubei luma le hínsiñebei lun.

2. Ka lunbei gabaroun humani lubaragiñe hadügün somu katei?

Ariñagatu Bíbülia: “Ha buídubaña ichügü, ariha hamuti buidu halía lan héibuga” (Ariñawagúni 14:15). Mini lan le, lubaragiñe lan wadügün aban katei, mosu lan wararamagun asaminara furumiñe luagu ámuñegueinarügü katei le gayaraabei wadügüni. Sunme hasaminaruña lan luagu kada aban lídangiñe katei ligía, álügüdagua humá hungua: “Ka adundehani tíchugubei Bíbülia luagu katei le? Kaba lídangiñe íchiga darangilaü nun? Ida luba hasandiragun amu houngua lau le nanúadirubei? Ani lóugiñe sun katei, ladügüba san lun lagundaarun Heowá?” (2 Lúrudu 32:29).

Garichati Heowá lun lariñaguni woun ka lan katei buídubei lumoun ka lan wuribabei. Dan le subudi wamani lilurudun Bungiu buidu luma adundehani le tídanbei Bíbülia ani aranseñu waña lun gaganbadi wamá lun, buídutimati lawadigimaridun waritagun o wasaminan. Wasaminan o waritagun ariñagubalin woun anhein buidu lubéi aban katei o wuriba lan (Rómana 2:14, 15). Aban saminaü le héchuhali afalarei le lubeibei Heowá, gayaraabei líderaguniwa anúadira buidu.

SIGÍ HUMÁ AFURENDEIRA

3. Ígira humá lun tadundehanün Bíbülia

BIDÉU: Falá huméi adundehani le tídanbei Bíbülia súnwandan (5:54)

• Ka lubuidun idewesei ru laalibei Heowá woun?

• Ka uagu líchigei Heowá iyaraani woun lun wanúadiruni kaba lan wadüga?

• Ida liña líderaguniwa Heowá lun wanúadirun buidu?

Lun harihin aban hénpulu luáguti adundehani le tídanbei Bíbülia, aliiha huméi Éfesuna 5:15, 16. Lárigiñe, ayanuha humá luagu ida luba lan wayusuruni wadaani “lidan katei buiti” lun…

• … waliihanu Bíbülia sagü weyu.

• … buídutima wamá kei maríeitiña, agübürigu o isaanigu.

• … wabasiihan lidoun adamuridaguni.

4. Lun hanúadirun buidu, héchugüda huméi hisaminan afalarei le lariñagubei Bungiu

BIDÉU: Kipu humá aban lubuidun saminaü (5:13)

• Según warihini lidan bidéu, ka tadügübei íbiri to lun taranseruni tisaminan lun tafalaruni ladundehan Heowá lun tanúadirun buidu?

Ka uagu moun lumuti lubéi wamuriahan luma somu gürigia lun lanúadirun wawagu? Aliiha huméi Ebüréu 5:14, ábameti hayanuhan luagu álügüdahani burí le:

• Íbini ménrenguntima lan lun wamuriahan luma somu gürigia lun lanúadirun wawagu, ka uagu buídutima lubéi lun gabafu lan kada aban wádangiñe lun lasubudiruni ka lan buídubei?

• Ka burí katei gayaraabei wayusuruni lun líderaguniwa échudagüdei wasaminan lun lafalaruni ladundehan Heowá luma lun wanúadirun buidu?

5. Inebelá hasaminan amu hun

Kei ámuñegueinarügü wabéi, ámuñegueinarügüti giñe le wanúadirubei. Ida luba warufuduni inebe lan hasaminan amu woun? Ariha wamá bián sügǘ.

Furumiñeti sügǘ: Aba táguyun aban íbiri to hínsiñebei tun tefeindihani tigibu lidoun aban damuriguaü le ñein habéi íbirigu würiña ha wuribabei harihin lun tefeindihani aban würi tigibu.

Aliiha huméi Rómana 15:1 luma 1 Korintuna 10:23, 24, ábameti hayanuhan luagu álügüdahani burí le:

• Según bérusu burí le, ka gayaraabei tadügüni íbiri? Agia huguya, kaba hamuga hadüga anhein ígira lubalün hisaminan lun hadügün aban katei le mígirun lumuti lisaminan amu lun ladügüni?

Libiaman sügǘ: Lau sun subudi lani aban íbiri ígira tan Bíbülia lun latuniwa murusun binu, himei lumuti matun lan. Aban weyu, aba lagunbirahóuniwa lidoun aban liraüraü fedu ani arihati íbirigu ñein ata binu.

Aliiha huméi Apurichihati 7:16 luma Rómana 14:1, 10, ábameti hayanuhan luagu álügüdahani burí le:

• Según bérusu burí le, ka gayaraabei ladügüni íbiri le? Agia huguya, kaba hamuga hadüga anhaün ariha aban gürigia adüga aban katei le mígirun lubadün hisaminan lun hadügüni?

Ka burí katei lunbei hadügüni lun hanúadirun buidu?

1. Amuriaha humá luma Heowá lun líderagunün asubudirei ka lan lunbei hadügüni (Santiagu 1:5).

2. Áluaha humá ariñahani tidan Bíbülia luma tidan agumeiraguagüdüni to asagarúboun tídangiñe lun hadarirun adundehani le gayaraabei hafalaruni. Gayaraati giñe hayanuhan hama kristiánugu ha derebuguhali hafiñen.

3. Samina humá luagun le lunbei lanügüni le lunbei hanúadiruni dandu lun hisaminan kei lun hasaminan amu.

LE HAFURENDEIRUBEI

Wanúadiruba buidu ánhawa áluaha ariñahani furumiñe luagu le lasaminarubei Heowá luagu le wasaminarubei wadügün, gabaroun wameime gayara lan lanügün le wanúadirubei buiti o wuribati houn amu.

Águyuguagüdüni

• Ka lunbei hadügüni lun hanúadirun katei le hínsiñeti lun Heowá?

• Ida luba héchudagüdüni hisaminan lun lafalaruni ladundehan Bungiu?

• Ida luba harufuduni inebe lan hasaminan amu hun?

FURENDEI HUMÁ LANWOUN

Ida luba hanúadirun katei le adügüti lun lederebugudun humadagua luma Bungiu?

“Tomemos decisiones que honren a Dios” (La Atalaya, to lánina 15 lidan gádürü-hati, irumu 2011)

Furendeitima humá luagu ida liña lan líchugun Heowá adundehani woun.

Adundeha lumutiña Heowá lumutuniña (9:50)

Ariha huméi ka lan íderagubalin aban wügüri lun lanúadirun lidan aban sügǘ hénrenguti.

Chóurugüda lumuti Heowá woun wibihubei lan sun le buídubei (5:51)

Sigí humá afurendeira luagu ida luba lan hagundaaragüdüni Heowá dan le míchugungili lan aban gumadi furanguti luagu le lunbei hadügüni.

“¿Hace falta siempre un mandato bíblico?” (La Atalaya, to lánina 1 lidan duusu-hati, irumu 2003)