Duari wamá lidan wani ministeriu
1. Ka uagu lunti lubéi aranseñu wamá lidan wani ministeriu?
1 Uguñe weyu, hapurichihaña lubúeingu Bungiu “haganagua gürigia wuribatiña ani salufuritiña”; ítara haña ‘kei mudún haganagua animaalu gáñitiña’ (Mat. 10:16; Fili. 2:15). Lidan sun fulasu adügatiña lílana ageiraü chagaguaü, añahein gürigia wuribatiña áfaraha, íweruhaña gürigia lun hamuriahan seinsu haweigiñe o lun háfaruniña, sun le arufudati ‘haribaduñatima” lan gürigia (2 Tim. 3:13). Ka adundehani tídangiñeti Bíbülia lunbei líderaguniwa lun “aranseñu” wamá lidan wani ministeriu? (Mat. 10:16.)
2. Ka burí sügǘ ídanbei lunti lan wáfuridun lídangiñe fulasu le ñein lubéi wapurichiha lun woudin apurichiha lidan amu fulasu?
2 Óusera wamá lau lichú aau. Lidan Ariñawagúni 22:3 ariñawagúati buidu lan hachügü ha egeyedubaña luéi denchaü. Ligía lunti lubéi agagudúañu wamá súnwandan. Íbini lidan aban fulasu le darangilougati ñein gayarati lasansiragun katei lidan murusun oura. Gayarati sódini lan hachülürün súdara ani aba habuinchagun gürigia ǘmadarugu. O háfuga lariñagun somu hádangiñe besinagu woun lun woudin. Lubaragiñe werederun aríagua, buítimati woudin ñéingiñe lau lóufudagun lun wasigirun apurichiha lidan amu fulasu (Ari. 17:14; Huan 8:59; 1 Tesa. 4:11).
3. Ida luba wagunfuliruni adundehani le lídanbei Apurichihati 4:9 lidan wani ministeriu?
3 Midin wamá wábuguarügü. Ariñagati Apurichihati 4:9: “Buítimatiña biama luéi aban”. Háfuga chóuruñahati wasandiragun woungua apurichiha wábugua lidan fulasu le ñein lubéi wapurichiha, gama lumoun, chourumémegili san? Háfuga aniheingua ichouruni lidan somu fulasu, gama lumoun lidan amu fulasu háfuga machourunhali táfuridun aban íbiri o aban nibureinti apurichiha muna tuagu muna hábugua, gúñountima. Sun le susereelibei arufudati buídutima lan ñein lan aban paaná wama le sumaditi (Apur. 4:10, 12). Mosu wóunigiragun woungua dan le wáfuridun apurichiha ani mosu wéchudun awisaha houn wánigu paaná dan le wéibuga lan.
4. Ka lunbei wadügüni sun wagía lun ñein lan ichouruni danme le wáfuridun apurichiha?
4 Wéiyaaña lidan afiñeni ha ‘óunigirubarun wawani’, hagía lúnbaña híchugun adundehani le huuti woun según fulasu le ñein lubéi wapurichiha (Ebü. 13:17). Ánhawa arufuda ǘnabuguni ani gídehadi wagía, labinirubei Heowá wáfaagun (Mik. 6:8; 1 Ko. 10:12). Agurabatiwa lun hasigirun sun lubúeingu Bungiu apurichiha lidan sun fulasu, gama lumoun lunti hadügüni lau duari.