Paraísu yaali Ubóu

TO TAGUMUHÓUN líburu tidan Bíbülia Arufudúni o Apokalipsis rutu emenigini houn sun gürigia. Apostolu Huan abürüdübarun, anihein saragu arufudúni tidan luáguti le lunbei lasuseredun ámuñegü ani lagumuchuba danme lagunfulirun lisuuni Heowá.

Lidan furumiñeti arufudúni, lárigiñe láguyugun Hesusu, ruti dǘgüdaguaü lun saragu damuriguaü ani ariñagalei hachara houn. Lidan le aban, arufudúati woun ida liña lan lálana larúeihan Bungiu sielu ani añahein lan giñe sífirigu gürigia ñein alawahei.

Dan le layarafadun dan lun lagunfulirun lisuini Bungiu aba leresibirun Mudún (Hesukrístu) aban líburu hóuburagutu lau sedü seyu. Dan le ladaaruni furumiñeti gádürü, aba háfuridun gádürü agalufehatiña. Hesusu furumiñetibei, Urúeihali ani wariñu liña luagu aban gabayu haruti. Ha híbiri, wariñu haña hawagu ámuñegueina koloru gabayu, sínbolu burí lani wuribu, ilamaü luma burí sandi le abuinchubalin ubóu le, le yarafaalibei lun lagumuchun. Dan le ladaarún lisedün seyu aba laganbún tínwirun sedü fidu, sínbolu lani lasubudiragüdüniwa lasiadihan Bungiu. Barüti le lidounya sedü íñanaü o ligaburi larufuduni Bungiu ligañi.

Larihini Huan lágurahoun aban irahü, aban sínbolu lánina lagumeserun Larúeihan Bungiu sielu. Aba latatirun aban wuribu aba lachagarún Satanási hama máfianu múarugun. Aba laganbún lariñagun aban umalali héreti: “Fugiabugu ha aganóubaña ubouagu”. Ladüga subudi lani Mafia murusunrügaali lan lidaani, wéiriti ligañi (Arufudúni 12:12).

Ábaya larihini Huan Hesusu sielu kei aban mudún, ani añahein 144.000 gürigia luma ha anúadiruaña lun “harúeihan úara luma”. Tidan líburu Arufudúni wasubudirei hagía lan libiaman fánreinti hádangiñe tadügawagun würi (Arufudúni 14:1; 20:6).

Aba hóundaragun sun urúeigu ha ubouagubaña lubá Arümahedón, o “wuribu le lánina óunwenbu luéyuri Bungiu le Suntigabafu”, aba hagagibudagun luma Hesusu, le agalufehabalin gabayu le harubei luma hama lisudaranigu ha siélubaña. Gumuguagüdawati sun arúeihani ábati ladaürǘn Satanási. Aba larúeihani Hesusu hama 144.000 Ubóu luagu milu irumu, lárigiñe, gumuguagüdawati Satanási (Arufudúni 16:14; 20:4).

Kaba ladüga Larúeihan Kristu le lánina Milu irumu hawagu gürigia ha gaganbaditiña? Abürühati Huan: “Laragahabei [Heowá] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (Arufudúni 21:4). Ítara liña, paraísu yaali Ubóu!

Ítara liña tagumuchuni líburu Arufudúni tuganute Bíbülia: layusurubei Heowá Larúeihan lun larumadahani liri luma lun lasubudiragüdüni ligíarügüñein lan garicha lun larúeihan lun súnwandan.

(Tídangiñeti líburu Arufudúni.)