Luágutima Larúeihan Bungiu tayanuha Bíbülia. Arúeihaniba le layusura Heowá lun lagunfuliruni le labusenrubei lun Ubóu lúmagiñe furumiñeti dan. Katei san Larúeihanbei Bungiu? Ida liña wasubudiruni gumeseeli lan agumadiha? Ka ibiha láalibei darí guentó? Ani kaba libiha ámuñegü? Lounabúba álügüdahani le lidan arufudahani le luma lidan bián le asigirubei.

1. Katei san Larúeihanbei Bungiu ani ka Lurúeitebei?

Dan le layanuhóun luagu Larúeihan Bungiu, layanuhóuña luagu aban agumadihani le ladügübei Heowá. Hesukrístu lurúeitebei ani siélugiñeba lagumadiha (Matéu 4:17; Huan 18:36). Ariñagatu Bíbülia luagu Hesusu: “Magumuchadibei larúeihan” (Lúkasi 1:32, 33). Kei ligía lan Lurúeitebei Larúeihan Bungiu, lagumadihabaña sun lílana Ubóu.

2. Kátaña lúnbaña harúeihan luma Hesusu?

Mama lábuguarügü Hesusu larúeiha. Anuadirúaaña “gürigia lídangiñe sun rasa, sun iñeñein, fulasu luma néchani [...] lun hagumadihan” úara luma (Arufudúni 5:9, 10). Átiribaña san gürigia arúeiha úara luma Kristu? Lau sun lúmagiñe lan meha ya lan Hesusu ubouagu, anúadiraaña saragu míñunu gürigia hafalaruni Kristu lau hadügagun houngua kristiánugume, san-bián-wein-gádürü-mílurügüñanu hádangiñe anuadirúa lun houdin arúeiha luma Kristu sielu (aliiha huméi Arufudúni 14:1-4). Ha híbiri kristiánugu, lílanabaña Larúeihan Bungiu ya ubouagu (Sálumu 37:29).

3. Ka uéigiñe buídutima lubéi Larúeihan Bungiu luéi harúeihan gürigia?

Lau sun añahein lan gumadimatiña ha busentiña hadügün katei buiti, mabafutiña lun habihini sun le habusenrubei. Chülüti dan lun hárügüdüni amu gumadimatiña habara ani másiñati meberesen hamá iseri gumadimatiña hagía hau gürigia. Ánheinti Hesusu, le Lurúeite Larúeihan Bungiu, úabei árügüdüti lubara. Adügaali “Bungiu le siélubei aban arúeihani le siñabei lagünrinchaguni [...] ni aban” (Danieli 2:44). Lagumadihabei Hesusu sun Ubóu ani úabei himei lan aban gürigia luéi aban. Hínsiñehabuti Hesusu, areidati ani richaguati. Larufudahaba houn gürigia lun giñe hóuseragun hámagua ítara: lau ínsiñeni, areini luma irichaü (aliiha huméi Isaíasi 11:9).

4. Arúeihani gabafuti le lunbei lagumadiruni sun Ubóu

Gabafutimati Hesukrístu lun lagumadihan sügǘ lau furumiñeguarügü amu gumadimati. Aliiha huméi Matéu 28:18, ábameti hayanuhan luagu álügüdahani le:

• Ka uagu wéiritima lubéi lubafu Hesusu luéi furumiñeguarügü gumadimati ubouagu?

Chülüti dan lun hasansirúniwa gumadimatiña ani lídanrügüñein ítaga fulasu ubouagu gayara lan hagumadihan. Agia Larúeihan Bungiu, lasusereduba san ligiaméme lun? Aliiha huméi Danieli 7:14, ábameti hayanuhan luagu álügüdahani burí le:

• Ka uagu buidu lubéi “magünrinchawagunbei” lan Larúeihan Bungiu?

• Ka uagu buidu lubéi lun larúeihani sun Ubóu?

5. Mégeiwati lun lasansirún harúeihan gürigia

Ka uagu mégeiwa lubéi lun lárügüdüni Larúeihan Bungiu lubara harúeihan gürigia? Ariha huméi BIDÉU, ábameti hayanuhan luagu álügüdahani le.

BIDÉU: Katei san Larúeihan Bungiu? (murusun lídangiñe) (1:41)

• Ka wuribani lanügübei larúeihan wügüri?

Aliiha huméi Apurichihati 8:9, ábameti hayanuhan luagu álügüdahani burí le:

• Saminatün san lunti lan lárügüdüni Larúeihan Bungiu lubara harúeihan gürigia? Ka uagu?

6. Gunfuranda hamutiwa gumadimatiña ha lídanbaña Larúeihan Bungiu

“Gayaraati gudemehabu lan Hesukrístu” le Warúeite woun luagu wadebilin, lugundun wínwanti meha kei gürigia ya ubouagu (Ebüréu 4:15). Anúadiraali Heowá 144,000 wügüriña hama würiña ha úaraguatiña lídangiñe “sun rasa, sun iñeñein, fulasu luma néchani” lun harúeihan úara luma Hesusu (Arufudúni 5:9).

• Ruti san dǘgüdaguaü hun hasubudiruni subudi lani Hesusu hama ha lúnbaña harúeihan úara luma ida liña lan habagari gürigia? Ka uagu?

7. Buídutimati lilurudun Larúeihan Bungiu sügǘ lau lilurudun harúeihan gürigia

Adügatiña burí gumadimatiña lúrudu ladüga busén hamá hóunigiruniña luma híderaguniña lílana hageira. Galurudunti giñe Larúeihan Bungiu ani mosu gaganbadi hamá lílana lun. Aliiha huméi 1 Korintuna 6:9-11, ábameti hayanuhan luagu álügüdahani burí le:

• Según hisaminan, ida luba san ibagari ubouagu danme le gaganbadi hamá sun gürigia lun lilurudun Bungiu?a

• Garichati san lun lagurabun Heowá lun gaganbadi hamá sun lílana Larúeihan lun lilurudun? Ka uagu hasaminara ítara?

• Ida liña wasubudiruni gayara lan hasansirun gürigia ha maganbadibaña lun lúrudu burí le? (Ariha huméi bérusu 11).

LE HAFURENDEIRUBEI

Agumadihani inarüniti le siélubei Larúeihanbei Bungiu ani lagumadihabei sun Ubóu.

Águyuguagüdüni

• Kátaña san agumadihabaña lidan Larúeihan Bungiu?

• Ka uéigiñe buídutima lubéi Larúeihan Bungiu sügǘ lau furumiñeguarügü harúeihan gürigia?

• Ka lagurabubei Heowá hámagiñe lílana Larúeihan?

FURENDEI HUMÁ LANWOUN

Aliiha huméi le lariñagubei Hesusu luagu halíabei lan Larúeihan Bungiu.

“Aban san katei le hanügübei gürigia tidan hanigi Larúeihan Bungiu?” (Ariñahani lídangiñeti jw.org)

Ka uagu himei habalin gefentiña luagu Heowá úaragua hamá lun Larúeihan Bungiu lubaragiñe úaragua hamá lun harúeihan gürigia?

Luéigiñeñadiwa lóubadina Larúeihan Bungiu (1:44)

Aliiha huméi le tariñagubei Bíbülia hawagu 144,000 gürigia ha lanúadirubaña Heowá lun harúeihan luma Hesusu.

“Kátaña san lúnbaña houdin sielun?” (Ariñahani lídangiñeti jw.org)

Ka achoururagüdübalin tun aban würi to meha furisunruguboun Búngiurügüñein lan gayara lanügün aban ubóu richaguati?

“Aprendí cómo se solucionarán las injusticias” (¡Despertad!, to lánina unsu-hati, irumu 2011)

Gumeseeli Larúeihan Bungiu agumadiha. Ani málühali adüga óunwenbu burí asansiruni ubouagu. Ariha wamá fiu katei buiti le gayaraabei hibihini lábugiñe Larúeihan Bungiu.

1. Ida luba ladügün Larúeihan Bungiu lunya ñein lan darangilaü luma irichaü ubouagu?

Lagumuchuba Hesusu—le Lurúeite Larúeihan Bungiu—hau sun gürigia wuribatiña luma hau gumadimatiña lidan wuribu le gíribei Arümahedón (Arufudúni 16:14, 16). Lídanme dan ligía, gúnfulihalime füramasei tídangiñeti Bíbülia le sunsuinagubei: “Málühaña ánhaña ua wuribatiña” (Sálumu 37:10). Layusurubei Hesusu larúeihan lun ñein lan darangilaü luma irichaü lidan sun Ubóu (aliiha huméi Isaíasi 11:4).

2. Ida luba ibagari danme le ladügǘn lugundan Bungiu ya ubouagu?

Lábugiñe lagumadihan Larúeihan Bungiu, “galagantehabei gürigia buítiña múa, haganóuba giñe lidan [lun] súnwandan” (Sálumu 37:29). Maame lubuidun ibagari danme le buíduhaña sun gürigia, hínsiñe ligíame Heowá houn ani hínsiñegua hagíame hámagua! Madagabei sandi luagu ni aban ani hawinwanduba sun gürigia lun súnwandan.

3. Kaba libiha Larúeihan Bungiu lárigiñeme lagumuchun hau wuribatiña?

Lárigiñeme lagumuchun Hesusu hau wuribatiña, larúeihaba luagu 1,000 irumu. Lídanme dan ligía, lídehaba Hesusu hama 144,000 ha lúnbaña harúeihan luma lun hesefurun gürigia luéi figóu, ua láamuga mégeiti hawagu. Danme lagumuchun dan ligía, ábanhalime lubuidun paraísu Ubóu, buin hau gürigia ha gúndaatiña ani ha gaganbaditiña lun lilurudun Heowá. Ábameti lagiribudagüdüni Hesusu arúeihani lun Heowá, le Lúguchi. Inebewatimahalime liri Bungiu Heowá sügǘ luéi lidan amu dan (Matéu 6:9, 10). Furanguhalime ua lan gumadimati buídutimati luéi Heowá, le óunigirubaliña ha lábugiñebaña larúeihan. Lárigiñe, ábame lagumuchun Heowá lau Satanási hama lumafianu luma lau furumiñeguarügü le agarabaaguti luagun Larúeihan (Arufudúni 20:7-10). Laduraruba lubuidun burí katei le lunbei libihini Larúeihan Bungiu lun súnwandan.

SIGÍ HUMÁ AFURENDEIRA

4. Lagumuchuba Larúeihan Bungiu lau hagumadihan gürigia

“Lun ladügün damichi lun gürigia líledi” layusurei gürigia “ubafu le luágubei” (Apurichihati 8:9). Layusurubei Heowá Larúeihan lun laransehani sun damichi le lanügübei marichaü le.

Aliiha huméi Danieli 2:44 luma 2 Tesalónikana 1:6-8, ábameti hayanuhan luagu álügüdahani burí le:

• Kaba ladüga Heowá luma Hesusu, le Liráü, hau gumadimatiña luma hau sun ha ídehabaña hama?

• Ida liña ladügün le hasubudirubei luagu Heowá luma luagu Hesusu lun hachoururuni richaguabei lan sun le lunbei hadügüni ani úabei lan himei hamá aban gürigia luéi aban?

5. Hesusu Urúeibei le buídutimabei

Kei Lurúeite Larúeihan Bungiu, ladügüba Hesusu saragu katei buiti hawagu lílana Ubóu. Ariha huméi BIDÉU lun harihini ida liña lan larufuduni Hesusu busén lan líderaguniña gürigia ani rúhali lan Bungiu ubafu lun lun ladügüni.

BIDÉU: Arufuda lumuti Hesusu le lunbei libihini Larúeihan Bungiu (1:13)

Sun burí katei le meha ladügübei Hesusu dan le ya lubéi ubouagu, arufuda lumuti le lunbei libihini Larúeihan Bungiu. Ka lídangiñe sun füramasei le lunbei warihini busentima hubéi harihini lagunfulirun? Aliiha huméi burí bérusu le ñein lubéi ladarirúa füramasei burí le.

6. Lanügüba Larúeihan Bungiu aban lubuidun ibagari woun ámuñegü

BIDÉU: Ganari wamá arihei lubuidun dan le anitebei (4:38)

Aliiha huméi Sálumu 37:4, ábameti hayanuhan luagu álügüdahani le:

• Ida liña hasandiragun hungua lau hasubudiruni lagunfulirubei lan Heowá tayumahan hanigi sun gürigia?

LE HAFURENDEIRUBEI

Lagunfulirubei Larúeihan Bungiu le labusenrubei ladügün. Ladügübei Ubóu le ábanme paraísu buin hau gürigia buítiña ha áhuduragutiña lun Heowá lun súnwandan.

Águyuguagüdüni

• Kaba ladüga Larúeihan Bungiu lun inebewa lan liri Heowá?

• Ka uagu chouru wabalin lagunfulirubei lan Larúeihan Bungiu füramasei le tídanbei Bíbülia?

• Ka lídangiñe katei le lunbei libihini Larúeihan Bungiu busentima hubéi harihini lagunfulirun?

FURENDEI HUMÁ LANWOUN

Furendei huméi ka lan mini lubéi Arümahedón.

“Ka san Arümahedónbei?” (Ariñahani lídangiñeti jw.org)

Ariha huméi kaba lan asusereda lidan luma lárigiñe Milu Irumu le lánina Larúeihan Hesusu.

“¿Qué es la gran tribulación?” (Ariñahani lídangiñeti jw.org)

Ariha humaña iduheñu ha aríagubaña houngua úara lidan Paraísu.

Aríaguaba bungua lidan Paraísu (1:50)

Aliiha huméi abahüdaguni luáguti ibagari le gíribei “Me inquietaban muchas preguntas”, lun harihini ida liña lan ladariruni aban polítiku ka lan láranibei turobuli le meha labusenrubei laranserun.

“La Biblia les cambió la vida” (La Atalaya, to lánina 1 lidan eneru, irumu 2012)