“Barühadina meha darandi-nefu irumu maríeiñu tuma Sofíaa dan le tóunwenbei lárigiñe tásügürün saragu dan lau sandi. Íderagua hamutina meha numadagu saragu, áfaagua au lun nakipuragun nungua beresegu. Íbini ítara, sügütina aban irumu lau aban óunwenbu igarigu le siñá numuti awanda. Sagü meha murusun dan lasansiragun ligaburi nasandiragun nungua. Íbini guentó, lau sun gúnfulimemeeru lan ǘrüwa irumu lúmagiñe tounwen, anihein dan nasandirun aban óunwenbu igarigu sódini” (Kostas).

Féridihadün san somu hiduhe o humada lidan óunweni? Anhein ítara liña lubéi, másiñati sandigua humá hungua kei Kostas. Míbeti katei adügüti lun lasandirúniwa saragu igarigu luma lubucha uagu kei dan le tounwen lani gürigia weiriou o lounwen tani gürigia weiriei, aban iduhei o aban umadaü buiti. Arufuda hamuti sásaamu lidan egeburihani inarüni lan lira. Ariñagati aban arütíkulu tidan garüdia to gíriboun The American Journal of Psychiatry “furangu lan óunweni lan féridi le wéiritimabei ani le duratimati lídangiñe súngubei”. Dan le hásügürün gürigia lídangiñe óunwenbu igarigu le lanügübei egeburihani, másiñati álügüdagua hamá houngua: “Átiribei san dan nau asandiragua nungua ítara? Lagundaarayaba san nibagari? Kaba san nadüga lun nadarirun gurasu?”.

Ounabúati álügüdahani burí le tidan garüdia Agaguduabá! to. Layanuhaba leweñegua arütíkulu luagu lénrengunga le úmabei gayara lan hadunragun anhein hegeburihaña lubéi. Ánheinti lidan le líbiri arütíkulu, hadariruba adundehani le gayaraabei líderagunün iñuragua lídangiñe igarigu le hasandirubei.

Agurabatiwa lun tíchugun garüdia to gurasu luma ídemuei houn sun ha egeburihabaña.

Lau sun añahein lan sásaamu ayanuhatiña luagu katei burí le hasandirubei egeburihatiña aban lárigi aban, ámuñegueinarügüti ligaburi lagagibudagun kada egeburihati luma ligarigu. Mini lan san le añahein lan egeburihatiña ha maweirinti hasandirun íruni o ragüguarügü hamá houngua luéi harufuduni le hasandirubei? Mama súnwandan lasuseredun ítara. Lau sun ídeha lan layanuhan egeburihati luagu ligarigu, anha ligía lun le asuseredubei, úati ábanrügü igaburi buiti lun liñuragun lídangiñe ligarigu. Arufuda lumuti gürigia ligarigu según ligaburi, hechun lílana fulasu le ñein lubéi laweirida, sügǘ le winwan láalibei luma ligaburi lounwen legeburi.

KA LÉNRENGUNGA ÚMABEI GAYARA LAN HAGAGIBUDAGUN?

Másiñati ibidiñe lan houn ha egeburihabaña kaba lan uma hagagibudagua lárigiñe lounwen somu haduhe o hamada. Íbini ítara, hiibe-agei egeburihatiña, gagibuguatiña luma fiu lénrengunga, sandí hagía fiu katei. Ariha wamá fiu lídangiñe:

Lasansiragun ligaburi hasandiragun houngua sódini. Liibe-agei dan, ayahuahatiña gürigia ha egeburihabaña, álugatiña luagu hegeburi ani gayaraati hagañidun sódini. Gayaraati laganwoundun le hasandirubei dan le haritagun o gewenedü hamá somu katei. Lidan lagumeseha, másiñati gürewei lan houn hafiñeruni le asuseredubei o libidiñedun houn kaba lan hadüga. Afuranguagüda tumuti Tina le tasandirubei dan le lóunwenbei tani weiriei sódini, ariñagatu: “Aba libidiñedun nun kaba lan nadüga. Siñati meha nayahun. Wéiriti meha nidiheri darí lun hénrengu lan nun nawaragun. Le linarün katei, siñati meha nafiñeruni le asuseredubei”.

Hasandirun mederaaguagüdüni, igañi luma duru. Abahüdaguati Iwán: “Lárigiñebei lounwen wasaani Erik le meha wein-gádürübei irumu lau, wéiriti meha nigañi dandu au kei Yolanda to nani weiriou. Wéiritu wanigi luagu lira lugundun ibidiñeti yebe woun gañi gañi wamá ítara. Sanditiwa giñe duru ani álügüdaguatiwa woungua anhein gayara lubéi hamuga meha wadügün somu katei lun mounwen lan wasaani”. Sanditi meha giñe Alehánduru duru dan le tóunwenbei lani weiriou lárigiñe tálüdün lau sandi. Ariñagati: “Saminatina furumiñe lígiruña lan meha Bungiu lun nasufurirun ladüga nuriban. Lárigiñe, aba nasandiragun nungua wuriba ladüga ítara liña lan meha lira kamá níchuguñein duru luagun Bungiu luagu le asuseredubei”. Ariñagati Kostas, le uágubei wayanuha lidan arütíkulu le ásügürübei: “Anihein meha dan nagañidun tuma Sofía ladüga tounwen. Lárigiñe, aba nasandirun duru luagu nasaminarun ítara. Lau sun luwuyeri, mama meha tidurun”.

Lénrengun lasaminarúniwa furangu. Gayaraati anihein lan dan lasansiragun ligaburi hasaminan egeburihatiña sódini o múaran lan luma inarüni. Kéiburi lasaminarun le egeburihabei aganba lani lumalali le óunwebei, sandí lani lubadu o ariha lani. Másiñati giñe hénrengu lan houn hetenirun lun somu katei o haritaguni. Ariñagatu Tina: “Anihein meha dan, dan le nayanuhaña lan luma somu gürigia, sódini níchugun fe lídanñein lan amu katei nisaminan. Saminatina meha saminaya luagu sun le asuseredubei dan le lóunwenbei Timu. Adügati meha lásiñarun lederaaguagüdün nisaminan luagu somu katei lúntima nadiheridun”.

Habusenrun herederun hábugua. Másiñati lasafaragun gürigia le egeburihabei dan le hádanñein lan gürigia o masandiragun lan lungua buidu. Ariñagati Kostas: “Mésebetina meha ni hadan maríeitiña ni hadan mamarieidungiña”. Ariñagatu giñe Yolanda to lani Iwán weiriou: “Hénrenguti meha nun násügürün dan hama gürigia ha ekeharubaña luagu haturóbulin le genegebei maweirin lan kei le úmabei wagagibudagua. Añahein meha giñe abahüdagutiña woun luagu lubuidun lidin houn hasaanigu. Gúndaatina meha hau, íbini ítara, güreweiti meha nun naganbuniña. Lau sun subudi lan meha nun luma lun nani weiriei mosu lan wasigirun wabaruaguóun, le linarün katei, maguraasuntiwa meha lun wagagibudagun luma sun lira, henren ligía woun”.

Luriban átuadi. Gayaraati giñe halamachun o lagidarun halama, hadibunedun o hadureidun, harumugun saragu o lagidarun hadabagu. Abahüdagua lumuti Aarón le asuseredubei lun lidan furumiñeti irumu lárigiñe lounwen lúguchi: “Gaturobulintina meha lun narumugun. Sagü meha áriebu nagagudun lidan ligiaméme oura asaminara luagun lounwen núguchi”.

Abahüdaguati Alehánduru wuriba lan meha látuadi mébunouga, ariñagati: “Ñǘdüntina saragu wéiyaasu lumoun surusia ani chóurugüda lumuti meha nun ua lan ni kata nuagu. Aba nagumeserun asaminara háfuga lan egeburihani lan adügübei lun nasandiragun nungua wuriba”. Íbini meha gidá lan le lasandirubei Alehánduru luéi lau lásügürün dan, buiti ladüga lau lidin lumoun surusia. Gayaraati ladügün egeburihani lun ladagarun somu sandi luagu egeburihati, lakomoradun sandi le aniheinhalibei luagu o mere lan lúgubu lun lageindagun luma sandi.

Ligürewein hetenirun lun dasi súdiniti. Afuranguagüdati Iwán: “Lárigiñebei lounwen Erik, mosu meha wawisahan, mámarügü houn waduheñu luma houn wamadagu, mosu meha giñe wawisahan houn saragu amu gürigia, kéiburi lun liyubudiri luma lun tabureme muna to meha ñein lubéi lawinwanda. Mosu meha giñe ladügǘn saragu gararaguaü le lánina lúrudu, ariha wagíame kaba lan wadüga lau lílagu. Lunti meha wetenirun lun sun lira, lau sun meha buchá lan wawagu dandu lidan ligaburi wasandiragun woungua, kei luéigiñe wágubu luma wasaminan”.

Ánheinti houn amu, lárigiñehali sun katei liabin le hénrengutimabei, dan le mosu lan harihin lau burí katei le meha aubei lariha gürigia le óunwebei. Ligía meha asuseredubei tun Tina, abahüdaguatu: “Nani meha weiriei arihibei lau sun luáguti seinsu, kéiburi lau le wámabei bánkurugu. Guenleti, nuguyaaru meha lun narihin lau lira, ligía adügübei lúntima laganwoundun nidiheri. Álügüdaguatina meha nungua anhein gayaraabei lubéi nagunfulirun buidu lau dasi lira”.

Dan le wasaminarun luagun sun le lanügübei egeburihani lun wágubu, lun wasaminan luma lun ligaburi wasandiragun woungua, le uágubei sun liña lan wayanuhan, másiñati genege lan siñá lan liñuragun gürigia lídangiñe. Inarüni hanarime lan igarigu le asandirúbei, íbini ítara, huuti lasubudiruni gürigia le sun líñabei legeburihan lénrengunga le gayaraabei lagurabuni. Haritagua huméi másügürün hamá sun gürigia lídangiñe sun burí lénrengunga le gayaraabei lanügüni egeburihani. Gayaraati giñe hárügüdün egeburihatiña gurasu lau hasubudiruni sügǘ hamá hiibe-agei gürigia lídangiñe ligiaméme.

LAGUNDAARAYABA SAN NIBAGARI?

Le gayaraabei hagurabuni. Madurarunbei lanarime igarigu le hasandirubei lun súnwandan; agidareina luba huéi lau lásügürün dan. Úati mini lan lira hareidaguba lan sunsuinagubei o habulieidubei lan hegeburi. Íbini ítara, adilireina luba igarigu ligía murusun murusun, lau sun gayaraabei lan lagiribudagun sódini, danme haritagun somu katei o lachülürün somu weyu espechaliti. Lau lásügürün dan, ibihatiña hiibe-agei gürigia lunya labuidurun hasandiragun houngua luma lun hetenirun lun le lunbei hadügüni. Dántima le ibiha hamani hídehan haduheñu hama hamadagu ani adüga haméi le mégeiwabei lun hiñuragun lídangiñe le gádanbaliña.

Átiribei dan lidura? Añahein gürigia sügütiña lídangiñe le hénrengutimabei fiu hati lárigiñe hegeburihan. Añahein amu gumesetiña asandiragua houngua buidu lárigiñe aban o biama irumu. Añaheinti amu, durati hagarigu lóugiñe lira.a Ariñagati Alehánduru: “Lidan nikesin, ǘrüwañein meha irumu nau lau lanarime igarigu”.

Gaguraasun humá, hámaru huguyame hungua. Haritagua huméi madurarunbei lan higarigu lun súnwandan. Anihein funati somu katei le gayaraabei hadügüni lun lawalidagun higarigu luma lun madurarun lan lóugiñe dan le lubeibei?

Anhaün áluaha adundehani libügürü le gayaraabei hadügüni lun hasigirun hubaruaguóun lau sun hegeburihaña lan, hadariruba saragu milu, ani ñeinbei lídangiñe húutimati luéi amu. Másiñati ladüga lan ámuñegueinarügü lan ligaburi lagagibudagun kada egeburihati luma ligarigu, kei buga aubei warihei. Ligíati, le gayaraabei lahuudun lun aban gürigia, másiñati mahuudunbei lan lun amu.

Íbini ítara, anihein adundehani méiniti le húuhalibei houn saragu gürigia. Liibe-agei dan, ru hamuti sásaamu lidan egeburihani adundehani burí le ani arufuda lumuti lichú aau le tídanbei Bíbülia, aban binadu líburu.

1: ANHA HUMÁ LUN HÍDERAGUNÜN HIDUHEÑU HAMA HUMADAGU

• 

  Añahein sásaamu saminatiña anihán lan puntu le ídehatimabei lun hiñuragun egeburihatiña lídangiñe hagarigu. Íbini ítara, másiñati ñeinbei lan dan busén humá herederun hábugua o hasafaragun hama ha álugubaña híderagunün. Gasuseredaditi lira houn gürigia.

• Masaminara humá mosu lan ñein lan somu gürigia huma súnwandan, íbini ítara, moun lumuti hadisedun sunsuinagubei hawéi amu, lugundun másiñati hemegeirubei lan hídehan amu weyu. Ayanuha humá lau gamadóuni danme hariñaguni houn amu ka lan hemegeirubei lumoun le memegeirun hubéi.

• Másügüra humá anhein sandí hubéi megei humá lun ñein hamá gürigia huma ni anhein busén hubéi herederun hábugua.

ADUNDEHANI TÍDANGIÑETI BÍBÜLIA: “Buítimatiña biama luéi aban, lugundun [...] anhein éiguada aban hádangiñe, liñuragubei le aban” (Apurichihati 4:9, 10).

2: HOU HUMÁ BUIDU ANI ADÜGA HUMÁ EHERSÍSIU

• Líderagubadün heigin buidu lun buídutima lan hahandilihani lubucha uagu le lanügübei egeburihani. Áfaagua humá lun heigin furuda, híduru, fagudiya luma éigini le maganati saragu agülei.

• Gurá humá bandi duna luma amu burí uniñein le buiti lun átuadi.

• Anhein malama hubéi, hou humá murusun sagü murusun oura. Gayaraati giñe hálügüdüni surusia ka lan gayaraabei hátahani lun libihini húgubu erei le mibihin lubéi lídangiñe le héigubei.a

• Líderagubadün háfuridun éibuga furese o hadügün amu luwuyeri ehersísiu lun lagidarun furumiñeguarügü katei híruti le hasandirubei huéi. Añahein gürigia yusu hamuti dan le hásügürübei adüga ehersísiu lun hararamagun asaminara luagun le óunwebei, ani añahein amu, yusu hamuti dan ligía lun masaminarun hamá luagun lira.

ADUNDEHANI TÍDANGIÑETI BÍBÜLIA: “Úati gürigia meberesenti lau lúgubu guánarügü; hóugüdarügü lumuti, góunigilei” (Éfesuna 5:29).

3: ARUMUGA HUMÁ BUIDU

• 

  Lau sun súdini lan arumuguni houn sun gürigia, súdinitimati houn ha egeburihabaña lugundun wéiritimati lubucha hawagu.

• Duari humá luéi hatun saragu uniñein gabacharuadaditi, gafe, chuguladi o katei líbeina lira lugundun gaganati katei le gayaraati lagidaruni idabagu.

ADUNDEHANI TÍDANGIÑETI BÍBÜLIA: “Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (Apurichihati 4:6).

4: MAWEIRINLÁ HARABACHUN LUAGUN ABAN KATEI

• 

  Kei ámuñegueinarügü lan ligaburi lagagibudagun kada egeburihati luma ligarigu, mosu hasubudiruni ka lan buídutimabei hun.

• Añahein saragu, íderagua lumutiña hayanuhan luagu hagarigu hama amu lun gayara lan hawanduni ani añahein amu, himei hamuti hámanichun lau le hasandirubei. Ámuñegueinarügüti hasaminan sásaamu luagu lisudinin layanuhan egeburihati luagu ligarigu. Anhein sandí hubéi megei humá hayanuhan luagu le hasandirubei hama amu ani hénrenguti hun, gayaraati hagumeserun lau hayanuhan murusun murusun luma somu humada le yarafabei hun.

• Añahein sanditiña megei hamá hayahun, añaheinti amu, iñuraguatiña lídangiñe hagarigu mayahuahanga saragu.

ADUNDEHANI TÍDANGIÑETI BÍBÜLIA: “Subudi tumuti anigi sun tigarigu” (Ariñawagúni 14:10).

5: MAFALARA HUMÁ ÉCHUNI LE DENCHATI

• 

  Añahein egeburihatiña átagutiña o yúsutiña düroga lun hawalidagun lídangiñe hagarigu. Lau lira, hadügüña damichi hóuniwagua. Madurati furumiñeguarügü awalidaguni le gayaraabei lasandiruni gürigia lau ladügüni lira ani gayaraabei lanügün saragu turobuli lun. Áluaha humá hagalumaruni hidiheri lau katei le madügünti damichi.

ADUNDEHANI TÍDANGIÑETI BÍBÜLIA: “Lunti [...] wachibuni sun luwuyeri iwiyei wawariua” (2 Korintuna 7:1).

6: YUSU HUMÉI HIDAANI BUIDU

• Arihaaña saragu egeburihatiña íderagua lániña hadireirun dan labadinagua hayanuhan luagu hagarigu lun hetenirun lun amu katei le ídehati lun masaminarun hamá luagun.

• Gayaraabei hadarirun murusun awalidaguni, anhaün adüga iseri umadagu o hayarafaduntima houn ha húmabaña, hafurendeirun somu fisiu o háluahan hisebáhari.

• Másiñati asansireina luba lan le súdinitimabei hun murusun murusun. Háfuga híchugun fe gíbetimahali lan dan hásügürün adüga amu katei sügǘ lau ayanuha luagu higarigu. Larufuduñeinme lira hiñuraguña lan lídangiñe íruni le lanügübei egeburihani.

ADUNDEHANI TÍDANGIÑETI BÍBÜLIA: “Gadaaniti sun katei [...]: Lidaani ayahuni luma lidaani éherahani” (Apurichihati 3:1, 4).

7: ADÜGAYA HUMÉI LE MEHA HADÜGÜBEI

• 

  Keime harihin gayaraahali lan hadügüni, adügaya huméi katei burí le uágubei héchuda.

• Anhein góurate harumugun, hawadigimaridun o hadügün amu katei, hasandiruba lagiribuduña lan hibagari kei meha.

• Bereseguñu humá lidan katei le adügübei lun lawalidagun higarigu.

ADUNDEHANI TÍDANGIÑETI BÍBÜLIA: “Keiti buíngüdalanu Bungiu lanigi gürigia lau ugundani, maweirinti ladiheridun luagu libagari” (Apurichihati 5:20).

8: MÓUFUDAHA HUMÁ ADÜGA KATEI SÚDINITI

• Asakürihatiña saragu gürigia lárigiñe hadügün somu katei súdiniti murusun dan lárigiñe hegeburihan.

• Anhein gayara, agurabaha humá fiu dan lubaragiñe háguyun, hasansiruni huádigimari o harihin kaba lan hadüga lau lílagu hiduhe.

ADUNDEHANI TÍDANGIÑETI BÍBÜLIA: “Aransehani le saminawati buidu, buiti lasalirun, anhein le adügǘbei lau furesei, barüti günringuaü” (Ariñawagúni 21:5).

9: HARITAGUA HUMÉI HEGEBURI

• 

  Añahein saragu, íderagua lumutiña hadügün katei le ídehati lun haritaguni gürigia le óunwebei.

• Gama humá iyawaü, ílagu o kuadernu to ñein lumuti gayara lan habürüdüni weyu súdiniti le meha hásügürübei. Líderagubadün lira lun hiñuragun lídangiñe higarigu.

• Areida huméi katei burí le adügübei lun haritagun sügǘ buíduburiti, ani ariha huméi danme hasandirun aranseedün lan lun hadügüni.

ADUNDEHANI TÍDANGIÑETI BÍBÜLIA: “Digiguabá bárigoun, saminabá luagu dan le sügühalibei” (2 Lúrudu 32:7).

10: HEIBA ÁGURA PASU

• Adüga humá aransehani lun hemeraagun fiu weyu.

• Anhein siñá lubéi haweiyasuhan luagu saragu weyu, háfuga gayaraabei hadireirun aban o bián weyu lun hásügürün aban lubuidun dan hama humadagu asariñaha béyabu o lidan amu fulasu buiti.

• Láurügü hadügün aban liraüraü asansiruni lidan le hadügübei sagü weyu, gayaraabei líderagunün awandei higarigu.

ADUNDEHANI TÍDANGIÑETI BÍBÜLIA: “Higougu, keimoun wemeraagua lidan aban fulasu le darangilati” (Márükosu 6:31).

11: ÍDERAGUA HUMAÑA AMU

• 

  Mabulieida huméi buídutimabei lan hasandiragun hungua ánhadün íderagua amu.

• Gayaraati hagumeserun lau híderaguniña ha giñe hírubaña luagu lounwen hiduhe o humada. Másiñati megei hamá hayanuhan luma somu gürigia le gunfuranda lumuti igarigu le hasandirubei.

• Gayaraati ladügün híderaguniña amu luma híchugun gurasu houn lun gunda humá luma lunya gasuuni lan hibagari.

ADUNDEHANI TÍDANGIÑETI BÍBÜLIA: “Gúndaatimáati le íchugubei sügǘ láu le erésibirubei” (Adügaü 20:35, Lererun Bungiu to lánina Iseri Daradu).

12: AKUTIHAYA HUMÉI KA LAN SÚDINITIMABEI HUN

• Gayaraati ladügün egeburihani lun lasansirun hisaminan libügürü ka lan súdinitimabei.

• Yusu huméi dan ligía lun hararamagun asaminara luagu ligaburi hanügüni hibagari.

• Anhein mégeiwa, adüga humá asansiruni lidan le súdinitimabei hun.

ADUNDEHANI TÍDANGIÑETI BÍBÜLIA: “Buítimati lidiniwa ábunaha sügǘ lau lidiniwa efeduha, lugundun óunweni hagumuchagülebei sun gürigia, lunti hamugati haritagun ha wínwangiñabaña luagun” (Apurichihati 7:2).

Le linarün katei, úabei ni kata agidaruti higarigu sunsuinagubei. Íbini ítara, ariñagaaña saragu egeburihatiña íderagua lániña hadügün katei kéiburi le iridúbei lidan arütíkulu le lun hárügüdün gurasu. Inarüni anihein lan amu burí adundehani le gayaraabei líderagunün lun hawalidagun lídangiñe higarigu. Íbini ítara, anhein hafalara adundehani burí le yaabei, harihubei hasandiruba lan awalidaguni.

LIDAN LAGUMUHÓUN BURÍ IRUMU, AKUTIHÓUAALI SARAGU LIBÜGÜRÜ EGEBURIHANI. Ani kei buga aubei warihei, arufuda lumuti adundehani le híchugubei sásaamu binadu lichú aau le tídanbei Bíbülia. Arufudati lira húugili lan adundehani le tídanbei. Ani mámarügüñein adundehani le gayaraati lafiñerúniwa luagu wadarira tidan Bíbülia. Anihein giñe ariñahani tidan le siñabei wadariruni lidan amu fulasu, le gayaraabei líchugun gurasu houn egeburihatiña.

• Ichouruni luagu mama lan hasufuriruña waduheñu o wamadagu ha hilaañabaña

  Ariñagatu Bíbülia lidan Apurichihati 9:5 ibidiñe lan “ni kata” houn hilaaña. Ani ariñagatu giñe aba lan lagumuchagun le hasaminarubei (Sálumu 146:4). Ligía tariñagunbei Bíbülia ítara liña lan óunweni kei aban idabagu huliliti (Huan 11:11).

• Gurasu le líchugubei woun wafiñerun luagu aban Bungiu le unbei hínsiñe wamá

  Ariñagatu Bíbülia: “Góunigi lumutiña Aburemei ha harumabaña émeri, ru lumuti giñe larigei lun laganbuniña” (Sálumu 34:15). Mámarügüñein lun wagaranihan tun wanigi lahuuda wafurieidun lun Heowáa lun wariñaguni lun ida liña lan wasandiragun woungua ni lúnrügü wabihin watouhani wasaminan. Le linarün katei, íderagua lumutiwa lun wadügün aban umadaguaü buiti luma Le adügübaliwa, le gayaraabei layusuruni lubafu lun líchugun gurasu woun.

• Füramasei luagu buídutimabei lan ibagari ámuñegü

  Samina huméi ida luba lan ibagari ubouagu ámuñegü danme le habagaridunya hilaaña! Ayanuhatu Bíbülia luagu lira saragu wéiyaasu, kéiburi dan le tayanuhan luagu ida luba lan ibagari ubouagu ámuñegü, ariñagatu: “Laragahabei [Bungiu] sun háguira; úaalime óunweni ni ayahuni ni íruni ni igarigu” (Arufudúni 21:3, 4).

Ídehaali emenigini luáguti háguyuguba lan hilaaña lun hárügüdün saragu gürigia ha afiñebaña luagu Heowá, Bungiu le abürügüdübarun Bíbülia, gurasu. Hilati tani Ann weiriei lárigiñe hásügürün 65 irumu maríeiñu ani ariñagatu: “Chóurugüda tumuti Bíbülia nun mama lan hasufuriruña waduheñu ha hilaguañabaña ani láguyuguagüdübaña lan Bungiu sun ha lídanbaña laritagun. Saminatina luagun lira dan le naritagun luagun nani weiriei ani ítara liña gayara lan nawanduni sügǘ hénrengutimati le násügürübei lidan nibagari”.

Ariñagatu Tina, to buga uáguboun wayanuha: “Ariha naali lídehan Bungiu lidan nibagari lúmagiñe lounwen Timu. Ariha naali líderagunina lau lúhabu le gagañeiradibei dan le nasandirun saragu idiheri. Inarüniti füramasei le tídanbei Bíbülia nun luáguti ñeinbei lan aban águyuguni ani íderagua lumutina lira lun nasigirun nubaruaguóun darime láguyugun Timu”.

Arufuda lumuti dimurei burí lira le hasandirubei saragu míñunu gürigia ha afiñebaña luagu le tariñagubei Bíbülia. Anhein samina hubéi úraga lan le tariñagubei Bíbülia, ka uagu makutihan hubalin ariñahani le arufudubalin gayara lan lafiñerúniwa luagu adundehani le tídanbei ani gúnfuli lan le füramase tubéi? Híchuguba fe Bíbülia lan íchugubalin ídemuei le buídutimabei houn egeburihatiña.

SIGÍ HUMÁ AFURENDEIRA LUAGU ÁGUYUGUNI

Hadariruba bidéu lau ariñahani lidan wani páhina lidan Internet, www.jw.org/cab.

KA ASUSEREDUBEI HOUN HILAAÑA?

Ka asuseredubei woun dan le wóunwegun? Adügati óunabagülei furanguti le tíchugubei Bíbülia lun wibihin gurasu le inarüniti.

Belú humá lidoun LÍBURU-AGEI> BIDEU BURÍ (luwuyeri bidéu: BÍBÜLIA > ARUFUDAHANI TÍDANGIÑETI BÍBÜLIA)

HÍNSIÑETI HAMUGA SAN HUN HAGANBUN UGANU BUITI?

Laganagua saragu ñunsu wuribati, gayaraati funa san wadarirun uganu buiti?

Belú humá lidoun ENSEÑANZAS BÍBLICAS (luwuyeri: FELICIDAD Y PAZ INTERIOR)