ÍDEMUEI HOUN MARÍEITIÑA HAMA AGÜBÜRIGU
Ida luba híderaguni hisaani lun lasagarun puntu buiti leskuelarugu
Genegeti mínsiñe tan leskuela lun hisaani, mabusenrunti ladügüni dasi le íchugubei lun. Ida liña lidin lun? Adügati katei le lun ararireina lan puntu le lasagarubei ani ámuhali giñe ligaburi. Ka lunbei hadügüni lun híderaguni hisaani lun lasagarun puntu buiti?
Le lunbei hasubudiruni
Adügati ladügüdarun hawagun hirahüñü lun laganwoundun turobuli. Adügati ladügüdarun luagu irahü lun ladiheridun saragu dandu leskuelarugu kei múnada. Másiñati leyeehan lun gayara lan labulubudun lidiheri, laramuduni átiri lan lasagarun, ladügün kamá huguya aseinirubarun ubanaü to ñein lubéi larufudúa átiri lan lasagarun o moudin lan leskuela. Gánwountimarügüti turobuli.
Gayaraati ladügün hedewehan idewesei lun lun lasuseredun aban katei le magurabun humuti. Ariñagati aban úguchili gíriti Andrew: “Lun gayara lan wínchahanu wasaani áfaaguatiwa lun wedewehan idewesei tun ladüga tasagarun puntu buiti, según warihini, adügarügüti katei le lun táfaagun lun tibihin idewesei. Dan le ǘnabu lan puntu le tasagarubei hiruntimaatu ladüga mibihin tan idewesei ladüga ǘnabu lan puntu le tasagarubei”.
Manügünbei buiti lun hisaani híchuguni duru hawagu máisturugu. Gayaraabei ladügün le lun lasaminarun hisaani gayara lan lasagarun puntu íñuti sin láfaagun. Gayaraabei giñe ladügün lun líchuguni duru hawagu amu luagu lichara guánarügü luma lun lagurabuni haransehani amu lituróbulin. Lidan murusun dimurei mafurendeirunbei ánhara lun lichara.
Le lunbei hadügüni
Ragügua humá hungua. Anhein gáñiñu hiña lubéi, mabuidunti lun hayanuhan hama hisaanigu libügürü puntu le lasagarubei leskuelarugu. Ariñagati aban úguchili gíriti Brett: “Au tuma nani weiriou ariha wamaali buidu lan lun darangilu wamá ani gayaraabei gunfurandatima wamaniña wasaanigu buidu”.
Adundehani tídangiñeti Bíbülia: “Kada aban hídangiñe lunti aranseñu lan lun laganbun, gama lumoun lunti hámaru lan lun ladimurehan luma lun lagañidun” (Santiagu 1:19).
Subudi huméi ka lan turobulibei. Létima lébubei lasagarun irahüñü puntu ǘnabuti leskuelarugu ladüga lananihóun lun, lasansihan leskuela anufudei tuéi egüsámini, turobuli hadan iduheñu, marumugun lan, lilouguan oura luma meteni lan lun le arufudahóubei. Masaminara humá magúali lan hisaani.
Adundehani tídangiñeti Bíbülia: “Ha alidihatiña buidu, buiti lidin houn” (Ariñawagúni 16:20).
Adüga humá lun ménrengun lan lun irahü lafurendeirun. Ru humá lóurate aturiahani luma lun lóurate ladügüni dasi le íchugubei lun leskuelarugu. Ñein lan aban fulasu lun ladügüni iraü lidasin sin leberesehani katei kei burí bigibigitu o gágamuru. Fánreingua huméi dasi lidan murusun lun gayara lan letenirun hisaani lun. Ariñagati Hector, aban úguchili Yámanina: “Dan le ayarafadeina tiña lan egüsámini aba waturiahan murusunraü sagü weyu lubaragiñe wígiruni sun katei lubá lagumuhóun oura”.
Adundehani tídangiñeti Bíbülia: “Gadaaniti sun katei ya ligibuagu ubóu le” (Apurichihati 3:1).
Ínchaha huméi lun busén lan lafurendeirun. Anhein ibiha hisaani guentó lun gufuranda lani buiti le asagarubei leskuelarugu giñe, ladügüba lun laturiahan. Kei hénpulu larihibei gayara lan tíderaguni matemátika lun lasubudiruni ida liña lan layusuruni seinsu danme le lagastarun.
Adundehani tídangiñeti Bíbülia: “lbihabá lichú aau luma lubuidun ichügü [...] Hínsiñela bun” (Ariñawagúni 4:5, 8).
Le lunbei hadügüni. Madüga huméi lidasin hisaani, íderaguarügü huméi. Ariñagati Andrew: “Afiñetu meha wasaani luagu lualin wachügü ani mayusu tumuti tichügü”. Arufudaha humá lun hisaani lun ladügüni lidasin lungua.