Michigalá anufudei bun
1. Ka un megei ban ganigi, ani ka uagu?
1 Féridihadibu san chansi lun bapurichihan leskuelarugu ladüga banufude hadügün bula bau? Inarüni mégeiwa lan ganigi lun ladügün lira, dántima maní ban. Ariha waméi kaba lan íderaguabu.
2. Ida luba barufudun lichú aau dan le bapurichihan leskuelarugu?
2 Arufudabá lichú aau. Íbini gayara lan banügünu leskuela kei fulasu lun bapurichihan, haritaguabei mama lan mosu badimurehan tuagu Bíbülia houn sun gürigia, kamá hamuga bapurichihaña muna tuagun muna. Arufudabá lichú aau lun desidírüba ídaba lan bapurichiha (Apur. 3:1, 7). Gayarati líchugun somu dasi o leksióun chansi bun lun badimurehan luagu bafiñen. O gayarati lálügüdünibu somu bupaaná ka lan uagu madan lubadibu somu fedu. Añahein kristiánugu ariñaga hamuti houn hamáisturugu luagu gefentiña lan luagu Heowá hagía, dan le lagumeserun irumu lánina külase, ru hagía agumeiraguagüdüni houn to afuranguagüdübalin hafiñen. Añahein ígiratiña agumeiraguagüdüni luagu hadabulan lun harihinu hapaanágu lun hadügün álügüdahani houn.
3. Ida luba baranserun lubá bapurichihan leskuelarugu?
3 Aransebá. Ánhabu aransera, chóurutimabei basandiragun bungua (1 Fe. 3:15). Ligíati saminabá luagu álügüdahani le gayarabei ladügǘn bun, luma ida luba lan bóunabuni (Ari. 15:28). Anhein gayara, barüba aban Bíbülia búmagua, líburu kéiburi Los jóvenes preguntan o Razonamiento, tuma somu agumeiraguagüdüni to adimurehatu luagu katei burí le ladügübei Bungiu, lun bayusurunu danme le mégeiwa lan. Amuriahabá giñe hama bagübürigu lun hasayahan buma lidan áhuduraguni hadan familia.
4. Ka uagu buidu lubéi lun basigirun apurichiha leskuelarugu?
4 Arihabei katei lau lubuidun igaburi. Masaminarabá luagu hadügüba lan bupaanágu bula bau súnwandan danme bapurichihan luagu inarüni. Gayarati taweiridun hanigi danme harihini fiú hádangiñe ganigi ban, ábame hetenirun lun le bariñagubei. Ani íbini hamuga ua lan adügüti gasu bau, mábürühala barüna. Lagundaaruba Heowá ladüga houchabáni (Ebü. 13:15, 16). Sigiba amuriaha luma lun líderagunibu lun basigirun adimureha “manufudeuga” (Adü. 4:29; 2 Tim. 1:7, 8). Saminabá giñe luagu ugundani le lunbei basandiruni danme le laganbunibu somu gürigia. Ibidiñewati anhein lachülürüba lubéi dan lun lubúein lan Heowá gürigia ligía.