Apurichihatiwa sun dan
1. Ida liña wasubudiruni aranseñu haña lan meha furumiñetiña kristiánugu sun dan lun hapurichihan?
1 Apurichihatiña ha arufudubaña ubebeni ha meha awinwandubaña lidan furumiñeti sígulu, “meredeti” meha hapurichihani uganu buiti le ñein habéi gürigia (Adü. 5:42). Chóuruti dan lan meha le hapurichihan muna tuagu muna apurichiha hamá lun furumiñeguarügü ásügürüti ümadarugugiñe. Ani ánhaña meha ñüdün agañeiha mágidurugu, háfuga yusu hamani sun chansi le hadarirun lun hapurichihan. Ítara kei Hesusu, súnwandan aranseñu hamá lun hapurichihan (Mar. 6:31-34).
2. Ka un lunti lubéi aranseñu wamá wagía le gíribei gefentiña luagu Heowá?
2 Aranseñu sun dan. Arufuda lumuti iri le wanügübei dandu le wadügübei luma kátañadiwa lan (Isa. 43:10-12). Lunti aranseñu lan aban gefenti luagu Heowá sun dan lun lóunabun luagu lemenigin, mámarügü dan le lapurichihan muna tuagu muna (1 Fe. 3:15). Saminadün san luagun sun chansi le ídanbei gayara lan hapurichihan dan le mama lan muna tuagu muna luma luagu le gayarabei hariñaguni? Barütün san agumeiraguagüdüni húmagua súnwandan lun híchugun houn ha arufudubaña busén hamá haganbun? (Ari. 21:5.) Tuagunrügüñein san muna tuagu muna hapurichiha, o yusu humuti sun chansi anhein gayara lubéi, lun hapurichihan lidan amu fulasu?
3. Ka uagu buídutima lubéi wariñagun apurichihani lidan “guririguaü” lun apurichihani ǘmadarugu, le ñein lubéi tamuñeira karü, párükerugu luma lidan bísinisi?
3 Apurichihani lidan “guririguaü”. Kaba hamuga dimurei buídutimabei lun layanuhóun luagu lapurichihóun ǘmadarugu, le ñein lubéi tamuñeira karü, párükerugu luma lidan bísinisi? Ariñagati apostolu Pábulu mámarügüñein lan muna tuagu muna lapurichiha apurichiha lan giñe lidan “guririguaü” (Adü. 20:20). Ligíati lapurichihóun lidan “güririguaü” ligía dimurei buídutimabei lun wayanuhan luagu luwuyeri apurichihani le. Inarüni luagu apurichihani lan muna tuagu muna ligía lan manera méinitimati ani buídutima ligía lun lapurichihóun uganu luáguti Larúeihan Bungiu. Gama lumoun, kátima san meha habusenrunbei furumiñetiña apurichihatiña? Mámarügü meha hadaünhan hábiñe gürigia lubaragiñe lira busentiña meha hayanuhan hama gürigia. Ligíati, yusu hamuti meha sun chansi lun hayanuhan luagu inarüni, hapurichihan lidan güririguaü, luma muna tuagu muna. Ani lun wagunfulirun lau wani ministeriu buidu buidu lunti wadügüni ligiaméme (2 Tim. 4:5).