Ka uagu lunti lubéi wakutihanu Bíbülia?
Gíbetimaharu Bíbülia afanreinhóutu ubouagu sügǘ tau furumiñeguarügü líburu. Aliiha humaaru san tubuidun líburu to? Lidan sun sígulu le sügühalibei, darihaña gürigia lídangiñetiña sun néchani, gurasu luma emenigini lidan uganu le tídanbei ani daritiña adundehani le huuti. Gama lumoun, añahein saragu maliihan hamagiru ani añahein fiú, dandu afiñetiña kei mafiñentiña hínsiñeti hamuga houn hasubudirunu buidu. Anhein hugía lubéi aban hádangiñe, tíderagubadün garüdia to lun hatatirun adügei.
LUBARAGIÑE haliihanu, buiti hasubudirun fiú katei tuagu. Bíbülia, to giñe subudiwaboun kei Sandu Bürütu, tóundaragun 66 líburu lidan aban. Furumiñetu Agumesehani tiri, to tagumuhóun Arufudúni.
Kati isaminan tídanbei Bíbülia? Buiti álügüdahani le. Bián-wein wügüriña abürüdübarun 66 líburu to, lidan 1,600 irumu. Ani súdiniti ua lan ni aban ariñaguti lisaminan lan labürühabei. Lubaragiñe lira, ariñagati aban hádangiñe: “Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni” (2 Timotéu 3:16). Ariñagati amu: “Adimurehati lani Wabungiute sífiri nídangiñe; anihein lererun tuagu niñeñe” (2 Samueli 23:2). Kei warihini, ariñaga hamuti abürühatiñu Bíbülia lisaminan lan Heowá Bungiu, le Labureme sun ubóu tídanbei Bíbülia. Bürüwati tidan ru lumutu lan woun lun wasubudiruni.
Súdiniti giñe wasubudiruni katei méinitimati le uágubei tadimureha Bíbülia: Líchuguba Bungiu aban arúeihani sielu lun lasubudirúniwa ani inebewa ligíame liricha lun larúeihaniña gürigia. Lidan le líbiri páhina, harihibei ábanmeme lan saminaü tídanbei Bíbülia, túmagiñe líburu Agumesehani darí Arufudúni.
Amisuraha wamutün lun gabaroun humani katei le, danme le hagumeserun akutihei uganu le tídanbei líburu súdinitimatu to bürüwaruboun.
a Tidan garüdia to, wayusurubei dimurei lubaragiñe lidaani Hesusu (lb.l.H.), luma lárigiñe lidaani Hesusu (l.l.H.). Ǘnabugiñe lun kada páhina hadarirubei bürüwañu lidan dimurei chátiti kei harihini iñu.