Ariñahani le lunbei lakutihóun lidan adamuridaguni Habagari Kristiánugu luma Heseriwidun
4-10 LIDAN DUUSU-HATI
ARUFUDAHANI GEBEGITI TÍDANGIÑETI BÍBÜLIA | SOFONÍASI 1 DARÍ AHÉU 2
“Áluaha waméi Heowá lubaragiñe liabin luéyuri ligañi”
(Sofoníasi 2:2, 3.)
w01-S 15/2 páh. 18, 19 pár. 5-7
Áluaha waméi Heowá lubaragiñe liabin luéyuri ligañi
5 Másiñati hariñagun: “Deregeguaadina nungua lun Bungiu ani badiseihadina kei aban gefenti luagu Heowá. Marufudun lumuti funagia lira gúnfulihadina lan lau le lamuriahabei númagiñe?”. Le linarün katei, úati buídurügü lan wederegeragun woungua lun Heowá. Deregeguaaña meha lílana néchani Ísüraeli houngua lun Heowá, gama lumoun lidan lidaani Sofoníasi, magunfuliruntiña meha hudaana lau füramasei le hadügübei. Kei resultóu, lau lásügürün dan, aba mabusenrun laaña lan Heowá keisi lumutuniña. Uguñe weyu, áluaha wamuti Heowá lau wadügün luma wakipurun aban lubuidun umadaguaü luma úara hama tílana lóundarun to yaaboun ubouagu. Mini lan le, mosu lan wasubudiruni ligaburi lasaminarun luma lasandiragun Bungiu lungua. Áluaha wamuti Heowá dan le waturiahanu Lererun, wararamagun asaminara luagu le tariñagunbei luma dan le wadügüni le wafurendeirubei tídangiñe lidan wabagari. Áluaha wamuti giñe Heowá dan le wamuriahan luma tídangiñe sun wanigi lun ladundehaniwa luma dan le wafalaruni ladundehan lani sífiri sandu, adügati lira lun wederebudagüdüni wamadagua luma ani ínchaha lumutiwa lun weseriwidun lun tau sun wanigi, tau sun wawani luma lau sun were (2 Lúrudu 6:5; Galasiana 5:22-25; Filipuna 4:6, 7; Arufudúni 4:11).
6 Darí wamuti libiaman katei le amuriahóubei wámagiñe lidan Sofoníasi 2:3 le ñein lubéi lariñaga: “Adüga huméi sun katei lidan lúaragun”. Saragu wádangiñe adügatiwa óunwenbu burí asansiruni lidan wabagari lun gayara lan wabadiseirun, gama lumoun, mosu wasigirun agunfulira lau lilurudun Bungiu le richabei lidan sun wabagari. Añahein gumesetiña adügei sun katei le buidu gama lumoun ígiraguagüdaaña houngua lun lagadeiruniña ubóu le lábugiñebei lubafu Satanási. Hénrenguti wadügüni sun katei lidan lúaragun ladüga geyegu waña hau gürigia ha arihibalin magíaguni, iyeeni luma amu luwuyeri figóu kei katei le maribanti. Ánheinti weiri lubéi wayumahan wagundaaragüdüni Heowá gayaraabei wagidaruni luriban échuni wawariua lánina wáluahan wéiguadun buidu houn lílana ubóu le lau wáyeihani hagaburi. Aba meha magundanhali lan Heowá hau lílana Hudá ladüga háyeihani hagaburi lílana burí néchani le geyegubei hau ha máhuduragunbaña lun Bungiu. Buítimati wáyeihani Bungiu lubaragiñe wáyeihaniña gürigia ha meseriwidunbaña lun, lau wáyeihani “iseri igaburi [...] le ladügübei Bungiu kei ligaburi guánarügü, lidan irichaü le tímatimaati luma arumani” (Éfesuna 4:24; 5:1).
7 “Ǘnabuguni”, ligía lǘrüwanbei igaburi le uágubei lariñaga Sofoníasi 2:3 mosu lan wáyeihani anhein busén wabéi wadarirun “aramudaguagülei lídanme luéyuri ligañi” Heowá. Sagü weyu wásügürün dan hama wügüriña, würiña hama nibureintiña ha marufuduntiña ni murusun ǘnabuguni. Ariha hamuti ǘnabuguni kei aban katei le mabuidunti ani saminatiña débili lan gürigia le gaganbadibei. Amuriaha hamuti katei lau éregu, hóunguarügüñein habusenra buiti, sigenetiña ani saminatiña mosu lan habihini sun le “yuubei houn” o le habusenrubei. Ma hamuga lirun ánhawa agumesera áyeiha aban lídangiñe igaburi le! Anihán lidaani wadügüni “sun katei [...] lau ǘnabuguni”. Ida? Lau gaganbadi wamá lun Bungiu, arufuda wagíame ǘnabuguni lau wánharun lun lererehan woun adüga wameime sun katei kei labusenruni.
Darí wamá pérüla lánina lichú aau
(Sofoníasi 1:8.)
w07-S 15/11 páh. 11 pár. 3
Puntu méiniti tídangiñeti liliburun Naún, Abakúku luma Sofoníasi
1:8. Genegeti gumese hamá meha huríu ha awinwandubaña lidaaniwagu Sofoníasi áluga héiguadun buidu houn lílana néchani burí le geyegubei hau lau hafalaruni “hechun [o ligaburi hasansiragun, TNM]”. Mama hamuga harufuduña kristiánugu ha uguñebaña weyu lichú aau anhein háyeiha hagaburi gürigia ha meseriwidunbaña lun Heowá kei meha hadügüni huríu.
(Ahéu 2:9.)
w07-S 1/12 páh. 9 pár. 3
Puntu méiniti tídangiñeti liliburun Ahéu luma Sakaríasi
2:9. Kaba meha idan wéirigutima tan “tibiaman ténpulu [...] sügǘ tau to furumiñetu”? Gayaraati liridúniwa ǘrüwa igaburi: sun irumu le tidurabei, le arufudahabei tidan hama gürigia ha ñǘdünbaña áhuduragua lun Heowá ñein. Lau sun meha durá tan ténpulu to lábunaguagüdüboun Salomón gádürü-san-wein irumu (1027-607 lb.l.K.), duratu “to tibiaman ténpulu” lóugiñe seingü-san-gádürü-wein irumu, lúmagiñe tóunwenbudun lidan irumu 515 lb.l.K. darí tagünrinchawagun lidan irumu 70 l.l.K. Lanwoun lira, tidan meha “tibiaman ténpulu” larufudaha Hesukrístu, le Mesíasi, ani gíbetimatiña gürigia ñǘdüntiña áhuduragua lun Bungiu tidan tibiaman ténpulu sügǘ lau tidan “to furumiñetu” (Adügaü 2:1-11).
11-17 LIDAN DUUSU-HATI
ARUFUDAHANI GEBEGITI TÍDANGIÑETI BÍBÜLIA | SAKARÍASI 1-8
“Hárügüdübei diisi terencha aban huríu tuéigiñe ladaüragun”
(Sakaríasi 8:20-22.)
Iseri lumutuniña Bungiu uguñe weyu
14 Ariñagatiña meha bián profetagu lidan hani profesía luagu hóundaruba lan saragu gürigia hamoun lumutuniña Heowá lidan wadaani. Ariñagati Isaíasi, le furumiñeti: “Sun néchanigu hayabiba lumoun; hayabiba saragu gürigia ariñageina: ‘Higougu, warí wamá luagun luwübüri [Heowá], tidoun litenpulun Lubungiute Hakobu, arufuda láamugei lémeri woun, gayara láamuga wéibugun lidan lémeri. Ladüga Sióngiñeba láfurida larufudahan Wabungiute, Herusaléngiñeme lererun’” (Isa. 2:2, 3). Ani ariñagati profeta Sakaríasi: “Hayabinyaba gürigia hama lílana saragu uburugu lun Herusaléun. Ábameti hayabin lílana aban uburugu hamoun lílana amu uburugu, hariñagame houn: ‘Wéibuga áluahei Wabureme Suntigabafu, lun wamuriahan luma lun labinirúniwa!”. Ariñagati Sakaríasi ítara haña lan gürigia hagía kei “diisi terencha ha lílana burí fulasu” ha lúnbaña hárügüdüniña kristiánugu anuadirúaaña tuéigiñe hadaüragun, ani ábame hariñagun: “Busentiwa woudin huma, ladüga aganbatiwa luagu anihein lan Bungiu huma!” (Sak. 8:20-23).
(Sakaríasi 8:23.)
“Busentiwa woudin huma”
4 Anhein ibidiñe lubéi hiri sun kristiánugu anuadirúaaña ha añaheinguabaña ubouagu houn amu mudún, ka uagu gayara lubéi hariñagun houn: “Busentiwa woudin huma”? Ariñagatu Bíbülia hárügüdüba lan “diisi terencha” tuagu ladaüragun aban “huríu” ábame hariñagun: “Busentiwa woudin huma, ladüga aganbatiwa luagu anihein lan Bungiu huma”. Kei aubei warihei, ayanuhati bérusu le luagu aban “huríu”, ani lárigiñe aba lariñagun “huma”. Ligíati, mama ábanrügü gürigia “huríu” ligía, mini lan sun kristiánugu anuadirúaaña keisi sétanu. Subuditi katei le houn amu mudún, ligía gayara lubéi hariñagun ‘hóudiña lan’ hama kristiánugu anuadirúaaña, o lidan amu dimurei, luagu heseriwiduña lan lun Heowá úara hama. Memegeiruntiña hasubudiruni hiri sun kristiánugu anuadirúaaña lun hafalaruni kada aban hádangiñe. Ka uagu? Ladüga ariñagatu Bíbülia Hesusurügübei lan wafalara (Mat. 23:10).
w09-S 15/2 páh. 27 pár. 14
Hafalaruñein “Mudún le ñeinhin lumuti lidin”
14 Ariñagati Hesukrístu ariha lani le wadügübei lun wíderaguniña líbirigu kamá hamuga wadügüñein lun (aliiha huméi Matéu 25:40). Ida liñati híchuguni lubúeingu Bungiu ha hemenigibaña hawinwandun ubouagu hídehan houn líbirigu Kristu ha anuadirúaañabaña lau sífiri sandu? Láutima hapurichihani uganu buiti luáguti Larúeihan Bungiu (Mat. 24:14; Huan 14:12). Eibu lásügürün dan, alouguadeina haña kristiánugu anuadirúaaña ubouagu, ánhañati amu mudún, aganwoundeina haña. Dan le hapurichihani saragu gürigia ha hemenigibaña hawinwandun ubouagu uganu buiti luáguti Larúeihan Bungiu, híderaguñanu kristiánugu anuadirúaaña agunfulira lau wadagimanu le ichugúbei houn lánina hadügün disipulugu. Ani ha gayaraabei hadügüni, apurichihatiña lidan dan dayarüti (Mat. 28:19, 20). Moun lumuti giñe wabulieiduni gayara lan giñe wídehan lidan wadagimanu le lau wíchugun budagia lidan ámuñegueinarügü igaburi.
Darí wamá pérüla lánina lichú aau
(Sakaríasi 5:6-11.)
Ka wafurendeirubei lídangiñe arufudúni burí le larihibei Sakaríasi?
18 Haritaguagüda lumuti giñe arufudúni ligía houn huríu luagu hani lan buligasion mígirun hamá lun lawiyedun háhuduragun lun Bungiu. Siñati ligirún lun ñein lan wuribani hadan lumutuniña Heowá. Barǘ laadiwa tidoun lóundarun to harumaboun, ñein lubéi wasandirei línsiñehabu luma lóunigiruniwa. Gama lumoun, lunti wídehan lun lakipurúniwa harumañu. Busentiwa san wadügüni? Mabarati wuribani lidan aransehani le ladügübei Bungiu lun ñein lan darangilaü hadan lumutuniña.
(Sakaríasi 6:1.)
Gádürü karü luma aban ridi le óunigirubaliwa
7 Tidan Bíbülia gayaraati mini lan aban wübü arúeihani o gumadi. Wübü le uágubei layanuhóua lidan arufudúni le larihibei Sakaríasi genegeguati luma bián wübü le áfuachubei lidan lani Danieli profesía. Larúeihan Heowá le lunbei ladurarun lun súnwandan mini lubéi aban lídangiñe. Ani le mini lubéi le aban, Larúeihan Mesíasi le lúhaburugubei Hesusu (Dan. 2:35, 45). Lúmagiñebei lagumeserun Hesusu arúeiha lidan irumu 1914 úarañein bián wübü le ani súdiniti lidan lagunfulirun lugundan Bungiu ya ubouagu.
8 Ka uagu lau lubéi buronse ladügǘwa? Ítara kei golu, wéiriti giñe lebegi buronse. Ruti meha Heowá gumadi lun layusurún buronse lidan tábunawagun tawernákulu tuma ténpulu to Herusalénboun (Afu. 27:1-3; 1 Uru. 7:13-16). Ligíati, kei le lau lubéi buronse ladügǘwa bián wübü le ayusurúbei kei sínbolu arufuda lumuti lubuidun liricha Heowá lun larúeihan lidan sun ubóu luma Larúeihan Mesíasi. Ladügüba arúeihani burí le lun hawinwandun gürigia darangilu ani ibiha hagíame saragu abinirúni.
18-24 LIDAN DUUSU-HATI
ARUFUDAHANI GEBEGITI TÍDANGIÑETI BÍBÜLIA | SAKARÍASI 9-14
“Redei humá lidan fulasu wayati le labadinaguabei wübü”
(Sakaríasi 14:3, 4.)
Áluaha humá aramudaguagülei lidan fulasu wayati le lani Heowá
10 Dan le lafanreinragunbei “wübü Oliwu” lidan biama, aba lerederun lamidan luagun nórute, lamidan luagun suru. Aba lerederun lugudi Heowá ligibuagu biángubei wübü, ábati lerederun “aban óunwenbu fulasu wayati” lábugiñe. Ka mini lubéi fulasu wayati ligía? Mini lan adouraguni le heresibirubei lubúeingu Bungiu lábugiñe larúeihan Heowá luma Larúeihan Lisaani. Ítara liña lachoururagüdüni Heowá úabei lan agumuchuti lau relihión inarüniti. Ídabugati lafanreinragúa “wübü”? Lidan irumu 1914, irumu le lagumuchagunbei hadaani néchanigu ani aba lagumeseruni Bungiu Larúeihan Mesíasi sielu. Ídabugati hagumesera lubúeingu Bungiu ha inarünitiña anuraha lidoun “fulasu wayati”? Ariha waméi.
(Sakaríasi 14:5, TNM.)
Áluaha humá aramudaguagülei lidan fulasu wayati le lani Heowá
13 Ánhawa eredera yarafa lun Heowá ani redei wagíame luéigiñe lóubadina inarüni, dandu ligía kei Hesukrístu, le Liráü, hóunigirubadiwa. Mígirunbei Heowá lun ñein lan ni kata adisedagüdütiwa luéi (Huan 10:28, 29). Busenti Heowá líderaguniwa lun úaragua wamá lun larúeihan luma lun Larúeihan Mesíasi. Ani kei yarafatimahadiwa lubéi lun óunwenbu asufuriruni, súdinitimati lun werederun lidan fulasu wayati le lani Heowá guentó sügǘ lau lidan amu dan.
(Sakaríasi 14:6, TNM, 7.)
(Sakaríasi 14:12.)
(Sakaríasi 14:15.)
Áluaha humá aramudaguagülei lidan fulasu wayati le lani Heowá
15 Kábati asusereda houn ha úabaña lidan óunwenbu fulasu wayati le lani Heowá lidan dan ligía? Ariñagati Sakaríasi 14:6: “Lídanme weyu ligía lasusereduba úabei lan leiti buiti... deregu luba sun katei” (TNM). Ariñagatu Bíbülia úabei lan “leiti buiti” houn, lidan amu dimurei, meresibirun lubaña Bungiu. Ariñagati giñe profesía luagu ni lan “gabayu, mile, kameyu, burigü hama sun animaalugu ha hámatiña áganiñu tidan hakianpun-agei” —sun ha sínbolu tani hárumate néchanigu— meseriwínbaña lun hageindagun, kamá hamuga aba meseriwínhaña lan lun ni kata ladüga lidiliga. Ariñawagúati giñe lanügüba lan Heowá aban “abeichúni”, o sandi. Larihíba lan yebe lasuseredun katei le o marihínbei lan, lámanichagüdübei hasiadihan áganiñu. Lidan dan ligía “lañaladuba” hagu tuma hañeñe ha éibaahabaliwa. Ida? Ladüga siñá lanme hadügün dañu woun ni lun hayanuhan wuriba luagu Bungiu (Sak. 14:7, 12, 15). Inarüni añaheinbaña lan saragu lánigu Satanási ya ubouagu aranseñu lun hageindagun, gama lumoun ñein hamuti, lagumuchuba Heowá hau (Aruf. 19:19-21). Lasusereduba kei lariñaguni Heremíasi 25:32, 33: “Hame láfaragun Aburemei lidan weyu ligía, herederuba riwagu múarugu lúmagiñe lagumeseha ubóu lumoun lébeha”.
Darí wamá pérüla lánina lichú aau
(Sakaríasi 12:3.)
w07-S 15/12 páh. 23 pár. 9, 10
Úagili ni aban adügütu áruma to lunboun tagünrinchagunibu
9 Ariñawagúati lidan aban lídangiñe profesía le labürüdübei Sakaríasi ka lan uagu hageindagua néchanigu hama kristiánugu inarünitiña. Ariha waméi le lariñagubei Sakaríasi 12:3: “Lídanme dan ligía, nadügübei Herusalén ábanme dübü houn sun gürigia”. Katei san Herusalén le uágubei layanuha profesía le? Layanuhaña luagu “Herusalén le siélubei”, lememe Larúeihan Bungiu le ídounbei haguarúa kristiánugu anuadirúaaña (Ebüréu 12:22). Añahagua fiu hádangiñe ha lúnbaña galagante hamani Larúeihan Mesíasi ubouagu. Dandu hagía kei hapanaagu ha “amu mudún”, hínchahañanu gürigia lun hánharun lun Larúeihan Bungiu sunme anihagua lan dan (Huan 10:16; Arufudúni 11:15). Ida liñati hóunabun néchanigu lun amisurahani le? Ida liña líderaguniña Heowá lubúeingu uguñe weyu? Lun wasubudiruni, akutiha waméi kátima lan mini lubéi le ariñawagúbei lidan Sakaríasi kapítulu 12. Ítara luba wachoururuni úabei lan ni aban adügütu áruma to luntu tagünrinchaguniña kristiánugu ha lanúadirubaña Bungiu ni hapanaagu ha deregeguaañabaña houngua lun.
10 Ariñagati Sakaríasi 12:3 bulesei hamá néchanigu. Ida liña lasuseredun lira? Kei rúhali lubéi Bungiu gumadi luagu mosu lan lapurichihóun uganu buiti luáguti Larúeihan, gaganbaditiña gefentiña luagu Heowá lun gumadi le. Gama lumoun, ariha hamuti néchanigu lapurichihóun uganu buiti luáguti Larúeihanrügüñein lan Bungiu gayara laransehani sun haturóbulin gürigia kei aban dübü hǘrüti. Ligía hadügünbalin sun hayaraati lun hagidaruni hawariua lau heberesehaniña ha apurichihabalin uganu buiti. Adügaali lira lun habuleseirun. Rédeihaña wuriba hagibugiñe sun gürigia lugundun wuribati lidin houn lidan sun áfaaguni le hadügübei. Úati adügüti lun hámanichun lubúeingu Bungiu ha únbaña weiri lan lisudinin lapurichihóun “uganu le magumuchaditi” luáguti Larúeihan Bungiu, le ídanbei Mesíasi lan urúeibei, lubaragiñe lachülürün lagumuchagüle ubóu (Arufudúni 14:6). Dan le larihinbalin aban súdara le óunigirubei aban furisun Áfürika weiri lan luriban houserún lubúeingu Heowá, aba lariñagun: “Heferidiruñein hidaani lau héibaahaniña gürigia ha. Úati adügüti lun lararamun hapurichihan. Adügarügüti lun haganwoundun”.
(Sakaríasi 12:7.)
w07-S 15/12 páh. 25 pár. 13
Úagili ni aban adügütu áruma to lunboun tagünrinchagunibu
13 Aliiha huméi Sakaríasi 12:7, 8. Héchutiña meha gürigia ariha kianpu-agei lidan binadu Ísüraeli lugundun tidan meha hawinwanda hóuniri mudún hama gürigia ha nadagimeibalin múa. Gürigia meha ha tídanbaña kianpu-agei mégeibaña hesefurúniwa furumiñe dan le lábürühan somu néchani luagun uburugu Herusalén. Arufudati dimurei “likianpun-agei Hudá” ítara haña lan kristiánugu anuadirúaaña ha añahaguabaña ubouagu uguñe weyu kamá haganóunña bóugudi luéi uburugu le gabarieirunti. Ñein hayanuha manufudeuga luéigiñe lóubadina Larúeihan Mesíasi. Lesefurubei Heowá “likianpun-agei Hudá furumiñe” ladüga hagíatima lan uágunbaña lábürüha Satanási.
25-31 LIDAN DUUSU-HATI
ARUFUDAHANI GEBEGITI TÍDANGIÑETI BÍBÜLIA | MALAKÍASI 1-4
“Gúndaati san Heowá lau hibagari keisi maríeitiña?”
(Malakíasi 2:13, 14.)
jd-S páh. 125, 126 pár. 4, 5
Adüga waméi sun wayaraati lun libihin Bungiu uéiriguni lau ligaburi wanügüni wabagari keisi iduheñu
4 Lidan meha lidaani Malakíasi (sígulu seingü lb.l.K.), kamanihali meha ígiraguni hadan huríu. Ligía lariñagunbei Malakíasi lun kada wügüri le adügübalin lira: “Gefenti Aburemei luagu múaradun ban lau bererun le bíchugubei tun búmari to úmaboun bamarieida dan meha le nibureingidibu”. “Lau [meha] igarigu” hayahuaha würiña ha lóuserubaña hani weiriei lau múaraguni ani buíngüda hamaali meha lani Heowá “latarü lau háguira”. Íbini meha fádirigu wuriba tigaburi ha ñéinbaña gúndaatiña lau wuribani ligía (Malakíasi 2:13, 14).
5 Ka meha lasaminarubei Heowá luagu luriban ligaburi hanügüni gürigia maríei lidan lidaani Malakíasi? Abürühati Malakíasi luagu Heowá le Lubungiute Ísüraeli: “Iyereeguti le ígiraguti tuma lúmari [l]un”. Ani ariñagati giñe masansirungili lan Heowá (Malakíasi 2:16; 3:6). Gunfuranda wamuti san le labusenrubei lariñagun? Arufuda laali meha Bungiu lúmagiñe furumiñeti dan magundan lan lau ígiraguni (Agumesehani 2:18, 24). Magundanmémegili meha Heowá lau ígiraguni lidan lidaani Malakíasi. Ani magundanmémegili lau uguñe weyu. Añahein gürigia, aba desidírü hamá hígiragun ladügarügü magundan hamá hámagua. Gama lumoun, subudi lumuti Heowá ka lan tídanbei wanigi luma le lídanbei lilulin-agei waritagun (Heremíasi 17:9, 10). Subudi lumuti anhein lau lubéi luriban saminaü luma lichú lau gürigia laransehei sun katei lun gayara lan lígiragun, meberesenga ka lan lariñagubei lun laricharaguagüdüni ligaburi lóuserun. Le linarün katei, “furanguti sun katei lun le lunbei laguseragüdüniwa” (Ebüréu 4:13).
(Malakíasi 2:15, 16.)
w02-S 1/5 páh. 18 pár. 19
Iyereeguti múaraguni lun Heowá
19 Ayanuhati giñe Malakíasi buidu hawagu maríeitiña ha úaragubaña tun hani weiriou. Ariñagati “anihagua lan meha lídangiñe lani Bungiu sífiri sandu hadan” (bérusu 15, TNM). Leti buídubei, gibe hamá wügüriña ítaratiña tidan lóundarun Bungiu uguñe weyu ha íchugubalin tufulasun hani weiriou tun (1 Féduru 3:7). Magayuahantiña tuagu, manabun hamutu, méreduntiña tuagu lun gadan lániña liwiye agamariduni, marufuduntiña giñe menebenehabuni tun lau hadarihan amu würiña o haríagun iyawaü o bidéu lánina agamariduni. Biniwaaru giñe lóundarun Heowá hau saragu würiña maríeitiña ha úaraguatiña lun Bungiu ani gaganbaditiña lun lilurudun. Subudi hamuti wügüriña hama würiña ha ka lan burí katei iyereegubei lun Bungiu, ani úaraguati ligaburi hóuserun luma hasaminan luma. Sigí wamá áyeihei hani hénpulu, lau “waganbuni Bungiu lun wadügüni le lariñagubei”, anhein wadüga labinirubadiwa lau lani sífiri sandu (Adügaü 5:29).
Darí wamá pérüla lánina lichú aau
(Malakíasi 1:10.)
w07-S 15/12 páh. 27 pár. 1
Puntu méiniti tídangiñeti liliburun Malakíasi
1:10. Magundanti meha Heowá lau hadagaragüdün fádirigu wéinamu tagu luagu irisini ha meha aguburahabaña luagu furumiñeguarügü katei le hadügün lidan heseriwidun kéiburi hadaaruni bena o hébeduni watu luagu latarü. Ligía súdini lubéi lun ínsiñeni lan le wasandirubei luagu Bungiu luma hawagu gürigia wáledi ínchahawa lun weseriwidun lun Heowá, kéiburi lapurichihóun uganu buiti. Maweiyasun wamá adügei ladüga busén wamá wagañeirun seinsu! (Matéu 22:37-39; 2 Korintuna 11:7.)
(Malakíasi 3:1.)
‘Anahein huma sagü weyu’
5 Saragu sígulu lubaragiñe labahüdaguni Hesusu hénpulu luáguti türigu luma híduru wuribati, adügati Heowá lun labürüdün profeta Malakíasi aban profesía lun ladimurehan luaguméme sügǘ burí le uágubei ladimureha Hesusu (aliiha huméi Malakíasi 3:1-4). Huan le abadiseihabei ligía ‘óunagülei le aransehabalin üma’ (Mat. 11:10, 11). Dan le lachülaagunbei lidan irumu 29, yarafaali meha lidaani haguseragüdüniwa ísüraelina. Hesusu libiamanbei óunagülei, “óunagülei lánina daradu”. Lidan biama ókaasion, arumadaha lumutu Hesusu ténpulu to Herusalénboun lídangiñe liwiye échuni: le furumiñeti, adüga lumuti lidan lagumeseha lani ministeriu, le libiaman, dan le lagumuchunbalin (Mat. 21:12, 13; Huan 2:14-17). Ligíati, durati larihini ida liña lan léibugun katei luma luadigimari lánina arumadahani luagu fiu dan.
6 Ídabugatima lagunfulira profesía le lídanbei Malakíasi? Lidan burí irumu le lubaragiñebei irumu 1914, adügati Charles Russell úara hama lupaanágu aban wadagimanu libe meha le ladügübei Huan le abadiseihabei. Wéiriti meha lisudinin wadagimanu le, ladüga mosu meha harufudahani inarüni le tídanbei Bíbülia ítara kei meha furumiñe. Afuranguagüda hamuti Aturiahatiña Bíbülia ha kátima lan mini lubéi sákürifisiu le ladügübei Kristu lun ferudunawa lan figóu, arufuda hamuti iyeeni lan arufudahani luáguti máfiougati ani apurichiha hamuti yarafaali lan lagumuchun hadaani ha mámabaña huríu. Gama lumoun, anihein meha saragu relihión le ídanbei hariñaga lílana hawougua kristiánugu hamá. Kaba meha san hádangiñe arufuda ítara haña lan kei türigu? Lun lasubudirúniwa katei le, gumeseti Hesusu arihei ida liña lan léibugun katei lidan áhuduraguni inarüniti lidan irumu 1914. Durati wadagimanu le luagu fiu dan: lúmagiñe irumu 1914 darí lagumeseha irumu 1919.
Ariñahani le lunbei lakutihóun lidan adamuridaguni Habagari Kristiánugu luma Heseriwidun. (Duusu-hati, 2017)