KA GÜRIGIA unbei mínsiñe hamá gürigia ǘnabugutiña? Híruti agumuchagueina liña lan ǘnabuguni inarüniti uguñe weyu, hádantima gürigia ha gabafubaña hawagu amu. Agia san Heowá, létima gabafubei ligibuagu sun ubóu? Ǘnabuguti san? Akutiha waméi le lariñagubei profeta Heremíasi lidan Ayahuni 3:20, 21: “Chóuruti baritaguba lan nuagun, ábame télemuchagun buani nuagun. Luágunba katei le naritagua. Ligía, nemenigiduba lubéi buagu” (NM).

Chouru lumuti Heremíasi luagu ‘lélemuchaguba’ lan buga Heowá hawagun ha asakürihabaña. Adügati dimurei le lun warihini Heowá kei aban gürigia hínsiñehabuti. Aranseñu liña “Le Íñugutimabei ligibuagu sun ubóu” lun lélemuchagun, o lǘnabudaguagüdün lungua, lun líderaguniña lubúeingu asansirei gádantiña lun harandarun luma (Sálumu 83:18). Ruti emenigini le dǘgüdaguaü lun Heremíasi le meha hírubei lasandirunu lanigi. Ligía desidírü lubéi lagurabahan lau gurasu darí desidírü lan Heowá líchuguni lúhabu lun lesefuruniña lumutuniña ha asakürihabaña (bérusu 21).