Mítaran wamá kei le agayuahabei garabalirugu
1. Ida luba lahuudun dimurei le lídanbei 1 Korintuna 9:26 lidan apurichihani?
1 Abürühati apostolu Pábulu: “Néibaaguña lidan ibagari le, ruñunéi narihin luagun ubuiduni le lunbei líchuguni Bungiu nun [...] mítarantina keisi ageindaguti le agayuahabei garabalirugu” (1 Ko. 9:26). Le labusenrubei Pábulu lariñagun lau dimurei le, desidírü haali lan meha lun buídutima lan leseriwidun lun Heowá. Gama lumoun, gayarati giñe wayusuruni adundehani le lidan wapurichiha, ladüga busentiwa lun buídutima lan ‘wagayuaha’ o wáfaagun. Ida luba wadügüni?
2. Ida luba gayara lan wáyeihani Pábulu hama amu íbirigu ha meha lídanbaña furumiñeti sígulu dan le desidírü wamani oura luma fulasu lun wapurichiha?
2 Apurichiha wamá lidan fulasu le ñein habéi gürigia. Lidan furumiñeti sígulu, Pábulu hama amu íbirigu apurichihatiña meha lidan fulasu le subudi hamuti hadariruba lan gürigia ñein (Adü. 5:42; 16:13; 17:17). Anhein añahein habéi hibe-agei gürigia ha unbaña wapurichiha hábiñe guñoun, háfuga anihán chansi le buídubeitimabei lun wapurichihan muna tuagu muna. Gibetiña san gürigia binaafin o rábounweyu le ñein lubéi tamuñeira busu o íngiini dan le hidin gürigia lidoun hawadigimaridun o dan le hagiribudun hábiñoun? Ka oura buin liña lan bísinisi hau gürigia lidan fulasu le ñein lubéi hapurichiha? Gayarati buídutimabei lan apurichihani ǘmadarugu lidan oura ligía.
3. Ka lunbei wadügüni lun wetenirun lun ligaburi wapurichihan lidan fulasu le ñein lubéi waganawa?
3 Yusu wamá lichú aau danme le wapurichihan. Lunti giñe wetenirun lun ligaburi wapurichihan lidan fulasu le ñein lubéi weredera. Aban hénpulu, dan le houdin saragu íbirigu lidan aban fulasu, mégeiwati saragu dan luma áfaaguni lun hakipurúniwa lidan aban luma lun beresegu hamá lidan apurichihani. Ma buitimaabei lun hafanreinraguniwa? Ítarati dan le mibe hamá íbirigu ñüdün tidan karü dan le houdin apurichiha lidan aban aüdü, furesetimabei hagumuchuni ani háfuga ñeinbei saragu chansi lun hadimureha hama gürigia. Ligíati, gayarati san wamuriaha aban fulasu yarafa tun waba lun wapurichihan? Ítarati, chülügiñebadiwa lidoun fulasu ligía.
4. Kaba san íderaguawa lun ‘gadiahadi wamá gürigia’?
4 Ariñagati meha Hesusu hawagu lánigu disipulugu ‘adiaha hamá gürigia’ (Mar. 1:17). Aban óuchahati buiti uáti gufuruma lan lunrügü lágurunu lisenin dúnarugu, lubaragiñe lira adüga lumuti sun liyaarati lun ladiginiña úduraü, áluaha lumuti oura luma fulasu létima buídubei lun ladariruniña ani gumeseti óuchaha lau loufudagun. Teniti lun ligaburi lóuchahan. Arufuda waméi ligíameme igaburi lidan wani ministeriu (Ebü. 6:11).