Aban profesía le adurarubei chülǘ lumoun wadaani

DAN le ligibuagu lubéi wübü Oliwu, ñéingiñe lubéi gayara lan larihín Herusalén tuma litenpulun, aba hálügüdüni gádürü apostolugu Hesusu luagu fiú dimurei le lariñagubei. Sun liña ladimurehan tagünrinchawaguba lan ténpulu, ani lubaragiñe lira adimurehaali luagu “lagumuchun ubóu” (Matéu 13:40, 49). Ábati hálügüdüni: “Busentiwa lun bariñaguni woun ídaba lan lasusereda sun le ani kaba lan liseinin bagiribudun ubouagun [o bagumadihan kei urúei marihúaditi] luma lagumuchagüle ubóu?” (Matéu 24:3).

Lidan lóunabagüle, aba lariñaguni Hesusu houn, sun le lunbei lasuseredun lubaragiñe lagünrinchawagun Herusalén. Gama lumoun, dimurei le lariñagubei, lagunfuliruba buga giñe lidan amu dan lidan sun ubóu. Lun hasubudiruni gürigia ídaba lan lagiribuda Hesusu kei Urúei marihúaditi mosu agaradahañu hamá lun harihini seini: saragu sügǘ le lunbei lasuseredun lidan ligiaméme dan ubouagu. Ligíaba arufudei ru laali lan Heowá Hesusu Urúeime lidan Larúeihan ani málühali lan arúeihani le agumucha lau sun wuribani ani lanügüba darangilaü ubouagun. Sügǘ burí le uágubei ladimureha Hesusu ligíaba amakürei lagumuchun ubóu le —lau sun óundaruni lánina polítika, lani relihión luma ligaburi hawinwandun gürigia— luma latatirun aban iseri ubóu.

Ariñagati Hesusu danme lan lagumeserun arúeiha sielu, ñeinbei lan wuribu, ilamaü, hárabaganali luma burí sandi ubouagu. Eferidireina luba lan inebesei lun lúrudu. Hapurichihabei lan giñe lani disipulugu ha inarünitiña uganu buiti luagu Larúeihan Bungiu houn sun néchanigu. Lagumuchuba seini le lau “saragu asufuriruni”, dan le lunbei hírutima lan luéi sun dan (Matéu 24:21).

Ida lubati hasubudiruni kristiánugu yarafaali lan dan wuribati ligía? Ariñagati Hesusu houn: “Furendei huméi hénpulu le tuáguti tídibu igu” (Matéu 24:32). Dan le tagumeserun tídibu igu íchiga ubanaü, subudiwati yarafaali lan irumurugu. Ítarameme, danme le lasuseredun sun le lariñagubei Hesusu lidan ligíameme dan, ábame lasubudirúniwa yarafaali lan lagumuchun ubóu. Gama lumoun ariñagati Hesusu Lúguchirügüñein lan asubudirei weyu luma oura le lunbei lagumeserun saragu asufuriruni. Ligía leweridihanbei: “Aranseñu humá, agagudúañu [...] ladüga ibidiñeti hun ídaame lan lachülüra oura ligía” (Márükosu 13:33).

(Lídangiñeti Matéu kapítulu 24 luma 25, Márükosu kapítulu 13 luma Lúkasi kapítulu 21.)