Wafurendeiruñein san sun le wayaraati lúmagiñe Heowá?

1. Ka lasaminarubei Heowá luagu larufudahóun houn lubúeingu?

¹ Súdiniti lun Wamaisturun, Heowá, lun larufudahóun houn lubúeingu buidu (Isa. 30:20). Lun furumiñeti Liráü larufudaha furumiñe (Huan 8:28). Íbini lárigiñe lebedaagun Adán, sigiti Heowá arufudaha lau ínsiñehabuni houn gürigia gafigountiña (Isa. 48:17, 18; 2 Tim. 3:14, 15).

2. Ka wadagimanu lánina arufudahani adügǘbei uguñe weyu?

² Uguñe weyu, lalidihañein Heowá wadagimanu lánina arufudahani létima wéiritimabei lidan sun dan. Ítara kei lariñaguni lani Isaíasi profesía, hayabiña míñunu gürigia lídangiñe sun Ubóu lidoun “wübü [le lánina sínbolu] le ñein tubéi litenpulun Wabureme” (Isa. 2:2). Ka un? Lun larufudahóun luáguti lémeri Bungiu houn, anha, lun larufudahan Heowá houn (Isa. 2:3). Lidan irumu lánina eseriwiduni irumu 2010, apurichiha ani arufudaha hamuti gefentiña luagu Heowá inarüni le tídanbei Bíbülia lidan lóugiñe 1.600 míñunu oura. Arufudahóuati giñe sagü dimaasu lidan kéiburi san-seingü-milu damuriguaü lidan sun ubóu, ani adügati musu úaraguati ani gunfuranda ligía, agumeiraguagüdüni lidan lóugiñe seingü-san iñeñein.

3. Ida liña líderagunün arufudahani le líchugubei Heowá?

³ Aranseñu waña buidu. Ma lueirin ídemuei le líchugubei arufudahani le resibi wamaalibei lúmagiñe Bungiu! Ligía subudi wabalin liri Bungiu luma berese lan wau (Sal. 83:18, NM; 1 Fe. 5:6, 7). Óunaba laali giñe álügüdahani burí létima súdinibei kéiburi: Ka uagu wasufurira? Ka uagu wóunwegua? Ida luba wadarirun ugundani le inarüniti? Ka lisuunibei ibagari? Adundeha lumutiwa giñe Heowá lun richagua wamá lidan wabagari, le adügübei lun buidu lan lidin woun (Hos. 1:8).

4. Ka burí programa lánina arufudahani gayarabei weresibiruni, ani ka uagu mosu lubéi wafurendeiruni sun le wayaraati lídangiñe arufudahani le líchugubei Heowá?

⁴ Ruti giñe Heowá arufudahani le espechaliti lun líderagun saragu lubúeingu lun haganwoundagüdüni hani ministeriu. Lidan burí páhina 4 darí 6 furitu aban lísüta lánina ámuñegueinarügü programa lánina arufudahani le gayarabei heresibiruni. Anhein siñá lubéi hidin tidan aban tídangiñe leskuela to, ka uagu mafurendeirun hubalin sun le hiyaraati lídangiñe arufudahani le gayara hubéi eresibira? Agia nibureingiña? Libe-agei dan ínchaha hamutiña hamáisturugu hama amu gürigia lun houdin tidan luba furendei to iñutu. Lubaragiñe wadügüni lira, amisuraha wamutiña san lun haganwoundagüdüni heseriwidun lun Heowá luma lun hasagarun buiti lídangiñe arufudahani le líchugubei? Wafurendeiruni sun le wayaraati lídangiñe arufudahani le líchugubei Heowá, ladügüba lun gunda lan wabagari guentó luma ámuñegü lidan iseri ubóu (Sal. 119:105; Huan 17:3).

Fiú programa lánina arufudahani le líchugubei óundaruni le lani Heowá

Külase lun aliihani luma abürühani

• Lisuuni: Lun hafurendeirun gürigia aliiha luma abürüha lun gayara lan haturiahanu Bíbülia luma lun harufudahani inarüni houn amu.

• Lidura: Según hemegeirun gürigia.

• Fulasu: Luban Hadamuridagun Gefentiña luagu Heowá.

• Ha gayarabei habürüdǘniwa: Sun íbirigu hama gürigia ha busenbaña.

• Lun hebelurun: Aransehatiña wéiyaaña lidan afiñeni lun ñein lan külase burí le, anhein mégeiwa lubéi ani amisuraha hamutiña sun ha busenbaña hidin.

Leskuela Kristiánu lánina Apurichihani

• Lisuuni: Lun larufudahóun houn íbirigu lun gapurichihadi hamá luma lun harufudahani uganu buiti houn amu gürigia.

• Lidura: Súnwandan.

• Fulasu: Luban Hadamuridagun Gefentiña luagu Heowá.

• Ha gayarabei habürüdǘniwa: Sun íbirigu. Amisurahóuwatiña giñe gürigia ha adamuridagubaña gabügürügua, ánhatiña lun le tarufudahabei Bíbülia ani úaraguati habagari luma.

• Lun hebelurun: Adimureha humá luma alidihati Leskuela Kristiánu lánina Apurichihani.

Külase lánina amu iñeñein

• Lisuuni: Larufudahóun houn íbirigu lun hapurichihan lidan amu iñeñein.

• Lidura: Gádürü o seingü hati. Libe-agei dan samudi binaafin lichugúa külase le ani durati aban o biama oura.

• Fulasu: Libe-agei dan tidan Luban Hadamuridagun Gefentiña luagu Heowá to yarafatu.

• Ha gayarabei habürüdǘniwa: Íbirigu ha rútiña buiti hénpulu ani busentiña hapurichihan lidan amu iñeñein.

• Lun hebelurun: Adüga tumuti Beteli aransehani según mégeiwa lan.

Tábunawagun Luban Hadamuridagun Gefentiña luagu Heowá

• Lisuuni: Tábunawagun luma taransehóun Luban Hadamuridagun Gefentiña luagu Heowá. Íbini mama lan aban külase lira, arufudahóuati ámuñegueinarügü fisiu houn íbirigu ha nadagimeinbaña lau sun hagundan lun gayara lan hídehan lidan ábunaguni.

• Lidura: Según le gádanbalin íbiri le nadagimeinbei lau sun lugundan.

• Fulasu: Furumiñeguarügü fulasu le lábugiñebei haríaahan Wéiyaaña ha arihibaña lau tábunawagun Luban Hadamuridagun Gefentiña luagu Heowá. Dan giñe le ñein lan günringuaü le lanügün luriban dan, amisurahóuatiña fiú íbirigu lun hidin íderaguaña íbirigu ha asufurirubaña damichi.

• Ha gayarabei hadügüni: Ha badiseihaña ani ru hagíame buiti hénpulu. Gayarati wügüriña hamá o würiña, meberesenga anhein adügañaha hamaali lubéi wadagimanu le.

• Lun hebelurun: Amuriaha humoun gárada Cuestionario para trabajadores voluntarios en Salones del Reino (S-82-S) hama wéiyaaña lidan afiñeni ani buíngüda humoun.

Leskuela houn Prekursorugu

• Lisuuni: Lun larufudahóun houn prekursorugu lun gayara lan ‘hagunfulirun buidu lau hawadigimari’ (2 Tim. 4:5).

• Lidura: Bián dimaasu.

• Fulasu: Beteli anúadirubalin, ani libe-agei dan tidan Luban Hadamuridagun Gefentiña luagu Heowá to yarafatu.

• Ha gayarabei habürüdǘniwa: Íbirigu ha barühaña íbini aban irumu kei prekursoru ha adügübaña ǘrüwa-wein-diisi oura.

• Lun hebelurun: Aguraba huméi adundehani le lunbei líchugun óunigiruti sirkuitu, sin lariñawagun lun, ligía abürüdübaliña ha lúnbaña houdin.

Leskuela houn Iseri Betelitagu

• Lisuuni: Adügǘwatu leskuela to lun tíderaguniña iseri betelitagu lun buidu lan lidin houn lidan heseriwidun Betelirugu.

• Lidura: Aban oura lidan dimaasu luagu disisi dimaasu.

• Fulasu: Beteli.

• Ha gayarabei habürüdǘniwa: Betelitagu o íbirigu ha nadagimeinbaña lau hagundan tidan Beteli luagu saragu dan (aban irumu o lóugiñe).

• Lun hebelurun: Beteli abürüdübaliña ha lúnbaña hibihini.

Leskuela houn Wéiyaaña hama Ídehatiña

• Lisuuni: Lun larufudahóun houn wéiyaaña lidan afiñeni luma houn ídehatiña lidan damuriguaü lun hadügüni hawadigimari, dandu lidan katei lánina aransehani kei lidan hóunigiruni damuriguaü (Adü. 20:28). Adügǘwatu leskuela to kada fiú irumu, según le desidírü lubéi Sétanu le Arihibei lau Damuriguaü lidan sun Ubóu.

• Lidura: Lúmagiñe fiú irumu le sügühalibei, durati aban weyu dimí houn wéiyaaña lidan afiñeni, luma aban weyu houn ídehatiña lidan damuriguaü.

• Fulasu: Libe-agei dan adügǘwatu tidan Luban Hadamuridagun Gefentiña luagu Heowá o tidan muna to ñein lubéi ladügǘwa Adamurini.

• Ha gayarabei habürüdǘniwa: Wéiyaaña lidan afiñeni hama ídehatiña lidan damuriguaü.

• Lun hebelurun: Óunigiruti sirkuitu amisurahabaliña ha lúnbaña houdin.

Leskuela houn Wéiyaaña lidan afiñenia

• Lisuuni: Lun híderawaguniwa wéiyaaña lidan afiñeni lun hagunfulirun lau buligasion le heresibirubei lúmagiñe Bungiu.

• Lidura: Seingü weyu.

• Fulasu: Beteli anúadirubalin, ani libe-agei dan tidan Luban Hadamuridagun Gefentiña luagu Heowá, o tidan Muna to ñein lubéi ladügǘwa Adamurini.

• Ha gayarabei habürüdǘniwa: Wéiyaaña lidan afiñeni.

• Lun hebelurun: Beteli amisurahabaliña ha lúnbaña houdin.

Leskuela houn Óunigirutiña Distritu luma Sirkuitu hama hánigu Weirioub

• Lisuuni: Lun híderawaguniwa óunigirutiña sirkuitu luma distritu lun buídutima lan hetenirun lun burí damuriguaü, lun weiri lan hawadigimaridun lidan “apurichihani luma arufudahani” luma lun hóunigiruniña gürigia ha lábugiñebaña haríaahan (1 Tim. 5:17; 1 Fe. 5:2, 3).

• Lidura: Bián hati.

• Fulasu: Beteli anúadirubalin.

• Ha gayarabei habürüdǘniwa: Óunigirutiña sirkuitu luma distritu.

• Lun hebelurun: Beteli amisurahabaliña ha lúnbaña houdin úara hama hánigu weiriou.

Leskuela Kristiánu houn Wügüriña Mamarieidungiñac

• Lisuuni: Lun larufudahóun houn wéiyaaña lidan afiñeni luma houn ídehatiña lidan damuriguaü ha mamarieidungiña, lun hibihin iseri burí buligasion. Hibe-agei ha güraduaruabaña tídangiñe leskuela to, óunahouatiña eseriwida lidan fulasu le ñein lubéi mégeiwa hamá apurichihatiña lidan guánarügü hageira. Añahein hádangiñe gayarati hóunahoun eseriwida lidan amu ageiraü, anhein aranseñu haña lubéi lun hóunahoun.

• Lidura: Bián hati.

• Fulasu: Beteli anúadirubalin, ani libe-agei dan tidan Luban Hadamuridagun Gefentiña luagu Heowá, o tidan Muna to ñein lubéi ladügǘwa Adamurini to yarafatu.

• Ha gayarabei habürüdǘniwa: Wügüriña mamarieidungiña ha gúnfulihaña lúmagiñe 23 darí 62 irumu, ha buiti hátuadi, ani aranseñu haña lun heseriwidun houn íbirigu luma luagu uganu luáguti Larúeihan Bungiu le ñein lubéi mégeiwa apurichihatiña (Mar. 10:29, 30). Mosu barühaña lan biama o lóugiñe biama irumu mararamagunga eseriwida kei wéiyaaña lidan afiñeni o kei ídehatiña lidan damuriguaü.

• Lun hebelurun: Lidan adamurini le lánina sirkuitu lidan fiú fulasu amisurahóuatiña ha busenbaña hidin, lidoun aban adamuridaguni le ñeinba lubéi hibiha lanwoun ariñahani.

Leskuela Kristiánu tídangiñeti Bíbülia houn Maríeitiñad

• Lisuuni: Lun lichugún arufudahani espechaliti houn maríeitiña lun wéiritima lan layusuruniña Heowá luma lóundarun. Hibe-agei íbirigu ha güraduaruabaña tídangiñe leskuela to, óunahouatiña eseriwida lidan fulasu le ñein lubéi mégeiwa hamá apurichihatiña lidan guánarügü hageira. Gayarati hóunahoun hádangiñe eseriwida lidan amu ageiraü, anhein aranseñu haña lubéi lun hóunahoun.

• Lidura: Bián hati.

• Fulasu: Le furumiñeti burí külase gumeseti lidan Fulasu lánina Arufudahani tidan Watchtower, Patterson (Newayoru). Láume lásügürün dan, lichugúba amu burí külase, lidan fulasu le lunbei tariñaguni Beteli, chóuruti tídanba lan Luban Hadamuridagun Gefentiña luagu Heowá o tidan Muna to ñein lubéi ladügǘwa Adamurini.

• Ha gayarabei habürüdǘniwa: Biángubei hagía mosu gúnfulihaña lan lúmagiñe 25 darí 50 irumu, buidu lan hátuadi, ani barühaña lan biama o lóugiñe biama irumu eseriwida lidan dan dayarüti mararamagunga luma lun harufuduni ligaburi Isaíasi, dan le lariñagubei: “Anahán, óunahabana” (Isa. 6:8). Mosu giñe barühaña lan bián irumu lúmagiñe hamarieidun luma lun gayara lan heseriwidun le lubéi megei hamá apurichihatiña.

• Lun hebelurun: Lidan adamurini le lánina weyu espechaliti lidan fiú fulasu, amisurahóuatiña ha busenbaña hidin lidoun aban adamuridaguni le ñeinba lubéi hibiha lanwoun ariñahani.

Leskuela tídangiñetu Bíbülia Galaadü

• Lisuuni: Lun larufudahóun houn prekursorugu luma houn amu íbirigu ha eseriwidubaña lidan dan dayarüti lun heseriwidun kei misioneru.

• Lidura: Seingü hati.

• Fulasu: Fulasu lánina Arufudahani tidan Watchtower, Patterson (Newayoru).

• Ha gayarabei habürüdǘniwa: Danme le habuinchagüdünu hagaradan, biángubei hagía mosu barühaña lan biama o lóugiñe biama irumu eseriwida lidan dan dayarüti, ǘrüwa lúmagiñe habadiseirun, bián lúmagiñe hamarieidun luma lun gúnfulihaña lan lúmagiñe 21 darí 38 irumu, mosu buidu lan hátuadi, gariñagadi hagíame inglesi. Anhein gúnfuli habéi lau le mégeiwabei, gayarati giñe habürüdǘn prekursorugu ha eseriwidubaña lidan amu ageiraü (íbini ha eseriwidubaña kamá misioneru), óunigirutiña sirkuitu o distritu, betelitagu, íbirigu ha güraduaruaña tídangiñe Leskuela Kristiánu houn Wügüriña Mamarieidungiña o Leskuela to Aranserubaliña íbirigu lun aban Ministeriu Espechaliti o Leskuela Kristiánu tídangiñeti Bíbülia houn Maríeitiña.

• Lun hebelurun: Lidan adamurini le lánina distritu lidan fiú ageiraü amisurahóuatiña ha busenbaña hidin lidoun aban adamuridaguni le ñeinba lubéi hibiha lanwoun ariñahani. Gama lumoun, anhein madügǘn lubéi adamuridaguni le lidan ageiraü le ñein lubéi haganawa ani hínsiñeti hamuga hun hidin, gayarati habürühan tidoun Beteli to arihiboun lau ageiraü le ñein lubéi heseriwida lun hamuriahan lanwoun ariñahani.

Leskuela houn Íbirigu ha Arihibaña tau Beteli hama hánigu Weiriou

• Lisuuni: Lun híderawagun íbirigu ha Arihibaña tau Beteli lun buídutima lan hetenirun lun wadagimani le adügǘbei Betelirugu luma lun hetenirun lun wadagimanu le gánibei luma eseriwiduni lidan burí damuriguaü luma wadagimanu le hadügübei óunigirutiña sirkuitu luma distritu, luma giñe tásügüragüdüniwa agumeiraguagüdüni lidoun amu iñeñein, imprimírua tan luma tóunahoun, luma wadagimanu le adügǘbei tidan ámuñegueinarügü áfisi (Luk. 12:48b).

• Lidura: Bián hati.

• Fulasu: Fulasu lánina Arufudahani tidan Watchtower, Patterson (Newayoru).

• Ha gayarabei hibihini: Íbirigu ha Arihibaña tau Beteli o lau Ageiraü o ha resibi hamaalibei aban wadagimanu kei lira.

• Lun hebelurun: Amisuraha lumutiña Sétanu le Arihibei lau Damuriguaü lidan sun Ubóu ha lúnbaña hidin úara hama hánigu weiriou.

[Abürüdǘni burí]